Obalaŋtai Ni Sɔmɔɔ Nyɔŋmɔ
ANl osusuɔ obalaŋtai kpakpai ni kɛ amɛ diɛŋtsɛ amɛbe haa kwraa, ni amɛheee nyɔmɔwoo, ni amɛbaa oshinaa naa ni amɛkɛ bo abawie Nyɔŋmɔ he lɛ akɛ nɔ ko ni afɔɔɔ feemɔ? Ani efeɔ bo naakpɛɛ akɛ bii faataa amɛfɔlɔi ahe kɛwieɔ Biblia shiwoi ni yɔɔ naakpɛɛ ni kɔɔ wɔsɛɛ be ni yɔɔ miishɛɛ lɛ he, yɛ nɛkɛ yinɔ ni aheee nɔ ko ayeee nɛɛ mli lɛ?a
Anaa obalaŋtai babaoo yɛ Yehowa Odasefoi asafoi 60,000 kɛ nɔ ni fa fe nakai ni yɔɔ jeŋ muu fɛɛ lɛ babaoo mli. Amɛyaaa daa otsi Hɔgbaa skul aloo jamɔ he nikasemɔ klas ko hu. Shi moŋ, nɛkɛ obalaŋtai nɛɛ naa asafoŋ kpeei lɛ ahe sɛɛ ni amɛkɛ amɛhe woɔ mli po. Amɛteŋ gbekɛbii kwraa lɛ po haa saji ni waaa lɛ ahetoo. Mɛi ni yeko afii nyɔŋma-kɛ-etɛ lɛ po kɛ amɛhe woɔ Teokrase Sɔɔmɔ Skul lɛ mli. Mɛi ni eye afii nyɔŋma-kɛ-etɛ kɛmiimɔ nyɔŋmai enyɔ lɛ kɛ amɛ skul gbɛhamɔ be lɛ tsuɔ nii ni amɛkɛyeɔ amɛbuaa amɛnanemɛi koni amɛbakase Nyɔŋmɔ kɛ enaakpɛɛ shiwoi kɛha wɔsɛɛ lɛ he nii.
Yɛ anɔkwale mli lɛ, nɛkɛ obalaŋtai anitsumɔ nɛɛ jeee nɔ hee ko. Biblia lɛ wieɔ obalahii kɛ obalayei anɔkwafoi, kɛ obalaŋtai kɛ gbekɛbii, ni fee nɔkwɛmɔ nii kpakpai yɛ Nyɔŋmɔ sɔɔmɔ mli lɛ ahe.
Biblia mli wolo ni ji Lala lɛ gba “obalahii asafo” ko, ni haa mɔ hejɔlɛ ni amɛyi fa tamɔ “bɔ” yɛ Nyɔŋmɔ sɔɔmɔ mli lɛ he sane efɔ shi. Ewie “obalahii kɛ obalayei” ahe hu akɛ amɛmiijie Nyɔŋmɔ yi. (Lala 110:3; 148: 12, 13) Ekolɛ, obalaŋtai komɛi fata mɛi ni yɔɔ jɛmɛ yɛ be mli ni afɔse Nyɔŋmɔ mumɔ krɔŋkrɔŋ lɛ ashwie heyelilɔi lɛ anɔ yɛ Pentekoste yɛ afi 33 Ŋ.B. lɛ ahe. Mɛi aaafee 3,000 he Wiemɔ lɛ atuu ni abaptisi amɛ. Bɔfo Petro kɛɛ akɛ nɛkɛ nifeemɔ ni yɔɔ naakpɛɛ nɛɛ ji Yoel gbalɛ lɛ mlibaa: “Ni nyɛbibii kɛ nyɛbiyei lɛ aaagba, ni nyɛbalahii lɛ aaana ninaa, ni nyɛnukpai lɛ aaala lamɔi.”—Bɔfoi lɛ Asaji 2:4-8, 16, 17, 41.
Mɛi ni fata Biblia mli nɔkwɛmɔ nii krokomɛi ni tsɔɔ mɛi ni sɔmɔ Yehowa Nyɔŋmɔ yɛ amɛbalaŋtaiaŋ lɛ ahe hu ji Samuel, Maŋtsɛ David ni ji jalɔ lɛ, Biblia mli gbalɔi ni ale amɛ jogbaŋŋ ni ji Yeremia kɛ Daniel, kɛ agbɛnɛ anɔkwafo Timoteo. Nɛkɛ wolo tɛtrɛɛ nɛɛ hiɛ saji etɛ ko ni kɔɔ nɛkɛ Biblia mli nɔkwɛmɔ nii nɛɛ ekomɛi ahe. Obaana nɔ hewɔ ni obalaŋtai, kɛ mɛi ni edara hu lɛ ahiɛ dɔɔ waa yɛ Nyɔŋmɔ sɔɔmɔ he kɛ nɔ hewɔ ni amɛkɛ be babaoo tsuɔ nii koni amɛye amɛbua amɛnanemɛi ni amɛ hu amɛfee nakai lɛ yɛ saji nɛɛ amli.
[Shishigbɛ niŋmai]
a Gallup niiamlitaomɔ ko ni afee yɛ 1985 lɛ tsɔɔ akɛ Amerikabii ni afɔ kɛjɛ 1946 lɛ amli oha mlijaa 12 pɛ kɛɔ akɛ amɛyɛ “hemɔkɛyeli kpele” yɛ be mli ni amɛye afii 16.