‘Yehowa Ji Mi-Nyɔŋmɔ, Lɛ Enɔ Mikɛ Mihiɛ Aaafɔ’

TAAKƐ WILLI DIEHL GBA LƐ

“Mɛni hewɔ otaoɔ oya Betel lɛ?” Sane ni mitsɛ bi mi yɛ afi 1931 agbiɛnaa be mli nɛ, beni miha ele miyiŋtoo akɛ miitao maje Betel sɔɔmɔ shishi lɛ. Mifɔlɔi, ni hi shi yɛ Saarland lɛ, ehi anɔkwale lɛ mli nɔ ni miihe ashɛ afii nyɔŋma sɔŋŋ, ni amɛfee nɔkwɛmɔ nɔ kpakpa amɛfɔ shi amɛha wɔ, gbekɛbii hii etɛ lɛ. Anɔkwale lɛ ji amɛshihilɛ gbɛ fɛɛ, ni mi hu miitao ni maha efee mishihilɛ gbɛ fɛɛ.

SHI mɛɛ gbɛ nɔ tsɔ ni mifɔlɔi kase Yehowa kɛ esuɔmɔnaa nii ni yɔɔ krɔŋkrɔŋ lɛ he nii? Akɛni amɛtsuii enyɔɔɔ amɛmli yɛ jamɔi ni yɔɔ momo lɛ amli hewɔ lɛ, amɛkɛ bei babaoo tao anɔkwale lɛ. Amɛka jamɔi sɔrɔtoi kɛ kui sɔrɔtoi babaoo amɛkwɛ, ni amɛkpa shi amɛna akɛ, amɛteŋ eko eko bɛ ni ji anɔkwale lɛ.

Gbi ko lɛ abashi dɛhiɛmɔ wolo ko yɛ wɔshinaa naa ni akɛmiitswa wiemɔ ko ni mfoniri-jiemɔ fata he, ni kɔɔ Nyɔŋmɔ yiŋtoo he, ni atsɛɔ lɛ “Photo-Drama of Creation” lɛ he adafi. Esa akɛ Ataa aya nitsumɔ yɛ be mli ni abaajie “Photo-drama” lɛ, shi ewo Awo hewalɛ ni eya eyakwɛ. Ekɛɛ: “Ekolɛ nɔ ko yɛ mli ni he aaanyɛ aba sɛɛnamɔ aha wɔ.” Beni Awo yakwɛ nakai mfoniri-jiemɔ lɛ nakai gbɛkɛ lɛ, ena he miishɛɛ babaoo diɛŋtsɛ. Kɛkɛ ni ekɛɛ: “Mina anɔkwale lɛ kɛ̃! Bo diɛŋtsɛ ba ni obakwɛ oha ohe wɔ gbɛkɛ. No ji anɔkwale ni wɔtaoɔ lɛ.” Enɛ ba mli yɛ 1921.

Akɛ Kristofoi ni akɛ mumɔ efɔ amɛ mu lɛ, mifɔlɔi tee nɔ amɛhi shi anɔkwafoi aahu kɛyashi amɛgboi, Ataa gbo yɛ 1944, yɛ be mli ni Nazibii lɛ ewo lɛ tsuŋ shii abɔ lɛ sɛɛ, ni Awo hu gbo 1970. Lɛ hu eye afii babaoo yɛ tsuŋwoo mli yɛ Nazi nɔyeli lɛ shishi.

Mi-Fɔlɔi Ekaafeemɔ He Nɔkwɛmɔ nɔ Kpakpa Lɛ

Dani mifɔlɔi aaagboi lɛ, no mli lɛ amɛyɛ ekaa waa yɛ shiɛmɔ nitsumɔ lɛ mli. Awo yɛ ekaa waa yɛ kpeei ashishi yiŋkpɛi ni afee ni je kpo kɛjɛ 1922 kɛyashi 1928 mli lɛ ajaa mli titri. Ecclesiastics Indicted (Afolɔ Osofoi Anaa), ni ji yiŋkpɛɛ ko ni akpɛlɛ nɔ yɛ 1924 lɛ wie eshi osɔfoi lɛ waa diɛŋtsɛ. Woji nɛɛ ajaa biɔ ekaa babaoo. Shiɛlɔi lɛ teɔ shi leebi ŋmɛji ejwɛ, ni amɛkɛ dɛhiɛmɔ woji lɛ yawoɔ shinaai ashishi. Eyɛ mli akɛ no mli lɛ miye afii 12 pɛ moŋ, shi mifɔlɔi ŋmɛ mi gbɛ ni mikɛ mihe wo mli. Bei pii lɛ wɔjeɔ shishi leebi ŋmɛji enumɔ, ni wɔtaraa baisiklei anɔ aaafee ŋmɛlɛtswai etɛ loo ejwɛ kɛyaa shikpɔŋkuku ni yɔɔ hei banee lɛ mli. Wɔkɛ baisiklei lɛ toɔ jwɛi amli, ni mibuɔ he beni mɛi krokomɛi lɛ tsuɔ nii yɛ akrowai lɛ amli lɛ. Shwane mli lɛ wɔtaa kɛkuɔ wɔsɛɛ kɛbaa shia, ni gbɛkɛnaashi mli lɛ, wɔnyiɛɔ ŋmɛlɛtswaa kome kɛyaa kpee.

Yɛ sɛɛ mli lɛ, aha mɔ kroko ni miye lɛ onukpa bu baisiklei lɛ ahe, ni mifata shiɛlɔi lɛ ahe kɛtee. Shi mɔ ko mɔ ko susuuu he akɛ eeetsɔse mi. Amɛtsɔɔ mi gbɛjegbɛ nɔ ni miyatsu nii yɛ kɛkɛ! Kɛkɛ ni mikɛ tsui ni tswaa kpalakpala nyiɛ blɛoo kɛbote klɛŋklɛŋ shia lɛ mli, kɛ hiɛnɔkamɔ akɛ mɔ ko ehiŋ shia yɛ nakai be lɛ mli. Shi mihe eyabaaa nii, kɛkɛ ni nuu ko gbele shinaa lɛ. Mitɔ mu nɔŋŋ. Ni mitsɔɔ lɛ wolo lɛ yɛ mibaagi lɛ mli, ni minaa miitɛrɛ shi. Ni nuu lɛ bi mi akɛ: “Ani ejɛ Kojolɔ Rutherford ŋɔɔ?” Miha lɛ hetoo kɛ momohaa. Ni ebi akɛ: “Ehee nɛ, nɔ ni mibɛ eko kwraa?” Ni mima nɔ mi akɛ: “Hɛɛ, ehee ni.” Ni ekɛɛ: “No lɛ esa akɛ mahe. Enyiɛ ji ejara?” Enɛ wo mi ekaa waa ni minyɛ mitee nɔ.

Yɛ 1924 mli lɛ, mɛi ni edara lɛ wie 1926 he babaoo diɛŋtsɛ. Be ko lɛ wɔyasara Biblia Kaselɔi aweku ko, ni minu ni nyɛminuu ko miibi akɛ: “Kɛji Nuŋtsɔ lɛ baŋɔ wɔ kɛtee lɛ, mɛni baaba wɔbii lɛ anɔ?” Kɛkɛ ni Awo, ni yɔɔ nɔmimaa waa yɛ sane nɛɛ he lɛ ha lɛ hetoo akɛ: “Nuŋtsɔ lɛ baale bɔ ni eeefee ekwɛ amɛ.” Mibana sane nɛɛ he miishɛɛ waa diɛŋtsɛ. Te eshishi hu? Afi 1925 bashɛ ni eho etee, ni nɔ ko nɔ ko baaa. Shi, mifɔlɔi anijiaŋ ejeee wui yɛ ekaa ni amɛyɔɔ lɛ mli.

Ataa Ŋaawoo ni Nilee Yɔɔ Mli Lɛ

Yɛ naagbee, yɛ 1931 lɛ, mikɛɛ mitsɛ nɔ ni mitaoɔ ni mikɛ miwala afee. Ni mitsɛ bi mi yɛ hetoo-hamɔ mli akɛ: “Mɛni hewɔ otaoɔ oya Betel lɛ?” Ni miha lɛ hetoo akɛ: “Ejaakɛ miitao masɔmɔ Yehowa.” Ni etee nɔ akɛ: “Ŋɔɔ lɛ akɛ akpɛlɛ onɔ ni oba Betel. Ani oyoo faŋŋ akɛ nyɛmimɛi ni yɔɔ jɛmɛ lɛ jeee ŋwɛibɔfoi? Amɛyeee emuu ni amɛ hu amɛtɔ̃ɔ. Miishe gbeyei miiha bo akɛ ekolɛ enɛ aaaha ojo foi oshi ni ekolɛ eeeha oŋmɛɛ hemɔkɛyeli lɛ he po. Kwɛmɔ ni osusu sane nɛɛ he jogbaŋŋ diɛŋtsɛ.”

Mihe jɔ̃ mihe waa akɛ manu wiemɔ tamɔ nɛkɛ, shi beni misusu saji ahe gbii komɛi asɛɛ lɛ, misaa mima mitaomɔ nii akɛ masɔmɔ yɛ Betel lɛ nɔ mi. Ni ekɛɛ mi akɛ: “Kɛɛmɔ mi ekoŋŋ nɔ hewɔ ni osumɔɔ ni oya jɛmɛ lɛ.” Ni mitĩ mli ekoŋŋ akɛ: “Ejaakɛ miitao masɔmɔ Yehowa.” Ni ekɛɛ mi akɛ: “Mibinuu, ohiɛ akakpa no nɔ kɔkɔɔkɔ. Kɛji afɔ bo nine lɛ, kaimɔ nɔ hewɔ ni oyaa lɛ. Kɛji ona nɔ ko ni ejaaa lɛ, kaaha eehao bo fe nine. Kɛji mɔ ko fee bo nɔ ko ni ejaaa po lɛ, kaashi jɛmɛ. Ohiɛ akakpa nɔ hewɔ ni oyɔɔ Betel lɛ nɔ kɔkɔɔkɔ​—ejaakɛ ootao ni osɔmɔ Yehowa! Yaa nɔ otsu onitsumɔ ni aha bo lɛ ni okɛ ohe afɔ enɔ kɛkɛ.”

Nɛkɛ ji bɔ ni ebalɛ ni yɛ November 17, 1931 shwane mli lɛ, miyashɛ Betel, yɛ Bern, yɛ Switzerland. Mikɛ mɛi krokomɛi etɛ wɔɔ tsu kome mli ni mitsuɔ nii yɛ woji akalamɔ he lɛ, ni miikase bɔ ni akɛ wolo kalamɔ tsɔne ni akɔlɔɔ woji akɛwoɔ mli ni ekalaa lɛ tsuɔ nii ahaa. Klɛŋklɛŋ nibii ni aha mi nitsumɔ ni mikala lɛ ateŋ ekome ji Buu-Mɔɔ lɛ yɛ Romania wiemɔ mli.

Shɛɛ Sane ni Jɛ Ŋwɛi!

Yɛ 1933 lɛ, Asafo lɛ ŋma The Crisis, ni ji wolo bibioo ko ni Nyɛminuu Rutherford wiemɔi etɛ ni eha yɛ redio nɔ yɛ United States, Amerika lɛ yɔɔ mli lɛ. Nyɛminuu Harbeck, ni ji nitsumɔ he nine nɔkwɛlɔ lɛ tswa Betel weku lɛ adafi yɛ leebi niyeli shishi gbi ko leebi akɛ abaaja nɛkɛ wolo bibioo nɛɛ yɛ gbɛ krɛdɛɛ ko nɔ. Abaajɛ kɔɔyɔɔŋ lɛlɛ ko ni ahai mli aŋmɛɛ adafitswaa woji bibii komɛi ahe kɛjɛ ŋwɛi ashwie Bern maŋ lɛ mli, yɛ be mli ni shiɛlɔi damɔ gbɛjegbɛi anɔ ni amɛkɛ wolo bibioo lɛ miiha maŋbii lɛ. Ni ebi akɛ: “Nyɛ nyɛmimɛi obalahii lɛ ateŋ namɛi efee klalo akɛ amɛbaatsu nii yɛ kɔɔyɔɔŋ lɛlɛ lɛ mli? Nyɛkɛ nyɛgbɛi ahaa amrɔ nɔŋŋ.” No hewɔ lɛ mifee nakai, ni Nyɛminuu Harbeck tswa mi adafi yɛ sɛɛ mli akɛ ahala mi afata he.

Yɛ nakai gbi krɛdɛɛ lɛ nɔ lɛ, wɔkɛ woji bibii lɛ adekai babaoo wo tsɔne mli kɛtee kɔɔyɔɔŋ lɛji adaamɔ he lɛ. Miyata kɔɔyɔɔŋ lɛlɛ kudɔlɔ lɛ sɛɛ tuuŋtu ni mibua woji bibii lɛ pii naa yɛ sɛi ni ma mimasɛi lɛ nɔ. Famɔi pɔtɛɛ ni akɛha mi ji: Kotamɔ dɛhiɛmɔ woji lɛ ni ofimɔ lɛ oha oha, ni ofɔ̃ bɔ ni ofimɔ lɛ kpoi kpoi lɛ oshɛ ofɔ kɛtsɔ samfɛlɛ lɛ mli waa kɛya afa kome kɛ ohewalɛ fɛɛ bɔ ni ooonyɛ. Kɛji wɔfɔɔɔ lɛ jogbaŋŋ lɛ, ebaaha woji lɛ ayahɔlɔ kɔɔyɔɔŋ lɛlɛ lɛ sɛɛ gbɛ fɔji lɛ amli, ni ekɛ naagbai baaba. Shi nɔ fɛɛ nɔ tee nɔ pɛpɛɛpɛ. Yɛ sɛɛ mli lɛ nyɛmimɛi lɛ tsɔɔ bɔ ni efee miishɛɛ sane eha akɛ aaana nɛkɛ ‘shɛɛ sane ni jɛ ŋwɛi’ nɛɛ. Kɛji mɛi komɛi po tswa tɛlifon ni amɛha ale akɛ woji bibii nɛɛ ebaha amɛŋmɔ mli nibii anɔ po lɛ, etsu nii bɔ ni akpaa gbɛ lɛ pɛpɛɛpɛ, ni akɛ woji wuji babaoo ha.

Midaa Shi Babaoo Yɛ Sɔɔmɔ Hegbɛi Fɛɛ Ahewɔ

Midaa Yehowa shi daa yɛ miishɛɛ ni minaa kɛ mitsui ni nyɔɔ mimli yɛ Betel sɔɔmɔ mli lɛ hewɔ. Aha mi nitsumɔ yɛ asafo lɛ mli ni migbele Maŋtsɛyeli Asa, ni mito emli sɛii lɛ hu fɛɛ fɛfɛo, ni mikɛ nu kɛ glase ama wielɔi akpoku lɛ nɔ okpɔlɔ lɛ nɔ. Mibu nitsumɔ nɛɛ akɛ nɔ ni woo kpele yɔɔ mli waa diɛŋtsɛ.

Yɛ Betel lɛ, yɛ naagbee lɛ miyatsu nii yɛ woji akalamɔ tsɔne ko ni akɛkalaa The Golden Age (amrɔ nɛɛ Awake!) lɛ yɛ Poland wiemɔ mli lɛ he. Yɛ 1934 mli lɛ, wɔkɛ gramafon bɔi nitsumɔ, ni miye mibua kɛ efeemɔ. Mina Biblia mli wiemɔi ni amɔmɔ awo kpaai anɔ ni wɔkɛyaa shia kɛ shia lɛ he miishɛɛ waa. Shiatsɛmɛi babaoo miisumɔ ni amɛle bɔ ni nɛkɛ tsɔnei bibii nɛɛ yɔɔ naakpɛɛ ha lɛ, ni bei pii lɛ weku muu fɛɛ babuaa amɛhe naa ni amɛboɔ toi, shi etsɛɛɛ kɛkɛ lɛ amɛtee ekomekome. Kɛ weku muu lɛ fɛɛ shi amɛtee lɛ, kɛkɛ lɛ mitee shia ni tsa amɛnɔ lɛ hu mli.

Ni Wɔɔya nɔ kɛ Ekaa yɛ Ta Be Mli

Yɛ Jeŋ Ta I sɛɛ lɛ, atse Saarland, he ni mijɛ lɛ kwraa kɛjɛ Germany he ni ebaje Jeŋmaji Akpaŋmɔ lɛ gbɛjianɔto kɛ enɔyeli shishi. No hewɔ lɛ, Saarland maŋ lɛ ha emaŋbii lɛ lɛ diɛŋtsɛ ekadimɔ woji. Yɛ 1935 mli lɛ, afɔ oshiki koni akɛkpɛ yiŋ kɛji maŋbii lɛ baasumɔ ni amɛkɛ Germany afee ekome ekoŋŋ. Miŋɔ hegbɛ lɛ ni mikɛtee miyasara miweku lɛ, ejaakɛ mile akɛ kɛji Saarland baje Nazi nɔyeli shishi lɛ, minyɛŋ nakai mafee dɔŋŋ. Ni lɛlɛŋ, no sɛɛ afii babaoo lɛ, minuuu nɔ ko kwraa kɛjɛɛɛ mifɔlɔi kɛ minyɛmimɛi hii lɛ aŋɔɔ.

Eyɛ mli akɛ wɔkɛ wɔhe wooo Jeŋ Ta II mli tɛɛ moŋ, shi Switzerland batse ehe banee kwraa beni Germany yaa nɔ ekɔlɔɔ maji ni ebɔle lɛ lɛ ekomekome lɛ. Wɔkalaa woji ni wɔkɛmajeɔ kɛyahaa Europa maji krokomɛi fɛɛ, ja Germany pɛ, shi amrɔ nɛɛ wɔnyɛɛɛ wɔkɛ woji ni ataoɔ lɛ eko aya dɔŋŋ. Nyɛminuu Zürcher, ni no mli lɛ eji nitsumɔ he nine nɔkwɛlɔ lɛ kɛɛ wɔ akɛ wɔ shika fɛɛ eta kwraa, ni no hewɔ lɛ efɔ wɔ nine ni wɔyatao nitsumɔ wɔtsu kɛyashi nibii amli baahi ekoŋŋ. Shi, aŋmɛ mi gbɛ ni mihi shi, ejaakɛ nibii fioo komɛi yɛ lolo ni esa akɛ akala aha shiɛlɔi akpe loo nɔ ni miihe ashɛ nakai ni eshwɛ lɛ.

Betel weku lɛ hiɛ kpaŋ July 5, 1940 nɔ kɔkɔɔkɔ. Ni wɔye shwane niyenii wɔgbe naa nɔŋŋ kɛkɛ ni asraafoi atsɔne bama shi. Kɛkɛ ni asraafoi huru kɛjɛ mli amɛyimɔ shi kɛbote Betel shia lɛ mli. Afa wɔ ni mɔ fɛɛ mɔ adamɔ shi ni ekatsi ehe, ni asraafoi ni hiɛ tui bu mɔ fɛɛ mɔ he ekomekome. Ni abua wɔ fɛɛ wɔnaa awo niyeli asa lɛ nɔ ni atee ayakwɛ tsui ni eshwɛ lɛ fɛɛ amli. Nɔyelɔi lɛ susu akɛ wɔkɛɔ mɛi krokomɛi ni amɛkɛ amɛhe akawo asraafoi anitsumɔ mli, shi amɛnaaa odaseyeli ko kwraa ni tsɔɔ nakai.

Beni awuuɔ ta lɛ mli fɛɛ lɛ, no mli lɛ miji asafoŋ sɔɔlɔ yɛ Thun kɛ Frutigen fɛɛ. No tsɔɔ akɛ gbɛjianɔtoo ni miyɔɔ kɛha otsi naagbee nitsumɔ Iɛ fa waa. Daa Hɔɔ kɛji miye nii shwane lɛ, mitaa baisikle nɔ kilomitai 50 kɛyaa Frutigen, ni miyakwɛɔ Buu-Mɔɔ Nikasemɔ nɔ yɛ jɛmɛ yɛ gbɛkɛnaashi mli. Hɔgbaa leebi lɛ mifataa shiɛlɔi lɛ ahe kɛyaa shiɛmɔ. Kɛkɛ lɛ, shwane mra mli lɛ, mishi kɛtee Interlaken kɛha Asafo Woloŋ Nikasemɔ lɛ nɔkwɛmɔ, kɛkɛ lɛ yɛ sɛɛ mli yɛ nakai shwane lɛ nɔŋŋ lɛ mikɛ weku ko hu efee Biblia mli nikasemɔ yɛ Spiez. No sɛɛ lɛ, misaa miyakwɛɔ Buu-Mɔɔ Nikasemɔ nɔ yɛ Thun hu kɛkɛ lɛ mikɛ gbi lɛ mli nitsumɔ eba naagbee.

Gbɛkɛ beni je ena, ni migbe minitsumɔ lɛ fɛɛ naa, kɛ miiku misɛɛ kɛmiiba Bern lɛ, milaa ni mikpaa bɛlɛ, ni minaa miishɛɛ waa. Kar faaa yɛ nakai beaŋ ni no hewɔ lɛ mikɛ pii ekpeee yɛ gbɛ lɛ nɔ. Akɛni gɔji ashikpɔŋ ni, ni agbe kanei hu fɛɛ yɛ ta ni awuuɔ lɛ hewɔ lɛ, he fɛɛ he efee dioo ni onuuu gbɛɛmɔ ko kwraa, ni kɛ eyɛ mli aahu dani jeŋ tseɔ fioo yɛ nyɔŋtsere yɛmɔ bei amli. Kwɛ bɔ ni nakai otsi naagbee nitsumɔi lɛ ha mishihilɛ tee hiɛ ni eha mi hewalɛ hee babaoo hu eha!

Saramɔ ko kɛ Nibii ni Wɔkpaaa Gbɛ ni Jɛ Mli Ba

Yɛ 1945 gbo be mli lɛ, Nyɛminuu Knorr basara wɔ. Gbi ko lɛ eba nitsumɔ he ni akalaa woji yɛ lɛ ni ebanina mi ni midamɔ woji akalamɔ tsɔne lɛ eko he. Kɛkɛ ni etsɛ mi ni ekɛɛ: “Ba! Ani obaasumɔ ni oya Gilead Skul lɛ eko?” Sane nɛɛ baŋɔɔ minaa waa diɛŋtsɛ. No hewɔ lɛ mijie lɛ naa akɛ: “Kɛji osusuɔ akɛ manyɛ maya lɛ, no lɛ ebaaŋɔɔ minaa akɛ maya.” Woji ni akɛfɔ Nyɛminuu Fred Borys, Nyɛmiyoo Alice Berner, kɛ mi nine ni wɔba lɛ bashɛ shi yɛ 1946 agbiɛnaa be mli. Shi akɛni afɔ mi yɛ Saarland hewɔ lɛ, mibɛ maŋ ko ni makɛɛ akɛ jɛmɛ afɔ mi yɛ, ni no hewɔ lɛ esa akɛ maŋma wolo kɛya,Washington, D.C., yɛ U.S. Amerika kɛha gbɛŋmɛɛ wolo krɛdɛɛ ko ni baaha manyɛ mafa gbɛ lɛ.

Mɛi krokomɛi lɛ shi yɛ be naa pɛpɛɛpɛ, shi ebahi ni mamɛ migbɛbimɔ wolo lɛ hetoo. Beni skul lɛ je shishi yɛ September 4 lɛ, no mli lɛ miyɛ Switzerland lolo, ni minijiaŋ miije wui fiofio. Kɛkɛ ni U.S. Amerika Maŋsɛɛ Nitsumɔ He lɛ tswa telifon, ni amɛkɛɛ mi akɛ migbɛŋmɛɛ wolo lɛ eba. Amrɔ nɔŋŋ kɛkɛ ni mibɔi migbɛfaa lɛ he gbɛjianɔtoo, kɛkɛ ni naagbee lɛ mina wɔɔhe yɛ asraafoi alɛlɛ ko ni miijɛ Marseilles kɛmiiya New York lɛ mli. Mɛɛ niiashikpamɔ nɛ! Athos II lɛ yi waa diɛŋtsɛ. Aha mi saatso bibioo ko yɛ tsu agbo ko mli. Beni wɔfa gbɛ aaashɛ gbii enyɔ lɛ, wɔnu gbɛɛmɔ wulu ko yɛ lɛlɛ lɛ mli tsɔne tsu lɛ mli, ni eha lɛlɛ lɛ wa edamɔ shi ni enyɛɛɛ eya dɔŋŋ. Gbɛfalɔi kɛ lɛlɛ lɛ mli nitsulɔi lɛ fɛɛ atsui fa, ejaakɛ wɔmiishe gbeyei akɛ lɛlɛ lɛ baashiu. Enɛ ha mina hegbɛ kpele ko ni mikɛye gbohiiashitee he hiɛnɔkamɔ lɛ he odase.

Ehe gbii enyɔ dani anyɛ asaa lɛlɛ lɛ, ni no sɛɛ lɛ wɔtsa gbɛfaa lɛ nɔ, shi enyiɛ blɛoo agbɛnɛ. Wɔyashɛ New York gbii 18 sɛɛ, shi beni wɔyashɛ lɛ wɔka lɛlɛ lɛ mli ni wɔnyɛɛɛ wɔyimɔ shi ejaakɛ lɛji adaamɔ he nitsulɔi lɛ etse atua. Beni akɛ amɛ yawie ni amɛkpɛlɛ nɔ sɛɛ lɛ, aŋmɛ wɔ gbɛ ni wɔyimɔ shi kɛjɛ lɛlɛ lɛ mli. No mli lɛ, mifee tɛligram kɛyaha Asafo lɛ momo yɛ shihilɛ nɛɛ he, no hewɔ lɛ, beni mishiɔ he ni awoɔ too yɛ ni akwɛɔ gbɛfaa woji amli yɛ lɛ, kɛkɛ ni nuu ko ba ni ebabi mi akɛ: “Bo ji Ow. Diehl lɛ?” Eji nyɛmimɛi ni kwɛɔ Nyɛminuu Knorr sɛɛ lɛ ateŋ mɔ kome, ni ekɛ mi tee ni miyafo oketeke ni shiɔ gbɛkɛ kɛyaa Ithaca, yɛ Gilead Skul lɛ masɛi lɛ, ni miyashɛ shi enɔ jetsɛremɔ leebi ŋmɛji kpaanyɔ sɛɛ fioo. Kwɛ bɔ ni mina miishɛɛ waa miha akɛ minyɛ miyashɛ jɛmɛ kɛ̃, ni miyafata Gilead klasbii ni ji klɛŋklɛŋ nɔ ni jɛ maji sɔrɔtoi anɔ lɛ ahe!

Tsuishiŋmɛɛ yɛ Shihilɛi ni Mli Wawai Amli

Gilead klasbii ni ji kpaanyɔ lɛ gbe nikasemɔ naa yɛ February 9, 1947, ni mɔ fɛɛ mɔ bɔi nɔ ni baanyiɛ sɛɛ kɛba lɛ gbɛkpamɔ. Nɛgbɛ akɛ wɔ baaya? Yɛ migbɛfaŋ lɛ, “hũsu kpaai” lɛ yagbee Asafo lɛ woji akalamɔ nitsumɔ he hee ni agbele naa yɛ Wiesbaden, yɛ Germany lɛ nɔ. (Lala 16:⁠6) Miku misɛɛ kɛtee Bern koni mikɛyatao gbɛŋmɛɛ woji ni he hiaa lɛ, shi U.S Amerika asraafoi ni ebahi Germany lɛ eŋmɛɛɛ mɔ ko mɔ ko gbɛ ni eba maŋ lɛ mli ja mɛi pɛ ni yɔɔ maŋ lɛ mli dani ta lɛ je shishi lɛ. Akɛni mibɛ jɛmɛ yɛ ta lɛ shishijee mli hewɔ lɛ, ehe bahia ni ajɛ Brooklyn nitsumɔ he yitso lɛ ni aha mi nitsumɔ hee. Yɛ naagbee lɛ ebafee kpokpaa nɔ nitsumɔ yɛ Switzerland, ni mikpɛlɛ nɔ kɛ hekɛnɔfɔɔ yɛ Yehowa mli. Shi beni mimɛɔ dani maje nitsumɔ nɛɛ shishi lɛ, gbi ko lɛ akɛɛ mi ni mikɛ nyɛmimɛi yei etɛ komɛi ni ba Betel shia lɛ kwɛmɔ lɛ ayashɛra shi. Amɛteŋ mɔ kome ji gbɛgbalɔ, ni atsɛɔ lɛ Marthe Mehl.

Yɛ May 1949 mli lɛ, miha nitsumɔ he yitso ni yɔɔ Bern lɛ le akɛ miitao mikɛ Marthe abote gbalashihilɛ mli, ni wɔmiisumɔ ni wɔhi be-fɛɛ sɔɔmɔ nitsumɔ lɛ mli. Mɛni hetoo aha wɔ? Sɔɔmɔ hegbɛ ko kwraa bɛ fe daa gbɛgbamɔ nitsumɔ lɛ. No hewɔ lɛ wɔje shishi yɛ Biel, yɛ yookpeemɔ lɛ sɛɛ yɛ June 1949. Aŋmɛɛɛ mi gbɛ ni maha maŋshiɛmɔ, ni akpɛlɛɛɛ hu ni wɔtaoɔ wɔɔhei wɔhaa nyɛmimɛi ni baaba kpeei ni ka wɔhiɛ ni abaafee lɛ, eyɛ mli akɛ wɔkpokpaa nɔkwɛlɔ lɛ ejie wɔyi kɛha nɛkɛ sɔɔmɔ hegbɛ nɛɛ. Mɛi pii kpa wɔ ŋamɔ po, ni amɛkɛ wɔ yeɔ tamɔ mɛi ni ashwie amɛ kɛjɛ asafo lɛ mli, eyɛ mli akɛ gbɛgbalɔi ji wɔ.

Shi, wɔle akɛ ŋmalɛ ko bɛ ni teɔ shi ewoɔ gbalashihilɛ mlibotemɔ, no hewɔ lɛ wɔkɛ sɔlemɔ fee wɔbobaahe ni wɔkɛ wɔhe fɔ Yehowa nɔ. Yɛ anɔkwale mli lɛ, bɔ ni akɛ wɔ ye ha nɛɛ jeee yɛ Asafo lɛ susumɔ naa. Ejɛ gbɛjianɔtoo lɛ gbɛtsɔɔmɔi ni akɛyatsuuu nii kɛ shishinumɔ kpakpa hewɔ.

Nyɛminuu Knorr Ku Esɛɛ Eba

Yɛ 1951 mli lɛ, Nyɛminuu Knorr basara Switzerland ekoŋŋ. Beni eha wiemɔ ko egbe naa sɛɛ lɛ, aha mile akɛ eesumɔ ni ekɛ mi awie. Eyɛ mli akɛ gbeyeishemɔ fioo ko yɛ mimli moŋ, shi eŋɔɔ minaa hu akɛ eetao ena mi. Ebi mi kɛji wɔbaasumɔ ni aha wɔ nitsumɔ yɛ maŋsɛɛ sanekpakpa shiɛlɔi ashia hee ni ataoɔ ama yɛ Geneva lɛ. Wɔna he miishɛɛ kɛ̃, eyɛ mli akɛ bɔ fɛɛ bɔ ni fee lɛ Biel shimɔ baadɔ wɔ waa diɛŋtsɛ. Enɔ jetsɛremɔ lɛ, Nyɛminuu Knorr tsu ni ababi wɔ nɔ kroko hu. Ani wɔbaasumɔ ni wɔje kpokpaa nɔ nitsumɔ shishi ekoŋŋ, akɛni enɛ he miihia waa yɛ Switzerland lɛ? Wɔkpɛlɛ nɔ amrɔ nɔŋŋ. Su ni mina be fɛɛ be ji akɛ makpɛlɛ nitsumɔ fɛɛ nitsumɔ ni aaaha mi lɛ nɔ.

Ajɔɔ wɔ kpokpaa nɔ nitsumɔ yɛ Switzerland bokagbɛ lɛ nɔ babaoo diɛŋtsɛ. Wɔkɛ oketekei faa gbɛ kɛyasaraa asafoi lɛ, ni wɔhiɛɔ wɔ nibii fɛɛ yɛ baagii agboi enyɔ mli. Bei pii lɛ nyɛmimɛi lɛ kɛ wɔ bakpeɔ yɛ oketeke shidaamɔ he lɛ kɛ baisiklei, ejaakɛ amɛteŋ mɛi fioo pɛ yɔɔ kar yɛ nakai beaŋ. Afii komɛi asɛɛ lɛ nyɛminuu ko kɛ ekar ha ni wɔkɛtsu nii, ni enɛ ha wɔsɔɔmɔ lɛ bafee mlɛo kwraa eha wɔ.

Nibii Heei Komɛi ni Fee Wɔ Naakpɛɛ

Mɛɛ miishɛɛ wɔbana yɛ 1964 nɛkɛ beni afɔ mikɛ miŋa nine ni wɔba Gilead klas ni ji 40 lɛ, naagbee klasbii ni kɛ nyɔji nyɔŋma kaseɔ nibii sɔrɔtoi babaoo ahe nii, ni amrɔ nɛɛ atse nɔ kɛba nyɔji kpaanyɔ lɛ. Ebabi ni Marthe akase Ŋleshi Blɔfo wiemɔ oya, shi enyɛ ebɔ he mɔdɛŋ ni eha mina ehe miishɛɛ. Kɛkɛ ni be bashɛ ni wɔbɔi he ni akɛ wɔ baaya he susumɔ. Bɔ ni mikpɛ miyiŋ ji akɛ: ‘He fɛɛ he ni akɛ mi baaya gbaaa minaa, bei abɔ ni ejeee okpɔlɔ sɛɛ tamɔ nitsumɔ lɛ!’

Shi nakai pɛpɛɛpɛ ji bɔ ni ebalɛ! Yɛ gbi ni wɔgbe nikasemɔ lɛ naa, ni ji September 13, 1965 lɛ, ahala mi akɛ Switzerland nitsumɔ he nine nɔ sɔɔlɔ. Betel baafee niiashikpamɔ he kwraa kɛha Marthe. Kɛha mi lɛ, ebafee misɛɛkuu kɛ “Nyɔŋmɔ Shia” lɛ yaa, jeee woji akalamɔ nitsumɔ he, he ni mitsu nii yɛ kɛjɛ 1931 kɛyashi 1946 lɛ, shi moŋ kɛmiiya ɔfis. Miyɛ nibii heei pii ni makase, shi minyɛ mifee nakai kɛtsɔ Yehowa yelikɛbuamɔ nɔ.

Be ni Eho Lɛ

Afii 60 ni wɔkɛhi be-fɛɛ sɔɔmɔ lɛ mli lɛ fɛɛ mli lɛ, mikɛ mihe efɔ Yehowa nɔ kwraa kɛmɔ shi, taakɛ mitsɛ kɛɛ mi akɛ mifee lɛ. Ni Yehowa efɔse jɔɔmɔi babaoo diɛŋtsɛ eshwie minɔ. Marthe etee nɔ efee hewalɛwoo jɛɛhe kpele jogbaŋŋ kɛha mi yɛ bei ni minine kɛnyɛɔ shi aloo bei ni nitsumɔ lɛ kaa akɛ eeeye minɔ lɛ fɛɛ mli, lɛlɛŋ, hefatalɔ anɔkwafo ni kɛ ehe fɔɔ Yehowa nɔ kwraa kɛmɔɔ shi.

Ajie Yehowa yi yɛ sɔɔmɔ hegbɛi babaoo ni mina mli ŋɔɔmɔ lɛ hewɔ! Miisɔmɔ lolo akɛ Nitsumɔ He Nine Ajinafoi asɛinɔtalɔ yɛ Thun, ni mifa gbɛ shii abɔ akɛ shikpɔŋ wulu nɔkwɛlɔ. Nɔ fɛɛ nɔ ni akɛhaa mi akɛ mitsu lɛ, mikwɛɔ Yehowa gbɛ be fɛɛ be kɛha egbɛtsɔɔmɔ. Yɛ mitɔmɔi kɛ migbɔjɔmɔi babaoo lɛ fɛɛ sɛɛ lɛ, miheɔ miyeɔ waa diɛŋtsɛ akɛ Yehowa kɛ mihe eke mi kɛtsɔ Kristo nɔ. Eba akɛ maya nɔ masa ehiɛ jogbaŋŋ kɛmɔ shi. Ni eba akɛ eeeya nɔ ejaje minajifaamɔi, yɛ be mli ni miyaa nɔ mikwɛɔ lɛ gbɛ akɛ “mi-Nyɔŋmɔ hu ni mihiɛ ka enɔ” lɛ.​—Lala 91:⁠2.

[Mfoniri ni yɔɔ baafa 27]

Nyɛminuu Diehl yɛ e-Betel sɔɔmɔ lɛ shishijee mli gbɛ