Wo Mɛi Krokomɛi Hewalɛ Ni Amɛkane Buu-Mɔɔ Lɛ
1 Yɛ May kɛ June mli lɛ, wɔbaasumɔ ni wɔwo mɛi ni sumɔɔ anɔkwale lɛ hewalɛ ni amɛkane Buu-Mɔɔ lɛ daa. Wɔ diɛŋtsɛ wɔ niiashikpamɔ ema nɔ mi eha wɔ faŋŋ akɛ yɛ woji tɛtrɛbii ni akalaa ŋmɛnɛ lɛ fɛɛ amli lɛ, no pɛ kɛ mumɔŋ niyenii ni he hiaa mɛi ni dɔmɔɔ ŋtsɔi ni amɛyeɔ ŋkɔmɔ yɛ shikpɔŋ nɔ shihilɛi ni yaa nɔ efiteɔ nɛɛ he lɛ haa amɛ.—Ezek. 9:4.
2 Buu-Mɔɔ lɛ eye ebua wɔ ni wɔnu Biblia gbalɛi ni maa nɔ mi akɛ naagbee be lɛ mli wɔyɔɔ nɛɛ, ni akɛ etsɛŋ ni Nyɔŋmɔ Maŋtsɛyeli lɛ kɛ toiŋjɔlɛ baaba shikpɔŋ lɛ nɔ lɛ ashishi jogbaŋŋ. Bɔ ni wɔsusuɔ mɛi krokomɛi awala he waa lɛ tsirɛɔ wɔ ni wɔkɛ amɛ aja nɛkɛ hiɛnɔkamɔ ni yɔɔ nyam nɛɛ. Ni bɔ ni wɔnaa ni abuaa mɛi ni yɔɔ tsui krɔŋŋ lɛ anaa babaoo kɛha yiwalaheremɔ lɛ woɔ wɔ hewalɛ.—Yoh. 10:16.
3 “Ani Ekpe Sɛɛ Fe bɔ ni Osusuɔ?” ji saji ni aŋmala yɛ April 1, 1991 Buu-Mɔɔ lɛ mli lɛ mli saneyitso ko ni gbalaa mɔ jwɛŋmɔ waa. April 15 nɔ lɛ wieɔ saneyitso ko ni ji “Mɛɛ Be Toiŋjɔlɛ Diɛŋtsɛ Baaba?” he. Abaanyɛ akɛ saneyitsei nɛɛ atsa Saneyitso Kɛha Sanegbaa ni wɔkɛtsuɔ nii amrɔ nɛɛ, ni ji “Jeŋ Toiŋjɔlɛ. Ani Ebɛŋkɛ?” lɛ nɔ. Kɛji wɔɔnyɛ wɔna akɛ shiatsɛ lɛ yɛ sanekpakpa lɛ he miishɛɛ lɛlɛŋ lɛ, no lɛ esa akɛ wɔgbala lɛ wɔwo Biblia mli sanegbaa ni ŋɔɔ ni naanyobɔɔ su yɔɔ mli lɛ mli. Enɛ biɔ ni wɔtsɔ hiɛ wɔsaa wɔhe ni wɔfee klalo akɛ wɔɔtsɔɔ shiatsɛ lɛ bɔ ni saji ni eje kpo yɛ woji tɛtrɛbii heei lɛ amli lɛ baanyɛ aye abua lɛ waa koni bɔ ni enuɔ sane ni nyɛsusuɔ he lɛ shishi lɛ mli alɛɛ lɛ mli.
4 Kaimɔ akɛ nitsumɔ ni akɛha wɔ ji ni wɔshiɛ sanekpakpa lɛ ni wɔfee kaselɔi. (Mat. 24:14; 28:19, 20) Kɛji mɔ lɛ ji mɔ ko ni sumɔɔ saji pɔtɛɛ komɛi akanemɔ yɛ bei komɛi amli lɛ, no lɛ ebaahi akɛ oooŋma egbɛi akɛ mɔ ko ni heɔ woji tɛtrɛbii lɛ daa koni oya eŋɔɔ daa ni oyasara lɛ. Ya ni oooya mɔ lɛ ŋɔɔ daa lɛ baaha onyɛ otee emiishɛɛ shi koni no aha ebatsɔ mɔ ko ni kaneɔ Buu-Mɔɔ lɛ daa.
5 Wɔbaana hegbɛi babaoo yɛ May kɛ June mli koni wɔkɛgbɛ Yehowa Maŋtsɛyeli lɛ he sanekpakpa lɛ yɛ shia kɛ shia kɛ agbɛnɛ kɛtsɔ gbɔmɛi ni wɔkɛo kpeɔ lɛ ni wɔkɛaagba sane trukaa lɛ nɔ. Wɔbaanyɛ wɔna hekɛnɔfɔɔ akɛ Yehowa baaya nɔ ajɔɔ mɔdɛŋbɔɔ ni ekaa yɔɔ mli ni wɔkɛtaoɔ mɛi ni he jɔ yɛ wɔshikpɔŋkuku lɛ mli ni wɔkɛ mumɔŋ niyenii aha amɛ lɛ nɔ.