Ani Okaiɔ?

Ani onya BUU-MƆƆ lɛ ekomekomei ni ba nyɛsɛɛ nɛɛ lɛ akanemɔ he? Ojogbaŋŋ, kwɛmɔ akɛ obaanyɛ oha sanebimɔi ni nyiɛ sɛɛ nɛɛ hetoo lo:

▫ Mɛɛ yelikɛbuamɔ ni sɛɛnamɔ yɔɔ he abaanyɛ akɛha helatsɛmɛi kɛ mɛi ni edara yɛ afii amli yɛ asafo ko mli ŋmɛnɛ?

Yɛ mra be mli Kristofoi asafo lɛ mli lɛ, aŋmala okulafoi ni heloo gbɛfaŋ yelikɛbuamɔ he hiaa amɛ lɛ agbɛi ashwie shi. (1 Timoteo 5:​9, 10) Nakai nɔŋŋ hu ŋmɛnɛ, yɛ shihilɛi komɛi amli lɛ, onukpai baanyɛ aŋmala helatsɛmɛi kɛ mɛi ni edara ni yelikɛbuamɔ titri ko he hiaa amɛ lɛ agbɛi amɛshwie shi. Kɛlɛ, esaaa ni ashiɔ enɛ ahaa asafoŋ onukpai lɛ pɛ koni amɛnyiɛ enɛ feemɔ hiɛ. Esa akɛ asafo lɛ mli bii fɛɛ ahiɛ ahi hiamɔ nii ni tamɔ enɛɛmɛi anɔ. (1 Timoteo 5:​4-8)​—8/15, baafai 28-9.

▫ Ani anyɛŋ ahe Biblia mli sane ni tsɔɔ akɛ ŋshɔŋ kooloo ko mi Yona lɛ aye?

Abaanyɛ ahe aye, bonso wulu kɛ edaaŋ nyanyɔji ogboole agbo ko ni yeɔ gbɔmɔ, loo bonso ni tamɔ ogboole lɛ baanyɛ ami gbɔmɔ. Kɛfata he lɛ, Yesu diɛŋtsɛ ma nɔ mi akɛ Yona sane lɛ yɛ mli anɔkwale. (Mateo 12:​39, 40)​—8/15, baafa 32.

▫ Mɛɛ oshara jɛɔ sɛbɛi kɛ ŋkunyaayeli nibii ni akɛtsuɔ nii kɛ hemɔkɛyeli gbonyo lɛ mli baa?

Enɛɛmɛi kɛ nitsumɔ jeɔ gbɔmɛi anijiaŋ wui moŋ, ni amɛkɛ nilee kpakpa ekpeee amɛnaagbai lɛ anaa, shi moŋ ewoɔ amɛ hewalɛ ni amɛkɛ amɛhiɛ afɔ̃ shade kpakpa nɔ akɛ nibii fɛɛ anaa tsabaa. Enɛɛmɛi hu haa mɔ ni kɛtsuɔ nii lɛ nuɔ apasa shweshweeshwe shihilɛ he. Nɔ ni fe fɛɛ Iɛ, mɔ ni naa hemɔkɛyeli yɛ ashwaiafeemɔ sɛbɛi kɛ shade kpakpa hewalɛi amli lɛ ŋmɛɛɔ eshihilɛ kudɔmɔ he ehaa daimonioi ahewalɛi ni anaaa amɛ.​—9/1, baafa 4.

▫ Mɛni ji nibii ejwɛ ni baanyɛ aye abua ni gbalashihilɛ sɛɛ atsɛ?

Enɛɛmɛi ji bɔ ni asumɔɔ ni abo toi, nyɛ ni anyɛɔ akpaa fai, nyɛ ni anyɛɔ akɛ henumɔŋ sɛɛfimɔ ni tsaa nɔ daa haa, kɛ bɔ ni asumɔɔ ni ajɛ suɔmɔ mli akɛ niji atara he. (1 Korintobii 13:​4-8; Efesobii 5:​33; Yakobo 1:19)​—9/1, baafa 20.

▫ Mɛni ji gbɛ kome ni Yehowa tsɔɔ nɔ ekɛ tsuishiŋmɛɛ haa mɛi ni kɛ kaai kpeɔ Iɛ?

Yehowa feɔ enɛ kɛtsɔɔ tsuishiŋmɛɛ he nɔkwɛmɔ nii ni aŋmala yɛ e-Wiemɔ ni ji Biblia lɛ mli lɛ nɔ. (Romabii 15:⁠4) Yɛ be mli ni wɔsusuɔ enɛɛmɛi ahe waa lɛ, belɛ jeee akɛ aawo wɔ hewalɛ ni wɔŋmɛ wɔtsui shi kɛkɛ, shi moŋ ni wɔkase bɔ ni wɔɔfee wɔŋmɛ wɔtsui shi lɛ he nii babaoo.​—9/15, baafai 11-12.

▫ Mɛni ji nyɔŋmɔjamɔ hetuu-kɛhamɔ?

Nyɔŋmɔjamɔ hetuu-kɛhamɔ tsɔɔ hetuu-kɛhamɔ ni akɛhaa Yehowa ni no tsirɛɔ wɔ koni wɔfee nɔ ni saa ehiɛ, yɛ kaai ni mli wawai ashishi po, ejaakɛ wɔsumɔɔ Nyɔŋmɔ kɛjɛɔ wɔtsui mli.​—9/15, baafa 15.

▫ Te esa akɛ wɔna Nyɔŋmɔ mɔbɔnalɛ lɛ wɔha tɛŋŋ?

Esaaa ni wɔbaa Nyɔŋmɔ mɔbɔnalɛ kpeteŋkpele lɛ shi kɔkɔɔkɔ. Esa akɛ wɔfee tamɔ Paulo ni wɔjie hiɛsɔɔ kpo kɛtsɔ wuu ni wɔɔwuu wɔshi emuu ni wɔ diɛŋtsɛ wɔyeee lɛ nɔ. (1 Korintobii 9:27) Yɛ nɛkɛ gbɛ nɔ lɛ wɔbaatsɔɔ akɛ, wɔkɛ anɔkwayeli miisumɔ ni wɔfee nɔ ni ja yɛ shihilɛi ni mli wawai po mli.​—10/1, baafa 23.

▫ Mɛni hewɔ eja gbɛ akɛ Paulo kɛ tsuishitoo aaaye klɛŋklɛŋ gbɛhe beni etsɔɔ nɔ ni suɔmɔ ji lɛ mli lɛ?

Awie akɛ nɔ ko ni ji Kristofoi anaanyobɔɔ ko ehiŋ shi kɛ tsuishitoo bɛ, loo kɛ wɔsumɔɔɔ ni wɔŋmɛɔ wɔtsui shi wɔhaa wɔhe. Nakai eji, ejaakɛ wɔ fɛɛ wɔyeee emuu, ni emuu ni wɔyeee lɛ kɛ wɔfatɔɔi lɛ kaa mɛi krokomɛi. No hewɔ lɛ, tsuishitoo ji oti kɛ suɔmɔ baahi nyɛmimɛi ateŋ.​—10/15, baafa 21.

▫ Ani klɛŋklɛŋ Kristofoi lɛ kɛ Nyɔŋmɔ gbɛi tsu nii?

Odaseyeli tsɔɔ akɛ hɛɛ. Yesu tsɔɔ esɛɛnyiɛlɔi lɛ ni amɛsɔle amɛha Nyɔŋmɔ akɛ:”Ha ogbɛi lɛ he atse.” (Mateo 6:​9, New world Translation) Ni yɛ esɔɔmɔ nitsumɔ lɛ naagbee lɛ, esɔle akɛ: ‘Mijie ogbɛi lɛ ashi mitsɔɔ gbɔmɛi ni oŋɔ amɛ kɛjɛ je lɛŋ oha mi lɛ.” (Yohane 17:⁠6) kɛfata he lɛ, Nyɔŋmɔ gbɛi yɛ mra be mli Septuagint woji lɛ amli ni akɛ Hebri Tetragrammaton okadii eŋmala.​—11/1, baafa 30.

▫ Mɛɛ Biblia mli nɔkwɛmɔ nii tsɔɔ akɛ gbɛ ni wɔtsɔɔ nɔ wɔtsuɔ wɔtɔmɔi ahe nii lɛ baanyɛ asa wɔshihilɛi ahe?

Maŋtsɛ Saul kɛ kuɛŋtimɔ kpoo ŋaawoo, ni etɔmɔi lɛ ku ebɔ he, yɛ naagbee lɛ, enɛ kɛ egbele ba akɛ mɔ ni bɛ Nyɔŋmɔ nɔkpɛlɛmɔ. (1 Samuel 15:​17-29) Yɛ gbɛ kroko nɔ lɛ, yɛ Maŋtsɛ David tɔmɔi kɛ eshai lɛ fɛɛ sɛɛ lɛ, ekɛ tsuitsakemɔ kpɛlɛ jajemɔ nɔ ni etee nɔ eye Yehowa anɔkwa. Biblia mli nɔkwɛmɔ nii nɛɛ tsɔɔ akɛ kɛ wɔkpɛlɛ wɔtɔmɔi anɔ lɛ eyeɔ ebuaa wɔ ni wɔnaa wɔkɛ Nyɔŋmɔ teŋ wekukpaa kpakpa ni agbɛnɛ ehaa wɔnaa naanɔ wala he gbɛkpamɔ. (Lala 32:​1-5)​—11/15, baafai 29-30.

▫ Mɛɛ gbɛ nɔ Yehowa tsɔɔ eyeɔ ebuaa ewebii yɛ, kɛ amɛbaje amanehulu mli yɛ adebɔɔ mli osharai loo nibii krokomɛi ahewɔ lɛ?

Yehowa yeɔ ebuaa, jeee kɛtsɔ adebɔɔ mli hewalɛi lɛ atsakemɔ kɛmiiya sɛɛsɛɛ yɛ naakpɛɛ gbɛ nɔ aloo kɛtsɔ naakpɛɛ nifeemɔ kroko ko nɔ, shi moŋ kɛtsɔ hewalɛ kroko ni mɛi pii nuuu shishi diɛŋtsɛ lɛ nɔ​—suɔmɔ. Hɛɛ, Yehowa sumɔɔ ewebii lɛlɛŋ, ni edu suɔmɔ ni amɛyɔɔ amɛha amɛhe lɛ ewo amɛmli, ni emli wa aahu akɛ enyɛɔ etsuɔ nɔ ni feɔ tamɔ naakpɛɛ nii lɛ ehaa amɛ.​—(1 Yohane 4:​10-12, 21) ​—12/1, baafa 10.