Ani Okaiɔ?

Ani onya Buu-Mɔɔ ni baa nyɛsɛɛ nɛɛ lɛ ahe? Kɛji nakai ni lɛ, obaana he miishɛɛ akɛ oookai nɔ ni nyiɛ sɛɛ nɛɛ:

▫ Ani anyɛɔ anaa jamɔ mli anɔkwale lɛ? Yesu Kristo kɛɛ: “Ni nyɛaale anɔkwale lɛ, ni anɔkwale lɛ aaaha nyɛye nyɛhe.” (Yohane 8:32) Jeee akɛ Yesu tsɔɔ akɛ nine baanyɛ ashɛ anɔkwale lɛ nɔ kɛkɛ, shi etsɔɔ akɛ enamɔ he miihia yɛ jamɔ ni wɔkɛhaa Nyɔŋmɔ lɛ mli. Ekɛɛ Samaria yoo ko akɛ: “Anɔkwa jalɔi lɛ aaaja Tsɛ lɛ yɛ mumɔ kɛ anɔkwale mli.” (Yohane 4:23)—4/15, baafa 5.

▫ Namɔ ji Robert Estienne, ni te fee tɛŋŋ ni eshi ekadimɔ nii yɛ esɛɛ lɛ? Robert Estienne ji woji akalalɔ ni hi shi yɛ afii ohai 16 lɛ mli. Etu ewala eha Ŋmalɛi Krɔŋkrɔŋi lɛ akalamɔ, ni ebɔ mɔdɛŋ ni enu Biblia mli shishijee wiemɔi lɛ ashishi taakɛ aŋma aha lɛ pɛpɛɛpɛ. Gbɛjianɔ ni eto koni ejara Biblia lɛ mli efee amɛ kukuji ni yibɔ okadii yɔɔ he lɛ ji gbɛjianɔtoo ni akɛtsuɔ nii yɛ jeŋ fɛɛ ŋmɛnɛ.—4/15, baafai 10, 14.

▫ Wɔnaa Biblia lɛ kanemɔ daa gbi lɛ he sɛɛ yɛ mɛɛ gbɛ nɔ? Wɔnaa shishinumɔ heei kɛjɛɔ Ŋmalɛi lɛ amli be fɛɛ be, ni gbalɛi ni kɔɔ naagbee gbii lɛ ahe lɛ bafeɔ naakpɛɛ sane babaoo yɛ nɔ ni wɔna, wɔnu, ni wɔ diɛŋtsɛ wɔkpa shi wɔna lɛ hewɔ. Yɛ be mli ni wɔ niiashikpamɔ yɛ shihilɛ mli lɛ mli lɛɛɔ ni wɔnyɛɔ wɔdamɔɔ naagbai anaa lɛ, wɔhiɛ sɔɔ Biblia mli ŋaawoo babaoo. (Abɛi 4:18)—5/1, baafa 14.

▫ Te aaafee tɛŋŋ akai Biblia mli ŋmalɛi? Beni okaneɔ Biblia lɛ, kadimɔ ŋmalɛi ni osumɔɔ ni okai lɛ, loo ŋmaa owo woji bibii anɔ, ni okɛ woji bibii nɛɛ ahɔlɔ he ni obaanyɛ ona daa gbi. Yɛ be mli ni obɔɔ mɔdɛŋ ni okase ŋmalɛi nɛɛ owo oyitsoŋ lɛ, jwɛŋmɔ nɔ, ni okɛtsu nii. Kaakase babaoo tsɔ owo oyitsoŋ, ekolɛ ekome loo enyɔ daa otsi.—5/1, baafai 16, 17.

▫ Mɛɛ saji yɔɔ Luka Sanekpakpa lɛ mli kɛfata nɔ ni Sanekpakpa ŋmalalɔi krokomɛi lɛ kɛha lɛ ahe? Yɛ be mli ni nɔ ni Luka ŋma lɛ babaoo tamɔ nɔ ni yɔɔ Mateo sane lɛ mli lɛ, emli oha mli 59 yɛ sɔrɔto. Luka ŋma naakpɛɛ nibii ekpaa ni yɔɔ sɔrɔto he sane yɛ ewolo lɛ mli, ni ebɔ Yesu abɛbuai lɛ ahe amaniɛ shii toi enyɔ fe bɔ ni Sanekpakpa ŋmalalɔi krokomɛi lɛ fee.—5/15, baafa 12.

▫ Mɛɛ anɔkwale la-kpɛmɔi ni ekaaa ajie amɛ kpo yɛ 1935? Nakai afi lɛ mli Yehowa webii banu shishi akɛ asafo babaoo ni atsi amɛ ta yɛ Kpojiemɔ 7:9, 14 lɛ kɔɔɔ ŋwɛi kuu ko ni ji enyɔ he, shi ekɔɔ mɛi ni hiɛ shikpɔŋ nɔ hiɛnɔkamɔ lɛ ahe. (Yohane 10:16)—5/15, baafa 20.

▫ Mɛɛ gbɛi pɔtɛɛ anɔ wɔbaanyɛ wɔtsɔ wɔshɛje mɛi ni agbo ashi amɛ lɛ amii? Bo amɛ toi. Okɛ hiɛnɔkamɔ aha. Okɛ ohe aha. Okɛ hegbɛ lɛ atsu nii kɛ esa. Ŋmaa wolo ni shɛjeɔ mɔ mii. Okɛ amɛ asɔle. (Yakobo 5:16) Yaa nɔ oye obua amɛ.—6/1, baafai 13, 14.

▫ Mɛni mumɔŋ nyɛmimɛi hii kɛ yei baanyɛ afee ni amɛkɛye amɛbua mɛi ni yɔɔ wekui ni jamɔ egbala amɛmli lɛ, ni amɛnyɛ amɛŋmɛ amɛtsui shi? Wiemɔ hewalɛwoo wiemɔi, wiemɔi kpakpai, kɛ miishɛjemɔ wiemɔi otsɔɔ amɛ daa. (1 Tesalonikabii 5:14) Enɛ feɔ tamɔ hejɔɔmɔ kɛhaa amɛ jwɛŋmɔ kɛ gbɔmɔtso. Kɛ ebaahi feemɔ ni esa lɛ, okɛ amɛ afata oteokrase kɛ hiɛtserɛjiemɔ nifeemɔi ahe. Tsii amɛ ta yɛ osɔlemɔi amli. (Romabii 1:9; Efesobii 1:16)—6/1, baafa 29.

▫ Mɛɛ nyɔmɔwoo baa kɛjɛɔ tsuishiŋmɛɛ ni ajieɔ lɛ kpo beni akɛ he ewo sɔɔmɔ nitsumɔ lɛ mli lɛ mli? Tsuishitoo yeɔ ebuaa Maŋtsɛyeli shiɛlɔ lɛ ni eŋmɛɔ etsui shi yɛ shikpilikpii-feemɔ loo shitee-kɛ-woo fɛɛ mli. Yɛ nɔ najiaŋ ni amɛkɛ shiatsɛmɛi aaaje ŋwane kɛ mlifu lɛ, sɔɔlɔi ni toɔ amɛtsui shi kɛ mlijɔlɛ hetoo baaha loo amɛbaashi jɛmɛ diŋŋ, koni amɛhiɛ toiŋjɔlɛ kɛ miishɛɛ mli. (Mateo 10:12, 13) Agbɛnɛ hu, ebaagbala mɛi ni tamɔ gwantɛŋi lɛ kɛba Maŋtsɛyeli sane lɛ he.—6/15, baafa 12.

▫ Mɛni hewɔ Biblia mli anɔkwale ni aleɔ lɛ he yɔɔ sɛɛnamɔ waa lɛ? Anɔkwale lɛ ni wɔleɔ lɛ haa wɔyeɔ wɔhe kɛjɛɔ amalei, lakamɔi, kɛ apasa hemɔkɛyelii ahe. Kɛ wɔhi shi yɛ naa lɛ, anɔkwale lɛ wajeɔ wɔ ni ehaa wɔŋmɛɔ wɔtsui shi yɛ nibii ni mli wawai amli ni ekanyaa wɔ kɛ hiɛnɔkamɔ ni haa wɔnyɛɔ wɔdamɔɔ shi yɛ kaa shishi.—7/1, baafa 8.

▫ Mɛɛ gbɛnaa titri Kristofoi ni afɔ amɛ mu lɛ asafo lɛ ná kɛjɛ heloo naa Israel dɛŋ? Hegbɛ ni amɛkɛaaye Yehowa agbojee lɛ he odase yɛ jeŋmaji lɛ ateŋ. (Yesaia 43:21; 1 Petro 2:9)—7/1, baafa 19.

▫ Mɛni bɔfo Petro wiemɔi akɛ wu ‘kɛ woo’ aha eŋa lɛ tsɔɔ? (1 Petro 3:7) Wu ni kɛ woo haa eŋa lɛ eshwieee ehiɛ shi loo ni eeeba lɛ shi. Shi moŋ, etsɔɔ ewiemɔi kɛ enifeemɔi—yɛ teemɔŋ kɛ faŋŋ—nɔ etsɔɔ akɛ ebuɔ lɛ waa. (Abɛi 31:10-31)—7/15, baafa 19.

▫ Mɛni hewɔ abaanyɛ akɛɛ akɛ eji suɔmɔ gbɛ akɛ aaashwie efɔŋ feelɔ ni tsakeee etsui kɛaajɛ Kristofoi asafo lɛ mli lɛ? Shwiemɔ ji suɔmɔ kɛha Yehowa kɛ egbɛ̀i lɛ kpojiemɔ. (Lala 97:10) Etsɔɔ suɔmɔ kɛha mɛi ni diɔ jalɛ nifeemɔ sɛɛ lɛ, ejaakɛ ejieɔ mɔ ni baanyɛ ana amɛnɔ hewalɛ fɔŋ lɛ kɛjɛɔ amɛteŋ; enɛ hu baa asafo lɛ krɔŋŋfeemɔ yi. (1 Korintobii 5:1-13)—7/15, baafa 25.

▫ Mɛɛ gbɛ nɔ aaatsɔ ayoo “tsulɔ anɔkwafo kɛ nilelɔ” lɛ ni Yesu wie ehe yɛ Mateo 24:45-47 lɛ ŋmɛnɛ? Ayɔseɔ amɛ titri kɛtsɔɔ nii ni amɛtsuɔ yɛ Biblia kasemɔ he woji ni amɛkɛhaa, yɛ “maŋtsɛyeli lɛ he sanekpakpa lɛ” tsɔɔmɔ kɛ eshiɛmɔ nɔ, kɛ Nyɔŋmɔ Wiemɔ, Biblia lɛ, ni amɛkɛ amɛhe kpɛtɛɔ he gbagbalii lɛ nɔ. (Mateo 24:14; 28:19, 20)—8/1, baafa 16.