Jeŋ ni Hi—Ani Eji Lamɔ ko Kɛkɛ?

EJI Mazda jamɔ ni Iran gbalɔ Zoroaster shiɛ etsɔɔ lɛ sɛɛnyiɛlɔ ji bo kulɛ, obaamɛ gbi ni shikpɔŋ lɛ baaku sɛɛ efee fɛo tamɔ bɔ ni eji kɛjɛ shishijee mli lɛ. Eji ohi blema Hela maŋ lɛ mli kulɛ, ekolɛ obaala ni ooshɛ Shade Kpakpa Ŋshɔkpɔi ni toiŋjɔlɛ kɛ miishɛɛ yɔɔ nɔ lɛ anɔ, aloo oona Yinɔ Kpakpa ni lalafolɔ Hesiod ni hi shi yɛ afii ohai kpaanyɔ D.Ŋ.B. lɛ wie he lɛ miiku sɛɛ kɛmiiba ekoŋŋ. Ekolɛ Guaraní Indianyo ni yɔɔ Amerika Wuoyigbɛ lɛ kã he eetao Shikpɔŋ ni Efɔŋ Bɛ Nɔ lɛ lolo. Yɛ wɔbe nɛɛ mli shihilɛ mli lɛ, ekolɛ ohiɛ ka nɔ akɛ je lɛŋ shihilɛ baahi kɛtsɔ maŋkwramɔŋ susumɔ ko nɔ, aloo kɛtsɔ ŋmɛnɛŋmɛnɛ beaŋ jwɛŋmɔ ni agbala kɛba nibii ni ebɔle adesai anɔ lɛ nɔ.

Yinɔ Kpakpa, Shade Kpakpa Ŋshɔkpɔi, Shikpɔŋ ni Efɔŋ Bɛ Nɔ—enɛɛmɛi fata gbɛi sɔrɔtoi ni akɛtsɛɔ nɔ kome ni mɛi fɛɛ taoɔ, ni ji hiɛnɔkamɔ kɛha jeŋ ni hi lɛ he.

Eka shi faŋŋ akɛ, je nɛɛ, ni ji wɔje lɛ jeee he ko ni hi. Awuiyeli ni miiya hiɛ daa, nyɛmimɛi ni gbeɔ amɛhe yɛ yiwalɛ tai ni anako eko dã mli, adesai akui ahiɛkpatamɔ, mɛi krokomɛi amanehului ni asusuuu he, ohia kɛ hɔmɔ, nitsumɔ ni anaaa kɛ ekomefeemɔ ni bɛ, adebɔɔ mli nibii ahe naagbai, helai ni anyɛɛɛ atsa, ni mɔmɔɔ mɛi akpekpei abɔ—abaanyɛ ato amrɔ nɛɛ haomɔi lɛ anaa ni esɛɛ efooo. Beni esusuɔ tai ni awuɔ amrɔ nɛɛ ahe lɛ, Italianyo adafitswalɔ ko wie akɛ: “Sane ni mɔ fɛɛ mɔ baabi nɔŋŋ ji akɛ ani jeee béi loo nɔmɔ ji henumɔ ni mli wa fe fɛɛ yɛ wɔbe nɛɛ mli.” Kɛ okwɛ shihilɛ ni yɔɔ lɛ, ani osusuɔ akɛ nilee yɛ mli akɛ aaakpa shihilɛ sɔrɔto ko, ni hi fe enɛ gbɛ? Aloo ani gbɛkpamɔ ni tamɔ nɛkɛ lɛ ji emuuyeli shihilɛ he susumɔi foji ni mɛi shweɔ, lamɔ ko ni baŋ mli kɔkɔɔkɔ? Ani jeŋ ni hi fe fɛɛ ni wɔɔnyɛ wɔna lɛ mli wɔyɔɔ nɛɛ?

Jeee susumɔi heei nɛ. Afii ohai abɔ nɛ ni adesai eshwe aahu akɛ amɛaana jeŋ ni gbeekpamɔ, jalɛsaneyeli, shweremɔ, kɛ suɔmɔ ehe shi yɛ mli. Beni be hoɔ yaa lɛ, jeŋ nilelɔi babaoo gbala susumɔi ni amɛhiɛ yɛ Maji ni hi kɛmɔ shi, aloo jeŋ sɔrɔtoi ni hi lɛ ahe lɛ mli jogbaŋŋ. Shi, dɔlɛ sane ji akɛ, amɛnyɛko amɛtsɔɔ bɔ ni aaafee ni etsu nii yɛ omanyeyeli mli lɛ mli.

Ani nɛkɛ lamɔi, emuuyeli shihilɛ he susumɔi foji, kɛ adesai agbɛkpamɔ kɛha shihilɛ ni hi, ni ehi shi aahu afii ohai abɔ lɛ baanyɛ atsɔɔ wɔ nɔ ko?

[Mfoniri ni yɔɔ baafa 3]

Ani jeŋ ni hi fe fɛɛ ni wɔɔnyɛ wɔna nɛ?