Kaimɔ Lɛ—Nifeemɔ Ko ni He Hiaa Waa Diɛŋtsɛ!
1 Wɔbaaye Kristo gbele lɛ Kaimɔ lɛ yɛ Hɔgbaa, March 23 beni hulu enyɔ shi. (Luka 22:19) Lɛlɛŋ, enɛ ji nifeemɔ ko ni he hiaa waa diɛŋtsɛ! Kɛtsɔ emuuyeli ni Yesu hiɛ mli eha Yehowa kɛyashi gbele mli lɛ nɔ lɛ, etsɔɔ akɛ, adesa baanyɛ ahiɛ emuuyeli mli yɛ Nyɔŋmɔ jamɔ hetuu-kɛhamɔ mli yɛ jaramɔ shihilɛ ni naa wa po mli, koni etsɔ nakai feemɔ nɔ efi ja ni Yehowa maŋtsɛyeli ja lɛ sɛɛ. (Heb. 5:8) Kɛfata he lɛ, Kristo gbele lɛ kɛ adesa ni eye emuu afɔleshaa ni he hiaa koni akɛkpɔ̃ adesai lɛ ha, ni ekɛgbele gbɛ koni mɛi ni heɔ yeɔ lɛ ahi shi kɛya naanɔ. (Yoh. 3:16) Wɔbaanyɛ wɔtsɔ Kaimɔ lɛ shishi ni wɔɔba lɛ nɔ wɔjie tsuiŋ hiɛsɔɔ ni wɔyɔɔ kɛha Yehowa suɔmɔ kɛ Yesu afɔleshaa hu ni ekɛha wɔ lɛ kpo wɔtsɔɔ.
2 Aawo mɛi fɛɛ hewalɛ ni anyiɛ Biblia kanemɔ he gbɛjianɔ ni ato kɛha March 18-23 lɛ sɛɛ, taakɛ ato naa yɛ 1997 Calendar of Jehovah’s Witnesses lɛ mli lɛ. Agbɛnɛ hu, weku sanegbaa ni baadamɔ Gbɔmɔ ni Fe Mɔ Fɛɛ Mɔ ni Ehi Shi Pɛŋ wolo lɛ yitsei 112-16 lɛ nɔ lɛ baaye abua ni wɔgbala wɔjwɛŋmɔ kɛya otsi ni he hiaa fe fɛɛ yɛ adesa yinɔsane mli lɛ nɔ.
3 Ani obaanyɛ oha bei ni okɛtsuɔ nii yɛ shiɛmɔ nitsumɔ lɛ mli yɛ Kaimɔ be lɛ mli lɛ aya hiɛ? Shiɛlɔi pii kɛ otsii lɛ anaagbee enumɔ ni yɔɔ March mli lɛ baatsu nii kɛmɔ shi, ni amɛkɛsɔmɔ akɛ gbɛgbalɔi awalɔi. Mɛni hewɔ ofataaa amɛhe? Wɔteŋ mɔ fɛɛ mɔ baanyɛ aná gbɛfaŋnɔ kɛmɔ shi akɛ eeema bɔ ni ehe hiaa ni aya Kaimɔ lɛ shishi lɛ nɔ mi. Akɛni abaafee yɛ Hɔgbaa hewɔ lɛ, ebaafee mlɛo kɛha mɛi pii akɛ amɛaaba. Kwɛmɔ koni ofɔ̃ Biblia kaselɔi kɛ mɛi krokomɛi ni yɔɔ wiemɔ lɛ he miishɛɛ lɛ fɛɛ nine ni amɛbafata wɔhe. Okɛ amɛ agba nɔ ni aŋma yɛ Nilee wolo lɛ baafa 127, kuku 18, ni kɔɔ gbi kome ni yɔɔ afi lɛ mli ni esa akɛ akai yɛ gbɛ krɛdɛɛ nɔ he lɛ he sane.
4 Okɛ hiɛsɔɔ ni mli kwɔ kɛha nibii fɛɛ ni Yesu gbele lɛ tsɔɔ kɛha wɔ lɛ asaa ohe kɛha 1997 nifeemɔ ni fe fɛɛ nɛɛ. Ba jɛmɛ yɛ March 23 gbɛkɛnaashi, be mli ni anɔkwa Kristofoi ni yɔɔ he fɛɛ he kɛ anɔkwayeli yeɔ Kaimɔ lɛ.