Sanebimɔi Ni Jɛ Kanelɔi Adɛŋ

◼ Kpojiemɔ 20:5 kɛɔ akɛ “shi gbohii ni eshwɛ lɛ ahiɛ nako atsɛ̃ kɛyashi beyinɔ ni aaagbe afii akpe lɛ naa.” Ani enɛ baaba dani naagbee kaa lɛ baaba aloo yɛ no sɛɛ?

Eka shi faŋŋ akɛ nɛkɛ be nɛɛ kɔɔ be mli ni adesai shɛɔ emuuyeli he yɛ Afii Akpe lɛ naagbee, dani aŋmɛɔ Satan he kɛjɛɔ bu kwɔŋkwɔŋ lɛ mli ni ekɛ naagbee kaa lɛ baa adesai anɔ lɛ he.

Saji ni yɔɔ Kpojiemɔ 20:5 lɛ kɔɔ Kristofoi ni afɔ amɛ mu ni Nyɔŋmɔ teeɔ amɛ shi kɛjɛɔ gbohii ateŋ koni amɛkɛ Kristo afee hefatalɔi niyelɔi lɛ ahe. (Romabii 8:17) Mɛnɛɛmɛi ‘baaba wala mli ni amɛkɛ Kristo baaye maŋtsɛ afii akpe.’ (Kpojiemɔ 20:⁠4) Yɛ be mli ni etsɔɔ mli nɛkɛ, ni dani eeeya nɔ ewie nɛkɛ nɔyelɔi nɛɛ ahe lolo lɛ, Kpojiemɔ 20:5 kɛ sane ko ni kɔɔ mɛi ni baahi shikpɔŋ nɔ lɛ ahe lɛ fo mli, akɛ: “Shi gbohii ni eshwɛ lɛ ahiɛ nako atsɛ̃ kɛyashi beyinɔ ni aaagbe afii akpe lɛ naa.” Mɛi fɛɛ ni gboi diɛŋtsɛ ni abaatee amɛ shi kɛba shikpɔŋ nɔ yɛ Afii Akpe lɛ mli lɛ baaka he afee mɛi ni yeee emuu. Agbɛnɛ hu afeŋ mɛi ni baaje ta lɛ mli lɛ akɛ mɛi ni eye emuu ni esha ko bɛ amɛhe amrɔ nɔŋŋ. Yɛ be mli ni mɛi ni yɔɔ wala mli yɛ shikpɔŋ nɔ lɛ yaa nɔ amɛyeɔ Nyɔŋmɔ anɔkwale yɛ Afii Akpe lɛ mli lɛ, amɛbaaya nɔ amɛshwere kɛshɛ emuuyeli he fiofio. No hewɔ lɛ, yɛ bei abɔ ni mɛi ni yɔɔ kui enyɔ nɛɛ mli lɛ yeko amɛhe kɛjɛko esha ni amɛná kɛjɛ fɔmɔ mli lɛ he lɛ, amɛbaatamɔ “mɛi ni egboi” (ni amɛhiɛ nako atsɛ̃ diɛŋtsɛ) yɛ Nyɔŋmɔ hiɛ.​—Luka 9:​60; Efesobii 2:⁠1.

Kɛji akɛ atee mɔ ko shi jio, eje “amanehulu kpeteŋkpele” lɛ mli jio, aloo afɔ lɛ yɛ Afii Akpe lɛ mli jio, hegbɛ kpakpa ko kã amɛ fɛɛ amɛhiɛ. (Kpojiemɔ 7:14) . Kɛ amɛye Nyɔŋmɔ anɔkwale, ni amɛkpɛlɛ Kristo kpɔmɔ nɔ lɛ mli sɛɛnamɔi anɔ lɛ, amɛnaŋ nɔ̃ yɛ esha kɛ emuu ni ayeee shishi dɔŋŋ; ni gbele yeŋ amɛnɔ maŋtsɛ dɔŋŋ yɛ be mli ni afii akpe lɛ aaaba naagbee lɛ. (Romabii 5:14) Nɔ ni tamɔɔɔ enɛ lɛ, amɛbaashɛ adesa emuuyeli mli, amɛbaaba shihilɛ ni Adam kɛ Hawa yɔɔ mli dani amɛfee esha lɛ mli.

No hewɔ lɛ beni Afii Akpe lɛ aaaba naagbee lɛ no mli lɛ, gbɔmɛi ni yɔɔ shikpɔŋ nɔ, “gbohii ni eshwɛ lɛ,” ‘ebote adesa wala ni yeɔ emuu mli.’ Yesu baanyɛ ekɛ adesai ni eye emuu aweku ko aha e-Tsɛ yɛ omanyeyeli mli. (1 Korintobii 15:​28; Kpojiemɔ 20:14) Taakɛ Kpojiemɔ 20:​7-10 yaa nɔ etsɔɔ mli lɛ, abaaŋmɛɛ Satan he kɛha adesai anaagbee kaa. Mɛi ni baaye Yehowa anɔkwale yɛ nakai kaa lɛ shishi lɛ baafee mɛi ni sa akɛ amɛnaa naanɔ wala akɛ adesai yɛ Paradeiso.