Kaimɔ Ni Oku Osɛɛ Oya Jɛmɛ

¹ Akɛ sanekpakpa lɛ he sɔɔlɔi lɛ, afa wɔ ni wɔfee mɛi kaselɔi. (Mat. 28:​19, 20) Sɛɛsaramɔ ni wɔɔfee lɛ ji wɔ kaselɔ-feemɔ nitsumɔ lɛ fa ko ni he hiaa. Wɔnuɔ he waa akɛ ekɔɔ wala he, no hewɔ lɛ wɔmiisumɔ ni wɔbɔ mɔdɛŋ waa ni wɔha shishijee miishɛɛ ni anaa yɛ he lɛ aya hiɛ.

² Eba akɛ wɔsusu mɛi aŋkroaŋkroi fɛɛ ni wɔkɛ woji haa amɛ lɛ ahe akɛ amɛsa sɛɛkuu kɛ saramɔ. Shi, esaaa akɛ woji ni wɔkɛhaa lɛ feɔ nɔdaamɔ nɔ pɛ ni wɔyɔɔ kɛha sɛɛsaramɔ feemɔ. Mɛi pii miisumɔ ni amɛkɛ wɔ asusu Biblia mli saji ahe, shi amɛsumɔɔɔ ni amɛheɔ woji. No hewɔ lɛ kɛji wɔna akɛ mɔ lɛ yɛ he miishɛɛ lɛ, esa akɛ bɔ fɛɛ bɔ ni fee lɛ wɔku wɔsɛɛ wɔya jɛmɛ, ni wɔha miishɛɛ ni eyɔɔ lɛ aya hiɛ.

³ Woji ni Wɔkɛbɔ lɛ Sɛɛdii: Akɛni wɔkɛ woji babaoo miiha yɛ shiɛmɔ mli ekoŋŋ hewɔ lɛ, hegbɛ babaoo eba kɛha sɛɛsaramɔ feemɔ. Akɛ nɔkwɛmɔ nɔ lɛ, gbɛgbalɔ ko kɛ wolo ha shiatsɛ ko, shi ena akɛ shiatsɛ lɛ bɛ he miishɛɛ tsɔ ko. Shi gbiko shwane beni etee esɛɛsaramɔi krokomɛi lɛ fɛɛ egbe naa lɛ, nyɛminuu lɛ kpɛ eyiŋ akɛ ebaaya nɛkɛ mɔ nɛɛ ŋɔɔ ekoŋŋ. Amɛje Biblia mli nikasemɔ shishi.

⁴ Nyɛminuu ko ha nuu ko woji tɛtrɛbii enyɔ, shi ejie ehiɛ yɛ enɔ, ejaakɛ esusu akɛ nuu lɛ bɛ he miishɛɛ. Shi gbii fioo sɛɛ lɛ, nuu lɛ ŋma wolo kɛbaha asafo ni yɔɔ he ni eyɔɔ lɛ kɛmiibi baptisimɔ. Abi nyɛmiyoo maŋsɛɛ sanekpakpa shiɛlɔ ko nɔ ni esusuɔ akɛ no ji gbɛ titri ni etsɔ nɔ, ni enyɛ eye ebua mɛi 74 ni amɛbatsɔmɔ shiɛlɔi lɛ. Ekɛɛ akɛ: “Wɔkɛ woji tɛtrɛbii babaoo ha, ni miku misɛɛ miyasara mɛi ni he woji tɛtrɛbii lɛ aahu kɛyashi minyɛ mikɛ amɛ je Biblia mli nikasemɔi ashishi.”

⁵ Bei komɛi lɛ, ekolɛ dɛhiɛmɔ wolo pɛ wɔnyɛɔ wɔshiɔ wɔhaa shiatsɛ lɛ kɛji wɔtee jɛmɛ klɛŋklɛŋ. Bei pii lɛ, abaanyɛ akɛ dɛhiɛmɔ woji atsu nii kɛmɔ shi yɛ sɛɛsaramɔ mli kɛfee Biblia kasemɔ he nɔkwɛmɔ nɔ. Kpokpaa nɔkwɛlɔ ko ni kɛ shiɛlɔ kroko miitsu nii kɛ dɛhiɛmɔ wolo ha yoo ko. Amɛkɛ lɛ wie be fioo ko pɛ, shi ewo nyɛmiyoo lɛ hewalɛ ni eku esɛɛ eya eŋɔɔ ekoŋŋ. Nyɛmiyoo lɛ fee sɛɛsaramɔ lɛ ni amɛje Biblia kasemɔ shishi amrɔ nɔŋŋ.

⁶ Kɛji Ajie Miishɛɛ Kpo: Kɛji shiatsɛ lɛ heee wolo ko beni otee jɛmɛ klɛŋklɛŋ kwraa lɛ, no etsɔɔɔ be fɛɛ be akɛ ebɛ wiemɔ lɛ he miishɛɛ. Beni shiɛlɔ ko fee sɛɛsaramɔ yɛ obalaŋtai gbalashihilɛ mli hefatalɔi komɛi aŋɔɔ lɛ, ena akɛ amɛyɛ wɔ woji lɛ eko momo, ni mɔ ko kɛ amɛ ekase nii da. Amɛkpɛlɛ nɔ amrɔ nɔŋŋ akɛ amɛbaasumɔ ni amɛtsa nikasemɔ lɛ nɔ. Gbɛgbalɔ krɛdɛɛ ko na akɛ yoo ko ni be fɛɛ be lɛ ekpooɔ akɛ eeehe woji tɛtrɛbii lɛ yɛ wiemɔ lɛ he miishɛɛ kɛ̃. Gbɛgbalɔ lɛ kɛ woji tɛtrɛbii lɛ fɔ afa ni yoo lɛ na he miishɛɛ akɛ amɛsusu woji bibii lɛ ekome mli kukuji fioo ko he. Yɛ saramɔ fioo ko sɛɛ lɛ, akɛ lɛ mifee Biblia mli nikasemɔ shii enyɔ yɛ otsi mli.

⁷ Ejaakɛ mɔ fɛɛ mɔ ni jɔɔ ehenɔ ehaa Yehowa lɛ anu he akɛ gbɛnaa nii ka enɔ akɛ ekɛ ehe awo kaselɔ-feemɔ nitsumɔ lɛ mli.Yɛ be mli ni wɔyaa mɛi ni naa wiemɔ lɛ he miishɛɛ lɛ aŋɔɔ daa lɛ, wɔbaakpa yibii ni kɛ jɔɔmɔi babaoo baaba wɔ diɛŋtsɛ ‘kɛ mɛi ni boɔ wɔ toi’ lɛ anɔ.​—1 Tim. 4:⁠16.