Sanebimɔ He

● Ani mɛi ni ashwie amɛ lɛ baanyɛ aya kpeei ni afeɔ yɛ mɛi ashiai amli yɛ wɔ amrɔ shihilɛ nɛɛ mli lɛ ashishi?

Aha nɛkɛ sanebimɔ nɛɛ hetoo yɛ March, 1975, Maŋtsɛyeli Sɔɔmɔ lɛ mli yɛ ebaafa 4. Hetoo lɛ ja ni ema shi nakai nɔŋŋ, ni wɔmiitsɛ sɛɛ koni ehe aba sɛɛnamɔ aha wɔ fɛɛ.

“Yɛ sanebimɔ nɛɛ hetoo-hamɔ mli lɛ, afɔɔɔ nine atsɛɛɛ mɛi ni ashwie amɛ kɛjɛ asafo lɛ mli lɛ koni amɛba kpeei yɛ mɛi ashiai amli. . . .

“Shi kɛ mɔ ni ashwie lɛ lɛ miibɔ mɔdɛŋ ni eku esɛɛ eba, eejie tsuitsakemɔ kpo, ni kɛ eshihilɛ eteee shi ewooo nɔ ni ajaje yɛ 2 Yohane 9-11 lɛ kɛtsɔ ya ni eeeya nɔ etsu nɔ ni teɔ shi ewoɔ ‘Kristo tsɔɔmɔ lɛ’ loo eeefi enɛ sɛɛ lɛ nɔ lɛ, belɛ ekolɛ abaaŋmɛ lɛ gbɛ koni eba kpeei yɛ mɔ ko shia mli kɛ Maŋtsɛyeli Asa ko bɛ maŋ lɛ mli, shi nyɛmimɛi ashiai amli afeɔ maŋshiɛmɔ he kpeei. Buu-Mɔɔ nikasemɔi kɛ sɔɔmɔ he kpeei lɛ yɛ, ni nɛkɛ shiai nɛɛ etsɔmɔ tamɔ Maŋtsɛyeli Asai lɛ. Yɛ shihilɛ ni tamɔ nɛkɛ mli lɛ, abaabu nɛkɛ shia nɛɛ akɛ Maŋtsɛyeli Asa, yɛ ŋmlɛtswai amli ni afeɔ nɛkɛ kpeei nɛɛ yɛ lɛ. Afeɔ kpeei lɛ yɛ onukpai akuu lɛ nɔkwɛmɔ shishi. Amɛbaale anɔkwalei ni kɔɔ mɔ ni ashwie lɛ lɛ he lɛ, ni amɛ amɛbaato amɛyiŋ kɛ ba ni mɔ lɛ aaaba kɛ heguɔgbee baaba asafo lɛ nɔ. Amɛbaasusu sane lɛ he yɛ amɛteŋ ni amɛgbala shiatsɛ lɛ amɛwo mli. Kɛ shiatsɛ lɛ eteee shi ewooo ba ni mɔ ni ashwie lɛ lɛ aaaba eshia lɛ, belɛ onukpai lɛ baabɔ mɔ ni ashwie lɛ nɛɛ amaniɛ, ni ebaaŋmɛ lɛ gbɛ ni ebote shia ni akɛfeɔ Maŋtsɛyeli Asa yɛ ŋmlɛtswai komɛi amli nɛɛ mli. Kɛ mɔ ni ashwie lɛ nɛɛ ba jɛmɛ lɛ, esa akɛ ele bɔ ni eeekudɔ ehe eha yɛ bei fɛɛ mli.”

No hewɔ lɛ oti lɛ ji, kɛ akɛ shia ko miitsu nii akɛ Maŋtsɛyeli Asa, ni eka shi faŋŋ akɛ mɔ ko ni ashwie lɛ lɛ miibɔ mɔdɛŋ ni eku esɛɛ eba lɛ, abaanyɛ aŋmɛ lɛ gbɛ ni eba kpeei yɛ shia lɛ mli kɛ shiatsɛ lɛ eteee shi ewooo enɛ. Ebaafee nɔ ni sa hu akɛ onukpai lɛ aaabɔ mɔ ni ashwie lɛ nɛɛ amaniɛ.