Sanekpakpa Lɛ Kɛhamɔ
Kɛ Sɛɛyoomɔ
1 Abɛbua ko ni jɛ mumɔŋ lɛ kɛɔ akɛ: “Mɔ ni mɔɔ sanesɛɛkɔmɔ mli lɛ, aaahi aha lɛ.” (Abɛi 19:8) Nilee ni yɔɔ nɛkɛ wiemɔi nɛɛ amli lɛ feɔ anɔkwale yɛ bei pii amli yɛ wɔ shiɛmɔ nitsumɔ lɛ mli. Akɛ nɔkwɛmɔ nɔ lɛ, shiɛlɔi babaoo etsɔ sɛɛyoomɔ kɛ ŋaa kɛ nitsumɔ nɔ ni amɛha mɛi ni kulɛ amɛbaatsi sanegbaa naa lɛ etsɔmɔ hegbɛi ni amɛkɛye odase babaoo. Aloo kɛ hoo kwraa lɛ amɛto hegbɛ ni amɛkɛaaye odase yɛ sɛɛ mli be kroko mli lɛ shishi. Mɛɛ gbɛ nɔ aaatsɔ afee enɛ?
Mɛi Ni Tsiɔ Sanegbaa Naa Lɛ Ahe Nitsumɔ
2 Bei pii lɛ wɔkɛ mɛi kpeɔ ni amɛkɛɔ akɛ, “Mibɛ deka.” Ani shiatsɛ lɛ bɛ deka lɛlɛŋ, aloo eekɛɛ enɛ kɛkɛ bɔni afee ni ekɛ ehe akawo sanegbaa kakadaŋŋ mli? Sɛɛyoomɔ he miihia. Kɛji otamɔɔɔ mɔ ko ni bɛ deka lɛlɛŋ lɛ, no lɛ wɔbaanyɛ wɔbɔ mɔdɛŋ ni wɔye nɛkɛ sanegbaa naatsilɔ nɛɛ nɔ. Wɔbaanyɛ wɔkɛɛ akɛ, “No lɛ mafo miwiemɔ lɛ kuku.” No sɛɛ lɛ, wɔbaanyɛ wɔmu nɔ ni wɔto ni wɔkɛ lɛ baawie lɛ naa, ni wɔha gbeekpamɔ ni wɔkɛ lɛ eba akɛ wɔbaawie kuku lɛ ahi wɔjwɛŋmɔ mli. Nɔ ni baajɛ ehesusumɔ kɛ wiemɔi ni wɔɔwie ni etee emiishɛɛ shi lɛ mli aba ji akɛ, ekolɛ mɔ lɛ baatsɔɔ po akɛ eesumɔ ni etsa sanegbaa lɛ nɔ amrɔ nɔŋŋ.
3 Wɔŋɔ lɛ akɛ mɔ ni oyanina lɛ bɛ deka lɛlɛŋ. Eyɛ mli akɛ wɔsumɔɔɔ ni amɛha wɔshi amɛ yɛ gbɛ ni yɔɔ mlɛo nɔ nakai moŋ, shi kɛji wɔfee shɛii loo wɔnyɛ amɛnɔ lɛ, no lɛ ebaaha amɛna wɔhe jwɛŋmɔ fɔŋ. Kɛji shiatsɛ lɛ hiɛ nihoomɔ tsɛŋsi yɛ edɛŋ ni wɔmiinu niyenii ni aahoo ŋmajee lɛ, no lɛ eyɛ faŋŋ akɛ ekolɛ ebɛ deka lɛlɛŋ. No hewɔ lɛ sɛɛyoomɔ kɛ shishinumɔ kpakpa ni wɔɔna lɛ he miihia. Efeŋ mɔ lɛ he susumɔ akɛ oooya nɔ kɛ sanegbaa lɛ yɛ nakai beaŋ. Ebaahi jogbaŋŋ moŋ akɛ oooha shiatsɛ lɛ dɛhiɛmɔ wolo koni oto gbɛjianɔ ni oya eŋɔɔ be kroko. Enɛ baaha ena ohe jwɛŋmɔ kpakpa, ni be kroko ni Odasefonyo ko baaya eŋɔɔ lɛ, ebaanyɛ eye lɛ odase fɛfɛo.
Bɔ Ni Wɔɔfee Wɔnii Yɛ Mɔ Lɛ Subaŋ He Wɔha
4 Bei komɛi lɛ wɔkɛ aŋkroaŋkroi komɛi kpeɔ ni amɛkuɔ wɔwiemɔ lɛ naa amrɔ nɔŋŋ kɛ wɔtee amɛŋɔɔ yɛ shiɛmɔ nitsumɔ lɛ mli. Mɛni esa akɛ wɔfee yɛ enɛ mli? Abɛi 17:27 woɔ ŋaa akɛ: “Mɔ ni mumɔ he jɔ lɛ, lɛ ji mɔ ni kɔɔ sane sɛɛ.” Mɛɛ ŋaawoo fɛfɛo nɛ! Bei pii lɛ, naajɔlɛ gbee ni wɔkɛaatsɔɔ bɔ ni wɔsusuɔ eho lɛ haa nakai mɔ lɛ hejɔɔ. Kɛfata he lɛ, kɛji wɔɔnyɛ wɔtsɔ ŋaa gbɛ nɔ wɔha ewie sane ko ni kɔɔ ehe lɛ, no lɛ ehaŋ efee akɛ eefa ehe babaoo. Ni kɛji eto sanegbaa lɛ nɔ kuku po lɛ, ekolɛ naajɔlɛ ni wɔkɛaaha lɛ hetoo lɛ baaha wɔshi lɛ akɛ mɔ ko ni ka he eyɔɔ Yehowa Odasefoi anitsumɔ lɛ he jwɛŋmɔ kpakpa. No baatee nitsumɔ kpakpa ni wɔnyɛ wɔtsu. Eji anɔkwale akɛ, kɛji shiatsɛ lɛ ehao ni emli efu hu lɛ, no lɛ ebaahi jogbaŋŋ akɛ oooshi jɛmɛ dioo koni ekolɛ oka ekoŋŋ akɛ oooye lɛ odase yɛ be kroko mli.
5 Agbɛnɛ mɛi krokomɛi hu yɛ ni, eyɛ mli akɛ amɛjeɔ ŋwane babaoo moŋ, shi kɛlɛ amɛyeɔ anɔkwa. Yɛ shihilɛi nɛɛ amli lɛ, ebaafee wɔtsuishitoo lɛ he kaa diɛŋtsɛ akɛ wɔɔya nɔ wɔkɛ amɛ agba sane. Kɛji wɔyooɔ nii asɛɛ lɛ, no lɛ wɔmuŋ sane naa amrɔ nɔŋŋ akɛ shiatsɛ lɛ bɛ wiemɔ lɛ he miishɛɛ akɛni ekɛ nɔmimaa tsɔɔ jwɛŋmɔ sɔrɔto ni eyɔɔ lɛ hewɔ. Wɔbaasumɔ ni wɔbibii lɛ saji komɛi yɛ ŋaa mli koni wɔkɛbɔ mɔdɛŋ wɔtao nɔ hewɔ ni eheɔ nibii eyeɔ nakai lɛ, koni no sɛɛ lɛ wɔtsɔɔ lɛ nɔ ni Biblia lɛ kɛɔ yɛ sane lɛ he. (Abɛi 20:5) Wɔbaanyɛ wɔdamɔ bɔ ni enifeemɔ ji lɛ nɔ wɔkpɛ wɔyiŋ kɛji eeefee sɛɛnamɔ akɛ wɔɔya nɔ kɛ sanegbaa lɛ aloo wɔkafee nakai.
6 Shiɛlɔ ni yɔɔ sɛɛyoomɔ lɛ naa akɛ yɛ bei babaoo mli lɛ be kɛ shihilɛ ni yɔɔ lɛ tsakeɔ bɔ ni shiatsɛ ko feɔ enii ehaa yɛ Maŋtsɛyeli shɛɛ sane lɛ he. Ekolɛ bɔ ni ebaafee enii eha be kroko ni wɔɔya jɛmɛ lɛ baafee sɔrɔto kwraa. Esa akɛ wɔkwɛ jogbaŋŋ ni wɔkasusu akɛ eboŋ wɔ toi jogbaŋŋ yɛ bɔ ni shiatsɛ lɛ fee enii eha yɛ be mli ni wɔtee eshinaa naa yɛ sɛɛkpee nɛɛ nɔ lɛ hewɔ.
7 Ni wɔɔkpɛ wɔyiŋ kɛji esa akɛ wɔtsa sanegbaa ko nɔ aloo dabi lɛ bɛ mlɛo. Shi kɛlɛ, kɛ wɔna ŋaa gbɛ ni atsɔɔ nɔ akɛtsɔɔ nii lɛ, ebaaha wɔnitsumɔ lɛ amɔ shi jogbaŋŋ yɛ sanekpakpa lɛ ni wɔkɛaaha kɛ sɛɛyoomɔ lɛ mli, yɛ be mli ni wɔkwɛɔ Yehowa gbɛ koni ejɔɔ wɔmɔdɛŋbɔi lɛ anɔ lɛ.—1 Kor. 3:6; Tito 1:9.