“Ŋwɛi Nitsɔɔmɔ” Kpokpaa Wulu nɔ Kpee Lɛ
MƐI fɛɛ ni miishwe ni Yehowa atsɔɔ amɛ nii lɛ kɛ miishɛɛ miikwɛ “Ŋwɛi Nitsɔɔmɔ” Kpokpaa Wulu nɔ Kpee lɛ gbɛ. Gbii ejwɛ wiemɔi ahe gbɛjianɔtoo lɛ baama Ŋmalɛ mli nitsɔɔmɔ fai sɔrɔtoi ni sa kadimɔ ni buɔ Kristofoi ahe yɛ nɛkɛ bei nɛɛ ni adesa diɛŋtsɛ naagbai kɛ je lɛŋ basabasafeemɔ yaa hiɛ waa yɛ mli lɛ nɔ mi. Wiemɔi ahe gbɛjianɔtoo lɛ baaye abua amɛ koni amɛnyɛ amɛdamɔ ‘nɔ fɛɛ nɔ ni teɔ shi woɔ tsɔɔmɔ ni tsaa mɔ’ lɛ naa koni amɛtsɔmɔ Nyɔŋmɔ Wiemɔ lɛ tsɔɔlɔi kpakpai.—1 Timoteo 1:10.
Mɛɛ nɔkwɛmɔ nii kpakpai ni wɔɔkase po wɔyɔɔ nɛkɛ! Tsɔɔlɔ Kpeteŋkpele lɛ jeee mɔ ko mɔ ko akɛ Yehowa Nyɔŋmɔ diɛŋtsɛ! Enɛ hewɔ lɛ, Elihu kɛɛ Hiob yɛ gbɛ ni ja nɔ akɛ, Yehowa ji “mɔ ni tsɔɔ wɔ nilee fe shikpɔŋ lɛ nɔ kooloi lɛ, kɛ ŋaa hu fe ŋwɛi loofɔji lɛ.” Ebi sane yɛ Yehowa he akɛ: “Namɔ ji tsɔɔlɔ tamɔ lɛ?” (Hiob 35:11; 36:22) Awieɔ Nyɔŋmɔ he yɛ Yesaia 30:20 (NW) akɛ “Tsɔɔlɔ Kpeteŋkpele.”
Mɔ pɛ ni yeɔ Yehowa sɛɛ akɛ tsɔɔlɔ ji Yesu Kristo. Ale lɛ akɛ “Tsɔɔlɔ” kɛ “Onukpa” loo “Nuŋtsɔ,” ni awie ehe nɛkɛ aaafee shii 50 sɔŋŋ yɛ Sanekpakpai lɛ amli. Yɛ naakpɛɛ tsamɔi babaoo kɛ naakpɛɛ nii krokomɛi ni efee lɛ fɛɛ sɛɛ lɛ, aleee Yesu akɛ Tsofatsɛ, shi moŋ akɛ Tsɔɔlɔ, Onukpa loo Nuŋtsɔ.—Mateo 8:19; Luka 5:5; Yohane 13:13.
Nɔ ni sa jogbaŋŋ lɛ, Yesu tsɔɔ ekaselɔi kɛ ebɔfoi lɛ nii koni amɛtsɔmɔ tsɔɔlɔi tamɔ lɛ. Wɔbaanyɛ wɔna enɛ kɛjɛ Mateo 10:5 kɛyashi 11:1 kɛ Luka 10:1-11. Beni eshwɛ fioo ni ebaaya ŋwɛi lɛ, Yesu kɛ nitsɔɔmɔ nitsumɔ ni ale waa ni aŋma yɛ Mateo 28:19, 20 lɛ he famɔ ha ekaselɔi lɛ. Bɔfoi lɛ Asaji wolo lɛ, kɛ woji ni nyiɛ sɛɛ ni ajɛ mumɔŋ aŋmala ni yɔɔ Kristofoi a-Hela Ŋmalɛi lɛ amli lɛ tsɔɔ bɔ ni Yesu klɛŋklɛŋ sɛɛnyiɛlɔi lɛ kɛ ekaa, hesaa, kɛ anɔkwayeli tsu nɛkɛ nitsɔɔmɔ nitsumɔ nɛɛ he nii.
Nɛkɛ nitsɔɔmɔ nitsumɔ nɛɛ he miihia waa ŋmɛnɛ fe bei fɛɛ. Nibii agbɛjianɔtoo nɛɛ naagbee gbii lɛ amli wɔyɔɔ lɛ, ni yɛ enɛ hewɔ lɛ, ekɔɔ wala he. Bɔni afee ni mɛi akana Babilon kpeteŋkpele lɛ he eshai lɛ amli gbɛfaŋnɔ ni amɛkana ehaomɔi lɛ eko lɛ, esa akɛ atsɔɔ amɛ nii ni aye abua amɛ ni amɛje Babilon mli, ni amɛkpɛ amɛyiŋ akɛ amɛaasɔmɔ Yehowa kɛ e-Maŋtsɛyeli lɛ.—Kpojiemɔ 18:4.
Bɔni afee ni aye abua Yehowa Odasefoi fɛɛ ni amɛnyɛ amɛtsu amɛ nitsɔɔmɔ nitsumɔ lɛ he nii lɛ, Yehowa etsɔ egbɛjianɔtoo lɛ nɔ ekɛ “Ŋwɛi Nitsɔɔmɔ” Kpokpaa Wulu nɔ Kpee eha. Nɛkɛ gbii ejwɛ kpee nɛɛ baaje shishi kɛbaajɛ Shikpɔŋ lɛ Kooyigbɛ yɛ hulutsoo be lɛ mli. Eba akɛ Yehowa sɔɔlɔ fɛɛ sɔɔlɔ ni ejɔɔ ehe nɔ lɛ kɛaafee oti ni ma ehiɛ akɛ kɛ hoo lɛ eeeya nɛkɛ kpeei nɛɛ ateŋ ekome, ni ehi jɛmɛ, ni ebo wiemɔ lɛ toi kɛjɛ be mli akɛ lala kɛ sɔlemɔ aaaje shishi yɛ Soo shwane kɛyashi be mli ni akɛ sɔlemɔ aaagbe naa yɛ Hɔgbaa shwane.