Sanekpakpa Lɛ Kɛhamɔ—Kɛtsɔ Woji Ni Wɔkɛaatsu Nii Yɛ Nilee Mli Nɔ
1 Gbi kome kpee krɛdɛɛ ni ato he gbɛjianɔ kɛha 1991 sɔɔmɔ afi lɛ susu sane ko ni yitso ji “Wɔ Sɔɔmɔ Nitsumɔ Lɛ—Ejeee Nitsumɔ ko Kɛkɛ, shi Nɔ ni Yɔɔ Krɔŋkrɔŋ” lɛ he. Ema nɔ mi akɛ wɔnitsumɔ lɛ yɛ krɔŋŋ, ni no hewɔ lɛ esaaa akɛ wɔbuɔ lɛ akɛ nɔ ni yɔɔ fɛlɛfɛlɛ. Akɛni woji ni akala ni wɔkɛtsuɔ nii lɛ fata wɔsɔɔmɔ nitsumɔ lɛ he hewɔ lɛ, esa akɛ wɔjie bulɛ kpo yɛ nomɛi hu he. Wɔteŋ mɔ fɛɛ mɔ baanyɛ atsɔɔ bulɛ ni mli kwɔ ni wɔyɔɔ kɛtsɔ wɔwoji lɛ ni wɔkɛaatsu nii yɛ nilee mli lɛ nɔ.
2 Yɛ 1990 sɔɔmɔ afi lɛ mli lɛ, Asafo lɛ ekala woji tɛtrɛbii akpekpei 678 kɛ Bibliai kɛ woji wuji hu fe akpekpei 51 kɛha nitsumɔ yɛ je lɛŋ fɛɛ. Enɛ tsɔɔ bɔ ni wɔkɛ nibii babaoo ni wɔjɔɔ nɔ lɛ tsu he nii wɔha, ni wɔ be, kɛ hewalɛ, kɛ shika fɛɛ fata he. Nyɛmimɛi babaoo ni kɛ amɛhe eha lɛ fɛɛ amɔdɛŋbɔɔ ji nɔ ni haa anyɛɔ afeɔ woji kpakpai nɛɛ kɛha wɔ diɛŋtsɛ wɔ sɛɛnamɔ kɛ agbɛnɛ ekɛ nitsumɔ yɛ shiɛmɔ mli hu lɛ. Mɛni ji gbɛi komɛi ni wɔɔtsɔ nɔ wɔjie tsuiŋ hiɛsɔɔ kpo yɛ wɔwoji lɛ ahe, yɛ be mli ni wɔhaa mɛi ni yɔɔ tsui krɔŋŋ lɛ nuɔ Maŋtsɛyeli lɛ he shɛɛ sane lɛ?
3 Teemɔŋ kɛ Weku Nikasemɔ: Bɔfo Paulo kɛɛ yɛ Romabii 2:21 akɛ: “Agbɛnɛ bo ni otsɔɔ mɛi krokomɛi anii lɛ, otsɔɔɔ bo diɛŋtsɛ ohe?” Kɛ wɔtoɔ be ni wɔkɛkaneɔ Biblia mli woji lɛ, ni wɔkaseɔ, ni wɔkɛ sɔlemɔ jwɛŋɔ nɔ ni wɔkaseɔ lɛ nɔ lɛ, no Iɛ wɔtsɔɔ nakai feemɔ nɔ wɔtsɔɔ bɔ ni wɔ diɛŋtsɛ wɔbuɔ mumɔŋ niyenii ni Yehowa kɛhaa wɔ yɛ ebe naa pɛpɛɛpɛ kɛtsɔ etsulɔ kuu lɛ nɔ lɛ waa wɔhaa. (Luka 12:42) Kɛji teemɔŋ loo weku nikasemɔ nɔ wɔtsɔɔ lɛ, anɔkwalei ni jeɔ kpo lɛ ni wɔɔle yɛ ebe naa pɛpɛɛpɛ lɛ yeɔ ebuaa wɔ ni wɔnaa bulɛ ni mli kwɔ wɔhaa nibii fɛɛ ni Yehowa etuu ewo wɔdɛŋ lɛ. Esa akɛ atsɔse gbekɛbii lɛ hu jogbaŋŋ, ni amɛna bulɛ amɛha amɛwoji lɛ ni amɛkwɛ nɔ jogbaŋŋ, ni amɛkaŋmala mli loo amɛwo lɛ muji kpɔtɔɔ. Kɛfata he lɛ, esa akɛ wɔkɛ wɔwoji lɛ ato jogbaŋŋ, bɔni afee ni amɛhe atse ni amɛsa kɛha nitsumɔ yɛ shiɛmɔ mli.
4 Kaaha Ehiɛ Miikpata: Kɛji ehe baaba sɛɛnamɔ diɛŋtsɛ lɛ, no lɛ esa akɛ wɔwoji lɛ ayaje mɛi ni taoɔ anɔkwale lɛ lɛlɛŋ lɛ adɛŋ, ni ji, mɛi ni yɔɔ wɔwiemɔ lɛ kɛ wɔnitsumɔ lɛ he miishɛɛ yɛ anɔkwale mli lɛ. (Mat. 10:11) Woji lɛ ahiɛ baanyɛ akpata hu kɛji wɔŋmɛ gbɛ ni woji tɛtrɛbii, woji wuji, kɛ woji krokomɛi ni eshwɛ lɛ naa tĩa yɛ wɔshia loo asafo lɛ mli.
5 Akɛni aŋmaa nyɔŋ nɔ nɔ ni ji Iɛ yɛ woji tɛtrɛbii lɛ anɔ hewɔ lɛ, be pɔtɛɛ yɛ ni abaanyɛ akɛha akɛ ehee ni eba. No hewɔ lɛ mɔdɛŋbɔɔ krɛdɛɛ he miihia yɛ wɔgbɛfaŋ bɔni afee ni wɔnyɛ wɔya shiɛmɔ ni wɔkɛ nɛkɛ woji tɛtrɛbii nɛɛ aha mɛi ni yɔɔ he miishɛɛ lɛ. Kɛji wɔna akɛ woji tɛtrɛbii ni wɔ diɛŋtsɛ wɔheɔ lɛ miitĩa lɛ, no lɛ ekolɛ ebaahi akɛ wɔɔtsake wɔgbɛjianɔtoo lɛ mli koni wɔna be babaoo kɛha woji tɛtrɛbii anitsumɔ. Aloo kɛji ehiŋ wɔ nakai feemɔ lɛ, no lɛ esa akɛ wɔtse bɔ ni wɔshɛɔ lɛ nɔ. Enɛ kɔɔ woji tɛtrɛbii ni asafo lɛ shɛɔ lɛ hu he. Kɛ wɔkɛ ŋaawoi nɛɛ tsu nii lɛ, ebaaha wɔkɛ wɔhe atsɔɔ akɛ Nyɔŋmɔ duromɔ ni wɔsaaa lɛ he tsuji anɔkwafoi.—1 Kor. 4:2; 1 Pet. 4:10, 11; okɛto Luka 16:1, 10 he.
6 Yehowa “etuu” gbɛnaa nii ni tsii kɛ nitsumɔ “ewo” ewebii ni ejɔɔ amɛhe nɔ amɛha lɛ lɛ adɛŋ, ni nɔ ni fata enɛ he ji “enibii” ni “tsulɔ nukpa” anɔkwafo lɛ yɔɔ hegbɛ yɛ nɔ lɛ. (2 Tim. 1:12: Luka 12:42-44, 48b; 1 Tim. 6:20) Yɛ be mli ni wɔnaa hiɛsɔɔ ni mli kwɔ wɔhaa hegbɛi ni wɔyɔɔ yɛ Nyɔŋmɔ sɔɔmɔ mli lɛ, eba akɛ wɔɔya nɔ wɔkɛ wɔwoji lɛ atsu nii yɛ nilee mli beni wɔkɛ sanekpakpa lɛ haa mɛi krokomɛi lɛ.