Maŋtsɛyeli Jajelɔi Bɔ Amaniɛ

Miishɛɛ Yibii ni Tsuishitoo kɛ Hiɛmiamɔ Woɔ

YESU KRISTO gba akɛ yɛ naagbee gbii lɛ amli lɛ “mɛi pii asuɔmɔ lɛ he aaajɔ.” No hewɔ lɛ, yɛ hei babaoo yɛ je lɛŋ ŋmɛnɛ lɛ, mɛi babaoo efee shikpilikpii yɛ Maŋtsɛyeli sanekpakpa lɛ he. Mɛi komɛi po ebuuu jamɔ.—Mateo 24:12, 14.

Yɛ enɛ fɛɛ sɛɛ po lɛ, Maŋtsɛyeli shiɛlɔi kɛ hemɔkɛyeli kɛ tsuishitoo miikpee kaa lɛ naa yɛ omanyeyeli mli, taakɛ niiashikpamɔ ni jɛ Czech Republic ni nyiɛ sɛɛ nɛɛ tsɔɔ lɛ.

Odasefoi enyɔ komɛi kɛ awura ko ni eŋmɛ eyi ewo tsu mli lɛ wie. Yɛ be fioo ko sɛɛ lɛ, yoo lɛ gbele shinaa lɛ bibioo, ni ekpã enine mli kɛhé Buu-Mɔɔ kɛ Awake! woji tɛtrɛbii lɛ ni Odasefoi lɛ kɛhaa lɛ lɛ. Yoo lɛ kɛɛ akɛ “nyɛyiwaladɔŋŋ,” ni eŋa shinaa lɛ. Odasefoi lɛ bi amɛhe akɛ, “ani esa akɛ wɔku wɔsɛɛ wɔba ekoŋŋ?” Amɛteŋ mɔ kome ni ji gbɛgbalɔ, loo be-fɛɛ sɔɔlɔ lɛ kpɛ eyiŋ akɛ ebaaku esɛɛ eya jɛmɛ ekoŋŋ, shi nɔ kome too lɛ nɔŋŋ ba ekoŋŋ, ni enɛ tee nɔ afi.

Akɛni gbɛgbalɔ lɛ kpɛ eyiŋ akɛ ebaatsake gbɛ ni etsɔɔ nɔ ekɛ yoo lɛ wieɔ lɛ mli hewɔ lɛ, esɔle kɛbi Yehowa yelikɛbuamɔ. Be kroko ni ekɛ woji tɛtrɛbii lɛ ha yoo lɛ, ekɛ naanyobɔɔ su bi lɛ akɛ: “Te oyɔɔ tɛŋŋ? Te oná woji tɛtrɛbii lɛ ahe miishɛɛ oha tɛŋŋ?” Klɛŋklɛŋ lɛ, efooo edaaŋ, shi yɛ saramɔi fioo komɛi asɛɛ lɛ, awura lɛ bɔi naanyobɔɔ su kpo jiemɔ. Gbi ko lɛ egbele shinaa lɛ shwaŋŋ, shi sanegbaa lɛ yɛ kuku.

Akɛni yoo lɛ sumɔɔɔ ni ewie yɛ shinaa lɛ naa hewɔ lɛ, gbɛgbalɔ lɛ kpɛ eyiŋ akɛ ebaaŋma lɛ wolo ni ekɛtsɔɔ lɛ yiŋtoo ni yɔɔ saramɔ lɛ sɛɛ, ní ebi ni ekɛ lɛ afee shia Biblia mli nikasemɔ. Yɛ naagbee lɛ, yɛ afi kɛ fã mɔdɛŋ ni gbɛgbalɔ lɛ bɔ kɛ tsuishitoo lɛ sɛɛ lɛ, eye omanye yɛ Biblia mli nikasemɔ shishi ni ekɛ shianyɛ lɛ je lɛ mli. Sɛɛ mli beni yoo lɛ kɛɛ lɛ akɛ: “Mihe Nyɔŋmɔ nɔ miye kɛjɛ be mli ni obɔi mi woji tɛtrɛbii lɛ hamɔ lɛ,” enaa kpɛ ehe, shi no wo lɛ hewalɛ.

Hɛɛ, tsuishitoo kɛ hiɛmiamɔ baanyɛ awo yibii ni yɔɔ miishɛɛ yɛ Maŋtsɛyeli shiɛmɔ kɛ kaselɔ feemɔ nitsumɔ lɛ mli.—Mateo 28:19, 20.