Sanekpakpa Lɛ Kɛhamɔ—Shia Biblia Kasemɔ He Gbɛjianɔtoo
1 Nɔ ni aŋma ahɔ Wɔ Maŋtsɛyeli Sɔɔmɔ (Vol. 34, No. 9) lɛ mli lɛ kaiɔ wɔ gbɛnaa nii ni ka wɔ nɔ yɛ Kristo kaselɔi afeemɔ lɛ mli akɛ wɔtɛo ni wɔshwã nɔ nu lɛ. Etsɔɔ wɔ akɛ esa akɛ ekanya wɔ ni wɔfee Biblia mli nikasemɔ yɛ suɔmɔ ni wɔyɔɔ kɛhaa gbɔmɛi ni kpɛlɛɔ Maŋtsɛyeli lɛ he sane lɛ nɔ lɛ hewɔ. Shia Biblia kasemɔi ni wɔɔto he gbɛjianɔ wɔha amɛ lɛ baaye abua wɔ ni wɔtsu wɔnitsumɔ akɛ wɔfee kaselɔi lɛ he nii.—Mat. 28:19, 20.
2 Ehi akɛ wɔɔna akɛ wɔteŋ mɛi pii eje shishi amɛkɛ hewalɛwoo kpakpa ni akɛha lɛ miitsu nii. Amaniɛbɔɔ lɛ tsɔɔ akɛ aafee Biblia mli nikasemɔi babaoo. Biblia kasemɔi ni abuɔ he akɔntaa yɛ Ghana lɛ tee hiɛ kɛyashɛ oha fɛɛ mli 25 nɔyaa yɛ 1991 fe 1990 sɔɔmɔ afi Iɛ nɔ. Mɛɛ nitsumɔ ni sa yijiemɔ nɛ! Eka shi faŋŋ akɛ mɛi ni kpaako amɛje Biblia kasemɔ feemɔ shishi klɛŋklɛŋ kwraa lɛ amli efili amɛ yɛ gbɛfaŋnɔ ni amɛnaa yɛ kaselɔfeemɔ nitsumɔ lɛ mli lɛ hewɔ. Shi te aaafee tɛŋŋ ni mɛi pii aaana gbɛfaŋnɔ yɛ wɔsɔɔmɔ lɛ fa ni nyɔmɔwoo babaoo yɔɔ mli nɛɛ mli?
3 Okɛ Wolo ni Akɛhaa yɛ Nyɔŋ Iɛ nɔ Iɛ Atsu Nii: December ji nyɔŋ titri ko ni sa jogbaŋŋ ni akɛaatao shia Biblia mli nikasemɔi heei. Wɔkɛ New World Translation of the Holy Scriptures lɛ kɛ Is the Bible Really the World of God? wolo lɛ baaha. Gbɛ ni hi ni oootsɔ nɔ otee shiatsɛ lɛ miishɛɛ shi ji ni okɛ ŋaawoo ni akɛha yɛ Reasoning wolo lɛ mli lɛ atsu nii.
4 Wɔbaanyɛ wɔkɛ Biblia lɛ aha kɛtsɔ hiɛkpamɔ wiemɔi ni awo he ŋaa yɛ Reasoning wolo lɛ baafa 10 lɛ kɛ nitsumɔ nɔ. Ato gbɛi sɔrɔtoi enumɔ ni abaanyɛ atsɔ nɔ agbala jwɛŋmɔ kɛba Biblia lɛ nɔ lɛ naa yɛ jɛmɛ. Hewalɛ ni wɔɔwo gbɔmɛi koni amɛtao Biblia mli hetooi amɛha shihilɛ mli sanebimɔi lɛ baagbele gbɛ kɛha Biblia lɛ kasemɔ.
5 Ŋaawoi sɔrɔtoi enyɔ yɛ Reasoning wolo lɛ baafa 12 yɛ yitso bibioo “Home Bible Study” (Shia Biblia Kasemɔ) shishi ni he baaba sɛɛnamɔ yɛ Word of God wolo lɛ ni aaagbala jwɛŋmɔ kɛya nɔ lɛ mli. Enyɔ lɛ fɛɛ woɔ hewalɛ koni aje gbɛ ato wolo lɛ kasemɔ naa. Kɛ okɛ Biblia kasemɔ ni ajeɔ shishi fɛɛ lɛ miitsu nii lɛ, obaanyɛ onyiɛ ŋaawoi kpakpai ni yɔɔ Wɔ Maŋtsɛyeli Sɔɔmɔ (Vol. 34, No. 10) lɛ mli lɛ sɛɛ.
6 Okɛ Ohiɛ Afɔ Yehowa Nɔ: Kɛ wɔɔye omanye yɛ Biblia kasemɔ nitsumɔ lɛ mli lɛ, esa akɛ wɔkai akɛ omanye ni wɔɔye yɛ Biblia kasemɔ he gbɛjianɔtoo lɛ mli lɛ damɔ Yehowa yelikɛbuamɔ pɛ nɔ. Lɛ ji mɔ ni tsuɔ babaoo yɛ mɔdɛŋ ni wɔbɔɔ koni wɔye wɔbua gbɔmɛi lɛ mli. (1 Kor. 3:6) No hewɔ lɛ, jeee mɔ ni wɔɔna ni wɔkɛ lɛ aje nikasemɔ shishi pɛ he esa akɛ wɔsɔle yɛ, shi mɔ ni wɔnine eshɛ enɔ lɛ nɔyaa hu. (Yoh. 16:23) Esa akɛ wɔkai akɛ wɔji “Nyɔŋmɔ hefatalɔi nitsulɔi.”—1 Kor. 3:9.