Dii Miishɛɛ Iɛ Sɛɛ kɛ Sɛɛyoomɔ

¹ Yɛ naagbai sɔrɔtoi ahewɔ lɛ, mɛi ni ena wɔ shɛɛ sane lɛ he miishɛɛ pɛŋ dã lɛ ateŋ mɛi pii naaa deka kwraa gbii etɛ nɛɛ. No hewɔ lɛ, kɛ wɔmiidi mɛi ni yɔɔ he miishɛɛ lɛ asɛɛ lɛ, ehe baahia ni wɔkɛ sɛɛyoomɔ atsu nii, ekolɛ ni wɔwie oti ni wɔhiɛ lɛ he oya nɔŋŋ, ja shiatsɛ lɛ tsɔɔ akɛ eyɛ sanegbaa kakadaŋŋ he miishɛɛ.

² Wɔtsɔ Hiɛ Wɔsusu nɔ ni Wɔbaakɛɛ lɛ He: Esa akɛ wɔha nɔ ni wɔtaoɔ wɔwie he lɛ afee faŋŋ yɛ wɔjwɛŋmɔ mli be fɛɛ be. Enɛ biɔ ni wɔkwɛ nibii ni wɔŋmala yɛ nyɛsɛɛ saramɔ lɛ mli lɛ, ni wɔbɔ mɔdɛŋ wɔkai otii ni wɔsusu he yɛ sanegbaa lɛ mli, kɛ ekolɛ sanebimɔi ni wɔkɛshi shiatsɛ lɛ ni wɔhaaa hetoo lɛ fɛɛ.

³ Kɛ ŋaawoo ni yɔɔ sane ni yɔɔ yiteŋgbɛ lɛ Kuku 5 lɛ okɛtsuɔ nii lɛ, no lɛ osɛɛkuu mli lɛ, obaanyɛ okɛɛ akɛ:

◼ “Kɛjɛ nyɛsɛɛ nyɔŋ lɛ nɔ tɔŋŋ mɛi pii bɔi Kristo fɔmɔ he susumɔ. Nyɛsɛɛ ni wɔgba sane lɛ, miwo bo shi akɛ wɔbaasusu anɔkwa sane ko ni yɔɔ miishɛɛ ni kɔɔ maŋtiase mli ni afɔ Yesu yɛ lɛ he. Ani ole akɛ Biblia lɛ tsɔ hiɛ egba efɔ shi afii 700 akɛ abaafɔ Yesu yɛ Betlehem?” Ŋmɛɛ gbɛ ni eha hetoo. Kɛkɛ lɛ, kɛ okane Mika 5:1 ogbe naa lɛ, obaanyɛ okɛɛ akɛ: “Gbalɛ ni yɔɔ naakpɛɛ waa nɛ, aloo jeee nakai? Eyɛ mli akɛ Biblia mli anɔkwa sane ni yɔɔ miishɛɛ nɛ moŋ, shi ani ole akɛ Biblia mli gbalɛi miiba mli anɔkwale yɛ wɔgbii nɛɛ amli hu?” Kɛ mɔ lɛ yɛ be lɛ, wɔbaanyɛ wɔtsa sanegbaa lɛ nɔ, aloo kɛ ebɛ deka lɛ, wɔbaanyɛ wɔkɛɛ lɛ akɛ wɔbaaku sɛɛ be kroko ni wɔkɛ lɛ abasusu he kɛtsa nɔ.

⁴ Kɛ́ “Ani Je Nɛɛ Baaya nɔ Ahi Shi?” dɛhiɛmɔ wolo lɛ eko wɔkɛha lɛ lɛ, wɔbaanyɛ wɔkɛɛ akɛ:

◼ “Kwɛmɔ nɔ ni awie yɛ biɛ yɛ baafa 4, yɛ yitso bibioo ni ji ‘Okadi Lɛ’ shishi lɛ. Enɛ kɔɔ gbalɛi ni Yesu wie akɛ ebaakadi naagbee gbii lɛ ahe. [Okɛ shiatsɛ lɛ asusu gbalɛi enyɔ loo etɛ he.] Ani obaakɛɛ akɛ odaseyeli yɛ ni tsɔɔ akɛ nɛkɛ gbalɛi nɛɛ miiba mli yɛ wɔgbii nɛɛ amli?” Kɛji esa, ni be baaŋmɛ gbɛ lɛ, no lɛ obaanyɛ owo lɛ ŋaa akɛ ekwɛ Gbɔmɔ ni Fe Fɛɛ wolo lɛ mli, koni no sɛɛ lɛ okɛha lɛ. Tsɔɔmɔ lɛ bɔ ni yitso 111 lɛ gbalaa nibii amli babaoo, yɛ okadi ni Yesu kɛha nɛɛ he. Kɛ dɛhiɛmɔ wolo pɛ okɛha lɛ Iɛ, be kroko kɛ otee eŋɔɔ lɛ, obaanyɛ otsa sanegbaa lɛ nɔ kɛya dɛhiɛmɔ wolo kroko loo Nɔyeli ni Kɛ Paradeiso Baaba loo “Naa! Miifee Nii Fɛɛ Ehee” woji bibii lɛ mli eko fɛɛ eko nɔ.

⁵ Hegbɛ Kɛha Shiɔ Biblia mi Nikasemɔ Feemɔ Kɛhamɔ: Kɛ wɔshi Gbɔmɔ ni Fe Fɛɛ wolo lɛ eko wɔha shiatsɛ lɛ aloo eyɛ eko momo lɛ, ebaahi akɛ wɔkɛ yitso 111 aaafee shia Biblia mli nikasemɔ he nɔkwɛmɔ nɔ wɔtsɔɔ lɛ. Wɔbaanyɛ wɔkɛ gbɛ ni tamɔ nɔ ni akɛtsuɔ nii yɛ Asafo Woloŋ Nikasemɔ lɛ shishi lɛ nɔŋŋ atsu nii. Kɛ nikasemɔ lɛ tee nɔ daa lɛ, wɔbaanyɛ wɔtsake kɛya woji bibii lɛ eko kasemɔ nɔ, aloo wɔbaanyɛ wɔkɛ lɛ akase Obaanyɛ Ohi Shi Kɛya Naanɔ wolo lɛ tɛɛ.

⁶ Nyɛhaa wɔfea klalo daa akɛ wɔɔdi mɛi fɛɛ ni yɔɔ wiemɔ lɛ he miishɛɛ lɛ asɛɛ. Esa akɛ wɔna sɛɛyoomɔ ni wɔbɔ mɔdɛŋ be fɛɛ be akɛ wɔɔto gbɛjianɔ kɛha wɔsɛɛ be saramɔ kɛtsɔ saji ni yɔɔ miishɛɛ ni wɔɔbi yɛ wɔsanegbaa lɛ eko fɛɛ eko naagbee nɔ. Enɛ baaye ebua wɔ ni wɔfee mɛi ni “asaa [wɔ] pɛpɛɛpɛ aha nitsumɔ kpakpa fɛɛ nitsumɔ kpakpa.”​—2 Tim. 3:⁠17.