Na Ni Wɔɔna Nɔ Ni Nibii Ni Yaa Nɔ Bianɛ Lɛ Tsɔɔ
1 “Je nɛŋ shikamɔ miitsake.” (1 Kor. 7:31, NW) Enɛ jeɔ kpo yɛ bɔ ni nibii baa oyayaayai bianɛ lɛ mli. Kɛfata nibii fɛɛ ni yaa nɔ yɛ Yehowa gbɛjianɔtoo lɛ mli lɛ he lɛ, mɛni ji nɔ ni enɛ tsɔɔ kɛhaa bo akɛ mɔ aŋkro?—Luka 21:28.
2 Bɔ ni Biblia mli gbalɛ baa mli yɛ afii ohai 20 nɛɛ mli lɛ maa nɔ mi akɛ yiwalɛ nibii agbɛjianɔtoo fɔŋ lɛ fɛɛ yɛ enaagbee gbii amli. (Mat. 24:3-14; Luka 21:7-11) Yesu kɛɛ akɛ “nɛkɛ yinɔ nɛɛ hoŋ, ja fɛɛ eba mli da.” (Luka 21:32) Ani onyɛɔ onaa nɔ ni enɛ tsɔɔ kɛhaa mɛi ni yɔɔ oshikpɔŋkuku lɛ mli, ni amɛhalako akɛ amɛaadamɔ Yehowa gbɛfaŋ lolo lɛ? Kɛji nakai lɛ, mɛɛ hewalɛ enɛ naa yɛ oshiɛmɔ nitsumɔ lɛ nɔ?—Luka 21:34-36.
3 Yɛ Obua Mɛi Krokomɛi Beni Be Yɔɔ Lolo Nɛɛ: Yesu wo ekaselɔi lɛ hewalɛ ni amɛŋɔ hegbɛ ni shihilɛi kpakpai kɛhaa lɛ ni amɛkɛha mɛi ale sanekpakpa lɛ. (Yoh. 9:4) Bɔfo Paulo saa eti nakai ŋaawoo lɛ nɔŋŋ mli beni ewo nyɛmimɛi ni yɔɔ Kolose lɛ hewalɛ ni ‘amɛnyiɛ yɛ nilee mli, yɛ mɛi ni yɔɔ sɛɛ lɛ ahiɛ, ni amɛtsu amɛdeka he nii’ lɛ.—Kol. 4:5.
4 Mɛi komɛi ebo ŋaawoo ni bɔfo lɛ kɛha akɛ amɛtsu amɛdeka he nii lɛ toi ni amɛtsɔmɔ daa gbɛgbalɔi. Obalaŋtai babaoo kɛ amɛhe ewo daa gbɛgbamɔ sɔɔmɔ lɛ mli beni amɛyɔɔ skul lolo po lɛ, ni amɛye omanye yɛ enɛ feemɔ mli. Obalaŋtai ni yɔɔ skul lolo lɛ baanyɛ atsu amɛdeka he nii ni amɛkɛye amɛbua amɛklasbii ni amɛnu nɔ ni nibii ni yaa nɔ ŋmɛnɛ lɛ tsɔɔ lɛ shishi kɛ wɔsɛɛ be he hiɛnɔkamɔ ni yɔɔ nyam yɛ Nyɔŋmɔ Maŋtsɛyeli lɛ shishi lɛ hu.—Jaj. 21:1.
5 Wɔbaanyɛ wɔkɛ wɔbe atsu nii jogbaŋŋ yɛ shiɛmɔ nitsumɔ lɛ mli yɛ November mli kɛtsɔ Awake! wolo tɛtrɛɛ lɛ ni wɔkɛaatsu nii yɛ hegbɛ fɛɛ hegbɛ mli lɛ nɔ. Nɛkɛ wolo nɛɛ kɛ sanesɛɛkɔmɔ ko haa yɛ nibii ni yaa nɔ amrɔ nɛɛ ashishinumɔ diɛŋtsɛ he. Okɛha mɛi ni susuɔ saji ni yaa nɔ lɛ ahe ni okɛ amɛ kpeɔ yɛ be mli ni otsuɔ nii yɛ shia kɛ shia lɛ. Ŋɔɔ hegbɛ lɛ hu ni okɛha oskulbii aloo mɛi ni yɔɔ onitsumɔ he lɛ hu. Maa saji ni osusuɔ akɛ mɛi ni ole amɛ lɛ baana he miishɛɛ waa lɛ anɔ mi titri. Akɛ nɔkwɛmɔ nɔ lɛ, October 8, 1991 Awake! lɛ mli saji wieɔ gbekɛbii ni afeɔ amɛ niseniianii lɛ he. Mɛi babaoo susuɔ nɛkɛ sane nɛɛ he waa diɛŋtsɛ.
6 Mɛɛ gbɛ nɔ obaatsɔ okɛ Saneyitso Kɛha Sanegbaa hee lɛ atsu nii yɛ? Beni otsɔɔ mɔ ni oji sɛɛ lɛ, obaanyɛ obi shiatsɛ lɛ akɛ: “Osusuɔ akɛ mɛni hewɔ wɔkɛ nijiaŋwujee shihilɛi babaoo kpeɔ ŋmɛnɛ lɛ?” Beni eha hetoo sɛɛ lɛ, obaanyɛ okɛfata he akɛ: “Biblia lɛ kpɛlɛɔ nɔ akɛ, kɛlɛ mɛi pii lɛ, hiɛnɔkamɔ ko bɛ amɛshihilɛ mli ni eji nijiaŋwujee nɔ hu. Kwɛmɔ nɔ ni awie yɛ biɛ yɛ Jajelɔ 2:17 lɛ. [Kanemɔ Ani okɛ nɔ ni akɛɛ nɛɛ kpaa gbee? [Ŋmɛɛ gbɛ ni eha hetoo.] Mɛni obaakɛɛ akɛ no baashɛje mɔ ko ni kɛ naagbai pii miikpe lɛ mii? [Ŋmɛɛ gbɛ ni etsɔɔ ejwɛŋmɔ.] Ŋmalɛ ko yɛ biɛ ni haa wɔ hiɛnɔkamɔ kpakpa yɛ wɔshihilɛ mli. [Kanemɔ Lala 37:39, 40.] Enɛ hewɔ ni Yehowa Odasefoi woɔ Biblia kasemɔ he hewalɛ lɛ. Akɛ nɔkwɛmɔ nɔ lɛ, kwɛmɔ sane ni asusu he yɛ Awake! hee ni wɔna nɛɛ mli lɛ.” Kɛkɛ lɛ obaanyɛ odamɔ miishɛɛ ni eeena yɛ he lɛ nɔ ona kɛji esa akɛ oha lɛ hegbɛ ni eshɛ aloo oha lɛ woji tɛtrɛbii lɛ eko kɛkɛ aloo kɛji eeehi moŋ akɛ oooshi dɛhiɛmɔ wolo oha lɛ.
7 Ŋwanejee ko kwraa bɛ he akɛ miishɛɛ be ni wɔkɛaasɔmɔ Yehowa mli wɔyɔɔ nɛɛ. Eba akɛ nɛkɛ anɔkwa sane nɛɛ aaatsirɛ wɔ ni wɔkɛ hegbɛi ni wɔɔna yɛ nyɔŋ nɛɛ mli lɛ atsu nii jogbaŋŋ ni wɔkɛ ye wɔbua anɔkwafoi babaoo lolo ni amɛna nibii ni yaa amrɔ nɛɛ ahe shishinumɔ diɛŋtsɛ.