Gbɔmɔ Ni Fe Mɔ Fɛɛ Mɔ Ni Ehi Shi Pɛŋ
1 Beni wɔnine shɛ wolo hee nɛɛ nɔ lɛ, egbɛi, Gbɔmɔ ni Fe Mɔ Fɛɛ Mɔ ni Ehi Shi pɛŋ lɛ ha wɔna miishɛɛ waa. Ni aaajie gbɔmɔ kome kpo akɛ mɔ ni da fe fɛɛ lɛ tsɔɔ akɛ efe gbɔmɛi akpekpei toi akpei abɔ ni ehi shikpɔŋ nɛɛ nɔ pɛŋ lɛ fɛɛ. Atsɔɔ “fe” mli akɛ “su loo nyɛmɔ ni hi fe ekrokomɛi.” Nuu ni he saa kɛhaa su ni tamɔ nɛkɛ lɛ baanyɛ afee mɔ ni ekaaa lɛlɛŋ!
2 Yesu Kristo, ni ji Nyɔŋmɔ Bi lɛ sa hegbɛ ni tamɔ nɛkɛ. Nɔ ni etsu yɛ shikpɔŋ nɔ lɛ kɔɔɔ ninamɔ, je lɛŋ nitsumɔi wuji, loo maŋkwramɔŋ nɔyeli he nɔ ko. Eje ohiafoi loo gbɔmɛi ni baa shi lɛ aweku mli, ni eshihilɛ be ni fa ji nɔ ni ekɛhi shi akɛ mɔ ni abuuu ehe akɔntaa ko. Shi beni eye afii 30 lɛ, gbɔmɛi ni yɔɔ Palestina shikpɔŋ lɛ fɛɛ nɔ gbala amɛjwɛŋmɔ kɛba enɔ kɛtsɔ nɔ ni ewie ni efee lɛ nɔ. Ejie mɔ ni Yehowa Nyɔŋmɔ ji kɛ eyiŋtoi akpo yɛ gbɛ ni gbɔmɔ enako lɛ nakai da lɛ nɔ. Etsu shiɛmɔ nitsumɔ ko ni da fe fɛɛ eko ni gbɔmɔ ko etsu pɛŋ, ni efee naakpɛɛ nibii ni ekaaa, ni eto jeŋ hee asafo ko shishi.
3 Bɔ ni Wolo Nɛɛ He Hiaa Ha: Paulo wo wɔ hewalɛ ni “wɔtɛje wɔhiɛ wɔkwɛ” Yesu akɛ wɔ nɔkwɛmɔ nɔ titri. (Heb. 12:2, NW) Asafo Iɛ ŋmala saji sɔrɔtoi 149 ni kɔɔ Yesu shihilɛ kɛ esɔɔmɔ nitsumɔ lɛ he kɛtsara nɔ yɛ Buu-Mɔɔ lɛ mli kɛjɛ 1985 kɛbashi 1991. Saji ni aŋmala nɛɛ ha wɔ fɛɛ wɔhiɛ ba wɔhe nɔ yɛ nɔ ni Yesu wie ni efee kɛha wɔ lɛ nɔ waa. Amɛmaa bɔ ni ehe hiaa akɛ wɔɔkase enɔkwɛmɔ nɔ lɛ nɔ mi. Amua nɛkɛ saji nɛɛ fɛɛ naa awo wolo kome mli aha wɔ. Mɛɛ dɛŋdade kpakpa ni wɔkɛaaye wɔbua mɛi krokomɛi ni amɛtɛje amɛhiɛ amɛkwɛ Yesu, ni amɛfee mɔ ni Yehowa kɛ lɛ eta “onukpayeli kɛ hegbɛ kɛ nɔyeli fɛɛ kɛ gbɛi fɛɛ gbɛi” nɔ lɛ shishibii po wolo nɛɛ ji nɛkɛ!.—Efe. 1:21.
4 Emli Nibii ni Ekaaa: Kɛ okɛ wolo lɛ miiha lɛ, obaanyɛ obi akɛ: “Mɛni fee Yesu gbɔmɔ ni fe mɔ fɛɛ mɔ ni ehi je lɛŋ pɛŋ lɛ?” Obaanyɛ oha enɛ hetoo kɛtsɔ yitsei 133 ni wieɔ eshihilɛ, esui, etsɔɔmɔi, kɛ enitsumɔi ahe lɛ ni ooogbala jwɛŋmɔ kɛya nɔ lɛ nɔ. Yitso 24 tsɔɔ yiŋtoo hewɔ ni eba shikpɔŋ nɔ lɛ mli. Yitso 35 tiɔ e-Gɔŋ nɔ Shiɛmɔ ni ehe gbɛi lɛ mli. Yitso 43 maa Yesu nyɛmɔi ni ekaaa ni ekɛtsɔɔ mɛi anii kɛtsɔɔ abɛbuai anɔ lɛ nɔ mi. Yitso 133 haa wɔnaa jɔɔmɔi ni adesai baana mli ŋɔɔmɔ beni egbe enitsumɔi lɛ anaa lɛ mli fioo. Obaana akɛ sanebimɔi ni yɔɔ yitso fɛɛ yitso naagbee lɛ kɛ nitsumɔ yeɔ ebuaa ni ekanyaa sanegbaa; ŋmalɛi ni atsɛ shi aŋmaaa emli wiemɔi lɛ tsɔɔ he ni abaana saji lɛ yɛ, yɛ Biblia lɛ mli. Obaanyɛ otsɔɔ abɛbuai ni sa kadimɔ jogbaŋŋ ni jieɔ hewalɛ ni yɔɔ Yesu su kɛ baŋ sɛɛ lɛ kpo lɛ. bɔ ni emusuŋ tsɔɔ lɛ haa mɛi krokomɛi, kɛ ekaa ni ekɛshiɛɔ ni etɔɔɔ lɛ lɛ.—Kadimɔ yitsei 44, 95, 117, kɛ 123.
5 Wɔkɛ wolo hee nɛɛ baatsu nii yɛ August mli. Emli saji ni ekaaa lɛ kɛ yiŋtoi kpakpai ni wɔɔdamɔ nɔ wɔjie wolo lɛ yi ni wɔkɛha mɛi krokomɛi kɛ miishɛɛ babaoo lɛ haa wɔ. Esa akɛ mɔ fɛɛ mɔ ni sumɔɔ naanɔ wala lɛ ana Yesu Kristo he nilee. (Yoh. 17:3) Wɔ mɔdɛŋbɔɔ kɛ ekaa ni wɔkɛaaja wolo nɛɛ baanyɛ aha gbɔmɔ ni fe mɔ lɛɛ mɔ ni ehi shi pɛŋ lɛ ana gbɔmɛi anɔkwafoi lɛ ashihilɛ nɔ hewalɛ.