Nɔ Hewɔ ni Nyɔŋmɔ Kɛɔ Wɔ akɛ Wɔsɔle

Nyɔŋmɔ miisumɔ ni otsɔ enaanyo.

Nanemɛi kɛ amɛhe gbaa sane koni amɛnaanyobɔɔ lɛ mli awa. Nakai nɔŋŋ Nyɔŋmɔ hu miisumɔ ni wɔ kɛ lɛ agba sane, koni naanyobɔɔ abakã wɔ kɛ lɛ teŋ. Ekɛɔ akɛ: “Nyɛaafo nyɛtsɛ mi, ni nyɛaaba nyɛbasɔle nyɛkpa mi fai, ni mibabo nyɛ toi.” (Yeremia 29:12, Ga Biblia hee) Kɛ́ okɛ Nyɔŋmɔ gbaa sane lɛ, no baahã ‘otsi obɛŋkɛ lɛ, ni lɛ hu ebaatsi ebɛŋkɛ bo.’ (Yakobo 4:8) Biblia lɛ kɛɔ wɔ akɛ: ‘Yehowa bɛŋkɛɔ mɛi fɛɛ ni tsɛɔ lɛ lɛ.’ (Lala 145:18) Kɛ́ wɔfɔɔ sɔlemɔ lɛ, naanyobɔɔ ni yɔɔ wɔkɛ Nyɔŋmɔ teŋ lɛ mli baawa.

Nyɔŋmɔ miisumɔ ni eye ebua bo.

Yesu kɛɛ akɛ: “Nyɛteŋ namɔ ni kɛ́ ebi bi lɛ aboloo lɛ, ebaahã lɛ tɛ? Aloo kɛ́ ebi lɛ nu mli loo lɛ, ebaahã lɛ onufu? No hewɔ lɛ, kɛji . . . nyɛle bɔ ni nyɛfeɔ nyɛŋɔɔ nikeenii kpakpai nyɛhãa nyɛbii lɛ, enyiɛ nɔŋŋ nyɛ-Tsɛ ni yɔɔ ŋwɛi lɛ eŋɔŋ nibii kpakpai ehãŋ mɛi ni biɔ lɛ lɛ!” (Mateo 7:9-11) Hɛɛ, Nyɔŋmɔ miisumɔ ni osɔle, ejaakɛ ‘esusuɔ ohe,’ ni eesumɔ ni eye ebua bo. (1 Petro 5:7) Eesumɔ ni okɛɛ lɛ onaagbai lɛ po. Biblia lɛ kɛɔ wɔ akɛ: “Nyɛkafea yeyeeye yɛ nɔ ko nɔ ko he, shi moŋ yɛ nɔ fɛɛ nɔ mli lɛ, nyɛtsɔa sɔlemɔ, kɛ fai ní akɛ hiɛdɔɔ kpaa, kɛ shidaa nɔ nyɛhãa Nyɔŋmɔ alea nyɛnibimɔi lɛ.”​—Filipibii 4:6.

Nyɔŋmɔ he miihia adesai.

Mɛi ni kaseɔ adesai ashihilɛ he nii lɛ ena akɛ, mɛi akpekpei ohai abɔ nuɔ he akɛ amɛsɔle. Mɛi ni heee yeee akɛ Nyɔŋmɔ yɛ kɛ mɛi ni yiŋ etɛ̃ɛɛ amɛ akɛ Nyɔŋmɔ yɛ loo ebɛ lɛ po nuɔ he akɛ esa akɛ amɛsɔle.a Enɛ maa anɔkwale ni eji akɛ abɔ adesai akɛ mɛi ni Nyɔŋmɔ he hiaa amɛ lɛ nɔ mi. Yesu kɛɛ akɛ: “Mɛi ni le akɛ Nyɔŋmɔ he miihia amɛ lɛ yɛ miishɛɛ.” (Mateo 5:3) Gbɛ kome ni wɔbaanyɛ wɔtsɔ nɔ wɔtsu nakai hiamɔ lɛ he nii ji, ni wɔkɛ Nyɔŋmɔ baafɔ sanegbaa.

Kɛ́ wɔkpɛlɛ nine ni Nyɔŋmɔ fɔ̃ɔ wɔ akɛ wɔsɔle wɔhã lɛ lɛ nɔ lɛ, mɛɛ sɛɛ wɔbaaná?