Maŋtsɛyeli Jajelɔi Bɔ Amaniɛ
Ní Amɛaaha Amɛla lɛ Akpɛ yɛ India
ODASEFOI 11,524 ni yɔɔ miishɛɛ miishiɛ Maŋtsɛyeli lɛ he sanekpakpa lɛ yɛ lndia. (Mateo 24:14) Mɛi 1,066 ni abaptisi amɛ yɛ 1991 sɔɔmɔ afi lɛ mli lɛ ji Maŋtsɛyeli jajelɔi, ni amɛmiiha amɛla lɛ miikpɛ kɛmiiha mɛi krokomɛi. Kwɛ bɔ ni mɛi fɛɛ na miishɛɛ amɛha akɛ amɛaana akɛ mɛi 28,866 ba Kristo gbele lɛ Kaimɔ lɛ yeli shishi!
◻ Mɛi pii nu Maŋtsɛyeli hiɛnɔkamɔ lɛ klɛŋklɛŋ kwraa kɛtsɔ trukaa odaseyeli nɔ. Akɛ nɔkwɛmɔ nɔ lɛ, Odasefonyo ko kɛ enanemɛi nitsulɔi, ni amɛ hu amɛji kapintɛfoi gba Maŋtsɛyeli lɛ he sane. Nitsulɔi lɛ ateŋ mɔ kome kpɛlɛ nɔ ni eha ela lɛ bɔi kpɛmɔ kɛha ewekumɛi kɛ enanemɛi. Mɛnɛɛmɛi hu kɛ miishɛɛ kpa nɛkɛ Maŋtsɛyeli shɛɛ sane ni yɔɔ naakpɛɛ nɛɛ mli amɛha mɛi krokomɛi. Taakɛ amaniɛbɔi tsɔɔ lɛ, beni shɛɔ afii fioo ko lɛ, ‘mɛi fe 30 ekpɛlɛ anɔkwale lɛ nɔ.’ Yehowa jɔɔ lɛ kɛ emumɔŋ nyɛmimɛi heei lɛ yɛ amɛla ni amɛha ekpɛ lɛ hewɔ.
◻ Nyɛminuu fioo ko hu ni jɛ asafo kroko mli ha ela lɛ kpɛ kɛtsɔ trukaa odase ni eye enanemɛi nikaselɔi yɛ skul lɛ nɔ. Amɛteŋ mɛi komɛi yɛ Maŋtsɛyeli hiɛnɔkamɔ lɛ he miishɛɛ, ni bei babaoo lɛ egbalaa Biblia lɛ mli ehaa amɛ aahu kɛyashiɔ nyɔɔŋ teŋ sɛɛ po. Amɛteŋ mɔ kome, ni ji Katoleknyo lɛ kɔ shidaamɔ ni yɔɔ shiŋŋ kɛha anɔkwale lɛ, yɛ kɔkɔ ni osɔfo lɛ bɔ lɛ akɛ ekɛ lɛ baaye waa kɛji etee nɔ ekɛ Odasefoi bɔ lɛ fɛɛ sɛɛ. Shi, nikaselɔ lɛ na nɔmimaa diɛŋtsɛ akɛ Biblia mli anɔkwale ekaseɔ kɛjɛɔ Odasefoi lɛ aŋɔɔ lɛ, ni etee nɔ ekase nii lɛ. Yɛ be ni sa mli lɛ, abaptisi lɛ, ni amrɔ nɛɛ eesɔmɔ akɛ asafoŋ sɔɔlɔ yɛ asafo lɛ mli. Emli filiɔ lɛ yɛ hiɛnɔkamɔ ni baa kɛtsɔɔ anɔkwale ni ji naakpɛɛ la lɛ nɔ lɛ mli!—Romabii 12:12.
◻ Mɔ kroko hu ni bo nɛkɛ nikaselɔ fioo nɛɛ toi ji nikaselɔ ko ni ale lɛ jogbaŋŋ, ni kɛɔ akɛ Nyɔŋmɔ bɛ, ni eyeɔ mɛi ni kɛɔ akɛ amɛheɔ Nyɔŋmɔ nɔ amɛyeɔ lɛ ahe fɛo, shi gbi ko lɛ ebafata sanegbaa lɛ he ni ebibii saji babaoo lɛ. Efee lɛ naakpɛɛ waa beni ena hetooi ni jwɛŋmɔ yɔɔ mli kɛha esanebimɔi lɛ fɛɛ lɛ, ni enɛ ha emu sane naa akɛ Biblia lɛ ji Nyɔŋmɔ Wiemɔ. Etee hiɛ yɛ Biblia mli nilee mli ni yɛ naagbee lɛ, abaptisi lɛ. Etsɛ ni ji Hindunyo lɛ te shi ewo lɛ aahu akɛ eshwie lɛ kɛjɛ eshia lɛ po. Shi, awo bɔ ni nɛkɛ obalanyo nɛɛ damɔ shi shiŋŋ eha anɔkwale lɛ he nyɔmɔ beni eheloonaa nyɛmimɛi hii enyɔ kɛ enanemɛi enyɔ kpɛlɛ anɔkwale lɛ nɔ ni abaptisi amɛ lɛ. Amrɔ nɛɛ enyɛmimɛi hii lɛ ateŋ mɔ kome miisɔmɔ yɛ nitsumɔ he nine lɛ yɛ India.
◻ Skulbii ahiɛnyiɛlɔ ko hu bafata sane ni Odasefonyo fioo nɛɛ kɛ mɛi krokomɛi gbaa nɛɛ he. Eji mɔ ko ni shɛreɔ zigaret waa ni etɔɔ daa waa hu. Be ko lɛ, kulɛ eetao eyi enanemɛi skulbii enyɔ komɛi ni ekase anɔkwale lɛ kɛjɛ Odasefonyo lɛ ŋɔɔ lɛ. Akɛni amɛkpɛlɛ anɔkwale lɛ nɔ hewɔ lɛ, amɛkɛ amɛhe wooo skul atuatsemɔ nifeemɔ ko mli, ni agbɛnɛ hu amɛjieŋ la amɛhaŋ yɛ la-hamɔ tafaa ko ni nakai skulbii ahiɛnyiɛlɔ lɛ to he gbɛjianɔ lɛ mli. Amrɔ nɛɛ nɛkɛ obalanyo nɛɛ yɛ miishɛɛ waa akɛ eji Yehowa Odasefonyo la hiɛlɔ.
◻ Yɛ fɛɛ mli lɛ, nikaselɔ ni ha ela lɛ kpɛ klɛŋklɛŋ lɛ ena gbɛfaŋnɔ babaoo yɛ etipɛŋfoi 15 ni eye ebua amɛ kɛshɛ henɔjɔɔmɔ kɛ baptisimɔ mli lɛ mli, kɛtsɔ trukaa odase ni eye amɛ lɛ nɔ.
Eji miishɛɛ sane akɛ aaana akɛ mɛi pii miikpɛlɛ Biblia mli hiɛnɔkamɔ ni kɔɔ Nyɔŋmɔ jeŋ hee lɛ he lɛ nɔ yɛ nakai shikpɔŋ agbo lɛ nɔ fɛɛ, ni amɛmiifata jeŋ muu fɛɛ nyɛmifeemɔ ni Yehowa Nyɔŋmɔ buaa amɛnaa koni amɛhi shi kɛya naanɔ yɛ e-Maŋtsɛyeli lɛ shishi lɛ ahe.