Maŋtsɛyeli Jajelɔi Bɔ Amaniɛ
Yelikɛbuamɔ Kɛha Mɛi ni “Kumai Yeɔ Amɛ” yɛ Russia Lɛ
“MIISHƐƐ ji mɛi ni jalɛ he hɔmɔ kɛ kumai yeɔ amɛ lɛ, ejaakɛ amɛaatɔrɔ,” Yesu kɛɛ. (Mateo 5:6, NW) Niiashikpamɔi ni nyiɛ sɛɛ lɛ miitsɔɔ bɔ ni Yehowa Odasefoi yeɔ amɛbuaa koni akɛtsu mumɔŋ kumai ni yeɔ mɛi pii yɛ Russia, he ni akɛ nɔ ni fe afii 70 sɔŋŋ tsĩ jamɔ mli heyeli naa lɛ he nii.
▪ Yoo ko ni atsɛɔ lɛ Valentina yɛ Biblia mli sanebimɔi ni hiɛdɔɔ yɔɔ mli, ni ahako hetoo afii babaoo. Akɛ nɔkwɛmɔ nɔ lɛ, ejwɛŋɔ he akɛ: ‘Namɔ Yesu sɔle kɛha?’ Esusu akɛ ekolɛ Yesu sɔle kɛha mɔ ko ni nɔ kwɔ fe lɛ, ni ejwɛŋ nɛkɛ Mɔ nɛɛ gbɛi he.
Etee Russian Ortodɔks Sɔlemɔ lɛ. Shi kɛlɛ, enaaa esanebimɔi lɛ ahetoo yɛ nakai jamɔ lɛ mli. Akɛni emii shɛɛɛ ehe hewɔ lɛ, etee Protestant sɔlemɔ ko hu, shi jɛmɛ hu enaaa hetooi ni yɔɔ faŋŋ. Agbɛnɛ akɛni eleee he ni ebaaya hewɔ lɛ, Valentina bɔi Biblia lɛ kanemɔ, ni ebɔ mɔdɛŋ ní lɛ diɛŋtsɛ ena hetooi lɛ—shi no hu yeee omanye. Esɔle kɛha yelikɛbuamɔ.
Be ko sɛɛ lɛ Yehowa Odasefoi batswa eshinaa lɛ. Amɛjɛ Biblia lɛ mli amɛtsɔɔ lɛ akɛ Nyɔŋmɔ gbɛi ji Yehowa. Yɛ naagbee lɛ, ebale mɔ ni Yesu sɔleɔ kɛhaa lɛ lɛ! Ekɛ Odasefoi lɛ bɔi Biblia lɛ kasemɔ daa. Bei pii lɛ, eshĩɔ kpe nyɔŋ-nyɔŋ fɛɛ ni ekaneɔ woji ni Buu Mɔɔ Asafo lɛ eŋmala lɛ ni ekaneɔ Biblia ŋmalɛi ni atsɛ yɛ mli lɛ hu. Etsɛɛɛ kɛkɛ ni Valentina bamu sane naa akɛ ena anɔkwale lɛ. Aaafee nyɔji etɛ sɛɛ lɛ ekɛ ehe bɔi shiɛmɔ nitsumɔ lɛ mli woo, ni no sɛɛ nyɔji enyɔ lɛ, abaptisi lɛ. Aha sɔlemɔ ni etsɔ nɔ ekɛtao anɔkwale lɛ hetoo.
▪ Odasefonyo ko kɛ bɔs fã gbɛ akɛ eyaashiɛ yɛ he ko ni yɔɔ shɔŋŋ. Beni amɛyaa lɛ, ekɛ obalayoo ko gba Biblia mli shiwooi ahe sane, shi obalayoo lɛ naaa wiemɔ lɛ he miishɛɛ. Nyɔji enyɔ sɛɛ lɛ, Odasefonyo lɛ fã gbɛ nɔ ni ji shii enyɔ nɔ kɛtee jɛmɛ nɔŋŋ akɛ eyaaha maŋshiɛmɔ. Yɛ maŋshiɛmɔ lɛ sɛɛ lɛ, etsi ebɛŋkɛ gbɔ ko ni ba jɛmɛ lɛ ni ebi lɛ akɛ: “Ani mɔ ko kɛ bo ewie sanekpakpa ni yɔɔ Biblia lɛ mli lɛ he dã?” Ni nuu lɛ ha hetoo akɛ, “Hɛɛ, bo okɛ mi wie he.” Odasefonyo lɛ susu akɛ eeye fɛo. Shi obalanyo lɛ tsɔɔ mli akɛ nyɔji enyɔ ni etsɔ hiɛ lɛ mli lɛ, enu sanegbaa ni tee nɔ yɛ Odasefonyo lɛ kɛ obalayoo lɛ teŋ, beni amɛkɛ bɔs lɛ fãa gbɛ lɛ. “Miitao male nibii babaoo, shi oyi shi kɛjɛ bɔs lɛ mli, ni misusu akɛ mikɛ Yehowa Odasefoi ekpeŋ dɔŋŋ. Kɛkɛ ni mikɛ nuu ko ni kɛ Odasefoi kaseɔ Biblia lɛ kpe yɛ minitsumɔ he. No hewɔ lɛ, naa mi!”
Nuu lɛ kɛ eŋa fɛɛ bɔi Biblia lɛ kasemɔ. Yɛ be fioo sɛɛ lɛ, enyɛ ena akɛ nitsumɔ ni etsuɔ lɛ kɛ Biblia shishitoo mlai kpaaa gbee. Akɛni eesumɔ ni ehiɛ henilee kpakpa mli yɛ Nyɔŋmɔ hiɛ hewɔ lɛ, etsake enitsumɔ lɛ. Amrɔ nɛɛ ekɛ hegbɛ fɛɛ hegbɛ gbaa mɛi krokomɛi Nyɔŋmɔ Maŋtsɛyeli lɛ he sane. Eŋa hu miiya hiɛ waa yɛ e-Biblia mli nikasemɔ lɛ mli.
Yehowa Odasefoi ni yɔɔ Russia shikpɔŋkuku agbo lɛ mli lɛ amii shɛɔ amɛhe akɛ amɛfataa he ni akɛɔ gbɔmɛi anɔkwafoi lɛ akɛ: “ ‘Ba!’ Ni mɔ ni kumai yeɔ lɛ lɛ, ha ni eba, ni mɔ ni sumɔɔ lɛ, ha ni ebayɛ wala nu lɛ yaka.”—Kpojiemɔ 22:17.