Okɛ Saji ni Yaa nɔ Bianɛ lɛ Atsu Nii Kɛtee Miishɛɛ Shi
1 Ani obaasumɔ ni oná saji ahesusumɔi kpakpai ni baaha oshiɛmɔ nitsumɔ lɛ afee ehee ni etee mɛi amiishɛɛ shi yɛ Biblia shɛɛ sane lɛ mli? Belɛ okɛ nɔ ni yaa nɔ yɛ je lɛŋ kɛ okutso lɛ mli lɛ atsu nii kɛje sanegbaai ashishi. Obaanyɛ okɛ saji ni yaa nɔ bianɛ yɛ he ni oyɔɔ loo nɔ ni yaa nɔ bianɛ yɛ maŋ lɛ mli loo majimaji ateŋ adafitswaa mli saji ni yɔɔ amrɔ nɛɛ lɛ atsu nii. Nɛkɛ nibii nɛɛ tsakeɔ be fɛɛ be. (1 Kor. 7:31) Susumɔ nɔkwɛmɔnii ni nyiɛ sɛɛ nɛɛ ahe okwɛ.
2 Shika he naagbai kɛ nibii ajara miigba mɛi anaa waa diɛŋtsɛ. No hewɔ lɛ, obaanyɛ okɛɛ akɛ:
◼ “Ani onu yɛ adafitswaa lɛ mli akɛ [tsɔɔmɔ nɔ ko ni ejara yaa ŋwɛi lɛ] jara miiya ŋwɛi ekoŋŋ?” Aloo obaanyɛ owie nitsumɔ ni anáaa atsu lɛ he kɛ́ nitsumɔhe wulu ko eshwie nitsulɔi babaoo. Yɛ bɔ ni osumɔɔ ni otsá sanegbaa lɛ nɔ lɛ, obaanyɛ onyiɛ sɛɛ kɛtsɔ ni ooobi akɛ “Ani osusu nɔ hewɔ ni ewa waa akɛ aaaná daaŋ ŋmãa lɛ he pɛŋ?” aloo “Ani osusuɔ akɛ ebaafee nɔ ni wa be fɛɛ be akɛ aaaná nitsumɔ ni emli shika shɛɔ mɔ naa?”
3 Basabasafeemɔ he amaniɛbɔi tamɔ osharai ni yɔɔ wekui amli loo skul nikaselɔi ateŋ lɛ haa anáa nɔ kroko ni aaadamɔ nɔ agba sane. Obaanyɛ obi akɛ:
◼ “Ani okane yɛ adafitswaa wolo lɛ mli akɛ [tsɔɔmɔ oshara ni ba akutso lɛ mli]?” No sɛɛ lɛ bi akɛ “Mɛni osusuɔ akɛ no ji nɔ ni kɛ basabasafeemɔ ni fa babaoo yɛ je lɛŋ lɛ baa?” aloo “Ani osusuɔ akɛ be ko baaba kɛ̃ ni wɔbaanyɛ wɔhi shi shweshweeshwe?”
4 Adafitswai ni tsɔɔ nu afuai ni kpataa nii ahiɛ, shikpɔŋhosomɔi, loo maŋ basabasafeemɔ ni yaa nɔ yɛ je lɛŋ hei srɔtoi lɛ hu haa anáa saji ni teeɔ miishɛɛ shi. Ákɛ nɔkwɛmɔnɔ lɛ, obaanyɛ obi akɛ:
◼ “Ani Nyɔŋmɔ ji mɔ ni kɛ [tsɔɔmɔ adebɔɔ oshara] lɛ baa?” Aloo obaanyɛ otsɔɔ nyɛsɛɛ nɛɛ maŋ basabasafeemɔ ni ba lɛ ni okɛɛ akɛ: “Kɛ mɔ fɛɛ mɔ miisumɔ toiŋjɔlɛ lɛ, mɛni hewɔ ni enámɔ wa waa nɛkɛ?”
5 Ha ohiɛ ahi saji ni yaa nɔ bianɛ ni obaanyɛ okɛtsu nii yɛ ohiɛkpamɔ wiemɔ mli lɛ nɔ daa. Abaaná gbɛtsɔɔmɔi ni yeɔ ebuaa yɛ “Current Events” (Saji ni Yaa nɔ Bianɛ) lɛ shishi yɛ Reasoning wolo lɛ baafai 10-11. Shi kɛlɛ, kaafĩ mɔ ko mɔ ko sɛɛ yɛ maŋkwramɔ loo maŋ saji amli. Yɛ no najiaŋ lɛ, gbalamɔ jwɛŋmɔ kɛya Ŋmalɛi lɛ kɛ Nyɔŋmɔ Maŋtsɛyeli lɛ nɔ akɛ adesai anaagbai anaa tsabaa kome pɛ ni yɔɔ daa.