Mɛni Hewɔ Nyɔŋmɔ Ŋmɛɔ Gbɛ ni Mɛi ni Yɔɔ Hegbɛ lɛ Yeɔ Amɛshishibii lɛ Awui Lɛ?

Biblia lɛ gbaa wɔ saji komɛi ni yɔɔ mɔbɔ ni kɔɔ mɛi ni yɔɔ hegbɛ ni ye amɛshishibii awui lɛ he. Eko ji Nabot sane lɛ.a Israel maŋtsɛ ko ni ye nɔ yɛ afi 900 D.Ŋ.B. afii lɛ amli, ni atsɛɔ lɛ Ahab lɛ, ŋmɛ eŋa Yezebel gbɛ ni eha agbe Nabot kɛ ebihii lɛ, koni enine ashɛ Nabot weintrom lɛ nɔ. (1 Maŋtsɛmɛi 21:1-16; 2 Maŋtsɛmɛi 9:26) Mɛni hewɔ Nyɔŋmɔ ŋmɛ gbɛ ni maŋtsɛ lɛ kɛ ehegbɛ lɛ tsu nii yɛ gbɛ gbonyo nɔ nɛkɛ?

Ha wɔkwɛ yiŋtoo kome ni he hiaa waa: Nyɔŋmɔ maleee. (Tito 1:2) Mɛni enɛ kɔɔ yɛ awuiyeli he? Ojogbaŋŋ, Nyɔŋmɔ je mra ebɔ adesai kɔkɔ akɛ kɛ́ amɛtse ehiɛ atua lɛ, amɛbaagboi. Lɛɛlɛŋ hu, kɛjɛ be ni adesai tse Nyɔŋmɔ hiɛ atua yɛ Eden trom lɛ mli nɛɛ, adesai gboiɔ kɛbashi ŋmɛnɛ. Anɔkwa, awuiyeli nɔ atsɔ agbe mɔ klɛŋklɛŋ ni gbo lɛ. Mɔ nɛɛ ji Habel, ni mɔ ni gbe lɛ ji enyɛmi Kain.​—1 Mose 2:16, 17; 4:8.

Nyɔŋmɔ Wiemɔ lɛ wieɔ adesai ashihilɛ mli saji kɛjɛ no beaŋ kɛbashi ŋmɛnɛ lɛ he kuku akɛ: “Gbɔmɔ yeɔ enaanyo gbɔmɔ nɔ ni ekɛyeɔ ehe awui.” (Jajelɔ 8:9) Ani wiemɔi nɛɛ ji anɔkwale? Yehowa bɔ ewebii, ni ji Israelbii lɛ, kɔkɔ akɛ amɛmaŋtsɛmɛi lɛ baaye amɛnɔ dɛŋdɛŋ ni enɛ baaha amɛbolɔ amɛtsɛ lɛ. (1 Samuel 8:11-18) Maŋtsɛ Salomo nilelɔ lɛ po ye ewebii lɛ anɔ dɛŋdɛŋ. (1 Maŋtsɛmɛi 11:43; 12:3, 4) Kɛlɛ, nɔ ni efee lɛ shɛɛɛ maŋtsɛmɛi tamɔ Ahab kɛ mɛi krokomɛi ni yitseiaŋ wala lɛ anɔ lɛ he kwraa. Susumɔ he okwɛ: Eji Nyɔŋmɔ tsĩ mɛi ni yɔɔ hegbɛ lɛ anaa koni amɛkaye amɛshishibii lɛ awui kulɛ, ani no haŋ etsɔ amalelɔ?

Agbɛnɛ hu, kaimɔ akɛ, Satan kɛɛ mɛi jaa Nyɔŋmɔ yɛ nɔ ni amɛbaaná yɛ edɛŋ lɛ pɛ hewɔ. (Hiob 1:9, 10; 2:4) Kɛ́ Nyɔŋmɔ bu ewebii fɛɛ ahe kɛjɛ nɔ fɛɛ nɔ ni baanyɛ aye amɛ awui lɛ he lɛ, ani no etsɔŋ akɛ nɔ ni Satan wie lɛ yɛ mli? Ni kɛ́ Nyɔŋmɔ bu mɔ fɛɛ mɔ he kɛjɛ nɔ fɛɛ nɔ ni baanyɛ aye lɛ awui lɛ he lɛ, ani no etsɔŋ akɛ emale waa? Kɛ́ Nyɔŋmɔ bu adesai ahe yɛ nɛkɛ gbɛ nɔ lɛ, mɛi pii baasusu akɛ adesai baanyɛ aye amɛ diɛŋtsɛ amɛhe nɔ yɛ omanyeyeli mli ni Nyɔŋmɔ he bɛ mli. Shi enɛ kɛ nɔ ni Nyɔŋmɔ Wiemɔ lɛ kɛɔ lɛ kpaaa gbee; ekɛɔ akɛ, adesai nyɛŋ aye amɛ diɛŋtsɛ amɛhe nɔ kɔkɔɔkɔ. (Yeremia 10:23) Esa akɛ Nyɔŋmɔ Maŋtsɛyeli lɛ aba, no dani awuiyeli sɛɛ baafo.

Ani enɛ tsɔɔ akɛ belɛ Nyɔŋmɔ efeee awuiyeli ni yaa nɔ lɛ he nɔ ko kwraa? Dabi. Susumɔ nibii enyɔ ni efeɔ yɛ he lɛ ahe: Klɛŋklɛŋ lɛ, ekpaa awuiyeli he mama. Akɛ nɔkwɛmɔnɔ lɛ, e-Wiemɔ lɛ haa wɔnaa ŋaa fɔŋ ni Yezebel tsɔ̃ eshi Nabot lɛ mli kri kɛ dɛkɛ. Kɛfata he lɛ, Biblia lɛ haa wɔnaa akɛ mɔ ni hɔ nibii gbohii ni tamɔ nɛkɛ lɛ asɛɛ ji nɔyelɔ ko ni he wa ni sumɔɔɔ akɛ akpaa lɛ shi. (Yohane 14:30; 2 Korintobii 11:14) Biblia lɛ kɛɔ akɛ lɛ ji Satan Abonsam. Bɔ ni Nyɔŋmɔ ekpa awuiyeli kɛ efɔŋfeemɔ kɛ mɔ ni hɔ sɛɛ lɛ he mama lɛ, yeɔ ebuaa wɔ ni wɔtsiɔ wɔhe kɛjɛɔ awuiyeli he. Enɛ haa wɔnáa hiɛnɔkamɔ kɛha wɔsɛɛ.

Nɔ ni ji enyɔ lɛ, Nyɔŋmɔ haa wɔ hiɛnɔkamɔ ni yɔɔ shiŋŋ akɛ ebaafo awuiyeli sɛɛ. Bɔ ni ekpa Ahab kɛ Yezebel he mama, ni ekojo amɛ, ni egbala amɛ kɛ mɛi krokomɛi ni fee amɛnii tamɔ amɛ lɛ atoi lɛ, haa wɔnáa hekɛnɔfɔ̃ɔ yɛ shi ni ewo akɛ ebaakpãta efɔŋfeelɔi fɛɛ ahiɛ gbi ko lɛ mli. (Lala 52:3-7) Agbɛnɛ hu, Nyɔŋmɔ ewo mɛi ni sumɔɔ lɛ lɛ ashi akɛ etsɛŋ ebaasaa nibii ni ejɛ awuiyeli kɛ efɔŋfeemɔ mli kɛba lɛ fɛɛ.b No hewɔ lɛ, be ko baaba ni anɔkwafo Nabot kɛ ebihii lɛ baahi shi kɛya naanɔ yɛ paradeiso mli yɛ shikpɔŋ lɛ nɔ, he ni ayeŋ sane fɔŋ ko kwraa yɛ lɛ.​—Lala 37:34.