Okɛ Buu-Mɔɔ Lɛ Ajaje Sanekpakpa Lɛ
1 Buu-Mɔɔ lɛ yɛ sɔrɔto diɛŋtsɛ ejaakɛ ehiɛ sanekpakpa. Nɔ ni tamɔɔɔ nakai lɛ, saji gbohii ni faa mɔ tsui sɔŋŋ eyimɔ je lɛŋ woji lɛ babaoo mli. Te wɔɔfee tɛŋŋ wɔtsɔɔ mɛi krokomɛi akɛ Buu-Mɔɔ lɛ yɛ sɔrɔto, ni saji ni shɛjeɔ mɔ mii diɛŋtsɛ yɔɔ mli?
2 Wɔbaanyɛ wɔgbala jwɛŋmɔ kɛya “Buu-Mɔɔ lɛ yiŋtoo” ni yɔɔ wolo tɛtrɛɛ lɛ baafa 2 lɛ nɔ. Tsɔɔmɔ akɛ eyiŋtoo ji ni ewo Yehowa nɔ akɛ Jeŋ Muu Fɛɛ Maŋtsɛ, ni egbalaa jwɛŋmɔ kɛyaa jeŋ saji ni haa Biblia gbalɛ baa mli lɛ anɔ, eshɛjeɔ mɛi ni awaa amɛ yi lɛ amli, ni ewoɔ hemɔkɛyeli hewalɛ yɛ Nyɔŋmɔ gbɛjianɔtoo kɛha wɔyiwalaheremɔ lɛ mli.
3 Ani bɔ ni wɔwieɔ Buu-Mɔɔ lɛ he wɔhaa lɛ kɛ jwɛŋmɔ ni tamɔ nɛkɛ haa yɛ gbɛ ni tsɔɔ mɔ yiŋ nɔ? Esaaa akɛ nɔ ni wɔkɛɔ lɛ feɔ ŋaatsɔɔ wiemɔ ko ni kanyaa mɔ miishɛɛ yɛ be kuku ko mli kɛkɛ; esa akɛ efee nɔ ni shishinumɔ yɔɔ mli, ni kanyaa hekɛnɔfɔɔ koni asumɔ akɛ aaakase babaoo.
4 Hesaamɔ He Miihia: Ehe miihia ni wɔkane wolo tɛtrɛɛ lɛ eko fɛɛ eko jogbaŋŋ, ni wɔha wɔshikpɔŋkuku lɛ ahi wɔjwɛŋmɔ mli yɛ be mli ni wɔsusuɔ shiɛmɔ wiemɔi sɔrɔtoi lɛ ahe lɛ. Ŋmalɛi ni atsɛ ni aŋmaaa emli wiemɔi lɛ akanemɔ baaha wɔshishinumɔ mli akwɔ. Enɛ baaha hiɛsɔɔ ni wɔyɔɔ kɛha anɔkwale lɛ mli akwɔ ni ebaakanya wɔ ni wɔgba mɛi krokomɛi. Kɛ anɔkwale lɛ bɛ wɔtsui mli lɛ, no lɛ ekanyaŋ wɔ koni wɔwie he wɔtsɔɔ mɛi krokomɛi.
5 Nɔ wolo ni wɔkɛbaaha lɛ damɔ miishɛɛ ni mɔ lɛ jeɔ lɛ kpo lɛ nɔ? Shi akɛni Buu-Mɔɔ lɛ wieɔ saji sɔrɔtoi babaoo he hewɔ lɛ, ekolɛ wɔbaanyɛ wɔkɛ ekome loo enyɔ mli saji ni ato naa lɛ atsɔɔ shiatsɛ lɛ koni wɔkɛkanya emiishɛɛ ni eshɛ eko.
6 Kɛ okane Buu-Mɔɔ heei lɛ amli saji lɛ, bɔɔ mɔdɛŋ ni okai saji ni otsɔ hiɛ okɛ shiatsɛmɛi lɛ gba ni nɛkɛ saji nɛɛ tee amɛmiishɛɛ shi lɛ. Ha efee oti ni ma ohiɛ akɛ oooku osɛɛ okɛ nakai wolo tɛtrɛɛ lɛ aba ni nyɛbagba he sane lolo.
7 Wɔleee bei abɔ lolo kɛ he ni abaajaje sanekpakpa lɛ kɛyashɛ. Shi wɔbaanyɛ wɔna nɔmimaa akɛ Buu-Mɔɔ lɛ baatsu nɔ titri yɛ nɔ ni anyɛɔ atsuɔ lɛ mli. Gbɛjianɔtoo nɛɛ kɛ nitsumɔ baaha wɔnyɛ wɔkase bɔfoi lɛ yɛ “Yehowa wiemɔ lɛ he sanekpakpa lɛ . . . tsɔɔmɔ kɛ ejajemɔ ni wɔkɛ mɔdɛŋbɔɔ feɔ lɛ mli.—Bɔfoi 15:35, NW.