Ni Wɔɔfee Weku Biblia mli Nikasemɔi ni mɔɔ Shi
1 Nitsumɔi ni he hiaa fe fɛɛ ni fɔlɔi tsuɔ lɛ ateŋ ekome ji anɔkwale lɛ ni amɛtsɔɔ amɛbii lɛ. Eji gbɛnaanii ko ni jɛ Yehowa ŋɔɔ. (5 Mose 6:6, 7) Gbɛtsɔɔmɔ kɛ kudɔmɔ he hiaa gbekɛbii bɔni afee ni amɛnyiɛ yɛ jalɛ gbɛi anɔ yɛ jeŋ ni sheee Nyɔŋmɔ gbeyei nɛɛ mli. Ehe miihia ni amɛkase bɔ ni amɛaafee amɛna suɔmɔ amɛha Yehowa kɛ anɔkwale lɛ koni amɛkpɛ amɛyiŋ hu akɛ amɛaakpɛtɛ he gbagbalii. September 1, 1988 Buu-Mɔɔ lɛ jaje yɛ baafa 20 akɛ: “Yɛ gbɛnaanii krokomɛi ni oyɔɔ loo haomɔi ni okɛkpeɔ lɛ fɛɛ sɛɛ lɛ, esa akɛ obu bei ni oooye yɛ obii amasɛi lɛ akɛ no he hiaa fe fɛɛ. Be ni okɛ amɛ yeɔ yɛ hekome lɛ baaŋmɛ gbɛ ni otɛo mumɔŋ hiamɔ nii ni baabu obii lɛ atsui he ni ekɛ amɛ ayi gbɛ ni ja lɛ nɔ lɛ yɛ amɛmli.”
2 Kɛji wekui lɛ baanyiɛ gbɛtsɔɔmɔi ni akɛha yɛ Nyɔŋmɔ Wiemɔ lɛ mli lɛ sɛɛ lɛ, no lɛ esa akɛ amɛto be he gbɛjianɔ daa kɛha weku nikasemɔ. Ehe miihia ni wekuyitsei lɛ aha amɛwekui lɛ amumɔŋ hiamɔ nii ahe nitsumɔ afee nɔ ni he hiaa fe fɛɛ. Kɛji ahaaa jwɛŋmɔ ahi weku lɛ mumɔŋ hiamɔ nii anɔ jogbaŋŋ bianɛ lɛ, no lɛ eka shi faŋŋ akɛ fɔlɔi kɛ naagbai ni hiɛdɔɔ yɔɔ he baakpe wɔsɛɛ ni ebaabi ni amɛtsu he nii.
Nibii Ni Abaakase Kɛ Gbɛi Ni Abaatsɔ Nɔ
3 Mɛni esa akɛ akase? Wekuyitso lɛ ji mɔ ni sa jogbaŋŋ akɛ ele nɔ ni he hiaa weku lɛ. Ebaanyɛ ebi mɛi krokomɛi nɔ ni amɛsusuɔ akɛ no he baaba sɛɛnamɔ koni esusu amɛŋaawoi lɛ ahe jogbaŋŋ. Tswaa ni aaafee lɛ baaha weku nikasemɔ lɛ afee nɔ ni anyɛɔ atsuɔ he nii ni ekanyaa mɔ hu. Wekui pii halaa akɛ amɛaasaa amɛhe kɛha daa otsi Buu-Mɔɔ nikasemɔ lɛ. Shi ekolɛ bei komɛi lɛ ehe baahia ni asusu otii pɔtɛɛ komɛi ni kɔɔ naagbai ni obalaŋtai kɛkpeɔ yɛ skul he lɛ ahe. Abaanyɛ asusu saji ni aŋmala ni kɔɔ nuu kɛ yoo nyiɛmɔ ni tsɔɔ gbalashihilɛ hiɛ, skul sɛɛ nifeemɔi, kpɔiaŋgbɔlemɔi kɛ jeŋba shara nifeemɔi ahe lɛ he yɛ gbɛ ni tswaa mɔ emaa shi ni woɔ mɔ hewalɛ hu nɔ. Ehe miihia ni wekuyitso lɛ asaa akwɛ saji ni he hiaa weku lɛ mli be fɛɛ be kɛ agbɛnɛ gbɛ ni hi fe fɛɛ ni eeetsɔ nɔ eha eshɛ amɛtsuii amli hu.—Kwɛmɔ Buu-Mɔɔ December 1, 1971 baafai 28-9.
4 Mɛɛ gbɛ nɔ esa akɛ afee nikasemɔ lɛ yɛ? Bɔɔ mɔdɛŋ ni efee nɔ ni yɔɔ miishɛɛ ni kɛlɛ bulɛ hu yɔɔ mli. Kaaha efee keketee kɛ nɔ ni yɔɔ shɛii. Bi saji krokomɛi ofata he, ni okɛ mfonirifeemɔi atsu nii ni okɛkanya niiahesusumɔ koni mɔ fɛɛ mɔ kɛ ehe awo mli. Abaanyɛ akɛ nibii ni akwɛɔ ni akɛkaseɔ nii, tamɔ shikpɔji ahe mfonirii atsu nii ni eha nikasemɔ lɛ aya hiɛ. Abaanyɛ akɛ nitsumɔi aha gbekɛbii lɛ ni amɛtao saji yɛ Index aloo Insight wolokpoi lɛ amli, yɛ afii abɔ ni amɛye lɛ kɛ bɔ ni amɛnyɛmɔi ji lɛ naa. Kɛ gbekɛbii bibii kwraa lɛ bɔi saji anaajiemɔ nɔŋŋ pɛ lɛ, esa akɛ akɛ amɛ hu afata sanegbaa lɛ he. Abaanyɛ abibii amɛ saji ni waaa ni abaanyɛ aha hetoo yɛ wiemɔ kome loo wiemɔi fioo mli lɛ ni amɛha hetoo. Akɛ nikasemɔ bei akasha gbekɛbii lɛ ahiɛ. Shi moŋ, ajie amɛ yi, ni ajie hiɛsɔɔ kpo yɛ amɛmɔdɛŋbɔi lɛ ahe, ni akɛ amɛ ana mumɔŋ niiashishinumɔi amli gbɛfaŋnɔ yɛ gbɛi ni kanyaa mɔ nɔ.
5 Mɛɛ gbɛ nɔ oootsɔ ona nɔmimaa yɛ akɛ ooshɛ etsui mli? Esa akɛ awo mɔ fɛɛ mɔ hewalɛ ni eha saji ahetoo yɛ lɛ diɛŋtsɛ ewiemɔ mli. Okɛ ŋaa atsu nii jogbaŋŋ ni obibii saji ni okɛna amɛshishinumɔ koni okɛle amɛtsuiaŋ susumɔi. Obaanyɛ obi akɛ: “Te gbekɛbii ni yɔɔ skul lɛ nuɔ he yɛ sane nɛɛ he amɛhaa tɛŋŋ? Ani ojwɛŋmɔ feɔ bo enyɔnyɔ yɛ oti nɛɛ he? Kwɛmɔ jogbaŋŋ ni okafee nɔ ko kɛteke nɔ yɛ hetoi ni gbekɛbii lɛ kɛbaaha yɛ saji ni obiɔ kɛtaoɔ amɛshishinumɔ mli lɛ he, kɛ jeee nakai lɛ gbekɛbii lɛ nyɛŋ amɛjɛ amɛsuɔmɔ mli amɛwie yɛ anɔkwayeli mli. Ha amɛ be ni amɛkɛwie. Kɛ amɛle akɛ oyɛ amɛ diɛŋtsɛ kɛ amɛ naagbai lɛ ahe miishɛɛ lɛ, no baaha mɔdɛŋ ni obɔɔ ni okɛtsɔɔ amɛ nii lɛ afee mlɛo kwraa.—Kwɛmɔ Buu-Mɔɔ April 1, 1987. baafai 23-5.
6 Ha ni ehi ojwɛŋmɔ mli akɛ yiŋtoo titri ni yɔɔ oweku nikasemɔ lɛ sɛɛ ji ni odu Yehowa jwɛŋmɔi owo amɛmli, ni jeee ni ootao hetoo ni abaakɛɛ yɛ asafoŋ kpee shishi. (Efes. 3:17-19) Enɛ tsɔɔ akɛ esa akɛ otsu nii ni oha sane lɛ ashɛ tsui lɛ mli tɔɔ. Ha weku lɛ ale yiŋtoi ahewɔ ni esa akɛ amɛfee Nyɔŋmɔ suɔmɔnaa nii kɛ nɔ hewɔ hu ni no pɛ ji gbɛ ni hi fe fɛɛ ni amɛaakɔ yɛ amɛshihilɛ mli lɛ.
7 Weku Biblia mli nikasemɔ ni aaafee daa lɛ he miihia koni akɛtswa weku lɛ ama shi yɛ mumɔŋ. Etsɔseɔ gbekɛbii lɛ ni ewulaa amɛ bɔni afee ni amɛnyɛ amɛkpee shihilɛ mli naagbai anaa. Nyɛ fɔlɔi lɛ ji mɛi ni yɔɔ hegbɛi kpakpai fe fɛɛ ni nyɛkɛaaye nyɛbua nyɛbii lɛ. Tsu nɛkɛ gbɛnaanii ni jɛ Nyɔŋmɔ ŋɔɔ nɛɛ he nii. Eka shi faŋŋ akɛ Yehowa baajɔɔ bo kɛji obɔ mɔdɛŋ fɛɛ ni ooonyɛ ni ofee shia Biblia mli nikasemɔ ni mɔɔ shi be fɛɛ be lɛ.