Ani Okpeɔ Sɛɛ Be Fɛɛ Be?
1. (a) Mɛɛ saji wɔbaanyɛ wɔbi wɔhe yɛ nii ni afeɔ yɛ be naa lɛ gbɛfaŋ? (b) Mɛni nibii ni afeɔ yɛ be naa be fɛɛ be lɛ tsɔɔ?
1 Ani ohiɛ yɛ nɔ? Mɛni nɔ? Bɔ ni ehe hiaa akɛ obaafee nii yɛ be naa yɛ nɔ fɛɛ nɔ mli lɛ! Ani ohiɔ Maŋtsɛyeli Asa lɛ nɔ dani ajeɔ kpeei shishi? Ani oshɛɔ kpeei lɛ ashishi mra koni okɛ miishɛɛ akpee nyɛmimɛi kɛ mɛi ni yɔɔ wiemɔ lɛ he miishɛɛ ni baa kpee lɛ ní oŋa amɛ, agbɛnɛ hu ni otsu nibii krokomɛi ahe nii? Ani oshɛɔ shi yɛ be ni sa mli bɔni afee ni otsu nitsumɔi ni akɛwo odɛŋ lɛ ahe nii? Kɛ́ ofeɔ nakai lɛ, belɛ oji mɔ ni feɔ nii yɛ be naa. Be naa ni afeɔ nii yɛ lɛ tsɔɔ suɔmɔ mli ni ajɛɔ asusuɔ mɛi krokomɛi ahe loo anuɔ he ahaa mɛi krokomɛi. Eji odaseyeli ni tsɔɔ akɛ otoɔ nibii ahe gbɛjianɔ jogbaŋŋ yɛ oshihilɛ mli, ni mɛi ni okɛ sharaa lɛ ahiɛ baasɔ enɛ waa.
2. Kɛ́ wɔkpe sɛɛ kɛtee asafoŋ kpeei ashishi minitii fioo po lɛ, mɛni ŋmɛɔ wɔ?
2 Asafoŋ kpeei ni Kristofonyo ko baaya yɛ be naa lɛ ji gbɛ kome ni ebaanyɛ etsɔ nɔ etsɔɔ akɛ esusuɔ mɛi ahe. Enɛ tsɔɔ bulɛ ni wɔyɔɔ kɛha Yehowa Nyɔŋmɔ kɛ mumɔŋ niyenii ni ekɛhaa wɔ lɛ. Shi mɛni baa kɛ́ wɔkpe sɛɛ minitii fioo ko po kɛtee kpeei ashishi? Wɔnyɛŋ wɔwowoo wɔhe hewalɛ dani aje kpee lɛ shishi. Wɔnyɛŋ wɔfata wɔnyɛmimɛi lɛ ahe ni wɔkɛ miishɛɛ alá lala ni jieɔ Yehowa gbɛi lɛ yi, ní eji wɔjamɔ lɛ fã ko ni he hiaa waa lɛ eko! Kɛ́ wɔkpe sɛɛ kɛtee kpeei ashishi lɛ, hegbɛ kpele ni wɔyɔɔ akɛ wɔbaafata asafo lɛ he kɛbɛŋkɛ Yehowa yɛ sɔlemɔ mli lɛ hu baaŋmɛɛ wɔ.
3. (a) Kɛ́ wɔkpe sɛɛ kɛtee kpee lɛ, ebaanyɛ esa wɔkɛ Nyɔŋmɔ teŋ wekukpaa lɛ he yɛ mɛɛ gbɛ nɔ? Feemɔ he nɔkwɛmɔnɔ. (b) Kɛ́ wɔkpe sɛɛ lɛ, te esaa mɛi krokomɛi ahe ehaa tɛŋŋ?
3 Kɛ́ wɔkpe sɛɛ minitii fioo po kɛtee kpee ko shishi lɛ, etamɔ nɔ ni wɔmiikane sane ko yɛ wolo ko mli ni wɔyaje shishi yɛ sane lɛ teŋ gbɛ—wɔnuŋ shihilɛ mli ni aŋma sane lɛ yɛ, kɛ sane lɛ hiɛkpamɔ lɛ shishi, ni enɛ haŋ wɔnu nɔ ni wɔkaneɔ lɛ shishi jogbaŋŋ ní wɔnyã he. Jeee akɛ Biblia mli tsɔsemɔ lɛ baaŋmɛɛ wɔ kɛkɛ, shi moŋ wɔbaagbala wɔnyɛmɛi ni eba mra lɛ hu ajwɛŋmɔ, ni no haŋ amɛná gbɛjianɔtoo lɛ he sɛɛ kɛmɔ shi.
4. (a) Mɛni baanyɛ afee yiŋtoo hewɔ ní mɛi komɛi kpeɔ sɛɛ be fɛɛ be lɛ? (b) Kɛ́ wɔkpeɔ sɛɛ be fɛɛ be lɛ, te mɛi krokomɛi baana wɔ amɛha tɛŋŋ?
4 Mɛni Hewɔ Mɛi Komɛi Kpeɔ Sɛɛ Be Fɛɛ Be Lɛ? Ekolɛ mɛi komɛi kpeɔ sɛɛ be fɛɛ be akɛni amɛsusu ko sɛɛnamɔ ni yɔɔ amɛhe ni amɛaatsɔse koni amɛba kpeei ashishi mra be fɛɛ be lɛ hewɔ. Mɔ ni kpeɔ sɛɛ be fɛɛ be ni jeee yɛ yiŋtoo kpakpa ko hewɔ lɛ baanyɛ alaaje bulɛ ni mɛi krokomɛi yɔɔ kɛha lɛ lɛ. Mɛni hewɔ? Ejaakɛ mɛi pii baana lɛ akɛ mɔ ni susuuu mɛi ahe, aloo mɔ ko ni anyɛŋ amu afɔ̃ enɔ po, ni enɛ baaha ana lɛ akɛ mɔ ni anyɛŋ akɛ he afɔ̃ enɔ yɛ nibii krokomɛi amli. Nɔ ni tamɔɔɔ nakai lɛ, kpeei ashishi ni wɔyaa yɛ be naa lɛ ji gbɛ kome ni wɔtsɔɔ nɔ wɔjieɔ bulɛ kpo wɔtsɔɔ Yehowa, ni etsɔɔ akɛ wɔyɛ suɔmɔ kɛha mɛi krokomɛi.—Okɛto Mateo 7:12 lɛ he.
5. (a) Mɛni baanyɛ aha wɔkpe sɛɛ kɛya kpeei bei komɛi? (b) Kɛ́ wɔkpe sɛɛ lɛ, mɛni esa akɛ efee wɔfaishitswaa?
5 Eji anɔkwale akɛ, ekɔɔɔ he eko bɔ ni wɔbaabɔ wɔhe mɔdɛŋ wɔha fɛɛ sɛɛ lɛ, bei komɛi lɛ wɔbaakpe sɛɛ kɛya kpee ko shishi kɛ̃. Ekolɛ tsɔne ni wɔbaawo lɛ sɛɛ baagbala shi, aloo wɔ diɛŋtsɛ wɔtsɔne ni wɔhiɛ lɛ baafite. Ekolɛ beni be eshɛ ni esa akɛ mɔ ko ni jɛ weku ni mlibii lɛ bɛ jamɔ kome mli, aloo nyɛ ko ni yɔɔ gbekɛbii ni ekome ekwɛɔ amɛ ni esa akɛ ekɛ amɛ aba kpee lɛ shiɔ shĩa nɔŋŋ lɛ, ekɛ naagba ko ni ekpaaa gbɛ baakpe. Kɛ́ ebaahi lɛ, yɛ nɔ najiaŋ ni kpee muu lɛ fɛɛ aaaŋmɛɛ bo lɛ, ebaahi ákɛ omia ohiɛ ni oya heni afeɔ kpee lɛ yɛ lɛ, bɔni afee ni oná kpee lɛ he sɛɛ bɔ ni sa. Mɛi krokomɛi ni yɔɔ asafo lɛ mli lɛ baanu shihilɛi ni tamɔ nɛkɛ lɛ shishi. Shi yɛ shihilɛi ni wɔbaanyɛ wɔfee he nɔ ko lɛ mli lɛ, esa akɛ wɔkwɛ jogbaŋŋ ni hiɛ ni esɔɔɔ nii, gbɛjianɔtoo kpakpa ni wɔ bɛ loo kpee lɛ he miishɛɛ ni wɔ bɛ lɛ akaha wɔtsɔmɔ mɛi ni fɔɔ sɛɛ kpee.
6. Mɛɛ nɔkwɛmɔnɔ esa akɛ asafoŋ onukpai kɛ asafoŋ sɔɔlɔi afee yɛ kpee ni abaa yɛ be naa lɛ he?
6 Kɛ́ wɔba kpeei ni wɔna akɛ asafoŋ onukpai lɛ kɛ asafoŋ sɔɔlɔi lɛ ebashɛ shi momo ni amɛmiimɛ ni amɛŋa wɔ, amɛkɛ miishɛɛ akpee wɔ atuu, amɛjie hiɛsɔɔ kpele kpo yɛ teokrase weku ni wɔfata emlibii lɛ ahe lɛ he lɛ, ewoɔ wɔ hewalɛ waa diɛŋtsɛ. (Rom. 15:7) No hewɔ lɛ kɛ́ oji asafoŋ onukpa loo asafoŋ sɔɔlɔ lɛ, ha ehi ojwɛŋmɔ mli akɛ kɛ́ okɛ oweku lɛ baa kpeei ashishi mra lɛ, efeɔ nɔkwɛmɔnɔ kpakpa ehaa mɛi krokomɛi.—1 Pet. 5:3.
7. Mɛni mɛi komɛi efee kɛtsu naagba lɛ he nii?
7 Mɛni Obaanyɛ Ofee? Te shiɛlɔi komɛi etsu naagba nɛɛ he nii amɛha tɛŋŋ? Mɛi komɛi sɔleɔ, kɛkɛ lɛ no sɛɛ lɛ amɛkɛ amɛnitsumɔtsɛmɛi lɛ eyasusu he akɛ amɛbaasumɔ ni amɛkpa nitsumɔ mra gbii ni amɛyaa kpeei lɛ, koni gbii ni amɛyaaa kpeei lɛ, amɛkɛ bei pii atsu nii kɛtse. Mɛi krokomɛi hu etswa amɛfai shi akɛ, kɛ́ amɛkɛ mɔ ko yɛ gbɛjianɔtoo ko ni baagba be ni amɛkɛyaa kpee lɛ naa lɛ, amɛbaatsi amɛto be kroko. Kɛ́ wɔfee enɛ lɛ, ehaa wɔyooɔ nii ni he hiaa titri lɛ kɛtsɔ kpeei lɛ fɛɛ ni wɔbaaba, ní wɔba yɛ be naa hu lɛ nɔ.—Abɛi 21:5; Fil 1:10.
8. Mɛɛ yiŋtoi ahewɔ esaaa akɛ wɔkpeɔ sɛɛ kɛyaa kpeei kɛha shiɛmɔyaa lɛ?
8 Kɛ́ wɔmiiya kpeei kɛha shiɛmɔyaa lɛ, ehe miihia ni wɔya jɛmɛ hu yɛ be naa! Shiɛlɔi babaoo ni bei pii lɛ amɛkpeɔ sɛɛ kɛyaa kpee nɛɛ shishi lɛ anine shɛɛɛ hewalɛwoo kɛ bɔ ni asaa wɔ kɛha shiɛmɔ nitsumɔ lɛ nɔ. Susumɔ sane nɛɛ hu he okwɛ, kɛ́ minitii ekpaa ŋmɛɛ shiɛlɔi nyɔŋma ni ebabua amɛhe naa kɛha shiɛmɔyaa akɛni amɛmiimɛ nyɛminuu ni baanyiɛ hiɛ ní ekpe sɛɛ lɛ hewɔ lɛ, etsɔɔ akɛ abaafite ŋmɛlɛtswaa kome nakai gbi lɛ ni akɛtsuuu nɔ ko. Kɛ́ aba kpee lɛ yɛ be naa lɛ, ehaa akɛ be babaoo tsuɔ shiɛmɔ kɛ kaselɔ feemɔ nitsumɔ ni he hiaa waa lɛ. Kɛ́ wɔba kpeei yɛ be naa lɛ, ehaa mɛi heei ni yɔɔ asafo ni wɔdamɔ enajiaŋ lɛ náa ekãa. Kɛ́ wɔba kpeei yɛ be naa lɛ, wɔtsɔɔ akɛ wɔji mɛi ni yeɔ amɛwiemɔ nɔ, ni wɔhaa wɔwiemɔ ‘feɔ Hɛɛ, hɛɛ, Dabi, dabi.’—Mat. 5:37.
9. Yɛ shishitoo mla ni yɔɔ 2 Korintobii 6:3, 4 lɛ naa lɛ, mɛni hewɔ esa akɛ fɔlɔi kɛ shiɛlɔi ni kɛ mɛi kaseɔ Biblia lɛ aye amɛbe nɔ be fɛɛ be lɛ?
9 Esa akɛ fɔlɔi afee nii yɛ be naa koni amɛkɛfee nɔkwɛmɔnɔ kpakpa amɛha amɛbii. Kɛ́ ato be kɛha weku nikasemɔ yɛ shĩa lɛ, esa akɛ weku lɛ mlibii lɛ fɛɛ afĩ gbɛjianɔtoo nɛɛ sɛɛ kɛtsɔ ya ni amɛbaaya, kɛ agbɛnɛ ní amɛbaaya yɛ be naa hu lɛ nɔ. Kɛ́ shiɛlɔi tee amɛ-Biblia kaselɔi aŋɔɔ yɛ be naa kɛha nikasemɔ lɛ, ebaaha amɛ-Biblia kaselɔi lɛ ana bɔ ni ehe hiaa ni amɛhu amɛfee nii yɛ be naa. (Luka 6:40) Kɛ́ wɔfee nakai lɛ, mɛi ni naa wɔ lɛ buɔ wɔ, “ni asaŋ wɔtooo mɔ ko mɔ ko pampi yɛ nɔ ko nɔ ko mli, koni akagbe sɔɔmɔ lɛ he guɔ.”—2 Kor. 6:3, 4.
10. Mɛni hewɔ wɔyɔɔ yiŋtoo kpakpa ni wɔɔdamɔ nɔ wɔfee nii yɛ be naa lɛ?
10 Kɛ́ wɔkpeɔ sɛɛ be fɛɛ be lɛ, esa akɛ wɔkai akɛ: Kɛ́ wɔtee Kristofoi akpee, kpeei kɛha shiɛmɔyaa, kɛ gbɛjianɔtooi krokomɛi ashishi yɛ be naa lɛ, etsɔɔ akɛ wɔyɛ bulɛ kɛ woo kɛha mɛi krokomɛi. Etsɔɔ akɛ wɔji mɛi ni kɛ hiɛdɔɔ tsuɔ saji ahe nii, ni abaanyɛ akɛ he afɔ̃ wɔ nɔ. Etsɔɔ akɛ wɔhiɛ sɔɔ mumɔŋ nibii srɔtoi ni Yehowa toɔ he gbɛjianɔ ehaa wɔ lɛ waa diɛŋtsɛ. Kɛ́ wɔ fɛɛ wɔyɛ su kpakpa nɛɛ eko, ni wɔmia wɔhiɛ lɛ, wɔbaanyɛ wɔkase bɔ ni afeɔ nii yɛ be naa!