Jeŋ Gbɛjianɔtoo Hee ko Taomɔ

“SHIKPƆŊ he mfonirii komɛi bɛ ni baanyiɛ wɔhiɛ kɛya he ni wɔyaa lɛ, kɛya nɛkɛ jeŋ hee ni wɔ diɛŋtsɛ wɔfeɔ nɛɛ mli. Yɛ be mli ni je lɛ kwɛɔ esɛɛ kɛyaa afii nyɔŋmai nɛɛhu mli ni akɛwuu ta, akɛbe, ni akɛna gbɔmɛi ahe jwɛŋmɔ fɔŋ nɛɛ, nyɛhaa wɔkwɛa wɔhiɛ gbɛ hu​—wɔkwɛ afii oha hee, afi akpe hee ni toiŋjɔlɛ, heyeli kɛ shweremɔ yɔɔ mli lɛ gbɛ.”

U.S. Amerika maŋsɔɔlɔ nukpa, George Bush wie nɛkɛ wiemɔi nɛɛ yɛ January 1, 1990. Soviet maŋsɔɔlɔ nukpa Mikhail Gorbachev kɛ shɛɛ sane ko ni tamɔ nakai nɔŋŋ ha akɛ afee ekome yɛ 1990 afii lɛ amli koni akɛjie “gbeyeishemɔi kɛ he ni aheee mɔ ayeee, tawuu nii ni he ehiaaa, maŋkwramɔŋ susumɔi kɛ tawuu mli tsɔɔmɔi ni be eho, kɛ husui ni aje gbɛ afee ni gbalaa gbɔmɛi kɛ maji ateŋ lɛ kɛjɛ je lɛ mli.” Nɛkɛ ji bɔ ni Japan Mainichi Daily News ni akala yɛ January 3, 1990 lɛ bɔ amaniɛ.

Eka shi faŋŋ akɛ hiɛnɔkamɔi lɛ miiya hiɛ. Nakai nɔŋŋ etee hiɛ yɛ afi ni nyiɛ sɛɛ lɛ mli. Maŋsɔɔlɔ nukpa Bush kɛ shɛɛ sane ko ha Amerika mlawoo gwabɔɔ lɛ yɛ January 29, 1991 ni ewie tawuu ni yaa nɔ yɛ Persian Gulf lɛ he ni ekɛɛ: “Hiamɔ sane ni eba lɛ fe maŋ bibioo kome kɛkɛ [Kuwait], eji jwɛŋmɔ agbo ko​—jeŋ gbɛjianɔtoo hee ko, he ni agbalaa jeŋmaji sɔrɔtoi abuaa amɛnaa afeɔ amɛ ekome kɛyaa yiŋtoo kome he, koni nine ashɛ nɔ ni adesai shweɔ yɛ jeŋ muu fɛɛ: toiŋjɔlɛ kɛ shweshweeshwe shihilɛ, heyeli kɛ mla nɔ yeli nɔ.”

Jeee Taomɔ Nii ni Naagba Bɛ Mli

Naagbai pii tsiɔ gbɔmɔ gbɛ yɛ jeŋ gbɛjianɔtoo hee ni etaoɔ lɛ mli. Eka shi faŋŋ akɛ béi ni kɛ tawuu baa tsiɔ lɛ gbɛ. Yɛ be mli ni ewieɔ tawuu ni yaa nɔ yɛ Irag kɛ Kuwait teŋ lɛ he lɛ, Time wolo tɛtrɛɛ ni ji January 28, 1991 nɔ lɛ kɛɛ: “Yɛ be mli ni okpɛlɛmii lɛ gbeeɔ shi ni osramaŋi lɛ filikiɔ lɛ, kɛkɛ ni hiɛnɔkamɔi kɛha jeŋ gbɛjianɔtoo hee lɛ batsɔ basabasa-feemɔ ni wɔnaa he daa lɛ.” Wolo lɛ kɛfata he akɛ: “Mɔ ko mɔ ko akalaka ehe akɛ jeŋ gbɛjianɔtoo hee ni apupuɔ he yɛ he lɛ eba loo ebɛŋkɛ po.”

Nine shɛko majimaji ateŋ gbeekpamɔ nɔ, ni enɛ tsiɔ gbɔmɔ mɔdɛŋbɔɔ ni aaaha eto jeŋ gbɛjianɔtoo hee ema shi lɛ gbɛ. Woloŋlelɔi pɛi “maŋsɛɛ mlai ni jeŋ hewalɛi ni fe fɛɛ lɛ kɛtsuɔ nii lɛ kɛ bɔ ni ebaana jeŋ gbɛjianɔtoo hee lɛ nɔ hewalɛ eha lɛ mli” yɛ amaniɛbɔɔ ko ni je kpo yɛ wolo ko ni atsɛɔ lɛ The World & I (January 1991) lɛ mli. Niŋmalɔ lɛ mu sane naa akɛ: “Yinɔsane tsɔɔ akɛ husu ni ka tawuu kɛ toiŋjɔlɛ teŋ lɛ hi jogbaŋŋ yɛ bei kpakpai fe fɛɛ mli. Majimaji ateŋ gbeekpamɔ, titri lɛ, yɛ jeŋ hewalɛi lɛ ateŋ lɛ he miihia kɛha omanye ni aaaye yɛ béi ni tawuu bɛ mli lɛ ni ajɛɔ no nɔ kɛyaboteɔ jeŋ gbɛjianɔtoo hee lɛ mli lɛ mli.”

Kɔɔyɔɔ ni ebɔle wɔhe lɛ hu mli naagbai tsiɔ jeŋ gbɛjianɔtoo hee ni mɛi pii naa ehe ninaa lɛ gbɛ. Lester R. Brown kɛɛ yɛ wolo, State of the World 1991 (ni ji Worldwatch Institute amaniɛbɔɔ) lɛ mli akɛ: “Mɔ ko nyɛŋ ni ekɛ nɔmimaa atsɔɔ bɔ ni gbɛjianɔtoo hee lɛ baatamɔ. Shi kɛji akɛ wɔbaanyɛ wɔto wɔsɛɛ he ni hiɛ shiwoo kpakpa he gbɛjianɔ wɔma shi wɔha yinɔ ni baaba lɛ, no lɛ mɔdɛŋbɔɔ babaoo ni he hiaa koni anyɛ atsake kɔɔyɔŋ ni ebɔle shibɔlemɔ ŋulami nɛɛ he lɛ ni afiteɔ lɛ lɛ baafee nɔ titri yɛ jeŋ saji amli yɛ afii nyɔŋmai abɔ ni baaba lɛ amli.” Amaniɛbɔɔ lɛ yɔse akɛ kɔɔyɔŋ mujiwoo “eshɛ he ni eewo hewalɛnamɔ he gbeyei yɛ maŋtiasei ohai abɔ mli ni eefite niyenii yɛ maji babaoo mli.” Ekɛfata he akɛ: “Yɛ be mli ni gbɔmɛi ni yɔɔ shibɔlemɔ ŋulami nɛɛ nɔ lɛ ayi faa lɛ, belɛ kwɛɛnii kɛ kooloi sɔrɔtoi lɛ ayifalɛ lɛ hu miiba shi. Shihilɛ hei afitemɔ kɛ mujiwoo miiba hewalɛ ni shikpɔŋ lɛ yɔɔ ni ekɛaabaa nii ayi lɛ shi. Kɔɔyɔŋ ni dɔɔ klakla kɛ ozone layer lɛ ni taa yɛ shikpɔŋ lɛ ŋwɛigbɛ lɛ kɛ nɔ ko fataa nibii ni laajeɔ lɛ ahe.”

Belɛ eka shi faŋŋ akɛ naagbai babaoo yɛ jeŋ gbɛjianɔtoo hee ni gbɔmɔ taoɔ lɛ mli. Ani nɔ ni ataoɔ nɛɛ baaye omanye? Ani abaanyɛ akɛɛ akɛ jeŋ hee ko ebɛŋkɛ? Kɛji nakai ni lɛ, mɛɛ gbɛ nɔ aaatsɔ ni akɛ enɛ aba?