Shia Biblia Mli Nikasemɔi ni Aaaje Shishi
1 Niiashikpamɔi ni he baa sɛɛnamɔ ni haa mɔ tsui nyɔɔ emli fe fɛɛ kɛha anɔkwa Kristofoi lɛ ateŋ eko ji ni aaatsɔɔ mɔ ko anɔkwale lɛ kɛtsɔ shia Biblia mli nikasemɔ nɔ. Kɛlɛ, mɛi komɛi kɛ amɛhe wooo sɔɔmɔ nitsumɔ lɛ fa nɛɛ ni he baa sɛɛnamɔ ni haa mɔ tsui nyɔɔ emli nɛɛ mli ejaakɛ amɛnuɔ he akɛ amɛnyɛŋ amɛje shia Biblia mli nikasemɔ shishi. Shiɛlɔi kɛ gbɛgbalɔi ni he esa lɛ ateŋ mɛi babaoo esusu nakai pɛŋ. Shi, akɛni amɛkɛ amɛhe fɔɔ Yehowa nɔ ni amɛkɛ nibii ni atsɔɔ yɛ Wɔ Maŋtsɛyeli Sɔɔmɔ lɛ mli lɛ tsuɔ nii hewɔ lɛ, amɛkase bɔ ni atsɔɔ ajeɔ Biblia mli nikasemɔi ashishi, ni amɛna miishɛɛ babaoo yɛ sɔɔmɔ nitsumɔ lɛ mli. Obaanyɛ okɛ nakai oti lɛ nɔŋŋ ama ohiɛ.
2 Gbɛ ni Yɔɔ Tɛ̃ɛ kɛ Dɛhiɛmɔ Woji lɛ ni Akɛbaatsu Nii: Gbɛi ni waaa kwraa ni atsɔɔ nɔ ajeɔ nikasemɔ shishi lɛ ateŋ ekome ji kɛtsɔ gbɛ ni yɔɔ tɛ̃ɛ lɛ nɔ. Nɔ ni he hiaa mɛi komɛi nɔŋŋ kɛkɛ ji ni akɛ miishɛɛ afɔ amɛ nine kɛha Biblia lɛ kasemɔ. Abaanyɛ afee enɛ kɛtsɔ shiatsɛ lɛ ni ooobi lɛ kɛkɛ akɛ: “Ani ooosumɔ ni akɛ bo akase Biblia lɛ yɛ shia ni onilee ni oyɔɔ yɛ Biblia lɛ kɛ Nyɔŋmɔ yiŋtoo kɛha shikpɔŋ nɛɛ he lɛ afa?” Aloo obaanyɛ okɛɛ shiatsɛ lɛ akɛ eeefee bo miishɛɛ akɛ ooofee bɔ ni afeɔ shia Biblia mli nikasemɔ ahaa lɛ he nɔkwɛmɔ nɔ otsɔɔ lɛ. Eyɛ mli akɛ mɛi babaoo baakpoo enɛ moŋ, shi susumɔ bɔ ni omli aaafili bo aha, kɛ ona mɔ ko ni kpɛlɛ nɔ lɛ!
3 Gbɛ kroko ni oootsɔ nɔ oje Biblia mli nikasemɔ shishi ji dɛhiɛmɔ woji lɛ ni okɛ aaatsu nii. Eyɛ mli akɛ amɛdaraaa moŋ, shi amɛkɛ shɛɛsane ni naa mɔ nɔ hewalɛ ni kɔneɔ mɔ yiŋ haa. Te aaafee tɛŋŋ akɛ dɛhiɛmɔ wolo aje Biblia mli nikasemɔ shishi hu? Nɔ ni ooofee nɔŋŋ kɛkɛ ji ni okɛ dɛhiɛmɔ wolo ni ole akɛ shiatsɛ lɛ baanya he lɛ aha. Kɛkɛ lɛ, tsɔ hiɛ ofɔ shiatsɛ lɛ nine ni efata ohe kɛkane klɛŋklɛŋ kuku lɛ. Nyɛkanea ŋmalɛi ni atsɛ yisɛɛ lɛ, ni nyɛkɛto bɔ ni ekɔɔ nɔ ni nyɛsusuɔ he lɛ he ehaa. Be mli ni okɛ shiatsɛ lɛ ekpe klɛŋklɛŋ kwraa lɛ, nyɛbaanyɛ nyɛsusu kuku kome loo kukuji enyɔ he. Be mli ni shiatsɛ lɛ naa akɛ eekase nibii ni haa mɔ mii shɛɔ ehe kɛmiijɛ Biblia lɛ mli lɛ, kɛkɛ lɛ ooonyɛ oha sane ni nyɛgbaa lɛ sɛɛ atsɛ fioo.
4 Biblia lɛ ni Akɛaatsu Nii: Bei komɛi lɛ, mɔ ko yɛ ni esumɔɔ sane ni ajɛɔ Biblia mli akɛ lɛ gbaa lɛ moŋ, shi eshashaoɔ shi yɛ shia Biblia mli nikasemɔ mli loo ni eeekane wɔwoji lɛ eko. Kɛlɛ, obaanyɛ oje Biblia mli nikasemɔ shishi kɛtsɔ Ŋmalɛ mli sanegbaa ni haa mɔ mii shɛɔ ehe ni damɔ Obaanyɛ Ohi Shi loo Reasoning wolo lɛ mli fai sɔrɔtoi komɛi anɔ lɛ ni okɛaasaa ohe yɛ be mli ni Biblia lɛ pɛ okɛtsuɔ nii yɛ mɔ ni yɔɔ wiemɔ lɛ he miishɛɛ nɛɛ kɛ nikasemɔ mli. Abaanyɛ akɛ minitii 15 loo 20 pɛ, loo nɔ ni fa fe nakai atsu nii kɛ shihilɛ lɛ aaaŋmɛ gbɛ. Kɛ afeɔ enɛ daa akɛ Biblia mli anɔkwale ni atsɔɔ ni yaa hiɛ fiofio lɛ, belɛ Biblia mli nikasemɔ nɔŋŋ shishi oje lɛ, ni abaanyɛ abu he akɔntaa. Kɛ eeehi lɛ, okɛ Obaanyɛ Ohi Shi wolo lɛ atsɔɔ lɛ, ni okɛ lɛ afee nikasemɔ.
5 Ani obɔ mɔdɛŋ akɛ okɛ onanemɛi, okutsoŋbii, loo weku mlibii aaaje Biblia mli nikasemɔ shishi kɛfata hegbɛi ni otaoɔ okɛtsu nii yɛ shiɛmɔ mli lɛ he? Ani otsu enɛ he nii be ko pɛŋ? Ani obɔ he mɔdɛŋ ekoŋŋ nyɛsɛɛ nɛɛ? Kɛ gbɛ ni otsɔ nɔ okɛfee lɛ yeee omanye lɛ ani otsu he nii yɛ gbɛ kroko nɔ?
6 Obaanyɛ oye omanye yɛ shia Biblia mli nikasemɔ ni oooje shishilɛ mli kɛ okɛ gbɛtsɔɔmɔi ni akɛha lɛ tsu nii ni ofi shi yɛ shiɛmɔ nitsumɔ lɛ mli, ni oŋɔ ohiɛ ofɔ Yehowa jɔɔmɔ nɔ lɛ. Okaba hewalɛ ni anɔkwale lɛ naa yɛ mɔ nɔ kɛ yelikɛbuamɔ ni Yehowa kɛhaa lɛ shi kɔkɔɔkɔ. Eba akɛ oooha omliflimɔ afa babaoo yɛ sɔɔmɔ nitsumɔ lɛ mli kɛtsɔ shia Biblia mli nikasemɔi ni ooofee lɛ nɔ.