Sanekpakpa Lɛ Kɛhamɔ—Kɛ Yiŋtsɔmɔ
1 Ani eja gbɛ akɛ sanekpakpa lɛ he sɔɔlɔi aaatsɔ gbɔmɛi ayiŋ koni amɛkpɛlɛ anɔkwale lɛ nɔ? Eja gbɛ diɛŋtsɛ! (Bɔfoi 18:4) Bɔfo Paulo kai Timoteo akɛ enyɛ kɛ enaa tsɔ eyiŋ koni ebatsɔ heyelilɔ. (2 Tim. 3:14) Ni oootsɔ mɔ ko yiŋ lɛ tsɔɔ akɛ oootsirɛ lɛ kɛtsɔ faikpamɔ nɔ, okɛ lɛ asusu ehemɔkɛyeli, gbɛhe, aloo nifeemɔ gbɛ ko he kɛ hiɛdɔɔ yɛ anɔkwayeli mli.
2 Bɔfo Paulo kɛ yiŋtsɔmɔ he ŋaa tsu nii yɛ gbɛ kpakpa nɔ. Beni eyɔɔ Ateene lɛ, “emumɔ mli wo la yɛ emli, beni ena maŋ lɛ ni emli eyi obɔ kɛ amagai sɔŋŋ lɛ.” (Bɔfoi 17:16) Shi, beni eyadamɔ Areopago lɛ teŋ lɛ, Paulo ekɛɛɛ mɛi ni yɔɔ jɛmɛ lɛ kpeŋ akɛ amagai ni amɛjaa lɛ ji yakayaka nii. Akɛni ekɛ ŋaalee tsu nii ni ekɛkpoo keketee ni eeefee yɛ ehenumɔ ni ekɛaawie lɛ mli hewɔ lɛ, egbala jwɛŋmɔ kɛtee “afɔleshaa latɛ ko ni aŋma yɛ nɔ akɛ ‘Nyɔŋmɔ ni aleee lɛ’ nɔŋŋ” lɛ nɔ. No hewɔ lɛ etsɔ enɛ nɔ ekɛ odaseyeli ko ni mli wa ha ni nɔ kpakpa hu jɛ mli ba.—Bɔfoi 17:23, 28, 29, 34.
OKƐ SANESƐƐYOOMƆ ATSU NII
3 Paulo tsɔɔ yɛ faŋŋ mli akɛ yiŋtsɔmɔ biɔ babaoo fe henumɔŋ shiɛmɔ loo wiemɔ babaoo. Esa akɛ wɔna sane shishinumɔ ni wɔyoo gbɔmɛi ni wɔwieɔ wɔtsɔɔ amɛ lɛ ahenumɔi, hemɔkɛyelii kɛ nibii ni amɛyɔɔ he miishɛɛ. Esa akɛ wɔhe afee oya ni wɔyoo kɛji akɛ shiatsɛ lɛ henumɔi ji nɔ ni efee pampi kɛha lɛ ni no hewɔ ni egbeleee ejwɛŋmɔ mli esusuuu Biblia mli tsɔɔmɔi ahe lɛ.—Abɛi 16:23.
4 Akɛ nɔkwɛmɔ nɔ lɛ, mɔ ko baanyɛ ahe susuma ni gbooo lɛ eye akɛni ekɛ ehe ekpɛtɛ esuɔlɔ ko ni egbo kaimɔ he lɛ hewɔ. Mɛni ji yiŋtsɔmɔ gbɛ ni aaatsɔ nɔ ni akɛye abua lɛ ni ele anɔkwale lɛ? Ni oookɛɛ lɛ kpeŋ akɛ nɔ ni eheɔ eyeɔ lɛ ejaaa yɛ ehemɔkɛyeli lɛ mli akɛ susuma gboɔ lɛ, ani ebafeŋ nɔ ni hi jogbaŋŋ akɛ okɛ yiŋtsɔmɔ aaatsu nii koni ogbu shi kɛbote ehenumɔŋ husu lɛ mli ni okɛ lɛ asusu saji ahe? Wɔbaanyɛ wɔkɛɛ lɛ akɛ wɔnuɔ ehenumɔi ashishi ejaakɛ wɔ hu wɔlaaje suɔlɔi yɛ gbele mli. Shi wɔnaa miishɛjemɔ yɛ gbohiiashitee he shiwoo lɛ mli, be mli ni mɛi ni amɛlaaje suɔlɔi lɛ fɛɛ kɛ amɛ aaafee ekome ekoŋŋ yɛ miishɛɛ mli lɛ. Kɛkɛ lɛ obaanyɛ okane ŋmalɛi ni sa lɛ ni nyɛsusu he. Kɛ wɔkɛ sɛɛyoomɔ tsu nii ni wɔha ŋoo ba wɔwiemɔi amli lɛ, wɔbaanyɛ wɔtsɔ mɛi ayiŋ yɛ sanekpakpa lɛ kɛhamɔ mli.—Abɛi 16:21; Kol. 4:6.
OKƐ NƆKWƐMƆ NII ATSU NII
5 Nɔkwɛmɔ nii baanyɛ afee nɔ kroko ni mɔɔ shi jogbaŋŋ ni tsɔɔ mɛi ayiŋ koni amɛtsake amɛsusumɔ. Nɔkwɛmɔ nɔ ko ni sa kadimɔ ji ŋaa gbɛ ni Natan tsɔ nɔ ni enine shɛ Maŋtsɛ David nɔ lɛ. (2 Sam. 12:1-14) Nɔkwɛmɔ nii ni ahala jogbaŋŋ kɛ bi ni abiɔ ni akɛ jwɛŋmɔ atsu nii kɛ henumɔ hu lɛ ji nii ni hewalɛ yɔɔ mli. Ehaa efeɔ mlɛo kɛhaa gbɔmɛi akɛ amɛaanu nibii heei ashishi. Akɛ nɔkwɛmɔ nɔ lɛ, abaanyɛ akɛ shikpɔŋ lɛ ato shia ko he ni akɛ enɔ gbɔmɛi lɛ hu ato shia lɛ mlibii ahe. Kɛji akɛ mɛi ni yɔɔ shia lɛ kwɛɛɛ shia lɛ nɔ jogbaŋŋ lɛ, shiatsɛ lɛ fiteŋ eshia lɛ, shi moŋ ebaashwie mɛi ni yɔɔ shia lɛ mli lɛ. No hewɔ lɛ, Nyɔŋmɔ kpataŋ shikpɔŋ lɛ hiɛ, shi moŋ ebaajie gbɔmɛi gbohii lɛ kɛjɛ nɔ.—Yes. 45:18.
6 Yiŋtsɔmɔ yɛ he ni etsuɔ nii kɛyashɛɔ. Kɛji akɛ gbɔmɛi sumɔɔɔ ni amɛhe amɛye loo ni amɛfee tsakemɔi yɛ amɛshihilɛi amli lɛ amɛbaahi shi taakɛ bɔ ni amɛyɔɔ lɛ nɔŋŋ. (Mat. 13: 14, 15) Shi, gbɔmɛi ni yɔɔ tsuijurɔ lɛ babaoo yɛ je lɛ mli ni abaanyɛ akɛ Maŋtsɛyeli lɛ he sane lɛ ayaha amɛ. Bɔni afee ni wɔye wɔbua amɛ lɛ, esa akɛ wɔbɔ mɔdɛŋ fɛɛ ni sa ni wɔɔnyɛ ni wɔna yiŋtsɔmɔ he ŋaa ni wɔkɛtsu nii yɛ wɔsɔɔmɔ nitsumɔ lɛ mli.