Esa akɛ Wɔtsɔmɔ Tsɔɔlɔi, Jeee Shiɛlɔi Kɛkɛ

¹ Nɔ ni ayɔse ji akɛ, “Yehowa Odasefoi kɛ amɛ odaseyeli lɛ etee shikpɔŋ nɔ he fɛɛ he diɛŋtsɛ.” Te fee tɛŋŋ ni enɛ eba lɛ nakai? Jeee yɛ adesa nyɛmɔ loo hewalɛ naa, shi yɛ Nyɔŋmɔ mumɔ ni tsuɔ nii yɛ etsuji anɔ lɛ naa, yɛ be mli ni amɛkɛ gbɛjianɔtoi sɔrɔtoi tsuɔ nii koni amɛkɛtsu amɛ shiɛmɔ kɛ nitsɔɔmɔ nitsumɔ ni akɛwo amɛdɛŋ lɛ he nii lɛ.​—⁠Zak. 4:6; Bɔf. 1:⁠8.

² Woji ni akalaa ji gbɛ ni mɔɔ shi ni wɔtsɔɔ nɔ wɔtsuɔ wɔ shiɛmɔ nitsumɔ lɛ he nii. Yɛ afii ni eho lɛ amli lɛ, Yehowa Odasefoi ekala woji, woji bibii, woji tɛtrɛbii, kɛ dɛhiɛmɔ woji akpekpei toi akpei abɔ ni amɛjara koni amɛkɛye amɛbua ni ale Maŋtsɛyeli sanekpakpa lɛ he sane. Amaniɛbɔi ni yɔɔ 1997 Yearbook lɛ mli lɛ tsɔɔ akɛ, woji afeemɔ etee hiɛ waa fe fɛɛ. Kɛbashi amrɔ nɛɛ, akala New World Translation lɛ ekomekomei ni fa fe akpekpei 91. Buu-Mɔɔ kɛ Awake! woji tɛtrɛbii falɛ ni akala yɛ United States lɛ tee hiɛ oha mlijaa 7.1 yɛ afi kome mli. Yɛ Germany lɛ, woji tɛtrɛbii afeemɔ tee hiɛ oha mlijaa 35. Afee woji tɛtrɛbii ni fa fe oha mlijaa etɛ mli ekome ni afeɔ yɛ jɛmɛ lɛ yɛ Russia wiemɔ mli.

³ Mɛni hewɔ ni woji babaoo ahe hiaa nɛkɛ? Ahere hewalɛwoo ni akɛha koni wɔye odase yɛ he fɛɛ he ni wɔɔnyɛ wɔna gbɔmɛi yɛ lɛ nɔ waa diɛŋtsɛ yɛ je lɛŋ fɛɛ. Akɛni wɔteŋ mɛi babaoo miilɛɛ odaseyeli nitsumɔ ni wɔtsuɔ lɛ mli​—⁠yɛ maŋ lɛŋ hei, yɛ gbɛjegbɛi anɔ, kɛ shikpɔŋkukuji ni yɔɔ nitsumɔhei amli hewɔ lɛ​—⁠akɛ woji babaoo diɛŋtsɛ haa gbɔmɛi ni jieɔ miishɛɛ ko kpo lɛ. Jeee be fɛɛ be mɛnɛɛmɛi ateŋ mɛi babaoo ená hegbɛ tsutsu ko ni amɛkɛnu Maŋtsɛyeli shɛɛ sane lɛ kɛ́ amɛbo toi be ko ni eho po. Bɔni afee ni atsu hiamɔ nɛɛ he nii lɛ, asafoi hiɛɔ woji sɔrɔtoi babaoo ni amɛkɛaatsu nii yɛ sɔɔmɔ nitsumɔ lɛ fãi sɔrɔtoi lɛ fɛɛ mli.

⁴ Mɛni Ji Oti ni Ma Wɔhiɛ yɛ Woji Kɛhamɔ Mli? Oti ni ma wɔhiɛ lɛ jeee ni wɔkɛ woji aha kɛkɛ. Nibii sɔrɔtoi enyɔ kɔɔ nitsumɔ ni akɛwo wɔdɛŋ akɛ wɔfee kaselɔi lɛ he​—⁠shiɛmɔ kɛ nitsɔɔmɔ. Klɛŋklɛŋ lɛ, wɔná hegbɛ lɛ akɛ wɔɔshiɛ Maŋtsɛyeli lɛ sanekpakpa lɛ, ni wɔha gbɔmɛi ale akɛ no ji adesai ahiɛnɔkamɔ kome pɛ. (Mat. 10:7; 24:14) Wɔ Biblia he woji lɛ ji nɔ ni akɛ be babaoo ena akɛ ehi, ni eji gbɛ ni mɔɔ shi, ni atsɔɔ nɔ akanyaa miishɛɛ, ni akɛ Maŋtsɛyeli lɛ he nilee haa mɛi krokomɛi.

⁵ Nɔ ni ji enyɔ lɛ, kɛ́ wɔɔfee kaselɔi lɛ, esa akɛ wɔtsɔɔ mɛi nibii fɛɛ ni Yesu efã akɛ atsɔɔ mɛi lɛ. (Mat. 11:1; 28:​19, 20) Agbɛnɛ hu, woji lɛ tsuɔ nitsumɔ ni he hiaa yɛ anɔkwale lɛ ni wɔkɛwoɔ nikaselɔi atsuii amli ní wɔyeɔ wɔbuaa amɛ koni amɛtsɔ kaselɔi lɛ mli.

⁶ Ekolɛ mɛi ni heɔ woji lɛ baafee “wiemɔ lɛ nulɔi” moŋ, shi efɔɔɔ kaa akɛ amɛbaatsɔ enɔyelɔi kɛ́ ashi amɛ kome too. (Yak. 1:​22-​25) Amɛteŋ mɛi fioo pɛ baanyɛ atsɔmɔ kaselɔi ja mɔ ko ye ebua amɛ. (Bɔf. 8:​30, 31) Tsɔɔlɔ ni baaye abua koni amɛ diɛŋtsɛ amɛna ja ni anɔkwale ni yɔɔ Ŋmalɛi lɛ amli lɛ ja ha lɛ he miihia amɛ. (Bɔf. 17:​2, 3) Oti ni ma wɔhiɛ ji ni wɔye wɔbua amɛ koni amɛya amɛhiɛ kɛyashɛ henɔjɔɔmɔ kɛ baptisimɔ he, koni wɔtsɔse amɛ ni amɛhe asa bɔ ni amɛaatsɔɔ mɛi krokomɛi anii.​—⁠2 Tim. 2:⁠2.

⁷ Hiamɔ Nii ni Da Fe Fɛɛ Ji ni Aná Tsɔɔlɔi Babaoo: Kɛ wɔshiɛ lɛ, wɔjajeɔ sanekpakpa lɛ yɛ faŋŋ. Shi, nɔ ni fata nitsɔɔmɔ he ji ni aaatsɔse mɔ ko fiofio. Yɛ be mli ni shiɛmɔ haa mɛi krokomɛi leɔ Maŋtsɛyeli shɛɛ sane lɛ he nɔ ko lɛ, nitsɔɔmɔ yeɔ ebuaa aŋkroaŋkroi ni amɛkpɛlɛɔ sanekpakpa lɛ nɔ, ni amɛtsuɔ he nii. (Luka 8:15) Tsɔɔlɔ feɔ babaoo fe sane ni ejajeɔ etsɔɔ; etsɔɔ saji amli, ekɛ sane naataamɔ kpakpa susuɔ sane he, ekɛ odaseyelii haa, ni ekɔneɔ mɔ yiŋ.

⁸ Esa akɛ kɛ aaahi lɛ, wɔteŋ mɛi babaoo atsɔmɔ tsɔɔlɔi, jeee shiɛlɔi kɛkɛ. (Heb. 5:12a) Wɔnitsumɔ lɛ fã ko ni he hiaa ji woji ni akɛhaa, shi yɛ naagbee mli lɛ, wɔsɔɔmɔ nitsumɔ lɛ yiŋtoo ni ji enyɔ ni wɔɔtsu he nii lɛ damɔ nɔ ni wɔfeɔ akɛ tsɔɔlɔi lɛ nɔ. Eyɛ mli akɛ wɔbaanyɛ wɔná miishɛɛ kɛ́ wɔnyɛ wɔkɛ woji ha moŋ, shi bɔni afee ni wɔgbe wɔsɔɔmɔ lɛ naa kwraa lɛ, esaaa akɛ wɔbuɔ wolo ni wɔkɛhaa lɛ akɛ no gbeɔ oti ni ma ­wɔhiɛ lɛ naa. (2 Tim. 4:⁠5) Woji kɛhamɔ ji gbɛ ni mɔɔ shi ni wɔtsɔɔ nɔ wɔgbeleɔ hegbɛi anaa koni wɔtsɔɔ mɛi krokomɛi anɔkwale lɛ.

⁹ Feemɔ Sɛɛsaramɔi Koni Oje Biblia Mli Nikasemɔi Ashishi: Ekolɛ wɔ fɛɛ wɔkɛ woji, woji bibii, kɛ woji tɛtrɛbii komɛi eha, ni wɔ­ŋmala mɛi agbɛi kɛha sɛɛsaramɔi. Esa akɛ wɔto be wɔma shi daa koni wɔku wɔsɛɛ wɔyatee miishɛɛ shi. Yiŋtoo titri ni ma wɔhiɛ yɛ sɛɛkuu mli lɛ jeee ni wɔkɛ woji babaoo aha kɛkɛ, shi koni wɔwo mɛi hewalɛ ni amɛkane ni amɛná nɔ ni amɛyɔɔ momo lɛ he sɛɛ. Kulɛ mumɔŋ nɔyaa enyiɛ wɔ diɛŋtsɛ wɔbaanyɛ wɔfee, kɛji mɔ ko ekuuu esɛɛ ebaaa wɔŋɔɔ shii abɔ koni ebaye ebua ni wɔná anɔkwa nilee?​—⁠Yoh. 17:⁠3.

¹⁰ Dii miishɛɛ fɛɛ ni ajie lɛ kpo lɛ sɛɛ kɛ yiŋtoo lɛ akɛ okɛ wolo bibioo ni ji Mɛni Nyɔŋmɔ Taoɔ yɛ Wɔdɛŋ? loo wolo ni ji Nilee Ni Kɛ Mɔ Yaa Naanɔ Wala Mli lɛ aaaje Biblia mli nikasemɔ shishi. Nɛkɛ woji enyɔ nɛɛ kɛ Maŋtsɛyeli he shɛɛ sane lɛ haa yɛ gbɛ ni eshishinumɔ yɔɔ mlɛo nɔ. Nikasemɔ ni atsɔɔ mli fitsofitso ni wieɔ Biblia lɛ shishijee tsɔɔmɔi ahe lɛ yɛ Taoɔ wolo bibioo lɛ mli. Nilee wolo lɛ yeɔ ebuaa koni mɔ lɛ atsɔɔ anɔkwale lɛ mli fitsofitso diɛŋtsɛ, ni kɛlɛ, eyɛ mlɛo, eyɛ faŋŋ, ni eyɛ kuku.

¹¹ Nitsɔɔmɔ he gbɛjianɔtoo ni yɔɔ mlɛo, taakɛ atsɔɔ mli yɛ nɔ ni aŋma ahɔ July 1996 Wɔ Maŋtsɛyeli Sɔɔmɔ lɛ mli lɛ, haa efeɔ mlɛo kɛhaa tsɔɔlɔ lɛ akɛ eeetsɔɔ nii, ni nikasemɔ lɛ feɔ mlɛo ehaa nikaselɔ lɛ. Ha nakai nɔ ni aŋma ahɔ mli lɛ eko ahi omasɛi ni otĩ nitsɔɔmɔ gbɛi kɛ ŋaa gbɛi ni ana akɛ emɔɔ shi lɛ mli. Nɔ ni fata gbɛtsɔɔmɔi ni ekɛhaa lɛ ekomɛi ahe ji bɔ ni aaafee aná nikaselɔ lɛ he miishɛɛ diɛŋtsɛ, nii abɔ ni esa akɛ akase yɛ nikasemɔ be kome mli, bɔ ni aaafee atsu sanebimɔi ni kɔɔɔ nikasemɔ lɛ he lɛ he nii, bɔ ni tsɔɔlɔ kɛ nikaselɔ fɛɛ baanyɛ asaa amɛhe kɛtsɔ nikasemɔ lɛ hiɛ, kɛ bɔ ni aaagbala nikaselɔ lɛ jwɛŋmɔ kɛya Yehowa gbɛjianɔtoo lɛ he. Kɛ anyiɛ gbɛtsɔɔmɔi nɛɛ asɛɛ lɛ, wɔteŋ mɛi babaoo, ni mɛi heei fata he lɛ baanyɛ afee nikasemɔi ni yaa hiɛ.

¹² Amaniɛbɔi ni Jɛ Shikpɔji Anɔ ni Tsɔɔ Bɔ ni Aye Omanye Aha: Taoɔ wolo bibioo lɛ kɛ Nilee wolo lɛ efee dɛŋdadei ni he eba sɛɛnamɔ yɛ kaselɔi afeemɔ nitsumɔ ni ahaa eyaa nɔ oyayaayai lɛ mli. Beni nyɛmi nuu ko ni yɔɔ Bolivia lɛ nine shɛ Taoɔ wolo bibioo lɛ nɔ lɛ, ekɛtsu nii amrɔ nɔŋŋ ni ekɛ nuu ko je nikasemɔ shishi. Nyɔji ejwɛ sɛɛ lɛ, nikaselɔ nɛɛ fata mɛi ni yɔɔ miishɛɛ ni abaabap­tisi amɛ lɛ ahe yɛ kpokpaa wulu nɔ kpee lɛ shishi!

¹³ Mɛi babaoo naa kanyamɔ akɛ amɛbaajɔɔ amɛwala nɔ amɛha Yehowa kɛ́ amɛgbe Nilee wolo lɛ kasemɔ naa. Yɛ asafo ko ni yɔɔ Angola lɛ mli lɛ, Biblia mli nikasemɔi abɔ ni shiɛlɔi fee lɛ tee hiɛ kɛjɛ 190 kɛyashɛ 260 ni mɛi ni baa kpee lɛ ayibɔ bɔ he toi enyɔ kɛjɛ 180 kɛyashɛ 360 yɛ nyɔji ejwɛ pɛ mli, beni akɛ Nilee wolo lɛ bɔi nitsumɔ yɛ nakai akutso lɛ mli lɛ. No sɛɛ lɛ, etsɛɛɛ ni ehe bahia ni ato asafo kroko shishi.

¹⁴ Beni nyɛmi nuu ko kɛ Nilee wolo lɛ bɔi nikasemɔ feemɔ klɛŋklɛŋ lɛ, ekɛɛ akɛ nikasemɔ lɛ feemɔ “yɛ mlɛo kɛ́ mɔ ni kwɛɔ nɔ lɛ bi saji lɛ kɛkɛ, ni ekane ŋmalɛi komɛi ni wieɔ he lɛ, koni ekwɛ ni nikaselɔ lɛ anu shishi.” Eyɛ mli akɛ esusu be fɛɛ be akɛ shiɛlɔi ni he esa waa diɛŋtsɛ lɛ pɛ baanyɛ afee Biblia mli nikasemɔi ni yaa hiɛ ni ákɛ enyɛŋ efee moŋ, shi eyɔse akɛ ebaanyɛ, ni ekɛɛ: “Kɛ manyɛ lɛ, mɔ fɛɛ mɔ hu baanyɛ.”

¹⁵ Kɛ wɔfee Biblia mli nikasemɔi akɛ wɔ sɔɔmɔ nitsumɔ lɛ fã lɛ, no dani wɔbaatsu yiŋtoo ni wɔyɔɔ akɛ wɔɔfee kaselɔi lɛ he nii. Mɛi ni ená nyɛmɔ akɛ amɛkɛ amɛhe aaawo sɔɔmɔ nitsumɔ lɛ fã nɛɛ mli lɛ naa akɛ ehaa mɔ tsui nyɔɔ emli lɛɛlɛŋ ni ekɛ nyɔmɔwoo babaoo baa. Eba akɛ aaawie yɛ wɔ hu wɔhe akɛ ‘wɔshiɛɔ Nyɔŋmɔ maŋtsɛyeli lɛ he sane lɛ, ni wɔkɛ ekãa fɛɛ jajeɔ Nuntsɔ Yesu Kristo he saji lɛ wɔtsɔɔ.’​—⁠Bɔf. 28:⁠31.