Sanekpakpa Lɛ Kɛhamɔ—Yɛ Be Krɛdɛɛ ko Mli
1 Gbi ni he hiaa fe fɛɛ yɛ wɔ kalanda lɛ nɔ afi nɛɛ ji Hɔɔ, March 30. Wɔbaaye Yesu gbele lɛ he Kaimɔ lɛ yɛ nakai gbi lɛ nɔ, beni hulu eyanyɔ shi sɛɛ. (1 Kor. 11:20, 24) Mɛni hewɔ ni ahala gbi ni Yesu gbo lɛ akɛ gbi kɛha kaimɔ krɛdɛɛ ko lɛ?
Kaimɔ Lɛ—Bɔ Ni Ehe Hiaa Ha
2 Yesu gbele lɛ ji nifeemɔ ko ni he hiaa yɛ jeŋ fɛɛ. Beni bɔfo Paulo ŋmaa wolo eyaha Kristofoi ni akɛ mumɔ efɔ amɛ lɛ asafo lɛ mlibii lɛ, ekɛɛ: “Shi shii abɔ ni nyɛyeɔ nɛkɛ aboloo nɛɛ ni nyɛnuɔ nɛkɛ kpulu nɛɛ hu lɛ, nyɛmiijaje Nuŋtsɔ lɛ gbele lɛ nyɛmiitsɔɔ kɛyashi beyinɔ ni eeeba.” (1 Kor. 11:26) No hewɔ lɛ Kaimɔ lɛ gbalaa wɔjwɛŋmɔ kɛyaa bɔ ni Yesu Kristo gbele lɛ he hiaa yɛ Yehowa yiŋtoo he nitsumɔ mli lɛ nɔ yɛ gbɛ krɛdɛɛ nɔ. Emaa shishinumɔ ni yɔɔ Yesu afɔleshaa gbele lɛ he lɛ nɔ mi, titri lɛ yɛ bɔ ni ekɔɔ kpaŋmɔ hee lɛ he kɛ bɔ ni egbele lɛ saa mɛi ni baafee enanemɛi gboshiniyelɔi yɛ ŋwɛi Maŋtsɛyeli lɛ mli lɛ ahe lɛ he.—Yoh. 14:2, 3: Heb. 9:15.
3 Yesu tsɔ emuuyeli mli ni ehiɛ aahu kɛyashi egbele mli tɔɔ lɛ nɔ eha e-Tsɛ gbɛi lɛ he tse ni efee he nɔkwɛmɔ akɛ adesa ni eye emuu lɛ baanyɛ ahiɛ anɔkwayeli mli eha Nyɔŋmɔ yɛ kaa fɛɛ kaa ni Satan kɛaaba enɔ lɛ shishi. Egbele lɛ hu kɛ adesa afɔleshaa ni eye emuu ni he hiaa bɔni afee ni akpɔ Adam seshibii lɛ haa ni ekɛ hegbɛ hu haa mɛi fɛɛ ni baana hemɔkɛyeli yɛ emli lɛ ni amɛhi shi kɛya naanɔ yɛ paradeiso shikpɔŋ nɔ. Yɛ nibii babaoo ni Yesu gbele lɛ haa anyɛɔ afeɔ nɛɛ fɛɛ hewɔ lɛ, eja gbɛ jogbaŋŋ akɛ eeefa ekaselɔi lɛ ni amɛkai egbele lɛ.—rs bf. 266-7
Bɔ Ni Wɔɔfee Wɔjie Hiɛsɔɔ Kpo
4 Je lɛ yɛ gbijurɔ pii ni ayeɔ yɛ afi lɛ mli, ni amɛbɔɔ mɔdɛŋ waa ni gbijurɔyelii nɛɛ aya nɔ nakai. Shi yɛ gbɛ kroko nɔ lɛ, Nuŋtsɔ lɛ Gbɛkɛnaashi Niyenii lɛ pɛ ji gbijurɔ ni Yesu fa mɛi ni etuu amɛhe amɛha akɛ amɛbaanyiɛ enanemaa hei asɛɛ lɛ ni amɛye. Ŋwanejee ko bɛ he akɛ, no ji afi lɛ mli gbijurɔyeli kpele ni fe fɛɛ kɛha anɔkwa Kristofoi fɛɛ. Ani esaaa akɛ bɔ ni Nuŋtsɔ lɛ Gbɛkɛnaashi Niyenii lɛ kaimɔ he hiaa waa ha lɛ tsirɛɔ wɔ ni wɔhaa wɔjwɛŋmɔ hiɔ nɔ yɛ March mli?
5 Ekolɛ wɔɔnyɛ wɔkɛ hiŋmɛitswaa fioo ko atsu nii daa otsi yɛ March mli ni wɔkɛ wɔ-Biblia kaselɔi lɛ asusu ŋmalɛi ni maa bɔ ni Kristo gbele lɛ he hiaa ha lɛ nɔ mi lɛ ahe, ni wɔtsɔɔ amɛ nɔdaamɔ nɔ kɛha Kaimɔ lɛ. Wɔbaanyɛ wɔwo amɛ hewalɛ hu ni amɛnyiɛ Kaimɔ Biblia kanemɔ he gbɛjianɔtoo kɛha March 25 kɛyashi 30 lɛ sɛɛ pɛpɛɛpɛ. Enɛ baanyɛ aye abua amɛ ni eha hiɛsɔɔ ni amɛyɔɔ kɛha Nuŋtsɔ lɛ Gbɛkɛnaashi Niyenii lɛ mli akwɔ.
6 Akɛni Kaimɔ gbijurɔyeli lɛ gbeɔ Hɔɔ hewɔ lɛ, ebaafee mlɛo eha mɛi pii akɛ amɛaato amɛ gbɛjianɔ ni amɛnyɛ amɛba. Shiɛlɔi pii kɛ otsi naagbeei enumɔ ni yɔɔ March mli lɛ he hegbɛ ni ekɛhaa lɛ miito gbɛjianɔ ni amɛkɛsɔmɔ akɛ gbɛgbalɔi awalɔi. Enɛ haa amɛnaa hegbɛ koni amɛna gbɛfaŋnɔ babaoo ni amɛkɛma bɔ ni Nuŋtsɔ lɛ Gbɛkɛnaashi Niyenii lɛ yeli lɛ he hiaa lɛ nɔ mi. Ekɛ hegbɛi babaoo hu haa amɛ koni amɛkɛye amɛbua mɛi heei lɛ koni amɛha gbi krɛdɛɛ nɛɛ ahi amɛjwɛŋmɔ mli jogbaŋŋ.
7 Yɛ bɔ ni Kaimɔ lɛ yeli he hiaa waa ha nɛɛ hewɔ lɛ, nyɛhaa wɔbɔa mɔdɛŋ fɛɛ ni wɔɔnyɛ ni wɔkɛye wɔbua mɛi krokomɛi ni amɛba. Abaanyɛ ana nibii ni esa akɛ onukpai lɛ atsu he nii ni akaiɔ wɔ yɛ he lɛ he saji yɛ Wɔ Maŋtsɛyelii Sɔɔmɔ kɛha March 1989 kɛ March 1990 lɛ amli.
8 Eba akɛ wɔkɛ sɛɛyoomɔ ni mli tse kɛ hiɛsɔɔ ni mli kwɔ ni wɔyɔɔ kɛha nibii fɛɛ ni Yesu gbele lɛ tsɔɔ kɛha adesai lɛ aaakpa nɛkɛ gbi ni he hiaa fe fɛɛ yɛ 1991 mli nɛɛ gbɛ. Hɛɛ, eba akɛ wɔ fɛɛ wɔnaa aaakpe shi shikome ekoŋŋ yɛ March 30 gbɛkɛnaashi yɛ be mli ni Yehowa anɔkwa jalɔi fɛɛ kɛ anɔkwayeli boɔ Yesu famɔ nɛɛ toi akɛ ‘wɔjaje Nuŋtsɔ lɛ gbele lɛ wɔtsɔɔ kɛyashi beyinɔ ni eeeba’ lɛ.