Gbɛgbamɔ—Sɔɔmɔ Ni Kɛ Nyɔmɔwoo Babaoo Baa
1 Yehowa miisumɔ ni wɔmli afili wɔ ni wɔna nɔ́ kpakpa kɛjɛ wɔdeŋmegbomɔi lɛ fɛɛ mli. (Jaj. 5:18) Nitsumɔ ni he hiaa fe fɛɛ ni wɔbaanyɛ ni wɔkɛ wɔhe awo mli ji Maŋtsɛyeli-shiɛmɔ kɛ kaselɔfeemɔ nitsumɔ lɛ. Paulo wo Timoteo ŋaa akɛ: “Tsu sanekpakpa jajelɔ nitsumɔ lɛ, gbee osɔɔmɔ lɛ naa kwraa.” (2 Tim. 4:6) Ewo Timoteo hewalɛ, ni Paulo wiemɔi lɛ woɔ wɔ fɛɛ hewalɛ ŋmɛnɛ koni wɔkɛ wɔsusuma fɛɛ awo wɔsɔɔmɔ lɛ mli. Kɛha mɛi komɛi lɛ, nɔ ni fata susuma fɛɛ sɔɔmɔ lɛ he ji ni amɛaasɔmɔ akɛ daa gbɛgbalɔi. Mɛni hewɔ otsɔɔɔ sɔlemɔ nɔ osusuuu he akɛ ani oshihilɛ aaaŋmɛ bo gbɛ ni okɛ ohe awo be fɛɛ sɔɔmɔ lɛ mli lo?
2 Nifeemɔ Kɛ Jwɛŋmɔ kpakpa He Miihia: Ni akɛ he aaawo gbɛgbamɔ nitsumɔ lɛ mli lɛ biɔ ni akpɛ yiŋ komɛi ni kɛ wɔsɔlemɔi lɛ kpaa gbee. Na Yehowa sɔɔmɔ he suɔmɔ ni jɛ tsuiŋ, kɛ suɔmɔ kɛha gbɔmɛi hu. Ha onitsumɔ yɛ shiɛmɔ mli aya hiɛ, ni ona sɛɛsaramɔi kɛ Biblia mli nikasemɔi ni fa. Tsu be he gbɛjianɔtoo kpakpa he nii: ha efee nɔ ni obaanyɛ otsu he nii. Taomɔ ŋaawoo kɛjɛ onukpai lɛ kɛ gbɛgbalɔi lɛ aŋɔɔ. Okɛ ohe akpɛtɛ gbɛjianɔ kpakpa ni oto oha shiɛmɔ nitsumɔ lɛ ni okɛ ohe aaawo mli lɛ he. He-tsɔsemɔ, hegbɛ ni baa ni atsuɔ he nii, kɛ faishitswaa he miihia. (1 Kor. 9:23, 25, 27) Enɛɛmɛi fata gbɛjianɔ kpakpa ni wɔ shiɛlɔi 126 ni kɛ amɛhe wo daa gbɛgbamɔ mli yɛ 1991 sɔɔmɔ afi lɛ mli lɛ to lɛ ahe.
3 Otii pɔtɛɛ ni wɔkɛaamamɔ wɔhiɛ ni wɔkɛ hiɛdɔɔ atsu he nii lɛ baaha wɔfee mɛi ni shwereɔ yɛ wɔshiɛmɔ mli yɛ be mli ni wɔhaa wɔnyɛmɔi yaa hiɛ lɛ. Ani wɔɔnyɛ wɔha wɔ hiɛkpamɔ wiemɔi yɛ shiai aloo gbɛ ni wɔtsɔɔ nɔ wɔtsuɔ shitee-kɛ-wooi ahe nii lɛ aya hiɛ? Ani wɔkɛ woji fɛɛ ni wɔyɔɔ lɛ tsuɔ nii kɛmɔɔ shi? Ani wɔmiifee shia Biblia mli nikasemɔ ni yaa hiɛ? Ani wɔbaanyɛ wɔje gbɛgbalɔi awamɔ shishi bianɛ kɛ yiŋtoo akɛ wɔɔfee daa gbɛgbalɔi yɛ sɛɛ mli? Esa akɛ otii lɛ afee nɔ ni anyɛɔ atsuɔ he nii ni wɔto yɛ nɔ ni wɔnyɛɔ wɔ tsuɔ lɛ naa. Otii nɛɛ ni wɔnine aaashɛ nɔ lɛ baaha wɔhesaa aya hiɛ ni eeeha wɔtsui anyɔ wɔmli babaoo.—1 Tim. 4:15, 16.
4 Shihilɛ Gbɛ ni Nyɔmɔwoo Yɔɔ Mli: Gbɛgbamɔ kɛ jwɛŋmɔ kpakpa kɛ suɔmɔ ni ayɔɔ akɛ aaaya hiɛ yɛ mumɔŋ lɛ kɛ sɛɛnamɔi pii baa. Wɔnyɛɔ wɔkɛ wɔhe fɔɔ Yehowa nɔ gbagbalii. Hesaa babaoo yɛ Nyɔŋmɔ Wiemɔ lɛ kɛ nitsumɔ mli baa kɛjɛɔ ekɛ nitsumɔ daa yɛ sɔɔmɔ mli lɛ mli. Esaa asafo lɛ he yɛ gbɛ kpakpa nɔ, ni ewoɔ mɛi krokomɛi ahewalɛ koni amɛkɛ be ni fa awo sɔɔmɔ lɛ mli yɛ wɔ ekaa feemɔ he nɔkwɛmɔ nɔ lɛ hewɔ. Gbɛgbamɔ baanyɛ aye abua wɔ ni wɔkwɛ shihilɛ yɛ mumɔŋ gbɛ nɔ babaoo, ni ebaabu wɔhe kɛjɛ je lɛ hiɛkɔɔi, akɔnɔi, kɛ naanyobɔɔ he.
5 Yesu kɛɛ esɛɛnyiɛlɔi lɛ akɛ: “Nikpamɔ lɛ fa moŋ, shi nitsulɔi lɛ faaa. No hewɔ lɛ, nyɛkpaa nikpamɔ Nuŋtsɔ lɛ fai, koni ewo nitsulɔi agbɛ kɛba enikpamɔ lɛ mli.” (Mat 9:37, 38) Nitsulɔi he miihia babaoo po bianɛ fe bɔ ni eji yɛ Yesu gbii lɛ amli lɛ. Gbɛgbamɔ haa wɔnaa hegbɛ ni wɔkɛ wɔhe woɔ nitsumɔ ni he hiaa ni hereɔ mɔ yiwala nɛɛ mli kɛmɔɔ shi. Nɔ ko nɔ ko bɛ ni abaanyɛ akɛto tsui ni nyɔɔ mɔ mli kɛ miishɛɛ ni baa yɛ mɔ ko shihilɛ ni ekɛwo be fɛɛ sɔɔmɔ ni akɛhaa wɔ Bɔlɔ Kpeteŋkpele lɛ mli lɛ he.—Abɛi 10:22.