Wala Yɛ Gbele Sɛɛ​—Sanebimɔi Ni Ahako Hetoo Lɛ

“KƐJI gbɔmɔ gbo lɛ, ani ehiɛ aaaka ekoŋŋ?” (Hiob 14:14) Gbɔmɛi adesai ni yɔɔ hei sɔrɔtoi fɛɛ kɛ afii babaoo etee nɔ amɛbi nɛkɛ sane nɛɛ ni blematsɛ Hiob bi afii ohai abɔ ni eho nɛ lɛ, ni hetooi ni akɛhaa lɛ asɛɛ efooo.

Blema Helabii lɛ kɛɔ akɛ mɛi ni egboi lɛ asusumai yaa nɔ amɛhiɔ shi lolo. Akɛ amɛ taa lɛlɛ mli kɛfoɔ Styx faa lɛ kɛyaa shikpɔŋ shishi nɔyeli he ko ni mli lɛɛ ni atsɛɔ jɛmɛ gbohii ajeŋ. Jɛmɛ ji he ni kojolɔi buɔ susumai lɛ fɔ yɛ ni amɛyaa piŋmɔ mli yɛ tsuŋwoo he ko ni afo he kɛ gbogboi ni nɔ kwɔlɔ amli aloo amɛbuɔ amɛ bem kɛyaa jɔɔmɔ mli yɛ Elysia shikpɔŋ lɛ nɔ. Blemabii lɛ ekomɛi hu susuɔ akɛ susumai lɛ tsɔmɔɔ ŋulamii aloo la kushai ni miibɔle shi. Ni kɛfata he hu lɛ, mɛi krokomɛi hu kɛɔ akɛ susumai lɛ kpɛɔ haŋŋ ni agbalaa amɛ kɛyaa nyɔŋtsere lɛ nɔ; daa nyɔŋ nɔ kɛ nyɔŋtsere lɛ ye emuu lɛ, atsakeɔ amɛ ni akɛ amɛ yaa hulu lɛ mli.

Ŋmɛnɛ, jeŋ nilee mli shishitsɔɔmɔi babaoo yɛ ni kɔɔ shihilɛ yɛ gbele sɛɛ lɛ he. Hindubii kɛ Budhabii heɔ yeɔ akɛ asaa afɔɔ mɛi ni egboi lɛ ekoŋŋ. Moslembii tsɔɔ akɛ susuma lɛ hiɔ shi yɛ gbɔmɔtso lɛ gbele sɛɛ, ni akɛ yɛ naagbee kojomɔ lɛ mli lɛ, amɛbaaya paradeiso aloo hɛl. Atsɔɔ Protestantbii pii akɛ susumai lɛ yaa nɔ amɛhiɔ shi yɛ gbele sɛɛ koni amɛna ŋwɛi jɔɔmɔ mli miishɛɛ aloo piŋmɔ yɛ hɛl lalilɛii lɛ amli. Ni Katolek tsɔɔmɔ hu kɛ Limbo kɛ hetsuumɔ he fataa nibii ni afeɔ he mfoniri nɛɛ he.

Yɛ shikpɔji komɛi anɔ lɛ, hemɔkɛyelii ni ayɔɔ yɛ gbohii lɛ asusumai ni akɛɛ amɛyɔɔ lɛ ahe lɛ ji blema kusumii ni akɛ Kristojamɔ folo efutu mli yɛ naakpɛɛ gbɛ nɔ. Akɛ nɔkwɛmɔ nɔ lɛ, eji kusum ni afɔɔ feemɔ yɛ Katolek kɛ Protestantbii pii ni yɔɔ Afrika Anaigbɛ lɛ ateŋ akɛ kɛ mɔ ko gbo lɛ, ahaa ashwishwɛi ahiɛ koni mɔ ko akayakwɛ mli ni ena mɔ ni egbo lɛ susuma. Kɛji suɔlɔ ko gbo lɛ, no sɛɛ gbii nyɔŋmai ejwɛ sɛɛ lɛ, wekumɛi kɛ nanemɛi ŋmɛɔ okpɔlɔ ni amɛyeɔ nii kɛ miishɛɛ akɛ susuma lɛ ekwɔ kɛtee ŋwɛi. Yɛ no sɛɛ lɛ, wekumɛi lɛ yaa gɔɔ lɛ mli ni amɛkɛ dãa yashwieɔ esãi lɛ nɔ, titri lɛ yɛ Blonya aloo Afi Hee Shishijee mli. Amɛkɛ mɔ ni egbo lɛ wieɔ po, ni amɛbiɔ lɛ ni eye ebua amɛ ni amɛgbaa lɛ weku lɛ mli saji hu.

Eyɛ faŋŋ akɛ, gbeekpamɔ bibioo ko pɛ yɔɔ je lɛŋ jamɔi lɛ ateŋ yɛ nɔ diɛŋtsɛ ni baa yɛ gbele sɛɛ lɛ he. Shi kɛlɛ, shwɛ fioo kulɛ gbeekpamɔ ba amɛ fɛɛ amɛteŋ yɛ shishijee tsɔɔmɔ ni mli wa nɛɛ he: adesa susuma ni gbooo lɛ. Tsɔɔmɔi ni kɔɔ wala yɛ gbele sɛɛ nɛɛ he lɛ ateŋ babaoo ji nɛkɛ shishijee saneyitso nɛɛ nɔŋŋ ni atsake mli fioo ko kɛkɛ.

Shi kɛlɛ, sanebimɔi pii ni baa jwɛŋmɔ mli be fɛɛ be ji akɛ: Nɛgbɛ ji he ni nɛkɛ susumɔ ni ahiɛ akɛ susuma lɛ gbooo lɛ jɛ kɛba? Ani atsɔɔ yɛ Ŋmalɛi lɛ amli? Kɛji nakai lɛ, mɛni hewɔ ni hemɔkɛyelii ni jeee Kristofoi anɔ po lɛ hu tsɔɔ enɛ lɛ? Enɛɛmɛi jeee sanebimɔi ni sa akɛ aku hiɛ ashwie nɔ. Bɔ fɛɛ bɔ ni ojamɔ mli shishinumɔi ji lɛ, gbele ji anɔkwa sane ko ni esa akɛ akpee naa. Enɛ hewɔ lɛ saji lɛ kɔɔ ohe akɛ mɔ aŋkro yɛ gbɛ ni mli wa nɔ. No hewɔ lɛ wɔmiifɔ bo nine ni okɛ jwɛŋmɔ ni mli ka shi akwɛ nɛkɛ saji nɛɛ amli.