Bɔ ni Ooofee Onu Biblia lɛ Shishi

3. Ha Mɛi Krokomɛi Aye Abua Bo

Beni niiashikpalɔ ni atsɛɔ lɛ Edward John Eyre lɛ fãa gbɛ kakadaŋŋ kɛtsɔɔ Nullarbor Ŋa kpataa lɛ nɔ lɛ, Australia Shikwɛ̃ɛbii ni yɔɔ jɛmɛ lɛ tsɔɔ Eyre bɔ ni eeefee ená nu kɛjɛ shia gɔji kɛ eucalyptus tsei amli. Akɛni Eyre ha mɛi ni le shikpɔŋ lɛ nɔ shihilɛ lɛ ye bua lɛ hewɔ lɛ, no here eyiwala sɛɛ mli.

TAAKƐ nɔkwɛmɔnɔ nɛɛ tsɔɔ lɛ, kɛ́ wɔbaanyɛ wɔtsu nitsumɔ ko ni wa he nii yɛ omanyeyeli mli lɛ, bei pii lɛ ebiɔ ni wɔha mɔ ko ni le he nii jogbaŋŋ aye abua wɔ. Nakai nɔŋŋ hu ebiɔ ni ofee kɛ́ oto oyiŋ akɛ obaakane Biblia lɛ.

Yesu le akɛ esɛɛnyiɛlɔi lɛ diɛŋtsɛ nyɛŋ anu Biblia lɛ shishi kɛ́ ayeee abuaaa amɛ. Be ko lɛ, “egbele amɛjwɛŋmɔ naa, koni amɛna Ŋmalɛi lɛ anaa.” (Luka 24:45) Yesu le akɛ esa akɛ aye abua Biblia kanelɔi koni amɛnu Ŋmalɛ mli tsɔɔmɔi ashishi.

Yelikɛbuamɔ Kɛmiijɛ Nɛgbɛ?

Yesu kɛwo enɔkwa sɛɛnyiɛlɔi lɛ adɛŋ akɛ amɛkɛ yelikɛbuamɔ nɛɛ aha. Dani Yesu baakwɔ kɛya ŋwɛi lɛ, efã akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi, . . . ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ.” (Mateo 28:19, 20) Nitsɔɔmɔ ji anɔkwa Kristofoi anitsumɔ titri, ni nɔ ni fata enɛ he ji akɛ amɛtsɔɔ bɔ ni abaanyɛ akɛ Biblia mli shishitoo mlai atsu nii yɛ daa gbi shihilɛ mli aha. Anɔkwa Kristofoi yeɔ amɛbuaa mɛi krokomɛi koni amɛnu Biblia lɛ shishi.

Beni Yesu kɛ fãmɔ nɛɛ ha esɛɛnyiɛlɔi lɛ sɛɛ etsɛɛɛ nɔŋŋ lɛ, nɔ ko ni sa kadimɔ waa ba. Biblia lɛ bɔ amaniɛ akɛ, no mli lɛ ablade ko ni jɛ Etiopia lɛ miikane Yesaia gbalɛ lɛ fã ko. Ekɛ sane ko kpe ni enuuu shishi. Biblia lɛ bɔ amaniɛ akɛ ŋmalɛi ni ha eyiŋ futu lɛ lɛ kaneɔ akɛ: “Akpala lɛ kɛtee taakɛ too gwaŋtɛŋ ni ayaagbe lɛ, ni bɔ ni too gwaŋtɛŋ bi feɔ dioo yɛ ehetsɔikulɔ hiɛ lɛ, nakai nɔŋŋ etswaaa esɛŋ. Eheshibaa lɛ mli lɛ ajie ekojomɔ lɛ kɛtee; shi eyinɔ lɛ, namɔ aaagba he sane? ejaakɛ aŋɔ ewala lɛ kɛjɛ shikpɔŋ lɛ nɔ.”—Bɔfoi lɛ Asaji 8:32, 33; Yesaia 53:7, 8.

Ablade nɛɛ bi Filipo ni ji Kristofonyo ni yɔɔ niiashikpamɔ ni le Ŋmalɛi lɛ amli jogbaŋŋ lɛ akɛ: “Miikpao fai, namɔ he gbalɔ lɛ wieɔ nɛɛ? lɛ diɛŋtsɛ ehe aloo mɔ krokoŋ?” (Bɔfoi lɛ Asaji 8:34) No mli lɛ, Etiopianyo ni hiɛ tsui kpakpa lɛ etee Yerusalem eyaja Nyɔŋmɔ momo, ni eeenyɛ efee akɛ esɔle kɛha gbɛtsɔɔmɔ. Ekã shi faŋŋ akɛ, no mli lɛ ejie eyitsoŋ ni ekɛ heshibaa miikane. Shi fɛɛ sɛɛ lɛ, ablade nɛɛ nuuu ŋmalɛ nɛɛ shishi. Ejɛ heshibaa mli ebi koni Filipo aye abua lɛ. Niiamlitsɔɔmɔ ni Filipo kɛha lɛ lɛ ha ená miishɛɛ aahu akɛ no tsirɛ lɛ ni lɛ hu ebatsɔ Kristofonyo.—Bɔfoi lɛ Asaji 8:35-39.

Yehowa Odasefoi miitsa nitsumɔ ni Filipo kɛ mra be mli Kristofoi lɛ tsu lɛ nɔ. Odasefoi lɛ jɛɔ amɛsuɔmɔ mli amɛyeɔ amɛbuaa mɛi krokomɛi koni amɛnu nɔ ni Biblia lɛ tsɔɔ diɛŋtsɛ lɛ shishi yɛ shikpɔji ni fa fe 235 anɔ. Amɛfeɔ enɛ kɛtsɔ Ŋmalɛ mli saneyitsei ni amɛkɛ mɛi nɛɛ kaseɔ lɛ nɔ. Gbɛ ni atsɔɔ nɔ kɛkaseɔ Biblia lɛ fiofio nɛɛ biɔ ni apɛi nɔ ni Biblia lɛ ekɛɛ yɛ sane pɔtɛɛ ko he lɛ mli.a—Kwɛmɔ akrabatsa ni ji “Biblia lɛ He Sanebimɔi Ahetoi ni Haa Mɔ Tsui Nyɔɔ Emli.”

‘Aha Misanebimɔi lɛ Fɛɛ Hetoo’

Yehowa Odasefoi kɛ Steven, Valvanera, kɛ Jo-Anne ni atsɛ amɛwiemɔi ayisɛɛ yɛ sane ni yɔɔ baafa etɛ lɛ mli lɛ kase Biblia lɛ. Steven kɛɛ akɛ: “Beni miná mile akɛ kɛ́ okɛ Ŋmalɛ mli shishitoo mlai loo amaniɛbɔi srɔtoi ni kɔɔ sane ko he lɛ totoo amɛhe lɛ, bei pii lɛ no kɛkɛ baaha ona anɔkwale ni kɔɔ nakai sane lɛ he yɛ Biblia lɛ mli lɛ, eha minaa kpɛ mihe. Dani Odasefoi kɛ mi baabɔi Biblia lɛ kasemɔ lɛ, no mli lɛ mɔ ko etsɔko mi bɔ ni afeɔ enɛ ahaa. Beni miná mile akɛ, Biblia lɛ jeee wolo ko ni esa akɛ aje ŋwane srɔtoi ni wooo yibii yɛ he, ni agbɛnɛ hu ahiɛ susumɔi ni kɛ amɛhe kpãaa gbee yɛ he lɛ, eha mitsui nyɔ mimli waa.”

Valvanera kɛ lɛ kpãa gbee. Valvanera kɛɛ akɛ, “Nibii ni mikase lɛ fɛɛ kɛ amɛhe kpãa gbee ni shishinumɔ yɛ he. Jeee akɛ mikpɛlɛ nibii ni mikase lɛ nɔ akɛ amɛja akɛni ‘Sɔlemɔ lɛ’ kɛɛ nakai lɛ hewɔ, shi moŋ akɛni shishinumɔ yɛ mligbalamɔ ni akɛhaa yɛ sane fɛɛ sane he lɛ mli lɛ hewɔ.” Jo-Anne kɛɛ akɛ: “Yɛ anɔkwale mli lɛ, misanebimɔi lɛ fɛɛ hetoo ni aha mi kɛjɛ Biblia lɛ mli lɛ ha mitsuiŋ yi obɔ kɛ hiɛsɔɔ—miná bulɛ kpele kɛha Nyɔŋmɔ—ejaakɛ ejɛ nilee mli eha aŋmala hetoi ni sa kɛha adesai asanebimɔi fɛɛ.”

Ani ole Yehowa Odasefoi lɛ ateŋ mɔ ko? Mɛni hewɔ obiii lɛ ni etsɔɔ bo bɔ ni afeɔ nikasemɔ nɛɛ ahaa? Kɛ oleee Yehowa Odasefoi lɛ ateŋ mɔ ko lɛ, ofainɛ ŋmaa amɛ kɛtsɔ adrɛs srɔtoi ni yɔɔ wolo tɛtrɛɛ nɛɛ baafa 2 lɛ mli lɛ ateŋ ekome nɔ. Nyɔŋmɔ Wiemɔ lɛ shishinumɔ efeŋ teemɔŋ sane kɛhaŋ bo, kɛji oha Nyɔŋmɔ mumɔ krɔŋkrɔŋ lɛ ye ebua bo, okɛ jwɛŋmɔ ni ja kane, ni obi yelikɛbuamɔ kɛjɛ Biblia tsɔɔlɔ ko ni he esa dɛŋ. Hɛɛ, obaanyɛ onu Biblia lɛ shishi!—w09 07/01-E.

[Shishigbɛ niŋmaa]

[Akrabatsa/Mfoniri ni yɔɔ baafa 7]

Biblia lɛ He Sanebimɔi Ahetoi ni Haa Mɔ Tsui Nyɔɔ Emli

Naa saneyitsei komɛi ni Yehowa Odasefoi kɛ mɛi kaseɔ kɛ́ amɛkɛ mɛi nɛɛ miikase Biblia lɛ:

• Mɛni ji Nyɔŋmɔ yiŋtoo kɛha shikpɔŋ lɛ?

• Nɛgbɛ gbohii lɛ yɔɔ?

• Ani “naagbee gbii lɛ” amli wɔyɔɔ lɛ?

• Mɛni hewɔ Nyɔŋmɔ ŋmɛɔ piŋmɔ gbɛ?

• Mɛɛ gbɛ nɔ matsɔ maha miweku shihilɛ afee nɔ ni miishɛɛ yɔɔ mli?