“Maŋtsɛyeli Nɔyaa” Kpokpaa Wuji Anɔ Kpeei

YEHOWA NYƆŊMƆ ejɔɔ jeŋ muu fɛɛ Maŋtsɛyeli shiɛmɔ nitsumɔ lɛ nɔ lɛlɛŋ. Kwɛ bɔ ni enɛ jeɔ kpo yɛ 1984 Yearbook of Jehovah’s Witnesses lɛ mli akɔntaabuu ni yɔɔ miishɛɛ lɛ mli! Ni kwɛ bɔ ni 1984 kpokpaa wuji anɔ kpeei lɛ yitso lɛ sa ha​—“Maŋtsɛyeli Nɔyaa”!

Wɔná nɔyaa ni ji oha mlijaa 6.8 yɛ sanekpakpa lɛ he shiɛlɔi amli, kɛ aja mli. Wɔná nɔyaa hu yɛ ŋmlɛtswaai abɔ ni akɛwo shiɛmɔ nitsumɔ lɛ mli lɛ mli, kɛ sɛɛsaramɔi abɔ ni afee kɛ shia Biblia mli nikasemɔi afeemɔ mli kɛ aja mli, ni nɔ ni tee hiɛ hu ji gbɛgbalɔi awalɔi kɛ daa gbɛgbalɔi. Kaimɔ lɛ yibɔ lɛ tee hiɛ kɛyashɛ 6,767,707. Enɛ feɔ oha mlijaa 8.2 nɔyaa fe nyɛsɛɛ afi lɛ nɔ! Yɛ anɔkwale mli lɛ, Yehowa webii anitsumɔ lɛ etee hiɛ yɛ nɔ fɛɛ nɔ mli, ni enɛ haa wɔkaiɔ gbalɛ wiemɔi ni kɔɔ Yehowa Maŋtsɛ lɛ he lɛ: “Elumɔyeli lɛ shweremɔ kɛ hejɔlɛ lɛ sɛɛ efoŋ.”​—Yesaia 9:⁠6.

Mɛɛ sɔrɔtofeemɔ enɛ ji yɛ nɔ ni yaa nɔ yɛ Kristendom sɔlemɔi lɛ amli Iɛ he! Jeee akɛ mɛi ni yaa sɔlemɔ lɛ ayibɔ nɔ miigbɔ kɛkɛ shi mumɔŋ niyenii ni haa wala lɛ eko kwraa bɛ, ni akɛ jeŋbai ni Nyɔŋmɔ gbeyeishemɔ yɔɔ mli hu tsuuu nii kwraa.

Shi ani esa akɛ wɔ ni ji Yehowa Odasefoi lɛ ajɔɔ wɔhe yɛ mɔdɛŋ ni wɔbɔ lɛ hewɔ ni wɔhi ogbɔjɔ shihilɛ mli? Ekaba lɛ nakai kɔkɔɔkɔ! Shi moŋ wɔtswa wɔfai shi akɛ wɔbaafee bɔ fɛɛ bɔ ni wɔɔnyɛ ni wɔha Maŋtsɛyeli lɛ he nibii lɛ afa. Yɛ enɛ hewɔ lɛ, aato mumɔŋ niyenii ni baatswa wɔ ama shi waa lɛ he gbɛjianɔ yɛ wɔ kpokpaa wuji anɔ kpeei ni baa nɛɛ ashishi. Wiemɔi ahe gbɛjianɔtoo kpakpa nɛɛ baaje shishi Soo shwane ni ebaaya nɔ aahu kɛyashi Hɔgbaa shwane. Ha be ni abaafee kpeei lɛ kɛ maji lɛ ahi ojwɛŋmɔ mli koni oto gbɛjianɔ bianɛ ni oya kɛjɛ shishijee kɛyashi naagbee.