Nifeemɔ kɛ Jwɛŋmɔ Kpakpai Kɛha Shweremɔ ni Yaa Hiɛ

¹ Ekolɛ wɔteŋ mɛi pii egbe 1992 Yearbook lɛ kanemɔ naa bianɛ. Le ni wɔleɔ 1991 jeŋ muu fɛɛ nɔyaa ni fe Maŋtsɛyeli shiɛlɔi akpekpei ejwɛ kɛ akpei ohai enyɔ kɛ nyɔŋmai enumɔ​—ni ji oha fɛɛ mli 6.5 nɔyaa lɛ​—haa wɔtsuii nyaa! Eka shi faŋŋ akɛ Maŋtsɛyeli nɔyaa ni yaa nɔ yɛ jeŋ fɛɛ bianɛ lɛ haa Yesaia 2:​2-4 kɛ Mika 4:​1-4 baa mli diɛŋtsɛ yɛ faŋŋ mli.

² Eyɛ mli akɛ 1992 sɔɔmɔ afi lɛ mli akɔntaabuu lɛ yeko emuu moŋ, shi odaseyeli lɛ yɛ faŋŋ akɛ Yehowa kɛ yifalɛ ni ekaaa miijɔɔ nɛkɛ sɔɔmɔ afi nɛɛ. Ninefɔɔ akɛ aba ni abafata wɔ majimaji ateŋ nyɛnifeemɔ lɛ he lɛ miiya nɔ lolo. Yibɔ ni ba Kaimɔ lɛ kɛ kpokpaa wuji anɔ kpeei lɛ ashishi lɛ tsɔɔ akɛ gbɔmɛi akpekpei abɔ miifee toi kɛmiiha Maŋtsɛyeli sane lɛ. Aahere mumɔ naa tsɛmɔ akɛ: “Nyɛbaa ni wɔyakwɔa Yehowa gɔŋ lɛ, kɛyaa Yakob Nyɔŋmɔ lɛ we lɛ, koni etsɔɔ wɔ egbɛi lɛ, ni wɔnyiɛ atempɔŋi lɛ anɔ” lɛ nɔ kɛmiijɛ jeŋmaji fɛɛ mli.

³ Tswaa Ofai Shi akɛ Obaashwere Kɛya Ohiɛ: Yehowa gbɛjianɔtoo lɛ miiya ehiɛ. Akɛni mɛi heei pii miiho yuu kɛmiiba Yehowa anɔkwa jamɔ gɔŋ lɛ nɔ hewɔ lɛ, ehe miihia ni mɔ fɛɛ mɔ ana jwɛŋmɔ kpakpa ni feɔ nii kɛhaa mumɔŋ nɔyaa koni he asa bɔ ni aaanyɛ aye abua mɛi heei lɛ ni amɛ hu amɛfee nakai nɔŋŋ. Bɔ ni nɛkɛ shweremɔ loo nɔyaa nɛɛ he hiaa ha lɛ jeɔ kpo yɛ wiemɔ akɛ mɛi ni hereɔ ninefɔɔ akɛ amɛba Yehowa gɔŋ lɛ nɔ lɛ hu akɛɛ mɛi krokomɛi akɛ, “Nyɛbaa!” lɛ mli. Bɔfo Yohane bɔ nɔ ko ni tamɔ nakai nɔŋŋ he amaniɛ yɛ Kpojiemɔ 22:17: “Ni mumɔ lɛ kɛ ayemforo lɛ kɛɔ akɛ: ‘Ba!’ Ni mɔ ni nuɔ lɛ, ha ni ekɛɛ: ‘Ba!’”

⁴ Yesu fee gbɛ ni esa akɛ atsɔ nɔ akɛ ninefɔɔ nɛɛ aha lɛ he nɔkwɛmɔ nɔ. Beni gbɔmɛi lɛ bo etsɔɔmɔ lɛ toi lɛ, efɔ nine etsɛ amɛ koni amɛkɛ amɛhe abawo esɔɔmɔ nitsumɔ lɛ mli, ni etsɔɔ bɔ ni amɛaafee enɛ amɛha. (Mat. 4:​19; 10:​5-7, 11-14) Ekaselɔi lɛ kase gbɛ ni mɔɔ shi Jogbaŋŋ ni ekɛtsu nii lɛ kɛtsɔ esɛɛ ni amɛnyiɛ kɛ bɔ ni amɛkwɛɔ gbɛ ni etsɔɔ nɔ efeɔ nii ehaa lɛ nɔ. Kɛkɛ ni amɛfee amɛsɔɔmɔ lɛ tamɔ enɔ̃ lɛ pɛpɛɛpɛ. Amɛkase gbɛ ni etsɔɔ nɔ efeɔ nii lɛ Jogbaŋŋ aahu akɛ ekaa ni amɛkɛyeɔ odase lɛ gbala shitee-kɛ-wolɔi lɛ ajwɛŋmɔ ni amɛyoo yɛ faŋŋ mli akɛ amɛji Yesu kaselɔi. Bɔfɔi lɛ Asaji 4:13 bɔ amaniɛ akɛ: “Agbɛnɛ beni amɛna Petro kɛ Yohane ekaa lɛ . . . amɛkɔ sɛɛ akɛ amɛkɛ Yesu hi shi.”

⁵ Dani eeeku esɛɛ kɛaaya ŋwɛi lɛ, Yesu kɛ famɔ ha akɛ esa akɛ ekaselɔi lɛ amɔ Kristofoi asɔɔmɔ nitsumɔ lɛ mli ni amɛha eshwere kɛtsɔ kaselɔi heei ni amɛaafee nɔ, ni amɛtsɔɔ amɛ nii taakɛ amɛ hu atsɔɔ amɛ lɛ pɛpɛɛpɛ. Yesu kɛ famɔ ha yɛ Mateo 28: 19, 20 akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi, . . . ni nyɛtsɔɔ amɛ ni amɛyɛ nii fiaa ni mikɛɛ nyɛ lɛ nɔ.” Ni beni etsɔɔ akɛ eyiŋtoo ji ni enɛ aya nɔ kɛbashi wɔgbii nɛɛ amli lɛ, ekɛ nɔmimaa nɛɛ fata he akɛ: “Ni naa, mi lɛ, mikɛ nyɛ yɛ daa, kɛyashi jeŋ naagbee lɛ.”

⁶ Yesu Kristo anɔkwa kaselɔi lɛ efeko mɛi ni booo efamɔi akɛ amɛtsɔɔ kaselɔi heei lɛ nibii fɛɛ ni ekɛɛ amɛ lɛ toi. Shi nɔyaa ni ekaaa ni yaa nɔ yɛ Yehowa Odasefoi asafoi ni yɔɔ jeŋ fɛɛ lɛ amli lɛ biɔ ni wɔsusu asafo lɛ mli bii ni abaptisi amɛ ehee lɛ kɛ shiɛlɔi ni abaptisiko amɛ lɛ kɛ mɛi ni wɔkɛ amɛ kaseɔ Biblia lɛ ni ekolɛ amɛje shishi akɛ amɛaaha asafoŋ kpeei daa yɛ gbɛ ko nɔ lɛ ahiamɔ nii krɛdɛɛi lɛ ahe.

⁷ Yɛ 1992 sɔɔmɔ afi lɛ shishijee lɛ, shiɛlɔi 9 fɛɛ mli mɔ kome ji mɔ ni kɛ ehe wo sɔɔmɔ lɛ mli nɛɛ ena afi kome pɛ. Kɛfata he lɛ, 6 fɛɛ mli mɔ kome eshiɛ afii etɛ loo nɔ ni shɛɛɛ nakai; ni 1 yɛ mɛi 4 mli kɛ ehe ewo sɔɔmɔ lɛ mli afii enumɔ loo nɔ ni shɛɛɛ nakai. Eyɛ mli akɛ mɛi heei pii ni batsɔmɔ asafo lɛ mlibii lɛ etee amɛhiɛ moŋ, shi ŋwanejee ko bɛ he akɛ yelikɛbuamɔ lolo yɛ gbɛi komɛi anɔ baaye abua ni amɛmumɔŋ nɔyaa lɛ aya nɔ oyayaayai

⁸ Hebribii 6:1 woɔ mɔ fɛɛ mɔ hewalɛ ni “wɔfoŋ kɛya dalɛ mli.” Kristofoi adalɛ tekeɔ sɔɔmɔ nitsumɔ akɔntaabuu pɛ kɛkɛ ni wɔkɛaaha. Etsɔɔ nɔyaa yɛ teemɔŋ nikasemɔ kɛ asafoŋ kpeei ni ayaa daa kɛ agbɛnɛ sɔɔmɔ nitsumɔ lɛ mli ni akɛ he woɔ yɛ ekaa naa. Ekɔɔ mɛi krokomɛi ni aaaye abua amɛ ni amɛna anɔkwale lɛ he nilee ni aaaha amɛna yiwalaheremɔ lɛ hu he. Esa akɛ wɔtsu nii ni wɔhe asa yɛ ‘Ŋmalɛi lɛ ahesusumɔ mli.’ (Bɔf. 17:⁠2) Ni aaaya hiɛ kɛyashɛ mumɔŋ dalɛ he lɛ heɔ be, ni edamɔ wɔ Nyɔŋmɔ jamɔ hetuu-kɛhamɔ kɛ hesaa diɛŋtsɛ ni wɔɔna yɛ shiɛmɔ mli lɛ nɔ titri. Eyɛ mli akɛ wɔ diɛŋtsɛ wɔyeɔ bɔ ni wɔ Nyɔŋmɔ jamɔ hetuu-kɛhamɔ lɛ mli kwɔ ha lɛ nɔ moŋ, shi eji nilee gbɛ akɛ wɔɔha nyɛmimɛi hii kɛ yei ni amɛdara lɛ aye abua wɔ ni wɔhe asa yɛ sɔɔmɔ lɛ mli. Wɔbaanyɛ wɔkase nii kɛjɛ amɛ niiashikpamɔ mli, titri lɛ yɛ sɔɔmɔ nitsumɔ lɛ mli. Ehe ehiaaa ni wɔkase nɔ fɛɛ nɔ wɔ diɛŋtsɛ kɛtsɔ kaa-kɛ-kwɛmɔ nɔ.

⁹ Yelikɛbuamɔ kɛha Mɛi ni He Esako Lɛ: Akɛ gbɛ ni atsɔɔ nɔ ayeɔ abuaa he nɔkwɛmɔ nɔ ha yɛ Kristofoi asafo lɛ shishijee mli. Yesu tsɔse ekaselɔi lɛ. (Mar. 3:​14; Luka 9:1; 10:⁠1) Amɛ hu amɛtsɔɔ mɛi krokomɛi anii. Timoteo nine shɛ hewalɛwoo kɛ yelikɛbuamɔ krɛdɛɛ nɔ kɛjɛ bɔfo Paulo dɛŋ, ni kaselɔ Apolo shwere kɛtsɔ yelikɛbuamɔ ni Akwila kɛ Priskila ni he esa lɛ kɛha lɛ lɛ nɔ. (Bɔf. 18:​24-27; 1 Kor. 4:17) Kristofoi asafo lɛ mlibii ni amɛdara yɛ mumɔŋ lɛ nyiɛɔ nakai nɔkwɛmɔ nii lɛ asɛɛ ŋmɛnɛ, ni amɛtsɔɔ mɛi ni he esako tsɔ lɛ anii ni amɛwoɔ amɛ hewalɛ, titri lɛ mɛi heei lɛ kɛ gbekɛbii. Taakɛ Romabii 15:​1, 2 kɛɔ lɛ, “Wɔ mɛi ni wɔyɔɔ hewalɛ lɛ, esa akɛ wɔkpeeɔ mɛi ni bɛ hewalɛ lɛ kɛ amɛgbɔjɔmɔi lɛ.”

¹⁰ Fɔlɔi ji mɛi ni gbɛnaa nii ka amɛnɔ akɛ amɛkɛ jwɛŋmɔ kpakpa afee nii ni amɛkɛye amɛbua amɛbii ni amɛshwere yɛ mumɔŋ. Enɛ biɔ weku nikasemɔ, tsɔɔmɔ ni aaatsɔɔ gbekɛbii lɛ gbɛ ni atsɔɔ nɔ akaseɔ nii yɛ teemɔŋ, kpeeiyaa daa kɛ amɛhe ni amɛkɛaawo mli, kɛ nɔ ni amɛkaseɔ lɛ ni amɛkɛaatsu nii he niiashikpamɔ (Efe. 6:4; 1 Tim. 5:⁠8) Asafo Woloŋ Nikasemɔ nɔkwɛlɔi lɛ titri ji mɛi ni baanyiɛ hiɛ yɛ gbɛjianɔ ni atoɔ koni akɛye abua mɛi fɛɛ ni yɔɔ nikasemɔ kuu lɛ mli lɛ kɛ mɛi ni baa he ni akpeɔ yɛ kɛhaa shiɛmɔ lɛ koni amɛya amɛhiɛ yɛ mumɔŋ. Sɔɔmɔ nɔkwɛlɔ lɛ kɛ onukpai krokomɛi lɛ kɛ asafoŋ sɔɔlɔi lɛ kɛ mɛi krokomɛi ni yɔɔ asafo lɛ mli lɛ hu baanyɛ aye abua.

¹¹ Nyɛkɛ nɔ ni He Hiaa lɛ Ahaa: Ekolɛ hiamɔ lɛ baanyɛ afee yelikɛbuamɔ yɛ Kristofoi anitsumɔi lɛ fa ko pɛ mli, tamɔ teemɔŋ nikasemɔ nɛkɛ. Ŋaawoo he baahia mɔ ko koni enyɛ eto nikasemɔ he gbɛjianɔ ni anyɛɔ atsuɔ he nii. Yelikɛbuamɔ he baahia mɔ kroko hu yɛ hetoohamɔ loo hesaamɔ yɛ wiemɔ ko ni akɛwo edɛŋ lɛ mli Ekolɛ yelikɛbuamɔ he baahia mɛi krokomɛi ni amɛle he ni Biblia mli saji komɛi yɔɔ kɛtsɔ nibii amlipɛimɔ kasemɔ nɔ.

¹² Yelikɛbuamɔ he miihia mɛi heei pii yɛ shiɛmɔ nitsumɔ lɛ mli. Ekolɛ shiɛlɔ ko baasumɔ ni ehe asa babaoo yɛ shia kɛ shia nitsumɔ lɛ mli, yɛ sɛɛsaramɔ mli, loo Biblia kasemɔ shishijee kɛ efeemɔ mli. Kɛ afee akwɛ shiiabɔ ko kɛtsɔ hiɛkpamɔ kɛ shiɛmɔ wiemɔi ni akɛha yɛ Reasoning wolo lɛ loo Wɔ Maŋtsɛyeli Sɔɔmɔ lɛ mli lɛ nɔ lɛ, ebaanyɛ eye ebua. Yɛ bei krokomɛi amli hu lɛ, ŋaawoi kɛha be he gbɛjianɔtoo kɛha sɔɔmɔ nitsumɔ lɛ kɛ yelikɛbuamɔ koni akɛ he akpɛtɛ he lɛ baanyɛ afee nɔ pɛ ni he hiaa. Gbɛjianɔ ni ajeɔ gbɛ atoɔ koni akɛ mɔ ni yelikɛbuamɔ he hiaa lɛ lɛ atsu nii lɛ baaye abua lɛ koni eya ehiɛ yɛ otii pɔtɛɛ komɛi amli.

¹³ Nyɔŋmɔ Wiemɔ lɛ woɔ wɔ hewalɛ koni wɔha mɛi krokomɛi ana wɔmumɔŋ nɔyaa lɛ. Enɛ ji ŋaawoo ni Paulo ŋma eyaha enaanyo nitsulɔ Timoteo lɛ. (1 Tim. 4:16) Yɛ nakai hewalɛwoo lɛ kɛ gbeekpamɔ naa lɛ, bɔfo lɛ ma bɔ ni ehe hiaa akɛ wɔɔtsɔse wɔhe tamɔ akaŋshilɔi loo tamɔ mɛi ni kɛ amɛhe woɔ mumɔŋ tawuu mli yɛ omanyeyeli mli lɛ nɔ mi. (1 Kor. 9:​24-27; 2 Kor. 10:​5, 6) Esa akɛ wɔhe afee oya ni wɔkɛ nɔ ni wɔkaseɔ yɛ Nyɔŋmɔ suɔmɔnaa nii he lɛ fɛɛ atsu nii, koni mɛi ni naa wɔ lɛ ana akɛ wɔji anɔkwa Kristofoi ahemɔkɛyeli he nɔkwɛmɔ nii ni hiɛ ka diɛŋtsɛ. Nakai nɔŋŋ hu esa akɛ wɔya wɔhiɛ ni wɔhe asa yɛ mɛi krokomɛi ni wɔtsɔɔ amɛ nii koni amɛbatsɔmɔ Yesu Kristo kaselɔi ni amɛjɔɔ amɛhe nɔ lɛ mli.​—Yak. 1:​22-25; 1 Tim. 4:​12-16.

¹⁴ Nɔyaa Biɔ Tsuishiŋmɛɛ Yɛ Kaai Amli: Yesu Kristo po kase nibii wuji kɛjɛ amanehulu ni ena lɛ mli. (Heb. 5:⁠8) Wɔ hu wɔbaanyɛ wɔfee nakai. No hewɔ lɛ, mumɔŋ nɔyaa baa kɛ wɔkɛ jwɛŋmɔ kpakpa ni ajie yi yɛ Yakobo 1:​2, 3 lɛ tsu nii: “Minyɛmimɛi, kɛji nyɛgbee kaai pii amli lɛ, nyɛbua lɛ miishɛɛ sɔŋŋ; ejaakɛ nyɛle akɛ nyɛ hemɔkɛyeli kaa lɛ tsɛɔ tsuishiŋmɛɛ kɛbaa.” No hewɔ lɛ, kɛ esa akɛ wɔdamɔ hela ko ni baaa shi naa jio, ohia mli naagbai, shia ni mli egbala mli shihilɛ, shikpɔŋkuku mli shitee-kɛ-woo, loo shihilɛi krokomɛi ni ehiii lɛ eko naa jio, wɔyɛ nɔmimaa ni jɛ Yehowa ŋɔɔ akɛ, yɛ eyelikɛbuamɔ naa lɛ, wɔbaanyɛ wɔye kunim ni wɔya nɔ wɔshwere yɛ jamɔ ni wɔkɛhaa lɛ lɛ mli. (1 Kor. 10:​13; 2 Kor. 12:9; 1 Pet. 5:​8-11) Ayeɔ omanye kɛtsɔɔ Shiŋŋ-feemɔ yɛ shihilɛi fɛɛ shishi mli lɛ nɔ, ‘beni wɔwieɔ Nyɔŋmɔ jajemɔi krɔŋkrɔŋi lɛ, ni wɔdamɔɔ hewalɛ ni Nyɔŋmɔ kɛhaa lɛ nɔ wɔsɔmɔɔ, koni awo Nyɔŋmɔ hiɛ nyam yɛ nibii fɛɛ mli kɛtsɔ Yesu Kristo nɔ lɛ.’​—1 Pet. 4:⁠11.

¹⁵ Kpɛlɛmɔ Yelikɛbuamɔ nɔ Koni Oshwere Kɛya Hiɛ: Kɛ oji mɔ ko ni yelikɛbuamɔ he miihia bo koni oya ohiɛ lolo yɛ mumɔŋ lɛ, feemɔ mɔ ni sumɔɔ akɛ eeekpɛlɛ yelikɛbuamɔ ni jɛ asafo lɛ mlinyo ko ni he esa babaoo dɛŋ lɛ nɔ. Kɛ mɔ ko bako oŋɔɔ po akɛ eeesumɔ ni eye ebuao lɛ, kaaha hiɛgbele miiha hegbɛ ni okɛaana yelikɛbuamɔ lɛ miŋmɛɛ bo. Bi ni aye abua bo. Okɛ heyeli atao yelikɛbuamɔ kɛjɛ mɛi ni he esa yɛ asafo lɛ mli lɛ ateŋ mɔ fɛɛ mɔ dɛŋ. Aloo ekolɛ obaanyɛ obi nyɛ Asafo Woloŋ Nikasemɔ nɔkwɛlɔ lɛ, sɔɔmɔ nɔkwɛlɔ lɛ, loo onukpai lɛ ateŋ mɔ ko kɛha yelikɛbuamɔ ni he hiaa bo lɛ.​—Okɛto 1 Mose 32:​26; Mateo 1:​7, 8 he.

¹⁶ Eka shi faŋŋ akɛ, eji hegbɛ ni yɔɔ naakpɛɛ akɛ wɔɔfata majimaji ateŋ “asafo babaoo” ni amɛyi faa be fɛɛ be ni hoɔ yuu kɛyaa Yehowa jamɔ krɔŋŋ gɔŋ lɛ nɔ lɛ ahe. (Kpoj. 7:⁠9) Eji hegbɛ hu akɛ wɔɔfɔ nine wɔtsɛ mɛi krokomɛi ni amɛbafata wɔhe yɛ he ni wɔkwɔɔ kɛyaa nɛɛ mli. Eba akɛ wɔkɛ tsuiŋ hiɛsɔɔ aaaya nɔ atsu nii kɛ jwɛŋmɔ kpakpa yɛ nɔyaa lolo he, ni wɔtswa mumɔŋ nibii wɔwo wɔ diɛŋtsɛ wɔmli, ni wɔfee bɔ ni wɔɔnyɛ ni wɔkɛye wɔbua mɛi krokomɛi ni amɛkɛ wɔ ashwere yɛ Yehowa sɔɔmɔ mli.