Nidumɔ Kɛ Enɔ Nu Shwamɔ—Gbɛi Ni Atsɔɔ Nɔ Afeɔ Kaselɔi
1 “Mi lɛ, mitɛo; Apolo shwie nɔ nu; shi Nyɔŋmɔ ha shwere.” (1 Kor. 3:6) Bɔfo Paulo tsɔ nɛkɛ gbɛ nɔ etsɔɔ shishijee gbɛi etɛ ni atsɔɔ nɔ afeɔ mɛi Kristo kaselɔi. Klɛŋklɛŋ gbɛi enyɔ, nidumɔ kɛ enɔ nu shwiemɔ lɛ kɔɔ hegbɛ kɛ gbɛnaa nii ni kaa Nyɔŋmɔ tsuji ni ejɔɔ amɛhe nɔ ni amɛbaptisi amɛ lɛ anɔ lɛ he.
2 Enɛ biɔ shiɛmɔ yɛ faŋŋ kɛ shia kɛ shia, trukaa odaseyeli, kɛ gbɛi krokomɛi hu kɛ nitsumɔ. Ekɔɔ bɔ ni wɔɔya nɔ wɔtsɔɔ gbɔmɛi lɛ anii ni amɛye nibii fɛɛ ni Yesu efa lɛ anɔ lɛ he. (Mat. 28:19, 20) Gbɛ pɛ ni abaanyɛ atsɔ nɔ atsu sɛɛkpee gbɛ nɛɛ he nii ji kɛtsɔ mɛi ni yɔɔ wiemɔ lɛ he miishɛɛ lɛ ni aaaku sɛɛ ayasara amɛ ekoŋŋ, ni akɛ amɛ ana Biblia mli sanegbaa, ni akɛ amɛ afee Biblia mli nikasemɔ lɛ nɔ. Ani oojie ohe kpo akɛ naanyo nitsulɔ anɔkwafo, ni okɛ Yehowa miifee ekome kɛtsɔ anɔkwale dumɔwui lɛ adumɔ kɛ esɛɛ ni oooyadi kɛtsɔ enɔ nu shwiemɔ kɛ ehe saamɔ ni he hiaa ni ofee lɛ nɔ?—1 Kor. 3:9.
YƆSEMƆ HEGBƐ KƐ HIAMƆ NI YƆƆ LƐ
3 Yɛ 1990 sɔɔmɔ afi lɛ mli lɛ, wɔja woji wuji 5,952, woji bibii 4,226, kɛ woji tɛtrɛbii 110,703 yɛ Ghana—ni fɛɛ feɔ woji komekomei 120,881. Akɛni kɛ aja mli lɛ shiɛlɔi 31,089 bu shiɛmɔ nitsumɔ he akɔntaa daa nyɔŋ nɔ yɛ sɔɔmɔ afi lɛ mli hewɔ lɛ, kɛ aja mli lɛ, shiɛlɔ fɛɛ shiɛlɔ kɛ woji 4 ha. Enɛ, kɛ anɔkwale ni eji akɛ gbɔmɛi 66,588 ba Kaimɔ lɛ shishi lɛ yeɔ hegbɛ ni yɔɔ kɛha kaselɔ-feemɔ ni esa akɛ wɔtsu he nii yɛ 1991 sɔɔmɔ afi lɛ mli fɛɛ lɛ he odase faŋŋ. Ŋwanejee ko bɛ he akɛ woji kɛhamɔ ji wɔnitsumɔ lɛ fa ni ji gbɛi ni wɔtsɔɔ nɔ wɔduɔ nii lɛ ateŋ ekome. Enɛ hewɔ lɛ anɔkwale dumɔ wui lɛ ni wɔtsɔɔ nɛkɛ gbɛ nɔ wɔduɔ lɛ haa hegbɛ babaoo kɛha kaselɔi heei afeemɔ, shi akɛ Nyɔŋmɔ nanemɛi nitsulɔi lɛ, ani wɔnuɔ he akɛ nɔ ko tsirɛɔ wɔ ni wɔku wɔsɛɛ wɔyasara nɛkɛ gbɔmɛi nɛɛ ni wɔha miishɛɛ ni amɛyɔɔ yɛ Biblia mli saji ahe lɛ aya hiɛ? Amrɔ nɛɛ, kɛ aja mli lɛ, asafoŋ shiɛlɔ fɛɛ shiɛlɔ ni yɔɔ Ghana lɛ feɔ Biblia mli nikasemɔ kome. Enɛ woɔ mɔ hewalɛ waa diɛŋtsɛ shi wɔnaa kɛtsɔ kpokpaa nɔkwɛlɔi lɛ amaniɛbɔi lɛ amli akɛ jeee shiɛlɔi fɛɛ yɔɔ Biblia mli nikasemɔ. Wɔyɛ hiɛnɔkamɔ akɛ nɛkɛ mlijaa nɛɛ baaya hiɛ kɛji shiɛlɔ fɛɛ shiɛlɔ baasusu lɛ diɛŋtsɛ egbɛnaa nii lɛ he jogbaŋŋ koni eya hiɛ kɛteke shishijee gbɛ ni ji anɔkwale dumɔwui lɛ adumɔ nɔ ni ebɔ mɔdɛŋ ni efee shia Biblia mli nikasemɔ ni yaa hiɛ. Eyɛ mli akɛ, yɛ naagbai komɛi ahewɔ lɛ, mɛi komɛi nyɛɛɛ amɛfee shia Biblia mli nikasemɔ kome loo nɔ ni fa fe nakai moŋ, shi ebaahi jogbaŋŋ akɛ wɔteŋ mɔ fɛɛ mɔ aaakwɛ lɛ diɛŋtsɛ eshihilɛ mli jogbaŋŋ ekoŋŋ.
4 Eyɛ miishɛɛ akɛ wɔɔna nibii ni yaa nɔ yɛ hei komɛi. Asafoi komɛi yɛ shikpɔŋkuku ni woɔ yibii ni kɛ aja mli lɛ amɛbuɔ Biblia mli nikasemɔ kome loo enyɔ he akɔntaa kɛhaa shiɛlɔ fɛɛ shiɛlɔ. Hiɛyaa ni baa yɛ kaselɔi heei agbɛfaŋ lɛ kɛ Biblia mli nikasemɔi abɔ ni wɔfeɔ lɛ yaa pɛpɛɛpɛ. Wɔbaanyɛ wɔna enɛ jogbaŋŋ kɛji wɔkɛ shiɛlɔi abɔ ni yɔɔ maji sɔrɔtoi lɛ amli lɛ to Biblia mli nikasemɔi ni amɛfeɔ lɛ he, taakɛ abu he akɔntaa yɛ 1991 Yearbook lɛ mli lɛ.
5 Esa akɛ nɔ ni kanyaa wɔ ni wɔfeɔ Biblia mli nikasemɔi lɛ afee suɔmɔ ni wɔyɔɔ kɛhaa gbɔmɛi ni boɔ Maŋtsɛyeli lɛ he shɛɛ sane ni wɔshiɛɔ lɛ toi lɛ. Esa akɛ wɔkɛ anɔkwayeli ana bɔ ni Yehowa jɛɔ suɔmɔ mli esusuɔ gbɔmɛi ahe lɛ nɔŋŋ eko, ni wɔyoo akɛ amɛyiwalaheremɔ kɛ amɛmumɔŋ dalɛ tsaa. (1 Pet. 2:2) Taakɛ nu he hiaa tsei diɛŋtsɛ ni aduɔ lɛ bɔni afee ni eha amɛdara lɛ, nakai nɔŋŋ gbɔmɛi ni naa Maŋtsɛyeli shɛɛ sane lɛ he miishɛɛ kɛjɛ shishijee lɛ ejeŋ shishi amɛbaŋ kpeei ja atee nɔ atsɔɔ amɛ gbɛ kɛba Nyɔŋmɔ gbɛjianɔtoo lɛ mli kɛtsɔ shia Biblia mli nikasemɔ nɔ.
6 Toiboo ni wɔɔfee lɛ hu he baa sane lɛ mli.Yesu kɛɛ akɛ mɛi ni yɔɔ anɔkwale lɛ gbɛfaŋ lɛ nuɔ egbee. (Yoh. 18:37) Efa ekaselɔi lɛ ni amɛshiɛ ni amɛtsɔɔ nii, ni eha amɛ dɛŋdade ni amɛkɛaatsu nakai nitsumɔ lɛ. Yesu to okadi efɔ shi eha wɔ ni wɔnyiɛ sɛɛ yɛ mɛi krokomɛi ayelikɛbuamɔ mli kɛtsɔ enɔkwɛmɔ nɔ ni ekaaa akɛ tsɔɔlɔ kɛ agbɛnɛ kɛtsɔ gbɔmɛi ahe ni esusuɔ waa lɛ nɔ. (Luka 6:40; Yoh. 13:13; 14:12) Wɔmɔdɛŋbɔɔ lɛ baanyɛ atsu babaoo yɛ wɔ diɛŋtsɛ kɛ mɛi ni wɔtsɔɔ amɛ nii lɛ ayiwalaheremɔ mli.—1 Tim. 4:16.
YELIKƐBUAMƆ KƐHA BIBLIA MLI NIKASEMƆ SHISHIJEE
7 Ŋaalɔ ni he esa waa lɛ halaa edɛŋdade ni sa lɛ kɛjɛɔ sɔrɔtoi babaoo ni eyɔɔ lɛ amli, bɔni afee ni enitsumɔ lɛ aye emuu jogbaŋŋ. Akɛ tsɔɔlɔi lɛ, wɔyɛ woji babaoo ni wɔkɛbaatsu nii, tamɔ woji bibii kɛ dɛhiɛmɔ woji, ni ato he gbɛjianɔ akɛ dɛŋdadei ni baaye abua wɔ koni wɔshɛ gbɔmɛi ni jɛ shihilɛi sɔrɔtoi amli ni amɛhiɛ shishinumɔi sɔrɔtoi hu lɛ atsuii ahe.
8 Shiɛlɔi komɛi ena nibii kpakpai ni jɛɔ dɛhiɛmɔ woji kɛ woji bibii ni akɛjeɔ Biblia mli sanegbaa shishi lɛ mli baa lɛ mli niiashikpamɔi. Akɛ nɔkwɛmɔ nɔ lɛ, Shihilɛ yɛ Toiŋjɔlɛ Jeŋ Hee ko Mli dɛhiɛmɔ wolo lɛ etsɛ ŋmalɛi sɔrɔtoi lɛ 20 ni tsɔɔ nɛkɛ hiɛnɔkamɔ fɛfɛo nɛɛ mli jogbaŋŋ lɛ ayisɛɛ loo eŋmala amɛmli wiemɔ lɛ po. Abaanyɛ akɛ ŋmalɛi nɛɛ atsu nii ni akɛje Biblia mli sanegbaa ni yɔɔ miishɛɛ shishi. Wɔwoji bibii lɛ hu baanyɛ aha gbɔmɛi lɛ ale Biblia mli shishijee anɔkwalei lɛ ni ekanya amɛ ni amɛtao nibii amli babaoo hu, yɛ gbɛ ni gbalaa mɔjwɛŋmɔ ni eyɔɔ mlɛo hu nɔ.
9 Ani ole mɔ ko ni ewoloŋlee eyaaa hiɛ tsɔ aloo eyako skul da ni enyɛɛɛ nii ekane? Ani oka akɛ okɛ Na Wala Mli Ŋɔɔmɔ yɛ Shikpɔŋ nɔ Kɛya Naanɔ! dɛhiɛmɔ wolo lɛ aaatsu nii ni okɛ gbɔmɔ ni tamɔ nɛkɛ aje Biblia mli sanegbaa ni yaa hiɛ shishi? ‘Naa!, Miifee Nii Fɛɛ Ehee’ wolo bibioo lɛ hu ji dɛŋdade fɛfɛo, ni emli klɛŋklɛŋ kukuji ni jeɔ shishi lɛ tsɔɔ ŋaa gbɛ nɔ ehaa shiatsɛ lɛ kɛ ehe woɔ Nyɔŋmɔ shiwoi ni kɔɔ wɔsɛɛ he lɛ ahe nikasemɔ mli. Ni eka shi faŋŋ akɛ, Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo ni ajie lɛ kpo yɛ 1982 lɛ eye omanye jogbaŋŋ yɛ mɛi 1,700,000 ni abaptisi amɛ kɛjɛ nakai beaŋ kɛbaa lɛ ateŋ mɛi babaoo ni eye ebua amɛ lɛ mli.
NI WƆƆTSU MƐI NI YƆƆ HE MIISHƐƐ LƐ AHE GBƐNAA NII LƐ HE NII
10 Obaana akɛ ebaahi jogbaŋŋ akɛ oookwɛ o-Congregation Publisher Record wolo bibioo lɛ nɔ ni okadi woji wuji, woji bibii, kɛ woji tɛtrɛbii abɔ ni okɛha yɛ nyɔji 12 ni eho lɛ mli lɛ jogbaŋŋ. Ani nakai woji ni onyɛ okɛha lɛ ji naagbee? Aloo ani otee ohiɛ kɛteke nidumɔ lɛ nɔ? Yɛ gbɔmɛi aŋkroaŋkroi ni mɔɔ miishɛɛ bɔ ni sa ni ha amɛhe wɔwoji lɛ eko lɛ agbɛfaŋ lɛ, amɛteŋ mɛi enyiɛ onyɛ otee amɛŋɔɔ ekoŋŋ oya? Ani oku osɛɛ otee oyakwɛ kɛji wu ni odu lɛ ekwɛ lo? Ani otee nɔ oshwie nɔ nu ni he hiaa lɛ ni no sɛɛ lɛ osɔle obi Yehowa koni eha ekwɛ̃?—Okɛto Bɔfoi lɛ Asaji 16:14 kɛ 2 Tesalonikabii 3:1 he.
11 Kɛji o-Congregation Publisher Record wolo lɛ jieɔ lɛ kpo akɛ okɛ woji haaa lɛ, ani ooonyɛ okɛ ohiɛ ni oooya yɛ shiɛmɔ nitsumɔ lɛ fa nɛɛ mli lɛ afee oti ni okɛma ohiɛ? Klɛŋklɛŋ nifeemɔ ji ni ohe dɛhiɛmɔ woji, woji bibii, woji tɛtrɛbii kɛ woji krokomɛi lɛ eko kɛha shiɛmɔyaa, ni okɛ fioo ko pɛ aje shishi. No sɛɛ lɛ,okɛtsu nii daa yɛ shiɛmɔ mli, ni okɛ ohiɛ afɔ Yehowa nɔ ni ejɔɔ omɔdɛŋbɔi akɛ oooje sɛɛsaramɔi kɛ shia Biblia mli nikasemɔi ashishi koni etsa nɔ hu lɛ nɔ.
12 Ekolɛ ofeee sɛɛsaramɔi loo Biblia mli nikasemɔ ko akɛni onuɔ he akɛ oshɛko jogbaŋŋ lɛ hewɔ. Ekolɛ, enɛ jɛ bɔ ni ofeɔ onii yɛ he lɛ moŋ fe bɔ ni onyɛmɔ ji. Yehowa tsuuu ewebii lɛ ni amɛyatsu nitsumɔ ko ni ehako amɛ ehe dɛŋdadei ni sa ni esako amɛ ni amɛhe asa kɛha etsumɔ hu. Esaa wɔ kɛhaa “nitsumɔ kpakpa fɛɛ nitsumɔ kpakpa” kɛtsɔ e-Wiemɔ krɔŋkrɔŋ lɛ kɛ egbɛjianɔtoo lɛ nɔ. (2 Tim. 3:16, 17; 2 Kor. 3:5, 6) E-kɛ nɔ ni he hiaa wɔ lɛ haa wɔ kɛtsɔ emumɔ krɔŋkrɔŋ lɛ, woji ni akalaa, kɛ gbɛtsɔɔmɔ ni akɛhaa kɛtsɔ wiemɔi kɛ nɔkwɛmɔ nii ni afeɔ atsɔɔ wɔ kɛjɛɔ wiemɔ kpoku lɛ nɔ, kɛ agbɛnɛ kɛtsɔ etsuji ni he esa ni ejɔɔ amɛhe nɔ akɛ amɛaaye amɛbua wɔ lɛ anɔkwɛmɔ nii anɔ. Ehe ehiaaa ni wɔna je lɛŋ woloŋlee ni nɔ kwɔ lɛ eko dani wɔnyɛ wɔfee Biblia mli nikasemɔ. Ehe miihia ni wɔkɛ mumɔŋ tsɔsemɔ kpakpa ni akɛhaa wɔ kɛtsɔ Yehowa gbɛjianɔtoo lɛ nɔ lɛ atsu nii.—Okɛto Bɔfoi lɛ Asaji 4:13 he.
13 Nibii ni akɛhaa yɛ Our Bulletin, Teokrase Sɔɔmɔ Skul lɛ, Sɔɔmɔ Kpee, kɛ gbɛi krokomɛi ni atsɔɔ nɔ akɛ gbɛtsɔɔmɔ haa wɔ lɛ amli ni wɔkɛaatsu nii lɛ he miihia. Bɔfo Paulo kɛɛ Hebribii lɛ tɛɛ akɛ: “Ejaakɛ nyɛ ni kulɛ esa akɛ nyɛtsɔmɔ tsɔɔlɔi moŋ yɛ be lɛ naa lɛ, ehia akɛ atsɔɔ nyɛ Nyɔŋmɔ wiemɔi lɛ amli shishijee nii lɛ ekoŋŋ.” (Heb. 5:12) Aakpa gbɛ akɛ mɔ ko ni etsu nitsumɔ ko he nii afii babaoo lɛ baale bɔ ni ekɛ edɛŋdadei lɛ tsuɔ nii ehaa lɛ he ŋaa. Abaanyɛ ana hiɛyaa ni wɔnaa yɛ bɔ ni wɔɔfee wɔya nɔ yɛ Biblia mli sanegbai amli lɛ he odaseyeli kɛji wɔjieɔ anɔkwa miishɛɛ kpo yɛ he ni wɔkɛ mɔdɛŋbɔɔ tsu he nii lɛ.—Abɛi 12:24; 22:29.
14 Wɔsɛɛ ni wɔɔku koni wɔkɛ mɛi ni yɔɔ Maŋtsɛyeli shɛɛ sane lɛ he miishɛɛ lɛ agba Biblia mli saji lɛ biɔ babaoo yɛ wɔbe kɛ wɔmɔdɛŋbɔɔ mli. Shi esa akɛ wɔyoo akɛ anɔkwale lɛ mli ni wɔyɔɔ lɛ ji Yehowa suɔmɔ kɛ mlihilɛ ni wɔsaaa lɛ kpojiemɔ. Ajie enɛ kpo kɛtsɔ mɔ ni kɛ ŋmɛlɛtswai babaoo tsɔɔ wɔ anɔkwale lɛ yɛ tsuishitoo mli lɛ nɔ. Nakai nɔŋŋ hu, esa akɛ suɔmɔ atsirɛ wɔ ni wɔhe be ni he hiaa ni wɔtuu wɔha nitsumɔ ni he hiaa waa ni ji kaselɔi afeemɔ nitsumɔ lɛ.—2 Kor. 5:14, 15; Efes. 5:15, 16.
15 Asafoi pii kɛ ŋaawoo ni Asafo lɛ kɛha akɛ ato gbɛkɛnaashi odaseyeli he gbɛjianɔ lɛ etsu nii. Gbɛkɛnaashi mra be mli hi jogbaŋŋ kɛha mɛi ni tsɔɔ wiemɔ lɛ he miishɛɛ lɛ asaramɔ. Shia-kɛ-shia kadimɔ wolo, ni oŋmala mɔ ni oye lɛ odase lɛ he kadimɔ nii yɛ nɔ lɛ he miihia kɛha sɛɛsaramɔ ni mɔɔ shi kɛ Biblia mli nikasemɔ shishijee. Okɛ nibii ni oŋmala lɛ akawo wolo ko loo Biblia lɛ mli okɛto ni ohiɛ kpa nɔ. Kaimɔ ni okaiŋ ni oyafee sɛɛsaramɔ ko aahu ja otsii babaoo sɛɛ beni oyaje nakai shikpɔŋkuku lɛ mli ekoŋŋ lɛ shiɔ nakai mɔ lɛ ehaa Satan webii lɛ asaramɔ, mɛi ni sumɔɔ ni amɛshɔ̃ nɔ ni ekolɛ odu owo mɔ lɛ tsui mli lɛ kɛjɛ edɛŋ lɛ. (Luka 8:12) Ani obaaha Satan ŋaai lɛ afee efolo kɛtsɔ eŋɔɔ ni oooku sɛɛ oya ekoŋŋ mra lɛ nɔ? Kɛji onuɔ gbɛnaa nii ni ka onɔ lɛ he ni ohiɛ sɔɔ hegbɛ ni ona lɛ, no lɛ obaaku osɛɛ mra, kɛji eeehi bo nakai feemɔ. No hewɔ lɛ okɛ shia-kɛ-shia kadimɔ wolo lɛ atsu nii jogbaŋŋ. Wɔyɛ babaoo. Onukpai lɛ baanyɛ amɛshɛ eko ni amɛwo hewalɛ ni akɛtsu nii kɛmɔ shi yɛ shiɛmɔ mli.—1 Kor. 9:16, 23.
BƆ NI OOOFEE OJE BIBLIA MLI NIKASEMƆ SHISHI
16 Biblia mli nikasemɔ shishijee ehiaaa gbɛ ni wa ni yɔɔ haŋtsii hu. Ekolɛ mɛi komɛi kɛ oyaiyeli baakpɛlɛ hegbɛ ni ohaa amɛ akɛ okɛ amɛ baafee shia Biblia mli nikasemɔ lɛ nɔ yɛ be mli ni okpa owiemɔ lɛ hiɛ yɛ ŋaa mli lɛ sɛɛ. Shi, shiɛlɔi pii sumɔɔ ni amɛkatsi nikasemɔ ta shi moŋ ni amɛkudɔ Biblia mli sanegbaa lɛ kɛya nakai feemɔ mli.
17 Suɔmɔ ni wɔyɔɔ kɛha gbɔmɛi lɛ kɛ shwe ni wɔshweɔ akɛ wɔɔye wɔbua amɛ yɛ anɔkwale mli lɛ he miihia. Hesaamɔ kpakpa hu he miihia. Nɔ ni sa akɛ efata enɛ he ji tĩ ni wɔɔtĩ nibii ni wɔŋmala wɔshwie shi ni ji nɔ ni okɛ mɔ lɛ egba he sane momo lɛ amli, kɛ oyiŋ ni oookpɛ yɛ gbɛ ni oootsɔ nɔ oha Biblia mli sanegbaa lɛ aya hiɛ lɛ nɔ. Ha shishinumɔ ni otaoɔ ni ena yɛ owiemɔi lɛ ahe lɛ ahi ojwɛŋmɔ mli. Ani obaahala ŋmalɛi fioo komɛi ni kɔɔ saneyitso ni nyɛgba he sane lɛ he lɛ ofata he? Aloo obaanyɛ ogbele dɛhiɛmɔ wolo loo wolo kroko ni mɔ lɛ yɔɔ lɛ mli ni okɛ lɛ asusu emli shishijee kukuji lɛ ekomɛi ahe? Obaanyɛ ohala saneyitso ko ni eyɔɔ he miishɛɛ. Klɛŋklɛŋ lɛ, okɛ lɛ aye minitii 10 loo 15 pɛ. Nyɛbaanyɛ nyɛha be lɛ aya hiɛ fiofio, yɛ miishɛɛ ni eyɔɔ yɛ he lɛ naa. Esa akɛ okɛ kojomɔ kpakpa atsu nii ni eye ebua bo ni ona bɔ ni obaaya nɔ oha kɛ be falɛ ni sa akɛ oye.
18 Akɛ ŋaawoi ni yeɔ buaa babaoo eha yɛ afii abɔ lɛ fɛɛ mli koni eye ebua bo ni oya ohiɛ fiofio yɛ kaselɔi afeemɔ gbɛi anɔ. Akɛ nɛkɛ ŋaawoi nɛɛ fa lɛ, aŋmala saji komɛi ni yeɔ ebuaa yɛ Our Bulletin ni ji 11 kɛ 12 yɛ 1990 mli lɛ mli ni yitsei ji “Shɛɛ Tsuii Ahe Kɛtsɔ Biblia Mli Nikasemɔi ni Mɔɔ Shi Nɔ” kɛ “Biblia Kaselɔi ni Wɔɔtsɔɔ Amɛ Gbɛ Kɛba Yehowa Gbɛjianɔtoo lɛ Mii” lɛ ashishi. Aŋma saneyitso ko ni ji “Hesaamɔ Kɛha Shia Biblia Kasemɔ kɛ Efeemɔ” yɛ Wɔ Maŋtsɛyeli Sɔɔmɔ ni je kpo yɛ May 1987 lɛ mli. Kɛji oyakwɛ Index lɛ mli yɛ “Bible Studies” shishi lɛ, ebaatsɔɔ bo hei krokomɛi ni obaana saji babaoo ni baaye ebua bo lɛ yɛ.
19 Ha ojwɛŋmɔ ahi nɔ ni afeɔ yɛ Asafo Woloŋ Nikasemɔ shishi lɛ nɔ, akɛ bɔ ni afeɔ nikasemɔ ahaa lɛ he nɔkwɛmɔ nɔ. Shi kɛlɛ, eji anɔkwale akɛ atsɔɔɔ hiɛ atooo he ni sa akɛ nyɛkase nii lɛ kɛyashi yɛ shia Biblia mli nikasemɔ mli. No hewɔ lɛ esa akɛ oto nɔ ni nyɛbaakase lɛ he gbɛjianɔ yɛ bɔ ni nikaselɔ lɛ nyɛmɔ kɛ ehiamɔ nii ji lɛ naa. Kɛfata he lɛ, sɔɔmɔ nɔkwɛlɔ lɛ kɛ shiɛlɔi krokomɛi kɛ gbɛgbalɔi ni yɔɔ niiashikpamɔ lɛ yɛ he miishɛɛ babaoo akɛ amɛaafata ohe kɛya ni amɛkɛ bɔ ni afeɔ Biblia mli nikasemɔ ni mɔɔ shi lɛ he ŋaawoo ni obaanyɛ okɛtsu nii aha bo.
20 Kɛji wɔyoo akɛ Yehowa tsuɔ gbɛfaŋnɔ ni he hiaa waa yɛ mɔdɛŋ ni wɔbɔɔ akɛ wɔɔye wɔbua gbɔmɛi lɛ mli lɛ, no lɛ esa akɛ wɔsɔle, jeee ni wɔna mɔ ko wɔkɛ lɛ akase nii kɛkɛ, shi moŋ yɛ mɛi ni wɔna ni amɛyɔɔ he miishɛɛ lɛ ahiɛyaa hu he. Esa akɛ wɔsu kɛ wɔhenumɔi afee tamɔ bɔfo Paulo nɔ lɛ nɔŋŋ beni eyeɔ Maŋtsɛ Agripa odase lɛ: “Mina ni kulɛ Nyɔŋmɔ ha ba mli akɛ, shwɛ fioo jio, shwɛ pii jio, jeee bo okome kɛkɛ, shi moŋ mɛi fɛɛ ni boɔ mi toi ŋmɛnɛ nɛɛ hu atsɔ tamɔ mi.” (Bɔfoi 26:29) Paulo miitao ni etoibolɔi lɛ atsɔmɔ Kristo anɔkwa kaselɔi, kɛji enɛ biɔ be kuku ko kɛkɛ aloo be kakadaŋŋ ni akɛaaye abua amɛ aŋkroaŋkro po lɛ.
21 Biblia mli nikasemɔi afeemɔ yeɔ ebuaa wɔ koni “[wɔ]ye Nyɔŋmɔ duromɔ sanekpakpa lɛ he odase faŋŋ.” (Bɔfoi 20:24) Ekolɛ mɛi babaoo yɛ lolo ni wɔbaanyɛ wɔkpale amɛ kɛjɛ duŋ mli kɛba la he, kɛ agbɛnɛ kɛjɛ Satan hewalɛ mli kɛba Nyɔŋmɔ ŋɔɔ. (Bɔfoi 26:18) Esa akɛ otsu ogbɛfaŋnɔ akɛ mɔ aŋkro ni ji Yehowa tsulɔ ni ejɔɔ ehe nɔ ni abaptisi bo lɛ he nii kɛtsɔ anɔkwale dumɔ wui lɛ adumɔ kɛ esɛɛdii kɛ enɔ nu shwiemɔ ni hiaa lɛ nɔ, kɛtsɔ Biblia mli sanegbaa kɛ shia Biblia mli nikasemɔ ni wɔkɛ amɛ aaafee daa lɛ nɔ. Kɛtsɔ enɛ nɔ lɛ, obaana miishɛɛ babaoo yɛ gbɔmɛi ni ooona akɛ amɛmiitsɔmɔ kaselɔi ni amɛmiifata ohe kɛmiiye kɛmiibua mɛi krokomɛi hu ni amɛbatsɔmɔ Yesu Kristo kaselɔi lɛ he.