Yaa nɔ Onyiɛ yɛ Hiɛyaa Mli yɛ Gbɛjianɔtoo Kpakpa Naa

¹ Bɔfo Paulo ná suɔmɔ krɛdɛɛ ko kɛha asafo ni yɔɔ Filipi, ni ena gbɛfaŋnɔ titri yɛ eshishitoo mli lɛ. Ejie hiɛsɔɔ kpo yɛ heloonaa nibii ni amɛjɛ mlihilɛ mli amɛha lɛ lɛ he, ni ewie amɛhe akɛ nɔkwɛmɔ nɔ kpakpa.​—⁠2 Kor. 8:​1-6.

² Suɔmɔ ni mli kwɔ tsirɛ Paulo ni eŋma wolo emaje Filipibii lɛ. Insight wolo lɛ, Kpo 2, baafa 631 bɔɔ amaniɛ akɛ: “Yɛ wolo lɛ mli fɛɛ lɛ, ewo Filipibii asafo lɛ hewalɛ ni amɛya nɔ yɛ gbɛ kpakpa ni amɛnyiɛ nɔ lɛ nɔ​—⁠ni amɛtao sɛɛyoomɔ babaoo ni amɛhiɛ wala Wiemɔ lɛ mli waa, ni amɛna hemɔkɛyeli ni mli wa, kɛ hiɛnɔkamɔ hu yɛ nyɔmɔwoo ni baa lɛ mli.” Amɛkɛ miishɛɛ here nɔ, ni enɛ wo suɔmɔ kpaa ni kã amɛkɛ bɔfo lɛ teŋ lɛ mli hewalɛ. Paulo wiemɔi nɛɛ naa shishinumɔ krɛ­dɛɛ kɛhaa wɔ ŋmɛnɛ, ni ehaa wɔ yiŋtoo kpakpa ni wɔɔdamɔ nɔ wɔsusu eŋaawoo lɛ he jogbaŋŋ, titri lɛ nɔ ni ajaje yɛ Filipibii 3:​15-17 lɛ.

³ Bɔ ni Akɛ Jwɛŋmɔ Kpakpa Kwɛɔ Nii He Miihia: Paulo ŋma nii ni yɔɔ Filipibii 3:15 lɛ akɛ nuu ni kɛ afii babaoo ena niiashikpamɔ. Ewie Filipibii lɛ amumɔŋ hiɛyaa lɛ he, ni ekɛ amɛ wie akɛ Kristofoi ni edara yɛ mumɔŋ, ni yɔɔ jwɛŋmɔŋ su kpakpa. Bei abɔ ni amɛjwɛŋmɔ kpakpa lɛ jieɔ heshibaa kɛ hiɛsɔɔ ni Yesu na lɛ nɔŋŋ kpo lɛ, amɛbaaya nɔ amɛhi shi koni “[amɛ]he akahi shwamɔ, ni [amɛ]fee mɛi krɔŋŋi, Nyɔŋmɔ bii ni he bɛ kpa ko . . . , ni [amɛ]hiɛ wala wiemɔ lɛ mli.” (Filip. 2:​15, 16) Kɛ wɔkane Paulo wiemɔi lɛ, esa akɛ wɔnu he akɛ ekɛ wɔ miiwie. Enɛ hewɔ lɛ wɔkɛ ekaa bɔɔ mɔdɛŋ akɛ wɔɔna jwɛŋmɔ kpakpa ni Yesu ná lɛ eko, ni wɔjie hiɛsɔɔ ni heshibaa yɔɔ mli kpo yɛ hegbɛi ni wɔyɔɔ lɛ he. Wɔyaa nɔ wɔkpaa Yehowa fai yɛ sɔlemɔ mli, ni wɔbiɔ yelikɛbuamɔ yɛ enɛ kɛ saji krokomɛi hu mli.​—⁠Filip. 4:​6, 7.

⁴ Taakɛ Filipibii 3:16 lɛ tsɔɔ lɛ, esa akɛ wɔ fɛɛ wɔbɔ mɔdɛŋ akɛ wɔɔya hiɛ. Wiemɔ “hiɛyaa” lɛ shishinumɔ ji “ni anyiɛ kɛya hiɛ, ni ashwere.” Gbɔmɛi ni yaa amɛhiɛ lɛ “naa susumɔi, nii­amli­tao­mɔi, loo hegbɛi heei ahe miishɛɛ.” Paulo miitao ni Filipibii lɛ anu shishi akɛ Kristojamɔ damɔɔɔ he kome lɛ nɔŋŋ be fɛɛ be, ni no hewɔ lɛ, esa akɛ mɛi ni tsɛɔ amɛhe nakai lɛ akã he aya amɛhiɛ daa nɛɛ. Nɔ ni baajie amɛ hiɛyaa mumɔ lɛ kpo jogbaŋŋ ji bɔ ni amɛsumɔɔ ni amɛpɛi amɛ diɛŋtsɛ amɛmli amɛkwɛ, ní amɛkpɛlɛ amɛ gbɔjɔmɔi anɔ, koni amɛnine ashɛ hegbɛi anɔ ni amɛtsu babaoo aloo ni amɛha nɔ ni amɛtsuɔ lɛ hilɛ aya hiɛ. Ŋmɛnɛ, Yehowa gbɛjianɔtoo ni yɔɔ shikpɔŋ nɔ lɛ kãa he eyaa hiɛ daa nɛɛ, ni elɛɛɔ he ni enitsumɔ yashɛɔ, kɛ shishinumɔ ni eyɔɔ yɛ Nyɔŋmɔ Wiemɔ lɛ he lɛ mli be fɛɛ be. Esa akɛ wɔteŋ mɔ fɛɛ mɔ kɛ lɛ anyiɛ, ni wɔkɛ nibii ni ehaa wɔ lɛ fɛɛ atsu nii, ni wɔna enitsumɔ lɛ mli gbɛfaŋnɔ kɛmɔ shi.

⁵ Hiɛyaa Biɔ ni Akɛ Gbɛjianɔtoo Kpakpa Atsu Nii: Paulo tsa nɔ ni ewo enyɛmimɛi lɛ hewalɛ ni “[amɛnyiɛ] nakai susumɔ kpaa lɛ nɔŋŋ naa.” (Filip. 3:16) Ni aaanyiɛ yɛ gbɛjianɔtoo kpakpa naa lɛ biɔ ni wɔkɛ gbɔmɛi loo nibii awo gbɛhei ni sa amɛ lɛ amli, yɛ wekukpaa ni ka wɔkɛ mɛi krokomɛi ateŋ lɛ gbɛfaŋ, ni wɔba wɔjeŋ jogbaŋŋ hu. Kristofoi ni hi Filipi lɛ tee nɔ amɛhi gbɛhe ni sa amɛ lɛ mli, ni amɛbɛŋkɛ Yehowa gbɛjianɔtoo lɛ kɛ amɛhe hu kpaakpa. Suɔmɔ mla lɛ ji nɔ ni kudɔ amɛshihilɛ. (Yoh. 15:17; Filip. 2:​1, 2) Paulo wo amɛ hewalɛ ni ‘amɛba amɛjeŋ bɔ ni sa sanekpakpa lɛ.’ (Filip. 1:27) Bɔ ni gbɛjianɔtoo kpakpa kɛ jeŋba kpakpa hu he hiaa lɛ he miihia kɛha Kristofoi ŋmɛnɛ hu.

⁶ Gbɛjianɔtoo tsɔɔ nɔ ko ni kã shi ni afeɔ, ni atsuɔ he nii daa. Enɛ hewɔ lɛ ekɛ kusum nifeemɔ loo nɔ ko ni afɔɔ feemɔ yɛ tsakpaa ni bɛŋkɛ kpaakpa. Gbɛjianɔtoo kpakpa ni wɔɔna lɛ baanyɛ aye abua wɔ ejaakɛ ehe ehiaaa ni wɔwa ni wɔsusu saji ahe kɛji wɔmiikpɛ wɔyiŋ yɛ nɔ ni sa akɛ wɔfee kɛtsa nɔ ko nɔ lɛ he​—⁠wɔto nifeemɔ gbɛ ko wɔfɔ̃ shi momo, ni wɔsu nyɛɔ wɔnɔ koni wɔnyiɛ sɛɛ.

⁷ Nibii ni fata teokrase gbɛjianɔtoo kpakpa he ji jeŋbai kɛ nifeemɔi ni he tse, ni he yɔɔ sɛɛnamɔ, ni tsɔɔ Nyɔŋmɔ jamɔ su​—⁠kɛ yiŋtoo akɛ wɔkɛaatswa wɔhe wɔma shi yɛ mumɔŋ, ni wɔye wɔbua mɛi krokomɛi, ni, kɛ eeehi lɛ, wɔfee babaoo yɛ Yehowa sɔɔmɔ mli. Nɛkɛ otii nɛɛ ni aaashɛ he lɛ mli omanyeyeli biɔ ni ato gbɛjianɔ kpakpa ama shi ni anyiɛ sɛɛ daa, ni emli nibii lɛ komɛi ji teemɔŋ nikasemɔ, kpeei ni aaaya daa, kɛ he ni akɛaawo shiɛmɔ nitsumɔ lɛ mli.

⁸ Nibii ni He Hiaa yɛ Gbɛjianɔtoo Kpakpa Mli: Nɔ kome ni he hiaa ji ‘nilee ni ja jogbaŋŋ kɛ sɛɛyoomɔ ni mɔɔ shi.’ (Filip. 1:⁠9) Teemɔŋ nikasemɔ haa wɔhemɔkɛyeli lɛ mli kwɔɔ, ni ewajeɔ hiɛsɔɔ ni wɔyɔɔ kɛha anɔkwale lɛ, ni ekanyaa wɔ kɛyaa nitsumɔi kpakpai ahe. Shi, ewa kɛha mɛi komɛi akɛ amɛkɛ amɛnikasemɔ gbɛjianɔtoo lɛ aaatsu nii daa. Naajiemɔi titrii ni akɛhaa lɛ ekome ji be.

⁹ Sɛɛnamɔi ni yɔɔ Biblia lɛ kanemɔ daa he lɛ nyɛŋ efee nɔ ni ama nɔ mi fe nine. Egbɛtsɔɔmɔ lɛ “hi” yɛ gbɛ fɛɛ gbɛ nɔ. (2 Tim. 3:​16, 17) Te wɔɔfee tɛŋŋ wɔna be kɛha Biblia kasemɔ yɛ wɔ daa gbi nifeemɔ mli? Mɛi komɛi ena akɛ amɛbaanyɛ amɛte shi mra fioo daa leebi, be ni amɛjwɛŋmɔ nyɛɔ emɔɔ nii waa lɛ. Mɛi krokomɛi hu ena akɛ amɛbɔɔ mɔdɛŋ waa kɛji amɛkɛ minitii fioo ko kane nii dani amɛyawɔ gbɛkɛ. Ŋamɛi ni yɔɔ shia yɛ gbi lɛ mli lɛ baanyɛ amɛto be fioo ko yɛ shwane mli dani mɛi krokomɛi lɛ ajɛ nitsumɔ loo skul amɛba shia. Mɛi kro­ko­mɛi hu kɛ Proclaimers wolo lɛ kanemɔ efata daa Biblia kanemɔ lɛ he, yɛ amɛ daa otsi nikasemɔ gbɛjianɔtoo lɛ mli.

¹⁰ Kɛ wɔto nifeemɔ gbɛi heei ashishi lɛ, enyɛɔ ebaa lɛlɛŋ akɛ ekolɛ ekɛ wɔtsutsu nifeemɔ gbɛi lɛ kpaŋ gbee. Ekolɛ tsutsu lɛ, wɔŋmɛɔ nibii ni he ehiaaa lɛ agbɛ ni amɛfiteɔ be ni wɔyɔɔ lɛ eko. Wɔhe ni wɔɔtsi kwraa kɛjɛ nakai nifeemɔ lɛ he lɛ bɛ mlɛo. Mɔ ko mɔ ko bɛ ni baatsɔɔ gbɛi ni sa akɛ wɔtsɔ nɔ wɔkane nii; nakai nɔŋŋ hu abiii ni wɔbu nɔ ni wɔfeɔ yɛ enɛ gbɛfaŋ lɛ he akɔntaa wɔtsɔɔ. Bɔ ni wɔnikasemɔ gbɛi lɛ tsaa nɔ daa ehaa lɛ damɔ hiɛsɔɔ ni wɔyɔɔ wɔha “nii ni hi titri lɛ,” kɛ bɔ ni wɔsumɔɔ akɛ ‘wɔtsu wɔdeka he nii’ koni wɔna he sɛɛ lɛ nɔ babaoo.​—⁠Filip. 1:10; Efes. 5:⁠16.

¹¹ Kristofoi akpeei tsuɔ gbɛfaŋnɔ ni he hiaa yɛ wɔ mumɔŋ hiɛyaa lɛ mli, ni ekɛ gbɛtsɔɔmɔ kɛ hewalɛwoo ni he hiaa wɔ lɛ haa wɔ. No hewɔ lɛ, kpeeiyaa ji wɔ daa nifeemɔ he gbɛjianɔtoo kpakpa lɛ fa kroko ni he hiaa. Paulo ma bɔ ni enɛ he hiaa ha lɛ nɔ mi. Ejeee nɔ ko ni wɔɔhala nɔ ni wɔɔfee, ni damɔ nɔ ni wɔsumɔɔ nɔ.​—⁠Heb. 10:​24, 25.

¹² Mɛɛ gbɛ nɔ wɔɔtsɔ wɔjie gbɛjianɔtoo kpakpa kpo kɛji wɔmiito wɔ daa otsi nitsumɔ he gbɛjianɔ? Mɛi komɛi toɔ bei pɔtɛɛ kɛha amɛ diɛŋtsɛ amɛnibii asɛɛdii, kɛkɛ lɛ amɛmia kpeei lɛ amɛwo bei bibii ni kamɔ teŋ lɛ amli, shi esa akɛ wɔtsake lɛ sɛɛsɛɛ moŋ. Esa akɛ wɔha wɔ daa otsi kpeei lɛ aye klɛŋklɛŋ gbɛhe, ni wɔto nifeemɔi krokomɛi lɛ ahe gbɛjianɔ kɛbɔle nomɛi ahe.

¹³ Kpeeiyaa daa biɔ gbɛjianɔtoo kpakpa kɛ weku ekomefeemɔ. Wɔteŋ mɛi pii yɛ nitsumɔ babaoo tsumɔ yɛ otsi lɛ mli gbii lɛ amli, ni bei pii lɛ ehaaa wɔna be ni fa bɔ ni sa. Enɛ tsɔɔ akɛ, kɛ ebaahi lɛ, esa akɛ ato gbɛkɛ niyeli he gbɛjianɔ oya bɔ ni sa, koni weku lɛ ana be ni fa saŋŋ kɛha niyeli, ni amɛsaa amɛhe, ni amɛshɛ kpee lɛ shishi dani aje shishi. Yɛ enɛ gbɛfaŋ lɛ, weku lɛ mlibii baanyɛ aye abua yɛ gbɛi sɔrɔtoi anɔ.

¹⁴ Kɛji wɔɔya nɔ wɔnyiɛ yɛ hiɛyaa mli yɛ gbɛjianɔtoo kpakpa naa lɛ, no lɛ shiɛmɔ ni wɔɔya daa hu he miihia waa. Wɔ fɛɛ wɔyooɔ gbɛnaa nii ni tsii, ni ka wɔnɔ akɛ wɔshiɛ Maŋtsɛyeli shɛɛ sane lɛ faŋŋ. No ji nɔ ni feɔ wɔ Yehowa Odasefoi lɛ. (Yes. 43:10) Akɛni no ji nitsumɔ ni he hiaa, ni sɛɛnamɔ yɔɔ he fe fɛɛ ni atsuɔ ŋmɛnɛ hewɔ lɛ, gbɛ ko kwraa bɛ ni wɔɔtsɔ nɔ wɔbu lɛ akɛ wɔ nitsumɔi lɛ ekomɛi ni wɔtsuɔ he nii trukaa kɛkɛ. Taakɛ Paulo wo ŋaa lɛ: “Nyɛhaa . . . wɔkɛ yijiemɔ afɔle abahaa Nyɔŋmɔ daa; no ji naabui ni jajeɔ egbɛi lɛ ayibii lɛ.”​—⁠Heb. 13:⁠15.

¹⁵ Kɛ wɔto wɔnitsumɔ he gbɛjianɔ kɛha otsi fɛɛ otsi lɛ, esa akɛ wɔto be pɔtɛɛ ko kɛha shiɛmɔyaa. Ekolɛ asafo lɛ yɛ kpeei kɛha shiɛ­mɔ­yaa ni atoɔ he gbɛjianɔ shii abɔ otsi fɛɛ otsi, ni nɔ ni he hiaa nɔŋŋ ji ni wɔkpɛ wɔyiŋ yɛ nɔ ni wɔkɛ wɔhe baawo mli lɛ he. Ebaahi jogbaŋŋ akɛ wɔɔbɔ mɔdɛŋ wɔshɛ sɔɔmɔ nitsumɔ lɛ fãi sɔrɔtoi lɛ fɛɛ he, tamɔ shia-kɛ-shia ni wɔkɛ woji tɛtrɛbii lɛ kɛ woji krokomɛi baaya, sɛɛ­sa­ra­mɔ yaa, kɛ shia Biblia mli nikasemɔ feemɔ. Ekolɛ wɔɔto gbɛjianɔ kɛtsɔ hiɛ po akɛ wɔɔye odase trukaa kɛtsɔ woji ni wɔɔhiɛ kɛ wɔhiɛ ni aaahi wɔhe nɔ kɛha sanegbaa shishijee lɛ nɔ. Akɛni bei pii lɛ wɔkɛ mɛi krokomɛi yaa shiɛmɔ hewɔ lɛ, ehe miihia ni wɔbi amɛ hu amɛbe he gbɛjianɔtoo koni wɔnyɛ wɔto be he gbɛjianɔ ni baahi aha mɛi enyɔ lɛ fɛɛ.

¹⁶ Esa akɛ wɔhiɛ wɔ daa shiɛmɔ nitsumɔ lɛ mli, yɛ shi­kpili­kpii-feemɔ ni yɔɔ shikpɔŋkuku lɛ mli lɛ fɛɛ sɛɛ. Wɔle kɛtsɔ hiɛ akɛ mɛi fioo pɛ ji mɛi ni baabo wɔ toi kɛ miishɛɛ. (Mat. 13:15; 24:⁠9) Aha Ezekiel nitsumɔ akɛ eshiɛ etsɔɔ gbɔmɛi ‘toigbolɔi, mɛi ni ebuuu nii, ni amɛtsuii hu wa.’ Yehowa wo shi akɛ ebaaye ebua Ezekiel, ni ebaaha ‘ehiɛŋtso awa awo amɛhiɛŋtsei,’ ni tsɔɔ akɛ ebaawa, “tamɔ daimente ni wa fe tswrɛbo.” (Ezek. 2:​3, 4; 3:​7-9) Enɛ hewɔ lɛ daa gbi gbɛjianɔtoo kɛha sɔɔmɔ nitsumɔ lɛ biɔ hiɛmiamɔ.

¹⁷ Nɔkwɛmɔ Nii Kpakpai ni Sa Kasemɔ: Wɔteŋ mɛi pii bɔɔ mɔdɛŋ yɛ shiɛmɔ mli kɛji mɔ ko yɛ ni baanyiɛ hiɛ. Paulo kɛ ehefatalɔi lɛ fee nɔkwɛmɔ nɔ kpakpa amɛfɔ shi, ni ewo mɛi krokomɛi hu hewalɛ ni amɛkase lɛ. (Filip. 3:17) Nɔ ni fata edaa gbi gbɛjianɔtoo he ji nibii fɛɛ ni he hiaa, koni eya nɔ ni ehe awa yɛ mumɔŋ.

¹⁸ Nakai nɔŋŋ, wɔ hu, ŋmɛnɛ ajɔɔ wɔ kɛ nɔkwɛmɔ nii kpakpai. Paulo wo hewalɛ yɛ Hebribii 13:​7 lɛ akɛ: “Nyɛkaia nyɛtsɔɔlɔi . . . lɛ; nyɛkwɛa amɛjeŋba lɛ naagbee lɛ, ni nyɛkasea amɛhemɔkɛyeli lɛ.” Eji anɔkwale akɛ, Kristo ji wɔ Nɔkwɛmɔ Nɔ moŋ, shi wɔbaanyɛ wɔkase mɛi ni nyiɛɔ hiɛ lɛ ahemɔkɛyeli ni amɛjieɔ lɛ kpo lɛ. Taakɛ Paulo ji lɛ, esa akɛ onukpai lɛ ahiɛ ahi amɛhe nɔ akɛ ehe miihia ni amɛfee nɔkwɛmɔ nii kpakpai amɛha mɛi krokomɛi. Eyɛ amli akɛ ekolɛ amɛ aŋkroaŋkro shihilɛ baafee sɔrɔtoi moŋ, shi esa akɛ onukpai lɛ ateŋ mɔ fɛɛ mɔ anyɛ atsɔɔ akɛ ehiɛ gbɛjianɔtoo kpakpa mli yɛ Maŋtsɛyeli lɛ he nibii ni ehaa eyeɔ klɛŋklɛŋ gbɛhe lɛ gbɛfaŋ. Yɛ nitsumɔ kɛ weku mli sɔ̃i agbɛfaŋ po lɛ, esa akɛ onukpai lɛ ahi nifeemɔ gbɛi ni ato shishi jogbaŋŋ, yɛ teemɔŋ nikasemɔ, kpeeiyaa, kɛ hiɛ ni amɛaanyiɛ yɛ shiɛmɔ nitsumɔ lɛ mli lɛ mli. Kɛji onukpai lɛ ye he odase akɛ ‘amɛmiikwɛ amɛ diɛŋtsɛ amɛwe nɔ yɛ gbɛ kpakpa nɔ’ lɛ, ebaawo mɛi ni yɔɔ asafo lɛ mli lɛ fɛɛ hewalɛ ni amɛ hu amɛya nɔ amɛnyiɛ yɛ gbɛjianɔtoo kpakpa naa be fɛɛ be.​—⁠1 Tim. 3:​4, 5. 

¹⁹ Otii Kɛha Sɔɔmɔ Afi Hee Lɛ: Sɔɔmɔ afi lɛ shishijee ji be ni sa jogbaŋŋ ni wɔkɛaasusu wɔ diɛŋtsɛ wɔ daa gbɛjianɔtoo he. Mɛni nɔ ni wɔnyɛ wɔtsu yɛ afi ni ho lɛ mli lɛ he susumɔ jieɔ lɛ kpo? Ani wɔnyɛ wɔhiɛ wɔnitsumɔ lɛ mli nakai nɔŋŋ, aloo kɛ eeehi lɛ, wɔha etee hiɛ fe nakai? Ekolɛ wɔbɔ mɔdɛŋ jogbaŋŋ kɛmɔ shi yɛ wɔ teemɔŋ nikasemɔ mli. Ekolɛ wɔbaa kpeei daa fe tsutsu lɛ aloo ekolɛ wɔha wɔshiɛmɔ nitsumɔ lɛ tee hiɛ kɛtsɔ wɔhe ni wɔkɛwo gbɛgbalɔi awalɔ nitsumɔ lɛ mli lɛ nɔ. Ekolɛ wɔnyɛ wɔtsɔɔ nibii krɛdɛɛi komɛi ni tsɔɔ Kristofoi amlihilɛ, ni wɔfee wɔha mɛi krokomɛi ni yɔɔ wɔ asafo lɛ loo lɛ wɔweku lɛ mli. Kɛji nakai lɛ, no lɛ wɔbaanyɛ wɔna miishɛɛ akɛ wɔnyiɛ gbɛ ni saa Nyɔŋmɔ hiɛ lɛ nɔ, ni wɔyɛ yiŋtoo kpakpa ni baaha “[wɔ]teke nɔ fe tsutsu lɛ.”​—⁠1 Tes. 4:⁠1.

²⁰ Shi kɛji wɔ daa nifeemɔi lɛ bɛ gbɛjianɔtoo kpakpa loo eyɛ jabe­jabe hu? Te esa wɔhe yɛ mumɔŋ eha tɛŋŋ? Ani nɔ ko tsi wɔ hiɛyaa lɛ naa? Hiɛyaa jeɔ shishi kɛ Yehowa yelikɛbuamɔ ni wɔɔbi. (Filip. 4:​6, 13) Okɛ weku lɛ mlibii ni eshwɛ lɛ asusu ohiamɔ nii ahe, ni obi amɛ yelikɛbuamɔ koni okɛfee tsakemɔi yɛ odaa gbi nifeemɔi amli. Kɛ oyɛ naagbai lɛ, bi onukpai lɛ yelikɛbuamɔ. Kɛ wɔkɛ ekaa bɔ mɔdɛŋ ni wɔkpɛlɛ Yehowa gbɛtsɔɔmɔ nɔ lɛ, no lɛ wɔbaanyɛ wɔna nɔmimaa akɛ wɔfeŋ “hejɔlɔi aloo mɛi ni wooo yibii.”​—⁠2 Pet. 1:​5-8.

²¹ Gbɛjianɔtoo kpakpa ni wɔnyiɛɔ yɛ naa lɛ haa wɔnaa jɔɔmɔi ni haa wɔmɔdɛŋbɔi lɛ feɔ nɔ ni sa. Beni otswaa ofai shi akɛ obaanyiɛ yɛ hiɛyaa mli yɛ gbɛjianɔtoo kpakpa naa lɛ, ‘omɔdɛŋbɔɔ lɛ naa akaba shi; omumɔ lɛ he adɔ la; sɔɔmɔ Yehowa.’ (Rom. 12:⁠11)​—⁠Kɛ ootao saneyitso nɛɛ mligbalamɔ babaoo kɛfata he lɛ, kwɛmɔ Buu-Mɔɔ ni je kpo May 1, 1985 lɛ, baafai 10-14.