Yaa Hiɛ yɛ Mumɔŋ Be Fɛɛ Be!
Esa akɛ wɔbu gbi ni abaptisi wɔ lɛ akɛ gbi ni jara wa, ní wɔkaiɔ be fɛɛ be. kɛ hoo kwraa lɛ, no ji gbi ni wɔyajajeɔ yɛ faŋŋ wɔtsɔɔ akɛ wɔjɔɔ wɔhe nɔ akɛ wɔbaasɔmɔ nyɔŋmɔ.
YƐ AŊKROAŊKROI babaoo agbɛfaŋ lɛ, ebiɔ mɔdɛŋbɔɔ babaoo diɛŋtsɛ dani ashɛ he ni tamɔ nɛkɛ—ní mɔ aaakwa subaŋi gbohii ni ehi ehe aahu lɛ, nanemɛi fɔji ni mɔ aaajie kɛaajɛ ehe, susumɔ kɛ jeŋba sui ni ehe shi waa yɛ mɔ mli lɛ tsakemɔ.
No po diɛŋtsɛ lɛ, yɛ be mli ni baptisimɔ ji miishɛɛ be kɛ be ni sa kadimɔ yɛ Kristofonyo shihilɛ mli lɛ, ekã he eji nifeemɔ ko shishijee kɛkɛ. Bɔfo Paulo kɛɛ Kristofoi ni abaptisi amɛ, ní amɛyɔɔ Yudea lɛ akɛ: “Nyɛhaa wɔfɔ̃ɔa Kristo shishijee saji lɛ ahe wiemɔ, ni wɔfoŋ kɛya dalɛ mli.” (Hebribii 6:1) Hɛɛ, ehe miihia ni Kristofoi fɛɛ ‘ashɛ Nyɔŋmɔ bi lɛ nɔ hemɔkɛyeli kɛ ehe nilee ekomefeemɔ lɛ he ni amɛfee nuu ni eye emuu yɛ Kristo dalɛ lɛ susumɔ naa.’ (Efesobii 4:13) Ja wɔtee hiɛ kɛyashɛ dalɛ mli dani wɔbaanyɛ ‘wɔfĩ shi yɛ hemɔkɛyeli lɛ mli’ jogbaŋŋ.—Kolosebii 2:7.
Yɛ afii fioo ni eho lɛ mli lɛ, jálɔi heei akpei ohai abɔ ní ejɔɔ amɛhe nɔ eba Kristofoi asafo lɛ mli. Ekolɛ amɛteŋ mɔ kome ji bo. Taakɛ onyɛmimɛi ni hi shi yɛ klɛŋklɛŋ afii oha lɛ mli lɛ ji lɛ, osumɔɔɔ ni oyaa nɔ ohiɔ mumɔŋ abifabii ashihilɛ mli. Oosumɔ ni oda, ní oya hiɛ! Shi yɛ mɛɛ gbɛ nɔ? Ni mɛɛ gbɛ̀i komɛi obaanyɛ otsɔ nɔ oná hiɛyaa ni tamɔ nɛkɛ?
Hiɛyaa Kɛtsɔ Teemɔŋ Nikasemɔ Nɔ
Paulo kɛɛ Kristofoi ni yɔɔ Filipi lɛ akɛ: “Enɛ he fai mikpaa, akɛ nyɛsuɔmɔ lɛ afa kɛya nɔ, ni eteke nɔ fe tsutsu lɛ yɛ nilee kɛ sɛɛyoomɔ fɛɛ gbɛfaŋ.” (Filipibii 1:9) ‘Anɔkwa nilee’ ni aaada yɛ mli lɛ he miihia kɛha omumɔŋ nɔyaa. ‘Yehowa Nyɔŋmɔ kɛ Yesu Kristo he anɔkwa nilee ni aaaná’ ji nifeemɔ ni yaa nɔ daa, jeee nɔ ko ni baa naagbee yɛ baptisimɔ sɛɛ.—Yohane 17:3.
Nyɛmiyoo Kristofonyo ko ni wɔbaatsɛ lɛ akɛ Alexandra ni abaptisi lɛ beni eye afii 16 lɛ bayɔse enɛ yɛ afii nyɔŋma sɛɛ. Atsɔse lɛ yɛ anɔkwale lɛ mli, ni eyaa Kristofoi akpeei daa, ni ekɛ ehe woɔ shiɛmɔ nitsumɔ lɛ mli. Eŋma akɛ: “Yɛ nyɔji fioo ni eho lɛ mli lɛ, miyɔse akɛ naagba ko miiya nɔ waa diɛŋtsɛ. Mikpɛ miyiŋ akɛ mikɛ anɔkwayeli baapɛi mimli jogbaŋŋ makwɛ, bɔ ni misusuɔ anɔkwale lɛ he mihaa, kɛ nɔ hewɔ ni miyɔɔ anɔkwale lɛ mli lolo.” Mɛni ena? Etee nɔ ekɛɛ akɛ: “Mina akɛ yiŋtoi ahewɔ ni miyɔɔ anɔkwale lɛ mli lɛ miihao mi. Mikai akɛ, yɛ be mli ni midaa kɛyaa hiɛ lɛ, ama kpeeiyaa kɛ shiɛmɔyaa nɔ mi. Efee tamɔ nɔ ni teemɔŋ nikasemɔ kɛ sɔlemɔ he súi lɛ baaya nɔ jogbaŋŋ yɛ gbɛ ko nɔ. Shi beni mipɛi mishihilɛ mli mikwɛ lɛ, miyɔse akɛ enɛ baaa lɛ nakai.”
Bɔfo Paulo wo hewalɛ akɛ: “Bɔ fɛɛ bɔ ni wɔtee hiɛ wɔha lɛ, nyɛhaa wɔyaa nɔ wɔnyiɛa pɛpɛɛpɛ yɛ gbɛjianɔtoo nɛɛ nɔŋŋ naa.” (Filipibii 3:16, NW) Gbɛjianɔtoo baanyɛ atsɔɔ gbɛ ni abaatsɔ nɔ aya hiɛ. Dani obaptisimɔ be lɛ shɛ lɛ, ŋwanejee ko bɛ he akɛ oyɛ daa otsi gbɛjianɔtoo ni nitsɔɔlɔ ni he esa kɛ bo bakaseɔ Biblia lɛ. Be mli ni onáa hiɛsɔɔ babaoo kɛyaa hiɛ lɛ, okɛ ohe ni osaa kɛtsɔɔ hiɛ kɛha daa otsi nikasemɔ, ŋmalɛi ni aŋmalako emli wiemɔi lɛ ni otaoɔ yɛ Biblia lɛ mli lɛ kɛ ekrokomɛi bafata gbɛjianɔtoo nɛɛ he. Amrɔ nɛɛ ni abaptisi bo nɛɛ, ani otee nɔ ‘onyiɛ yɛ nakai gbɛjianɔtoo lɛ nɔŋŋ naa’?
Kɛ jeee nakai lɛ, ekolɛ ehe baahia ni opɛi nibii ni okɛyeɔ klɛŋklɛŋ gbɛhe lɛ mli okwɛ ekoŋŋ, ‘koni oyoo nii ni hi titri lɛ.’ (Filipibii 1:10) Yɛ wɔshihilɛi ni dekã bɛ mli lɛ mli lɛ, ebiɔ henɔyeli koni ato be ama shi kɛha teemɔŋ Biblia kanemɔ kɛ ekasemɔ. Shi sɛɛnamɔi jɛɔ mɔdɛŋbɔɔ ni tamɔ nɛkɛ mli kɛbaa. Susumɔ Alexandra niiashikpamɔ lɛ he ekoŋŋ okwɛ. Ekpɛlɛ nɔ akɛ: “Esa akɛ makɛɛ akɛ mihi anɔkwale lɛ mli aahu afii 20 loo nɔ ni fe nakai yɛ be ni eho lɛ mli kɛtsɔ kpeeiyaa kɛ shiɛmɔ nitsumɔ lɛ ni mikɛ mihe woɔ mli kɛkɛ lɛ nɔ.” Shi kɛlɛ, etee nɔ ekɛɛ akɛ, “Mibamu sane naa akɛ eyɛ mli akɛ nibii nɛɛ ahe hiaa moŋ, shi nomɛi pɛ nyɛŋ aye abua mi kɛya nɔ kɛ́ nibii amli bɔi waa. Enɛɛmɛi fɛɛ eje kpo faŋŋ, ejaakɛ mitsuuu miteemɔŋ nikasemɔ súi lɛ ahe nii kwraa dɔŋŋ, ni misɔlemɔi eyaaa nɔ jogbaŋŋ ni emli waaa. Amrɔ nɛɛ miyɔse akɛ esa akɛ majaje misusumɔ ekoŋŋ ni maje nikasemɔ he gbɛjianɔtoo ni shishinumɔ yɔɔ mli lɛ shishi koni manyɛ male Yehowa jogbaŋŋ ni masumɔ lɛ ni mihiɛ asɔ nɔ ni e-Bi lɛ kɛha wɔ lɛ.”
Kɛ yelikɛbuamɔ he miihia bo koni oto teemɔŋ nikasemɔ he gbɛjianɔ ni he yɔɔ sɛɛnamɔ lɛ, onukpai lɛ kɛ Kristofoi krokomɛi ni edara yɛ mumɔŋ ni yɔɔ nyɛ asafo lɛ mli lɛ baaná he miishɛɛ akɛ amɛbaaye amɛbua bo. Kɛfata he lɛ, saji ni je kpo yɛ May 1, 1995; August 15, 1993 Buu-Mɔɔ; kɛ May 15, 1986 The Watchtower lɛ mli lɛ yɛ gbɛtsɔɔmɔi komɛi ni yeɔ ebuaa.
Bɔ ni Ehe Hiaa ni Obɛŋkɛ Nyɔŋmɔ
Shihilɛ kroko ni esa akɛ obɔ mɔdɛŋ koni oya hiɛ yɛ mli lɛ kɔɔ okɛ Nyɔŋmɔ teŋ wekukpaa he. Yɛ shihilɛi komɛi amli lɛ, ekolɛ enɛ he baahia waa. Susumɔ Anthony ni abaptisi lɛ beni eji gbekɛ lɛ he okwɛ. Ekɛɛ akɛ: “Miji gbekɛ ni abaptisi klɛŋklɛŋ yɛ wɔweku lɛ mli. Yɛ mibaptisimɔ lɛ sɛɛ lɛ, mimami kɛ miishɛɛ fua mi. Minako ni ená miishɛɛ waa nɛkɛ pɛŋ. Aná miishɛɛ waa diɛŋtsɛ, ni mina akɛ miyɛ ekãa waa diɛŋtsɛ.” Shi kɛlɛ, nɔ kroko jie ehe kpo yɛ shihilɛ lɛ mli. Anthony tee nɔ ekɛɛ akɛ: “Bei fioo shwie mli ni abaptisiko gbekɛ ko kwraa yɛ wɔ asafo lɛ mli lolo. No hewɔ lɛ miná henɔwomɔ sú waa. Mijieɔ henɔwomɔ sú kpo hu yɛ saji ahetooi kɛ wiemɔi ni mihaa lɛ amli yɛ kpeei ashishi. Gbɔmɛi ni aaajie miyi kɛ amɛhiɛ ni masa bafee nɔ ni he hiaa mi fe fɛɛ fe yijiemɔ ni mikɛaaha Yehowa. Yɛ anɔkwale mli lɛ, mináaa mikɛ lɛ teŋ wekukpaa gbagbalii.”
Taakɛ Anthony ji lɛ, ekolɛ mɛi komɛi ejɔɔ amɛhe nɔ, titri lɛ, koni amɛkɛsa mɛi krokomɛi ahiɛ fe suɔmɔ ni amɛyɔɔ akɛ amɛaasa Yehowa hiɛ. No po diɛŋtsɛ lɛ, Nyɔŋmɔ kpaa gbɛ akɛ mɛi ni tamɔ nakai baahi shi yɛ amɛshiwoo akɛ amɛbaasɔmɔ lɛ lɛ naa. (Okɛto Jajelɔ 5:4 he.) Shi kɛ́ amɛbɛ amɛkɛ Yehowa teŋ wekukpaa gbagbalii lɛ, bei pii lɛ ewaa kɛhaa amɛ akɛ amɛaafee nakai. Anthony kaiɔ akɛ: “Mlifilimɔ ni naa wa ni miná yɛ mibaptisimɔ be lɛ mli lɛ sɛɛ etsɛɛɛ. Eshɛɛɛ afi muu yɛ mibaptisimɔ lɛ sɛɛ ni mikɛ mihe wo efɔŋ ni hiɛdɔɔ yɔɔ mli lɛ mli, ni ehe bahia ni asafo lɛ mli onukpai lɛ akã mihiɛ. Jeŋba shara ni mikɛ mihe wo mli shii abɔ lɛ ha ashwie mi kɛjɛ asafo lɛ mli. Mihenɔjɔɔmɔ kɛha Yehowa lɛ sɛɛ afii ekpaa lɛ, amɔ mi ni awo mi tsuŋ yɛ gbɔmɔgbee hewɔ.”
Yehowa ni Akɛ Lɛ Aaaná Wekukpaa Gbagbalii
Bɔ fɛɛ bɔ ni bo diɛŋtsɛ oshihilɛ yɔɔ ha lɛ, Kristofoi fɛɛ baanyɛ akpɛlɛ Biblia mli ninefɔ̃ɔ nɛɛ nɔ akɛ: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ.” (Yakobo 4:8) Ŋwanejee ko bɛ he akɛ, otsu he nii ni oná okɛ Nyɔŋmɔ teŋ wekukpaa gbagbalii beni obɔi Biblia lɛ kasemɔ klɛŋklɛŋ kwraa lɛ. Okase akɛ, Nyɔŋmɔ jeee nyɔŋmɔ ko ni bɛ diɛŋtsɛ ni ajáa lɛ yɛ Kristendom lɛ, shi eji mɔ ko ni gbɛi ji Yehowa. Okase hu akɛ eyɛ sui ni asumɔɔ, ni ji akɛ eji “Nyɔŋmɔ musuŋtsɔlɔ kɛ durolɔ ni toɔ tsui, ní mɔbɔnalɛ . . . fá pii.”—2 Mose 34:6.
Shi bɔni afee ni ohi shi yɛ ohenɔjɔɔmɔ lɛ naa koni osɔmɔ Nyɔŋmɔ lɛ, esa akɛ obɛŋkɛ lɛ kwraa! Yɛ mɛɛ gbɛ nɔ? Lalatsɛ lɛ sɔle akɛ: “Yehowa, tsɔɔmɔ mi ogbɛ̀i lɛ, ha male otempɔŋi lɛ!” (Lala 25:4) Biblia lɛ kɛ Asafo lɛ woji ni okɛaafee teemɔŋ nikasemɔ baanyɛ aye abua bo koni obale Yehowa jogbaŋŋ. Ní ooosɔle kɛjɛ otsuiŋ daa lɛ he miihia hu. Lalatsɛ lɛ wo hewalɛ akɛ: “Nyɛfɔsea nyɛtsui nyɛshwiea ehiɛ.” (Lala 62:9) Be mli ni onaa akɛ aaha osɔlemɔi ahetoo lɛ, obaanu he akɛ Nyɔŋmɔ yɛ ohe miishɛɛ. Enɛ baaye ebua bo koni onu he akɛ obɛŋkɛ lɛ gbagbalii.
Kaai kɛ naagbai kɛ hegbɛ haa lolo akɛ ooobɛŋkɛ Nyɔŋmɔ. Ekolɛ okɛ naagbai kɛ hemɔkɛyeli he kaai baakpe, tamɔ hela, nɔnyɛɛ ni yɔɔ skul kɛ nitsumɔhe, loo shika mli naagba. Ekolɛ teokrase gbɛjianɔtoo ni sa lɛ po ni ji shiɛmɔ nitsumɔ ni okɛ ohe woɔ mli lɛ, kpeei ni oyaa, loo Biblia ni okɛ obii kaseɔ lɛ ji nɔ ko ni wa kɛha bo. Kaakpee nakai naagbai lɛ anaa okome! Kpa Nyɔŋmɔ fai kɛha yelikɛbuamɔ, ni obi ni ekudɔ bo ni etsɔɔ bo gbɛ. (Abɛi 3:5, 6) Kpa lɛ fai koni eha bo emumɔ krɔŋkrɔŋ lɛ! (Luka 11:13) Be mli ni onáa Nyɔŋmɔ yelikɛbuamɔ ni suɔmɔ yɔɔ mli lɛ, obaabɛŋkɛ lɛ babaoo diɛŋtsɛ. Taakɛ lalatsɛ David tsɔɔ mli lɛ, “nyɛsaa nyɛnaa nyɛkwɛa, ni nyɛaana akɛ Yehowa hi; ajɔɔ gbɔmɔ ni baa lɛ abo lɛ.”—Lala 34:9.
Ni Anthony hu? Ekaiɔ akɛ: “Mibɔi be ni miyɔɔ mumɔŋ otii ni fa babaoo yɛ Yehowa suɔmɔnaa nifeemɔ mli lɛ he susumɔ. Enɛ dɔ mi waa. Shi yɛ haomɔ kɛ nijiaŋwujee lɛ fɛɛ mli lɛ, mikai Yehowa suɔmɔ lɛ. Ehe be fioo dani minyɛ misɔlemɔ miha Yehowa, shi enɛ ji nɔ ni mifee, ni mifɔse mitsuiŋ miha lɛ, ni mibi edɛŋ eshaifaa. Mibɔi Biblia lɛ kanemɔ hu ni efee mi naakpɛɛ akɛ mihiɛ ekpa nibii babaoo nɔ, ni nɔ ko fioo pɛ mile diɛŋtsɛ yɛ Yehowa he.” Eyɛ mli akɛ eshwɛ fioo ni Anthony baaye be ni esa akɛ eye yɛ tsuŋwoo mli yɛ awui ni eye lɛ hewɔ egbe naa moŋ, shi ená Odasefoi ni yɔɔ jɛmɛ lɛ adɛŋ yelikɛbuamɔ ni éshwɛ fioo ebaaná hewalɛ ekoŋŋ yɛ mumɔŋ. Anthony kɛ hiɛsɔɔ wie akɛ: “Yɛ Yehowa kɛ egbɛjianɔtoo lɛ hewɔ lɛ, minyɛ mijie gbɔmɔ momo lɛ kɛjɛ mihe, ni miibɔ mɔdɛŋ koni mawo ehee lɛ gbi fɛɛ gbi. Wekukpaa ni aaakã mi kɛ Yehowa teŋ lɛ ji nɔ ni he hiaa mi fe fɛɛ bianɛ.”
Osɔɔmɔ Nitsumɔ lɛ Mli Mumɔŋ Nɔyaa
Yesu Kristo wo esɛɛnyiɛlɔi lɛ kita koni amɛtsɔmɔ “maŋtsɛyeli lɛ he sanekpakpa” shiɛlɔi. (Mateo 24:14) Akɛni kɛ́ aaawie lɛ, sanekpakpa shiɛlɔ hee ji bo lɛ, ekolɛ niiashikpamɔ ni oyɔɔ yɛ osɔɔmɔ nitsumɔ lɛ mli lɛ faaa. Belɛ te ooofee tɛŋŋ oya hiɛ bɔni afee ni ‘ogbe osɔɔmɔ lɛ naa kwraa’?—2 Timoteo 4:5.
Gbɛ kome ji koni oná jwɛŋmɔ ni ja. Kasemɔ bɔ ni ooofee koni ona shiɛmɔ nitsumɔ lɛ akɛ “jwetri,” ni ji hegbɛ. (2 Korintobii 4:7) Eji hegbɛ ni wɔná akɛ wɔɔjie suɔmɔ, anɔkwayeli kɛ emuuyeli kpo wɔtsɔɔ Yehowa. Eŋmɛɔ wɔ gbɛ hu koni wɔjie hesusumɔ kpo wɔtsɔɔ wɔnaanyo gbɔmɔ. Wɔhe ni wɔkɛaaha ni pɛsɛmkunya bɛ mli yɛ enɛ gbɛfaŋ lɛ baanyɛ afee anɔkwa miishɛɛ jɛɛhe.—Bɔfoi lɛ Asaji 20:35.
Yesu diɛŋtsɛ yɛ jwɛŋmɔ ni ja yɛ shiɛmɔ nitsumɔ lɛ he. Biblia mli anɔkwalei ni egbaa mɛi krokomɛi lɛ tamɔ ‘niyenii’ kɛha lɛ. (Yohane 4:34) No hewɔ lɛ abaanyɛ amu ekãa ni eyɔɔ akɛ eeeye ebua mɛi krokomɛi lɛ naa yɛ ewiemɔ nɛɛ mli akɛ, “Miisumɔ.” (Mateo 8:3) Yesu yɛ musuŋtsɔlɛ kɛha mɛi, titri lɛ mɛi ni Satan je lɛ eha “etɔ amɛ ni amɛfee yuyaa” lɛ. (Mateo 9:35, 36) Ani bo hu ‘oosumɔ’ ni oye obua mɛi ni yɔɔ mumɔŋ duŋ mli ni Nyɔŋmɔ Wiemɔ lɛ mli nilee he hiaa amɛ lɛ? Kɛkɛ lɛ ebaatsirɛ bo koni ohere Yesu kita nɛɛ nɔ: “No hewɔ lɛ nyɛyaa ni nyɛyafea jeŋmaji fɛɛ mikaselɔi.” (Mateo 28:19) Yɛ anɔkwale mli lɛ, ebaatsirɛ bo koni okɛ ohe awo nitsumɔ nɛɛ mli babaoo bɔ ni ogbɔmɔtsoŋ hewalɛ kɛ oshihilɛi baaŋmɛ bo gbɛ.
Yelikɛbuamɔ kroko kɛha hiɛyaa ji ohe ni okɛaawo shiɛmɔ nitsumɔ lɛ mli nɔtonɔto—daa otsi kɛ́ eeehi. Nakai feemɔ baanyɛ aye abua koni eba yiŋkɔshikɔshifeemɔ kɛ gbeyeishemɔ ni baanyɛ atsĩ mɔ ni shiɛɔ yɛ bei komekomei pɛ amli lɛ naa lɛ shi. Shiɛmɔ nitsumɔ lɛ ni okɛ ohe aaawo mli daa lɛ he baaba sɛɛnamɔ aha bo yɛ gbɛ̀i krokomɛi anɔ hu. Ebaaha hiɛsɔɔ ni oyɔɔ kɛha anɔkwale lɛ aya hiɛ, ní eha suɔmɔ ni oyɔɔ kɛha Yehowa kɛ naanyo gbɔmɔ lɛ mli awa, ni eye ebua bo koni okɛ ojwɛŋmɔ ama Maŋtsɛyeli hiɛnɔkamɔ lɛ nɔ babaoo.
Shi kɛ́ shihilɛ ni oyɔɔ mli amrɔ nɛɛ tsĩɔ bo gbɛ kwraa koni okɛ ohe akawo shiɛmɔ nitsumɔ lɛ mli hu? Kɛ eyɛ faŋŋ akɛ nibii amli ni otsakeɔ lɛ nyɛɛɛ aye omanye lɛ, belɛ ná miishɛjemɔ kɛjɛ le ni ooole akɛ nɔ fɛɛ nɔ ni onyɛɔ ofeɔ lɛ saa Nyɔŋmɔ hiɛ lɛ mli, shii abɔ ni okɛ osusuma fɛɛ haa yɛ osɔɔmɔ nitsumɔ lɛ mli lɛ. (Mateo 13:23) Ekolɛ obaanyɛ oya hiɛ yɛ gbɛ̀i krokomɛi amli, tamɔ oshiɛmɔ mli hesaai ni oooha eya hiɛ. Yɛ asafo lɛ mli lɛ, Teokrase Sɔɔmɔ Skul kɛ Sɔɔmɔ Kpee lɛ kɛ tsɔsemɔ fɛfɛo haa yɛ enɛ gbɛfaŋ. Eka shi faŋŋ akɛ, kɛ́ wɔhe esa waa yɛ sɔɔmɔ nitsumɔ lɛ mli lɛ, wɔbaaná mli ŋɔɔmɔ babaoo ni ebaawo yibii.
Belɛ eyɛ faŋŋ akɛ, esaaa akɛ mumɔŋ nɔyaa lɛ damɔɔ he kome yɛ gbi ni abaptisi mɔ lɛ nɔ. Bɔfo Paulo ŋma hiɛnɔkamɔ ni eyɔɔ akɛ eeená shihilɛ ni fiteee yɛ ŋwɛi lɛ he akɛ: “Anyɛmimɛi, mibuuu mihe akɛ minine eshɛ nɔ, shi nɔ kome kɛkɛ: nii ni yɔɔ sɛɛgbɛ lɛ miijie mihiɛ yɛ nɔ, shi nii ni yɔɔ hiɛgbɛ lɛ ahe moŋ mipeleɔ, ni miitiu oti lɛ kɛyashɛ Nyɔŋmɔ tsɛ́mɔ ni jɛ ŋwɛi yɛ Kristo Yesu mli lɛ he juromɔnɔ lɛ he. No hewɔ lɛ mɛi abɔ ni hi kɛwula shi yɛ wɔteŋ lɛ, nyɛhaa wɔjwɛŋa nakai; ni kɛ́ nɔ ko yɛ ni nyɛjwɛŋɔ lɛ ekroko lɛ, Nyɔŋmɔ aaajie no hu kpo atsɔɔ nyɛ.”—Filipibii 3:13-15.
Hɛɛ, Kristofoi fɛɛ, kɛ́ amɛhiɛnɔkamɔ ji shihilɛ ni gbele bɛ mli yɛ ŋwɛi loo naanɔ wala yɛ Paradeiso yɛ shikpɔŋ nɔ jio, esa akɛ ‘amɛpele kɛya hiɛ’—esa akɛ amɛmia amɛhiɛ waa, taakɛ eji lɛ, koni amɛnine ashɛ wala oti lɛ nɔ! Obaptisimɔ lɛ ji shishijee kpakpa, shi klɛŋklɛŋ nifeemɔ kɛkɛ ni. Yaa nɔ omia ohiɛ koni oya hiɛ yɛ mumɔŋ. Kɛtsɔ kpeei kɛ teemɔŋ nikasemɔ nɔ lɛ, ‘feemɔ mɔ ni eda yɛ jwɛŋmɔ gbɛfaŋ.’ (1 Korintobii 14:20) Feemɔ mɔ ni “baanyɛ anu” anɔkwale lɛ “lɛɛmɔ kɛ kɛlɛ kɛ nɔkwɔlɛ kɛ mlikwɔlɛ lɛ shishi.” (Efesobii 3:18, NW) Jeee akɛ nɔyaa ni ofeɔ lɛ baaye abua bo koni omli afili bo daa ni oná miishɛɛ amrɔ nɛɛ kɛkɛ, shi agbɛnɛ koni oná shweshweeshwe shihilɛ yɛ Nyɔŋmɔ jeŋ hee lɛ mli, he ni yɛ eŋwɛi Maŋtsɛyeli nɔyeli lɛ shishi lɛ, obaanyɛ oya hiɛ kɛya naanɔ lɛ!
[Mfoniri ni yɔɔ baafa 29]
Ebiɔ he tsɔsemɔ dani aná be kɛha teemɔŋ nikasemɔ
[Mfoniri ni yɔɔ baafa 31]
Jwɛŋmɔ kpakpa ni wɔɔná baanyɛ aye abua wɔ koni wɔná miishɛɛ yɛ sɔɔmɔ nitsumɔ lɛ mli