Ani Biblia lɛ Ji Nikee Nii ni Jɛ Nyɔŋmɔ Ŋɔɔ Lɛlɛŋ?
“MIHEƆ miyeɔ akɛ Biblia lɛ ji nikee nii ni hi fe fɛɛ ni Nyɔŋmɔ kɛha gbɔmɔ.” Abraham Lincoln, U.S. Amerika maŋsɔɔlɔ nukpa ni gbeɔ yi feɔ 16 lɛ wiemɔ nɛ.a Jeee lɛ pɛ ji mɔ ni hiɛ sɔɔ wolo ni etsɛ waa nɛɛ.
Afii ohai 19 lɛ mli Britain maŋ onukpa William E. Gladstone wie akɛ: “Akadi Biblia lɛ akɛ Eshishijee Jɛ he ko Krɛdɛɛ, ni gbɛ shwaŋŋ ni kɛ waa ni anyɛŋ asusu kã ekɛ woji krokomɛi fɛɛ teŋ.” Mɔ ni hiɛ jwɛŋmɔ ni tamɔ nakai nɔŋŋ ji afii ohai 18 lɛ mli Amerika maŋ nukpa Patrick Henry ni kɛɛ: “Biblia lɛ jara wa fe woji krokomɛi fɛɛ ni akala.” Eka shi faŋŋ akɛ akɛni ehiɛ sɔ Ŋmalɛi lɛ waa hewɔ lɛ, French maŋtsɛ Napoléon Bonaparte kɛɛ: “Biblia lɛ jeee wolo folo ko kɛkɛ, shi moŋ eji Bɔɔ Nɔ ni Hiɛ Kã, ni eyɛ hewalɛ ni haa eyeɔ mɛi fɛɛ ni teɔ shi woɔ lɛ lɛ anɔ kunim.”
Kɛha mɛi komɛi lɛ, Biblia lɛ efee yelikɛbuamɔ kɛ miishɛjemɔ jɛɛhe. Amerika Maji Bibii ni Efee Ekome lɛ anɔ tatsɛnukpa Robert E. Lee kɛɛ: “Yɛ mihaomɔi kɛ naagbai lɛ fɛɛ mli lɛ, Biblia lɛ haaa minine anyɛ shi yɛ la kɛ hewalɛ ni ekɛaaha mi lɛ mli.” Ni yɛ bɔ ni ehiɛ sɔɔ wolo nɛɛ sɔŋŋ ha hewɔ lɛ, U.S. Amerika maŋsɔɔlɔ nukpa John Guincy Adams kɛɛ: “Nɔ ni mifɔɔ feemɔ afii pii nɛ ji ni makane Biblia muu lɛ fɛɛ daa afi.”
Kɛji akɛ Ŋwɛi Flooflonyo lɛ kɛ Biblia lɛ ha adesai lɛ, belɛ esa akɛ odaseyeli ko ahi shi akɛ Nyɔŋmɔ mumɔ ha aŋma. Esa akɛ efee wolo ni da fe woji krokomɛi fɛɛ. Ni kɛ Biblia lɛ aaanyɛ afee anɔkwa hewalɛwoo kɛ tsɔsemɔ jɛɛhe lɛ, esa akɛ efee nɔ ni anyɛɔ akɛ he fɔɔ nɔ kwraa. No hewɔ lɛ, sanebimɔ nɛɛ yɛ lolo, Ani Biblia lɛ ji nikee nii ni jɛ Nyɔŋmɔ ŋɔɔ lɛlɛŋ? Nyɛhaa wɔkwɛa sanebimɔ nɛɛ hetoo agbɛnɛ.
[Shishigbɛ niŋmai]
a Shi, nikee nii ni da fe enɛ yɛ—Yesu Kristo.—Yohane 3:16.
[Mfonirii ni yɔɔ baafa 3]
William. E. Gladstone
[He ni Sane lɛ Jɛ]
U.S. National Archives photo
Abraham Lincoln
[He ni Sane lɛ Jɛ]
U.S. National Archives photo
Patrick Henry
[He ni Sane lɛ Jɛ]
Harper’s U.S. History
Napoléon Bonaparte
[He ni Sane lɛ Jɛ]
Drawn by E. Ronjat
John Quincy Adams
[He ni Sane lɛ Jɛ]
Harper’s U.S. History
Robert E. Lee
[He ni Sane lɛ Jɛ]
U.S. National Archives photo