Sanebimɔ he

◼ Mɛɛ kɔkɔbɔi esa akɛ wɔbo toi beni wɔyeɔ odase wɔtsɔɔ gboklɛfoi lɛ?

Kɛ hoo lɛ, ayɛ gboklɛfoi akpekpei kpaanyɔ yɛ jeŋ fɛɛ, ni amɛteŋ mɛi komɛi jieɔ miishɛɛ kpo yɛ sanekpakpa lɛ he. (1 Tim. 2:4) Nitsumɔhe nine ko nine shɛɔ woji aaafee 1,400 nɔ daa nyɔŋ nɔ kɛjɛɔ gboklɛfoi lɛ kɛ amɛweku lɛ mli bii aŋɔɔ ní amɛkɛmiibi woji loo ni abasara amɛ. Eyɛ mli akɛ gboklɛfoi lɛ ateŋ mɛi babaoo jieɔ anɔkwa miishɛɛ kpo moŋ, shi niiashikpamɔ etsɔɔ akɛ gboklɛfoi lɛ ateŋ mɛi komɛi kwaa amɛjieɔ lɛ kpo akɛ amɛyɛ he miishɛɛ, ni amɛtaoɔ ni amɛná Nyɔŋmɔ webii lɛ ahe sɛɛ yɛ pɛsɛmkunya gbɛ nɔ. Yɛ enɛ hewɔ lɛ, esa akɛ mɛi fɛɛ abo kɔkɔbɔi ni nyiɛ sɛɛ nɛɛ ni kɔɔ gboklɛfoi ni ayeɔ amɛ odase lɛ he lɛ toi.

Yɛ shihilɛi babaoo mli lɛ, ayeɔ gboklɛfoi lɛ odase kɛtsɔ woloŋmaa nɔ. Aajie yi waa akɛ nyɛmimɛi yei akaŋma wolo amɛha gboklɛfoi hii, kɛji oti lɛ ji ni amɛkɛ mumɔŋ yelikɛbuamɔ ko po aha amɛ. Esa akɛ nyɛmimɛi hii ni he esa pɛ atsu gbɛnaa nii nɛɛ he nii. Abaanyɛ aha nyɛmimɛi yei ni he esa lɛ aŋmala gboklɛfoi yei ni etsɔɔ diɛŋtsɛ akɛ amɛyɛ Biblia mli anɔkwale lɛ he miishɛɛ lɛ woji. Akɛ shika loo aŋkroaŋkro nikeenii akamaje gboklɛfoi lɛ, yɛ anɔkwale ni eji akɛ abaanyɛ abi enɛ lɛ fɛɛ sɛɛ.

Kɛ́ mɔ ko ni awo lɛ tsuŋ jie miishɛɛ kpo lɛ, esa ákɛ akɛ egbɛi kɛ edrɛs aha asafo ni bɛŋkɛ he ni tsuŋwoohe lɛ yɔɔ lɛ. Bei pii lɛ, nyɛmimɛi hii ni he esa ni yɔɔ jɛmɛ lɛ le bɔ ni atsuɔ shihilɛi srɔtoi ní baanyɛ ate shi lɛ he nii. Kɛ́ aleee asafo lɛ, no lɛ akɛ sane lɛ amaje nitsumɔhe nine lɛ.

Aŋmɛɔ gbɛ koni nyɛmimɛi hii ni akɛ nifeemɔ ewo amɛdɛŋ lɛ kɛ gboklɛfoi lɛ ato kpeei ahe gbɛjianɔ bɔni afee ni amɛteŋ mɛi babaoo anyɛ akase nii yɛ be kome too lɛ nɔŋŋ mli. Shi kɛlɛ, esaaa akɛ atoɔ nifeemɔi krɛdɛɛi ni baaha shiɛlɔi lɛ kɛ gboklɛfoi lɛ afutu kɛshara shi kɛkɛ he gbɛjianɔ yɛ tsuŋwoohei lɛ. Kɛfata he lɛ, esaaa akɛ shiɛlɔi yasaraa tsuŋwoohe lɛ kɛkɛ bɔ ni esaaa, ní amɛkɛ gboklɛfoi lɛ bɔɔ gbagbalii.

Eba akɛ ‘wɔhiɛ baatɛ̃ tamɔ onufui, ni wɔfee kpoo tamɔ okpoi’ yɛ be mli ni wɔgbaa gboklɛfoi lɛ sanekpakpa lɛ.—Mat. 10:16.