Wɔ Maŋtsɛyeli Sɔɔmɔ Lɛ He Nii Ni Wɔɔtsu Yɛ Asafo Lɛ Mli
1 Yehowa kɛ gbɛnaa nii ahe nitsumɔ ewo “tsulɔ nukpa anɔkwafo,” loo shia nɔkwɛlɔ lɛ dɛŋ, kɛtsɔ Yesu Kristo, ni ji Kristofoi asafo lɛ Yitso lɛ nɔ. (Luka 12:42, 43) Nɛkɛ gbɛjianɔtoo nɛɛ eye ebua ni eha wɔnine enyɛ eshɛ gbɛtsɔɔmɔ nɔ yɛ bɔ ni wɔɔfee ‘wɔba wɔjeŋ wɔha yɛ Nyɔŋmɔ we’ lɛ he, kɛtsɔ woji ni akala nɔ. (1 Tim. 3:15) Dɛŋdade titri ni wɔkɛtaoɔ saji ni akala lɛ ji Watch Tower Publications Index lɛ. Mɛɛ gbɛ nɔ eeenyɛ eye ebua bo yɛ?
2 Ani oji onukpa? Yitsei titrii enyɔ komɛi yɛ mli ni wieɔ ogbɛnaa nii ahe: ‘Onukpai’ kɛ ‘Nɔkwɛlɔi.’ Afa ni wieɔ ‘Onukpai’ ahe lɛ tsɔɔ hei ni abaanyɛ ana saji ni kɔɔ bɔ ni aaafee aye abua mɛi sɔrɔtoi yɛ asafo lɛ mli bɔ ni aaafee akɛ ŋaawoo aha, wekukpaa ni esa akɛ ehi onukpai akuu lɛ mli, onukpai agbɛnaa nii, kɛ nibii krokomɛi ahe lɛ yɛ. Anaa nibii ni atsɛ sɛɛ ni kɔɔ hesaai ahe lɛ yɛ ‘Nɔkwɛlɔi’ shishi, ejaakɛ nakai yitso lɛ ji wiemɔ ni Biblia lɛ kɛtsu nii yɛ be mli ni ewieɔ enɛɛmɛi ahe lɛ. Agbɛnɛ hu ‘Nɔkwɛlɔi’ shishi ji he ni anaa asafoŋ nitsumɔi krokomɛi pɔtɛɛ, tamɔ ‘onukpai asɛinɔtalɔ,’ ‘sɔɔmɔ nɔkwɛlɔ,’ kɛ ‘woloŋmalɔ’ lɛ he saji yɛ. Yitso titri ni ji ‘Asafoi’ lɛ hu baanyɛ ekɛ saji ni he yɔɔ sɛɛnamɔ aha.
3 Nyɛ mɛi ni nyɛji asafoŋ sɔɔlɔi lɛ hu tsuɔ gbɛfaŋnɔ ni he hiaa he nii yɛ asafo lɛ mli. Yitso ni ji ‘Asafoŋ Sɔɔlɔi’ lɛ eto saji ni kɔɔ nyɛhesaa kɛ gbɛnaa nii ahe lɛ fɛɛ naa pɛpɛɛpɛ. Obaana ni atsɔɔ hei ni aŋmala saji ni kɔɔ bɔ ni ehe hiaa ni adi sɔɔmɔ hegbɛi ni yɔɔ kɛha bo lɛ asɛɛ kɛ bɔ ni ooofee oya ohiɛ ni onyɛ oshɛ gbɛnaa nii krokomɛi ahe lɛ he yɛ.
4 Onukpai kɛ asafoŋ sɔɔlɔi fɛɛ yɛ hegbɛi yɛ nibii ni kɔɔ kpeei ni afeɔ yɛ asafo lɛ mli lɛ ahe lɛ gbɛfaŋ. Yitso ni ji ‘Kpeei’ lɛ etsɔɔ hei ni abaanyɛ ana saji ni kɔɔ sane nɛɛ he lɛ fɛɛ yɛ, kɛ nɔkwɛmɔ nii ni yɔɔ miishɛɛ yɛ ‘mɔdɛŋ ni abɔɔ ni aya’ shishi. Yɛ anɔkwale mli lɛ, saneyitsei otii yɛ kɛha kpeei sɔrɔtoi lɛ fɛɛ hu.
5 Lala 68:12 kɛɔ akɛ: “Yei ni shiɛɔ kunimyeli lɛ fa babaoo.” Taakɛ asafo lɛ mlibii ni ji hii lɛ feɔ lɛ, esa akɛ nyɛmimɛi yei lɛ hu kɛ amɛhe akpɛtɛ jeŋba kpakpa ni ato aha amɛ yɛ Nyɔŋmɔ webii ateŋ lɛ he. Bei komɛi lɛ abiɔ saji yɛ nibii tamɔ be mli ni esa akɛ nyɛmiyoo ko aha eyi nɔ aloo nɔ ni esa akɛ afee kɛji nyɛminuu ni he esa ni baanyɛ akwɛ kpee ko nɔ aloo enyiɛ asafo lɛ hiɛ yɛ sɔlemɔ mli bɛ lɛ ahe. Yitso ni ji ‘Yei’ lɛ baanyɛ atsɔɔ bo hei ni obaana saji ni kɔɔ enɛɛmɛi ahe lɛ yɛ. Yitsei tamɔ ‘Nyɛmimɛi Yei,’ ‘Yi nɔ Haa.’ kɛ ‘Sɔlemɔ’ hu ahe yɛ sɛɛnamɔ.
6 Ŋmalɛ ni yɔɔ 1 Timoteo 3:15 lɛ naagbee fa lɛ wieɔ Kristofoi asafo lɛ he akɛ “anɔkwale lɛ akulashiŋ kɛ enɔdaamɔ nɔ.” Eji hegbɛ ni wɔna akɛ wɔfi anɔkwale lɛ sɛɛ yɛ be mli ni wɔbaa wɔjeŋ yɛ gbɛ ni sa nɔ yɛ Nyɔŋmɔ we lɛ, ni wɔtsuɔ wɔ Maŋtsɛyeli sɔɔmɔ lɛ he nii yɛ asafo lɛ mli lɛ.