Jeŋ Hee Ko Ebɛŋkɛ!

MAŊ ONUKPAI ewie babaoo yɛ jeŋ gbɛjianɔtoo hee ko ni amɛ diɛŋtsɛ amɛfeɔ lɛ he. Amɛwieɔ gbeyeishemɔi kɛ husui ni tsiɔ gbɔmɛi kɛ maji ateŋ gbeekpamɔ gbɛ lɛ ni aaajie kɛaayɛ lɛ he. Shi ani adesai ji mɛi ni kɛ jeŋ hee ko baaba?

Adesai ena afii ohai abɔ ni kulɛ amɛkɛaato jeŋ toiŋjɔlɛ kɛ shweshweeshwe shihilɛ amɛma shi. Ŋwanejee ko bɛ he akɛ amɛteŋ mɛi pii eye anɔkwale diɛŋtsɛ yɛ mɔdɛŋbɔi nɛɛ amli. Shi, yɛ nɔyeli gbɛjianɔtoo ni gbɔmɛi aaana he jwɛŋmɔ akɛ no amɛkɛaatsu yiŋtoi nɛɛ ahe nii lɛ fɛɛ sɛɛ lɛ, Biblia mli wiemɔ lɛ efee anɔkwale: “Adesa ni nyiɛ nɛɛ, bɔ ni eeetsɔ ejaje enaji faamɔi eha lɛ, ebɛ edɛŋ.”​—Yeremia 10:⁠23.

Akɛ Jeŋ Hee He Shiwoo Eha

Kɛlɛ, Nyɔŋmɔ Wiemɔ ni jɛ mumɔŋ lɛ nɔŋŋ kɛ nɔmimaa haa akɛ jeŋ hee ko baaba. Yɛ be mli ni Kristofonyo bɔfo Petro egba nibii agbɛjianɔtoo momo ko hiɛkpatamɔ lɛ efɔ shi lɛ, ejaje akɛ: “Yɛ eshiwoo lɛ naa lɛ, wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.”​—2 Petro 3:​10-13.

Namɔ shiwoo nɛ? Jeee mɔ ko mɔ ko kɛha akɛ Yehowa, “Mɔ ni kwɔ fe fɛɛ yɛ shikpɔŋ lɛ nɔ fɛɛ” lɛ. (Lala 83:19) Ebaatsu nɔ ni gbɔmɛi nyɛŋ atsu lɛ. Hɛɛ, Yehowa Nyɔŋmɔ kɛ jeŋ hee ko baaba. Shi mɛɛ be?

Jeŋ Hee Ko Ebɛŋkɛ Kpaakpa!

Dani Nyɔŋmɔ jeŋ hee ni ewo shi yɛ he lɛ aaaba mli diɛŋtsɛ lɛ, esa akɛ ŋmɛnɛŋmɛnɛ “jeŋ” loo “nibii agbɛjianɔtoo” nɛɛ aba enaagbee. Yesu Kristo kaselɔi lɛ bi yɛ enɛ he akɛ: ‘“Tsɔɔmɔ wɔ beyinɔ ni aaafee nii nɛɛ, ni mɛni ji obaa lɛ kɛ je nɛŋ naagbee lɛ he okadi?” (Mateo 24:​3, King James Version) Taakɛ New World Translation lɛ ni ja jogbaŋŋ lɛ kɛbaa lɛ, Yesu sɛɛnyiɛlɔi lɛ bi akɛ: “Kɛɛmɔ wɔ, Mɛɛ be mli nibii nɛɛ baaba, ni mɛni baafee ba ni oba lɛ kɛ nibii agbɛjianɔtoo lɛ naagbee lɛ he okadi?”

Yɛ hetoo-hamɔ mli lɛ, Yesu gba beni eba ni anaaa lɛ akɛ mumɔŋ gbɔmɔ yɛ ŋwɛi Maŋtsɛyeli hewalɛ mli lɛ he okadi lɛ mli nibii pii efɔ shi. (1 Petro 3:18) Akɛ nɔkwɛmɔ nɔ lɛ, ekɛɛ: “Shi maŋ aaate shi awo maŋ, ni maŋtsɛyeli aaate shi awo maŋtsɛyeli; ni hɔmɔ kɛ tsɛŋemɔ helai kɛ shikpɔŋhosomɔi aaaba hei sɔrɔtoi fɛɛ.” Kɛjɛ “kɔɔmɔi lɛ abɔimɔ” ni je shishi kɛjɛ 1914 kɛbaa nɛɛ, “nɛkɛ yinɔ nɛɛ” ni Yesu kɛ enine tsɔɔ nɛɛ ena tawuu, hɔmɔ kɛ shikpɔŋhosomɔi ni yaa nɔ daa lɛ akɛ ba ni eba ni anaaa lɛ lɛ he okadi lɛ fa.​—Mateo 24:​7, 8, 34.

Tawuu eba yɛ nɛkɛ yinɔ nɛɛ mli yɛ gbɛ ni eko kwraa kɛ lɛ yeee egbɔ nɔ kɛjɛ 1914. Jeŋ Ta l gbe gbɔmɛi aaafee akpekpei 14. Agbe asraafoi kɛ maŋbii akpekpei 55 yɛ Jeŋ Ta Il be lɛ mli. Kɛjɛ 1914 kɛbaa nɛɛ, gbɔmɛi fe akpekpei 100 elaaje amɛwala yɛ tawuu mli! Eka shi faŋŋ akɛ enɛ kadiɔ ba ni Yesu eba lɛ he okadi lɛ fa.

Hɔmɔ, ni Kristo gba fɔ shi lɛ hu kpata shikpɔji pii anɔ bii ahiɛ yɛ jeŋ tai enyɔ lɛ eko fɛɛ eko sɛɛ. Yɛ jeŋ nilee mli nɔyaa lɛ fɛɛ sɛɛ lɛ, hɔmɔ miiye nɔ ni miihe ashɛ je lɛ mlijaa ejwɛ mli ekome ŋmɛnɛ. Kwashiokor gbeɔ gbekɛbii kɛ mɛi krokomɛi akpekpei abɔ daa afi. The World Book Encyclopedia Iɛ kɛɔ akɛ: “Niyenii bibioo ko pɛ maji ni naa nɔyaa kpaako yɛ Afrika, Asia, kɛ Latin Amerika lɛ yɔɔ kɛha amɛwebii. Hɔmɔ miiye akpekpei abɔ ni yɔɔ nɛkɛ maji nɛɛ amli lɛ. Kɛji akɛ niyenii ni anaa loo nɔ ni ashɛɔ lɛ ba shi yɛ yiŋtoo ko hewɔ lɛ, hɔmɔ baa ni gbɔmɛi akpekpei toi akpei abɔ baanyɛ agboi.”

Shikpɔŋhosomɔi hu egbe gbɔmɛi babaoo yɛ yinɔ nɛɛ mli ni enɛ kadiɔ “naagbee be lɛ.” (Daniel 12:⁠4) Gbɔmɛi ni shikpɔŋhosomɔ gbeɔ amɛ lɛ ayifalɛ yɛ sɔrɔto. Shi kɛjɛ 1914 kɛbaa nɛɛ, nii ahiɛ ni shikpɔŋhosomɔ kpataa lɛ etee hiɛ yɛ shikpɔŋ lɛ nɔ he fɛɛ he, ni enɛ egbe gbɔmɛi akpei ohai abɔ. Yɛ be mli ni Yorkshire Post ni ji October 19, 1989 nɔ lɛ wieɔ enɛɛmɛi ateŋ enyɔ pɛ he lɛ, ekɛɛ: “Yɛ 1920 mli lɛ, hosomɔ ko ni ba China Jiangsu niiaŋ lɛ gbe gbɔmɛi 180,000, ni yɛ July 28, 1976 lɛ, China na hosomɔ kpele ni fe fɛɛ yɛ eŋmɛnɛŋmɛnɛ beaŋ yinɔsane mli. Kɛ hoo lɛ, gbɔmɛi 240,000 gboi beni Tangshan maŋtiase ni yɔɔ kooyi-bokagbɛ lɛ fɛɛ shwie shi shwɛtɛɛ kɛtsɔ shikpɔŋhosomɔ ko ni enaawalɛ shɛɔ 7.8 yɛ Richter nseni lɛ nɔ lɛ nɔ.” Adafitswaa wolo lɛ tsi shikpɔŋhosomɔi wuji fe 30 ni eba yɛ wɔ afii ohai 20 nɛɛ mli lɛ ta.

Agba Maŋtsɛyeli-shiɛmɔ nitsumɔ lɛ hu afɔ shi akɛ ba ni Yesu eba ni anaaa lɛ lɛ he okadii lɛ fa. Ekɛɛ ekaselɔi ni biɔ lɛ sane lɛ akɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.” (Mateo 24:14) Taakɛ Yesu gba fɔ shi lɛ, Yehowa Odasefoi fe 4,000,000 miitsu shiɛmɔ nitsumɔ nɛɛ he nii bianɛ yɛ jeŋ fɛɛ yɛ maji 212 nɔ.

Gbalɛ nɛɛ kɛ ekrokomɛi amlibaa yɛ ŋmɛnɛŋmɛnɛ beaŋ lɛ yeɔ odase akɛ wɔyɛ “naagbee gbii” lɛ amli lɛlɛŋ. (2 Timoteo 3:​1-5) Nɔ ni ka wɔhiɛ nɔŋŋ ji “amanehulu kpeteŋkpele lɛ” ni Yesu Kristo gba no hu efɔ shi lɛ. Akɛni no baaba naagbee yɛ “Nyɔŋmɔ Ofe lɛ gbi wulu lɛ nɔ ta” lɛ mli yɛ Harmagedon hewɔ lɛ, ekɛ ŋmɛnɛŋmɛnɛ yiwalɛ nibii agbɛjianɔtoo nɛɛ baaba naagbee. (Mateo 24:​21; Kpojiemɔ 16:​14-16) Kɛkɛ lɛ jeŋ hee ni Nyɔŋmɔ ewo shi yɛ he lɛ baaba mli diɛŋtsɛ.a

Jɔɔmɔi ni Adesai Nyɛŋ Amɛkɛha

Maŋ onukpai shwãa yɛ jeŋ gbɛjianɔtoo hee ni amɛ diɛŋtsɛ amɛkɛbaaba lɛ he. Shi Yehowa, ŋwɛi kɛ shikpɔŋ Nyɔŋmɔ lɛ biko adesai ni amɛkɛ jeŋ hee ko ato ŋmɛnɛŋmɛnɛ gbɛjianɔtoo nɛɛ najiaŋ. Lɛ diɛŋtsɛ ebaafee enɛ yɛ gbi kɛ ŋmlɛtswaa ni lɛ pɛ ele lɛ nɔ. (Mateo 24:​34, 36) Bɔfo Yohane ni egbɔ lɛ tsɔ hiɛ ena nɔ ni Nyɔŋmɔ, shi jeee gbɔmɔ baafee nɛɛ:

“Ni mina ŋwɛi hee kɛ shikpɔŋ hee; ejaakɛ tsutsu ŋwɛi lɛ kɛ tsutsu shikpɔŋ lɛ eho etee, ni ŋshɔ bɛ dɔŋŋ. Ni mi, Yohane, mina maŋ krɔŋkrɔŋ lɛ ni ji Yerusalem Hee lɛ jɛ Nyɔŋmɔ ŋɔɔ yɛ ŋwɛi miikpeleke shi, ni asaa lɛ tamɔ ayemforo ni awula lɛ aha ewu. Ni minu gbee kpeteŋkpele ko jɛ maŋtsɛsɛi lɛ mli kɛɛ: ‘Naa! Nyɔŋmɔ buu lɛ yɛ gbɔmɛi ateŋ, ni eeeshi ebuu lɛ yɛ amɛteŋ, ni amɛaatsɔmɔ emaŋ, ni Nyɔŋmɔ diɛŋtsɛ kɛ amɛ aaahi shi, ni eeetsɔ amɛnyɔŋmɔ. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.’ Ni Mɔ ni ta maŋtsɛsɛi lɛ nɔ lɛ kɛɛ: ‘Naa! Miifee nii fɛɛ ehee.’ Ni ekɛɛ mi akɛ: ‘Ŋmaa, ejaakɛ nɛkɛ wiemɔi nɛɛ, anɔkwa wiemɔi ni ma shi shiŋŋ ni.’”​—Kpojiemɔ 21:​1-5.

“Ŋwɛi hee” lɛ ji Yesu Kristo ŋwɛi Maŋtsɛyeli lɛ. “Shikpɔŋ hee” lɛ jeee shikpɔŋ kutruku kroko, shi moŋ eji gbɔmɛi asafo hee ni yɔɔ shibɔlemɔ ŋulami nɛɛ nɔ​—ni amɛ fɛɛ amɛji Kristo Maŋtsɛyeli lɛ shishibii toibolɔi, ni weku, maŋ loo wiemɔi amligbalamɔ bɛ amɛteŋ. (Okɛto Lala 96:1 he.) Ŋmɛnɛŋmɛnɛ okadi ŋwɛi kɛ shikpɔŋ lɛ​—ni ji Abonsam nibii agbɛjianɔtoo lɛ kɛ enɔyeli gbɛjianɔtoo ni Satan kɛ edaimonioi lɛ naa amɛnɔ hewalɛ lɛ​—baafee nɔ ni akpata hiɛ momo. (1 Yohane 5:19) Eyɛ mli akɛ ŋshɔi diɛŋtsɛ nɛɛ baahi shi moŋ, shi okadi ŋshɔi ni ji adesai yiwalɔi ni nyɛɛɛ afee dioo lɛ baafee nɔ ni amɛho amɛtee. Yesu hefatalɔi ŋwɛi nɔyelɔi lɛ feɔ Yerusalem Hee lɛ, ni amɛkɛ lɛ feɔ maŋtiase gbɛjianɔtoo ni yeɔ adesai jalɔi lɛ anɔ lɛ. Nyɔŋmɔ ‘baashi ebuu’ yɛ adesai toibolɔi lɛ ateŋ kɛtsɔ najiaŋdamɔlɔi anɔ yɛ be mli ni asaa amɛkɛ lɛ teŋ kwraa kɛtsɔɔ Kristo nɔ yɛ afii akpe Kojomɔ Gbi lɛ nɔ lɛ.​—Kpojiemɔ 14:​1-4; 20:⁠6.

Nibii pii baahi shi yɛ Maŋtsɛyeli nɔyeli lɛ mli ni abaanyɛ adamɔ nɔ ana miishɛɛ. Yaafo kɛ bolɔmɔ, kɛ piŋmɔ ni jɛɔ hela, awerɛho, kɛ nibii ni tamɔ nakai mli baa lɛ baafee tsutsu nii ni eho. Gbele po ni ba wɔnɔ kɛtsɔ wɔ klɛŋklɛŋ fɔlɔ, eshafeelɔ Adam nɔ lɛ po bɛ dɔŋŋ. (Romabii 5:12) Mɛɛ nyamɔ baahi shi nɛkɛ, yɛ be mli ni nibii ni kɛ yaafonui baa jeŋ fɛɛ lɛ eho etee kɛmiiya naanɔ lɛ!

Nyɔŋmɔ diɛŋtsɛ maa nɛkɛ jɔɔmɔi nɛɛ anɔ mi akɛ ebaaba mli, shi jeee adesai ni gboiɔ. Lɛ ji Mɔ ni kɛɔ akɛ Kpo 21:5: “Naa! Miifee nii fɛɛ ehee.” Hɛɛ, ni Yehowa Nyɔŋmɔ kɛɛ bɔfo Yohane akɛ: “Ŋmaa, ejaakɛ nɛkɛ wiemɔi nɛɛ, anɔkwa wiemɔi ni ma shi shiŋŋ ni.”

Nine Baashɛ Hiamɔ Nii Titrii lɛ Anɔ

Shikpɔŋ lɛ baatsɔ paradeiso yɛ naagbee, yɛ jeŋ hee ni Nyɔŋmɔ feɔ lɛ mli. Anɔkwale ni, ejaakɛ Yesu wo efɔŋfeelɔ heshibalɔ ko ni asɛŋ lɛ yɛ emasɛi lɛ shi akɛ: “Lɛlɛŋ miikɛɛ bo ŋmɛnɛ, Obaafata mihe yɛ Paradeiso.” (Luka 23:​43, NW) Paradeiso shihilɛi ashishi nine baashɛ adesai ahiamɔ nii tamɔ niyenii kɛ wɔɔhe nɔ yɛ kɛmɔ shi.

Hɔmɔ miigbe gbɔmɛi akpekpei abɔ ŋmɛnɛ. Shi bɔ fɛɛ bɔ ni mɔdɛŋ ni abɔɔ koni alɛ mɛi ni hɔmɔ yeɔ amɛ lɛ sa yijiemɔ ha lɛ, hiɛjoomɔ kɛ nibii krokomɛi tsiɔ adesai agbɛ kɛjɛɔ naagbai nɛɛ anaa tsabaa ni amɛaana lɛ he. Akɛ nɔkwɛmɔ nɔ lɛ, Saturday Star, ni ji adafitswaa wolo ko ni yɔɔ Johannesburg, yɛ South Africa lɛ bɔ amaniɛ akɛ: “Maŋkwramɔŋ naataomɔi, pɛtrol jara ni waa kɛ tɔlɛ ni yɔɔ Afrika bei ni tamɔ nɔ ni baaa naagbee lɛ mli lɛ miifee ekome kɛmiitsi yelikɛbuamɔ nibii ni akɛaaha amɛ lɛ naa . . . Yɛ Sudan, ni ji maji ni hɔmɔ lɛ naa wa waa yɛ jɛmɛ lɛ ateŋ ekome lɛ, hɔmɔ miiye gbɔmɛi ayifalɛ ni shɛɔ kɛjɛ akpekpei 5 kɛmiiya akpekpei 6 yɛ jɛmɛ kɛmiibote gbele mli yɛ 1991.” Shi hiɛ baakpa hɔmɔ nɔ yɛ Nyɔŋmɔ jeŋ hee lɛ mli. “Shikpɔŋ lɛ nɔ aaaba abele babaoo kɛyashwie gɔji lɛ ayiteaŋ” yɛ Maŋtsɛyeli nɔyeli lɛ shishi.​—Lala 72:⁠16.

Wɔɔhe ji adesai ahiamɔ nii kroko ni mɛi pii anine shɛɛɛ nɔ yɛ wɔgbii nɛɛ amli. Akpekpei abɔ hiɔ tsũi gbohii ni amɛmli hilɛ yɔɔ mɔbɔ mli aloo po amɛbɛ wɔɔhe ko kwraa. Taakɛ The New York Times lɛ tsɔɔ lɛ, “esa akɛ nitsulɔi ni amɛye afii 20 ni tsuɔ ilɛtrɔniks he nii yɛ nitsumɔ he ko lɛ amɛ afii 73 dani amɛnine ashɛ tsui anɔ amɛwɔ mli” yɛ Bokagbɛ maŋ ko nɔ, ni nɔyeli lɛ amaniɛbɔɔ tsɔɔ akɛ esa akɛ mɛi komɛi ahi “nitoo hei, nitsumɔ hei kɛ wamɔ hei loo tiafi tsui po mli.” Shi kwɛ bɔ ni ebaafee nɔ ni yɔɔ sɔrɔto kwraa yɛ jeŋ hee lɛ mli! Yɛ wɔsɛɛ be Paradeiso ni baa lɛ mli lɛ, “amɛaamamɔ tsui ni amɛaahi mli, ni amɛaafee weintromi, ni amɛaaye mli yibii! Amɛmamɔŋ tsui ni mɔ kroko ahi mli, ni amɛhuŋ hu, ni mɔ kroko aye; ejaakɛ mimaŋ lɛ gbii aaatamɔ tsei agbii, ni mɛi ni mihala lɛ aaaye amɛninenaa nitsumɔ lɛ mli nii aahu po.”​—Yesaia 65:​21, 22.

Naagbai ni baa nibii ni ebɔle wɔhe kɛkpe lɛ amli lɛ baalaaje yɛ jeŋ hee ni Nyɔŋmɔ ewo shi yɛ he lɛ mli. Kɔɔyɔŋ mujiwoo ni woɔ gbɔmɔtsoŋ hewalɛnamɔ kɛ kwɛɛnii ahe gbeyei lɛ ehiŋ shi dɔŋŋ. Mujiwoo kɛ shihilɛ hei afitemɔ ni ka kwɛɛnii kɛ kooloi sɔrɔtoi ahiɛ lɛ efeŋ nɔ ni woɔ mɔ he gbeyei dɔŋŋ yɛ nakai be mli. Ni atatui loo kɔɔyɔɔ ni baa shikpɔŋ lɛ yi kɛjɛɔ dɔlɛ he ni taa ni woɔ shikpɔŋ nɔ wala he gbeyei lɛ baŋ lɛ nakai dɔŋŋ. Wɔbaanyɛ wɔna nɔmimaa akɛ Yehowa Nyɔŋmɔ baatsu naagbai nɛɛ fɛɛ he nii, ejaakɛ e-Wiemɔ lɛ maa nɔ mi kɛhaa wɔ akɛ etsɛŋ ni “eeefite mɛi ni fiteɔ shikpɔŋ lɛ.”​—Kpojiemɔ 11:⁠18.

Tawuu baafee nɔ ni eho etee yɛ jeŋ hee lɛ mli, shi jeee yɛ jeŋmaji lɛ ni maŋ onukpai lɛ enyɛ ehe amɛtawuu nii lɛ kɛjɛ amɛdɛŋ lɛ hewɔ. Shi moŋ Nyɔŋmɔ baatsu nɔ ni maŋkwramɔŋ nɔyelɔi lɛ nyɛɛɛ atsu lɛ. Ekɛ toiŋjɔlɛ baaba abaha adesai toibolɔi lɛ yɛ lalatsɛ lɛ wiemɔi nɛɛ kɛ gbeekpamɔ naa: “Nyɛbaa nyɛbakwɛa Yehowa nitsumɔi lɛ, nɔ hiɛkpatamɔ ni eha eba shikpɔŋ lɛ nɔ lɛ! Ebaa tai asɛɛ foɔ kɛyaa shikpɔŋ lɛ naagbee hei lɛ, ekuɔ gai mli, ni efolɔɔ akpɔlɔ mli, ta shwiili lɛ hu, eshaa kɛ la.” (Lala 46:​9, 10) Gbɔmɛi wuŋ ta dɔŋŋ yɛ Nyɔŋmɔ jeŋ hee ni ewo shi yɛ he ni ebɛŋkɛ kpaakpa lɛ mli, shi moŋ amɛbaana anɔkwa toiŋjɔlɛ kɛ shweshweeshwe shihilɛ mli ŋɔɔmɔ.​—Mika 4:​2-4.”

Ani Obaahi Jɛmɛ?

Obaanyɛ ona hekɛnɔfɔɔ yɛ jeŋ hee ni Yehowa Nyɔŋmɔ ewo shi yɛ he lɛ mli. Emaleee. (Hebribii 6:​17, 18) E-Wiemɔ ni ji Biblia lɛ ji anɔkwale, ni nɔ ni ewoɔ shi yɛ he lɛ baa mli be fɛɛ be.​—Yohane 17:⁠17.

Jɔɔmɔi ni yɔɔ naakpɛɛ kɛha adesai toibolɔi lɛ ahe sanekpakpa lɛ ji nɔ ni Yehowa Odasefoi bɔɔ mɔdɛŋ ni amɛkɛha mɛi fɛɛ ni yɔɔ tsuijurɔ lɛ. Esa akɛ obɔ mɔdɛŋ bianɛ ni ona ŋwɛi yiŋtoo lɛ he anɔkwa nilee, ni otsu shiwooi ni yɔɔ naakpɛɛ ni anaa yɛ Ŋmalɛ Krɔŋkrɔŋ lɛ mli lɛ he nii. Gbɛ nɛɛ kɛ naanɔ wala baaba, ejaakɛ Yesu kɛɛ: “Enɛ ji naanɔ wala lɛ, akɛ amɛaana bo, anɔkwa Nyɔŋmɔ kome pɛ lɛ, kɛ Yesu Kristo, mɔ ni otsu lɛ lɛ he nilee.” (Yohane 17:​3, NW) Kɛkɛ lɛ obaana hegbɛ ni ona miishɛɛ bei ni jwere wɔhiɛ lɛ amli ŋɔɔmɔ, ejaakɛ Nyɔŋmɔ jeŋ hee lɛ ebɛŋkɛ!

[Shishigbɛ niŋmai]