Kwɛmɔ Akɛ Obaakai Otii Lɛ Lo

Ani bei komɛi lɛ, kɛ́ okase nii lɛ, ohiɛ kpaa nɔ? Efeɔ wɔ fɛɛ. Mɛni baanyɛ awa bo ni okai nibii ni okase lɛ? Nɔ kome ni baanyɛ awa bo ji, kɛ́ okase nii ogbe naa nɔŋŋ lɛ, kwɛmɔ akɛ obaakai emli otii lɛ lo.

Kɛ́ okase nii lɛ kɛshɛ he ko lɛ, mɛɛ fioo ni okwɛ akɛ obaana oti ni yɔɔ nɔ ni okase lɛ mli lo dani otsa nɔ. Yɛ wolo ko ni bɔfo Paulo ŋma lɛ mli lɛ, ewo enyɛmimɛi Kristofoi lɛ hewalɛ ni amɛfee nɔ ko nakai. Ewie yɛ wolo lɛ fã ko akɛ: “Agbɛnɛ, nii ni wɔwieɔ lɛ mli sane oti nɛ.” (Heb. 8:1) Nɔ ni ewie nɛɛ ye ebua mɛi ni kaneɔ ewolo lɛ ni amɛna nɔ tuuntu ni etaoɔ etsɔɔ amɛ lɛ kɛ bɔ ni nibii krokomɛi ni ewie yɛ wolo lɛ mli lɛ kɔɔ nakai oti lɛ he ehãa.

Kɛ́ okase nii lɛ ogbe naa lɛ, obaanyɛ ohe minitii nyɔŋma loo nɔ ni okɛkwɛ akɛ obaanyɛ okai otii ni yɔɔ nɔ ni okase lɛ mli lo. Kɛ́ ona akɛ onyɛɛɛ okai lɛ, kwɛmɔ saneyitsei bibii lɛ loo kanemɔ sane ni jeɔ kuku fɛɛ kuku shishi lɛ ni okwɛ akɛ ebaawa bo ni okai lo. Kɛ́ okase nɔ ko hee lɛ, kwɛmɔ akɛ obaanyɛ ogbala mli yɛ bɔ ni onu shishi ohã lɛ naa lo. Kɛ́ obɔ mɔdɛŋ akɛ obaakai otii ni yɔɔ nɔ ni okase lɛ mli lɛ, no baahã eka ojwɛŋmɔ mli, ni ebaaye ebua bo ni onyɛ okɛtsu nii yɛ oshihilɛ mli.