1985 KPOKPAA WUJI ANƆ KPEEI

YEHOWA ODASEFOI haa amɛhemɔkɛyelii kɛ amɛnitsumɔi amli saji batsɔmɔɔ saneyitsei kɛhaa amɛ daa afi kpokpaa wuji anɔ kpeei lɛ. Enɛɛmɛi ekomɛi ji “Kunimyeli Hemɔkɛyeli,” “Nitsulɔi ni Yɔɔ Miishɛɛ,” “Ŋwɛi Suɔmɔ,” “Maŋtsɛyeli Anɔkwayeli,” kɛ “Maŋtsɛyeli Ekomefeemɔ.” Saneyitso ni ahala aha amɛ 1985 kpokpaa wulu nɔ kpee lɛ kɔɔ amɛnitsumɔi abe, ni no ji “Emuuyeli Mli Hiɛlɔi” a-Kpee.

Kwɛ bɔ ni emuuyeli he hiaa ha! Bɔ ni ehe hiaa ha hewɔ lɛ Yehowa kpɛlɛ Satan mpoatswaa, ni kɔɔ enɛ he lɛ nɔ, ejaakɛ Yehowa le jogbaŋŋ akɛ bɔɔnii ni ji adesai ni yɔɔ shikpɔŋ nɔ lɛ ateŋ mɛi komɛi baahiɛ amɛ emuuyeli mli, ni amɛha ana Yehowa Nyɔŋmɔ akɛ anɔkwafo kɛ Abonsam akɛ amalelɔ ni eba shi kwraa.

Emuuyeli mli hiɛmɔ bɛ mlɛo kwraa. Ejeee gbɛ ni yɔɔ mlɛo lɛ nɔ nyiɛmɔ aloo nɔ ni hegbɛ kɛbaa akɛ afee ni afeɔ. Akɛni Satan le nɔ ni yɔɔ enɛ mli hewɔ lɛ efeɔ nɔ fɛɛ nɔ ni eeenyɛ koni eha Nyɔŋmɔ tsuji aŋmɛɛ emuuyeli mli ni amɛhiɛ lɛ he. Ni jeee akɛ wɔyɛ Satan kɛ edaimonioi lɛ akɛ mɛi ni miite shi kɛmiiwo wɔ koni amɛfite emuuyeli mli ni wɔhiɛ lɛ kɛkɛ, shi wɔyɛ yiwalɛ je lɛ ni kɛ kaai kɛ nɔnyɛɛi sɔrɔtoi fɛɛ baa wɔnɔ lɛ hu. Agbɛnɛ wɔyɛ wɔgbɔjɔmɔi lɛ ni esa akɛ wɔtsi naa.

Yelikɛbuamɔ ni wɔbaana lɛ fɛɛ he miihia wɔ koni wɔnyɛ wɔhiɛ wɔ emuuyeli mli yɛ nɛkɛ henyɛlɔi etɛ nɛɛ ashishi. Ato “Emuuyeli Mli Hiɛlɔi” Akpee lɛ he gbɛjianɔ koni eye ebua mɛi fɛɛ ni ebi ni amɛhiɛ amɛ emuuyeli mli amɛha Yehowa Nyɔŋmɔ lɛ ni amɛha ana Abonsam akɛ amalelɔ. Taakɛ afɔɔ feemɔ yɛ afii ni eho lɛ amli lɛ, kpee lɛ baaje shishi Soo shwane yɛ maji pii anɔ ni ebaahe gbii ejwɛ. Too gbɛjianɔ bianɛ koni oya gbii ejwɛ lɛ fɛɛ, ba kpee lɛ shishi akɛ mɔ ni esaa ehe koni ona wiemɔi lɛ kɛ emli nɔ fɛɛ nɔ he sɛɛ.