Hã Efee Osu akɛ Obaafee Onii yɛ Be Naa
1. Mɛɛ nɔkwɛmɔnɔ Yehowa feɔ yɛ nii ni afeɔ yɛ be naa lɛ he?
1 Yehowa feɔ enii yɛ be naa be fɛɛ be. Akɛ nɔkwɛmɔnɔ lɛ, ‘eyeɔ ebuaa etsuji yɛ be ni sa mli.’ (Heb. 4:16) Ekɛ mumɔŋ ‘niyenii hu hãa yɛ be ni sa nɔ.’ (Mat. 24:45) No hewɔ lɛ, wɔbaanyɛ wɔná nɔmimaa akɛ emlifu gbi ni baa lɛ “ekpeŋ sɛɛ.” (Hab. 2:3) Kwɛ bɔ ni wɔnáa be nɔ ni Yehowa yeɔ lɛ he sɛɛ wɔhãa! (Lala 70:6) Akɛ adesai ni yeee emuu ni bɛ dekã lɛ, ewaa kɛhãa wɔ akɛ wɔɔye be nɔ. Mɛni hewɔ esa akɛ wɔhã efee wɔsu akɛ wɔbaafee wɔnii yɛ be naa lɛ?
2. Mɛni hewɔ kɛ́ wɔyeɔ be nɔ lɛ, ekɛ anunyam hãa Yehowa lɛ?
2 Akɛni mɛi babaoo sumɔɔ amɛhe ni amɛnyɛɛɛ amɛhe nɔ amɛye yɛ nɛkɛ naagbee gbii nɛɛ amli hewɔ lɛ, amɛnyɛɛɛ amɛfee amɛnii yɛ be naa. (2 Tim. 3:1-3) No hewɔ lɛ, kɛ́ Kristofoi yaa nitsumɔ yɛ be naa, amɛyeɔ amɛbe nɔ kɛ́ amɛkɛ mɔ ko to gbɛjianɔ, ni amɛyaa kpee hu yɛ be naa lɛ, mɛi krokomɛi naa, ni enɛ kɛ anunyam hãa Yehowa. (1 Pet. 2:12) Ani bei pii lɛ wɔjeɔ heloonaa nitsumɔ shishi mra, shi wɔfɔɔ sɛɛkpee kɛ́ wɔmiiya teokrase nifeemɔi ashishi? Kɛ́ wɔyaa Kristofoi akpeei yɛ be naa dani aláa ni asɔleɔ lɛ, etsɔɔ akɛ wɔmiisumɔ ni wɔkase wɔŋwɛi Tsɛ ni feɔ enii gbɛnaagbɛnaa lɛ.—1 Kor. 14:33, 40.
3. Mɛni hewɔ kɛ́ wɔyeɔ be nɔ lɛ, etsɔɔ akɛ wɔsusuɔ mɛi krokomɛi ahe lɛ?
3 Kɛ́ wɔfee wɔnii yɛ be naa lɛ, etsɔɔ hu akɛ wɔsusuɔ mɛi krokomɛi ahe. (Fil. 2:3, 4) Akɛ nɔkwɛmɔnɔ lɛ, kɛ́ wɔyaa Kristofoi akpeei kɛ kpeei kɛhã shiɛmɔyaa yɛ be naa lɛ, ehãaa wɔgba wɔnyɛmimɛi krokomɛi lɛ anaa. Yɛ gbɛ kroko nɔ lɛ, kɛ́ wɔkpeɔ sɛɛ daa lɛ, belɛ, wɔmiitao wɔkɛɛ mɛi krokomɛi lɛ akɛ, amɛbɛ nɔ ko feemɔ yɛ shĩa. Kɛ́ wɔyeɔ wɔbe nɔ lɛ, etsɔɔ akɛ abaanyɛ amu afɔ̃ wɔnɔ, etsɔɔ hu akɛ wɔtsuɔ nii waa, ni enɛɛmɛi ji sui ni wɔkutsoŋbii lɛ nyaa he waa.
4. Kɛ́ wɔkpeɔ sɛɛ daa lɛ, te wɔɔfee tɛŋŋ wɔtsake lɛ?
4 Kɛ́ ofɔɔ sɛɛkpee lɛ, susumɔ nibii ni hãa okpeɔ sɛɛ lɛ ahe. Too be ni okɛbaatsu nɔ fɛɛ nɔ he nii lɛ he gbɛjianɔ, koni onyɛ ogbe onifeemɔi lɛ anaa yɛ be naa. (Jaj. 3:1; Fil. 1:10) Sɔlemɔ ni Yehowa aye abua bo. (1 Yoh. 5:14) Kɛ́ wɔyeɔ wɔbe nɔ lɛ, eji gbɛ kome ni tsɔɔ akɛ wɔhiɛ sɔɔ kitai wuji enyɔ ni yɔɔ Mla lɛ mli ni ji akɛ, suɔmɔ Nyɔŋmɔ kɛ suɔmɔ onaanyo lɛ.—Mat. 22:37-39.