Dɛhiɛmɔ Woji ni Akɛaatsu Nii ni Ehe Aba Sɛɛnamɔ

¹ Yehowa ŋmɛnɛŋmɛnɛ beaŋ gbɛjianɔtoo lɛ kɛ dɛŋhiɛmɔ woji etsu nii yɛ omanyeyeli mli yɛ eyinɔsane be fɛɛ mli. Wɔ mla naa nitsumɔ gbɛjianɔtoo lɛ gbɛi diɛŋtsɛ, ni ji Watch Tower Bible and Tract Society lɛ tsɔɔ akɛ dɛhiɛmɔ woji tsuɔ gbɛfaŋnɔ ni he hiaa he nii yɛ sanekpakpa lɛ gbɛɛ-kɛ-shwamɔ mli. Kɛjɛ 1881 kɛbashi 1918 lɛ, Yehowa webii ja dɛhiɛmɔ woji ni fa fe akpekpei 300. Mɛi ni batsɔmɔ Kristo nyɛmimɛi lɛ ateŋ shwɛɛnii ni yɔɔ nɛkɛ be nɛɛ mli lɛ fa lɛ ateŋ mɛi pii banu anɔkwale lɛ he klɛŋklɛŋ kwraa kɛtsɔ nɛkɛ shishijee be mli dɛhiɛmɔ woji nɛɛ anɔ.

² Yɛ 1987 mli lɛ, asaa ama bɔ ni ehe hiaa ni wɔkɛ dɛhiɛmɔ woji bibii atsu nii lɛ nɔ mi ekoŋŋ beni ajie ehee fɛfɛji ejwɛ ni wɔkɛtsu nii aahu kɛjɛ nakai beaŋ fɛɛ kɛbaa nɛɛ kpo lɛ. Atswa adafi yɛ “La Hiɛlɔi” Kpokpaa Wulu nɔ kpee lɛ shishi akɛ abaaha nɛkɛ dɛhiɛmɔ woji nɛɛ afalɛ aya hiɛ kɛtsɔ dɛhiɛmɔ woji heei ejwɛ krokomɛi ni yɔɔ fɛo ni kanyaa niiahesusumɔ, ni akɛfata he lɛ nɔ. Nomɛi ji Miishɛjemɔ Kɛha Mɛi ni Ehao Lɛ, Na Weku Shihilɛ Mli Ŋɔɔmɔ, Namɔ Diɛŋtsɛ Yeɔ Je lɛ Nɔ?, kɛ Ani Je Nɛɛ Baaya nɔ Ahi Shi? Ani okɛ dɛhiɛmɔ woji kpaanyɔ nɛɛ fɛɛ miitsu nii koni ewo yibii kpakpai yɛ osɔɔmɔ nitsumɔ lɛ mli?

³ Kɛ wɔkɛ dɛhiɛmɔ woji lɛ tsu nii kɛmɔ shi lɛ, nibii kpakpai jɛɔ mli baa. Ehe baahia ni wɔle eko fɛɛ eko mli saji jogbaŋŋ. Akɛ nɔkwɛmɔ nɔ lɛ, ani okane fɛɛ jogbaŋŋ ni ole nɔ ni eko fɛɛ eko wieɔ he? Ani osusu gbɔmɛi sɔrɔtoi ni baana dɛhiɛmɔ woji lɛ eko fɛɛ eko he miishɛɛ lɛ ahe? Nɛkɛ dɛhiɛmɔ woji nɛɛ eko fɛɛ eko mli saji ni ooole jogbaŋŋ lɛ baaha ona hekɛnɔfɔɔ babaoo yɛ amɛkɛ nitsumɔ mli yɛ shia-kɛ-shia nitsumɔ lɛ kɛ shihilɛi sɔrɔtoi babaoo ni obaanyɛ okɛye odase trukaa Iɛ amli.

⁴ Okɛtsu Nii yɛ Shia-kɛ-Shia Sɔɔmɔ Iɛ Mli: Kpokpaa nɔkwɛlɔ ko ŋma akɛ: “Miiye omanye waa yɛ dɛhiɛmɔ woji ni mikɛjeɔ misanegbaai lɛ amli babaoo shishi lɛ mli.” Ani oka nɛkɛ gbɛ nɛɛ okwɛ da? Mɛni hewɔ okɛ dɛhiɛmɔ woji tsuuu nii akɛ gbɛ ni otsɔɔ nɔ ojeɔ owiemɔ lɛ Shishi? Wɔyɛ hiɛkpamɔ wiemɔi kpaanyɔ ni kanyaa mɔ, ní wɔbaanyɛ wɔhala emli nɔ ni wɔsumɔɔ, yɛ dɛhiɛmɔ woji kpaanyɔ ni wɔyɔɔ lɛ amli. Dɛhiɛmɔ woji lɛ eko fɛɛ eko haa wɔnaa hegbɛ kɛha Biblia mli nikasemɔ shishijee beni wɔtee mɔ lɛ ŋɔɔ klɛŋklɛŋ kwraa aloo yɛ sɛɛsaramɔ mli.

⁵ Hegbɛi krokomɛi hu yɛ kɛha dɛhiɛmɔ woji kɛ nitsumɔ. Beni okɛ mɔ ko gbaa sane yɛ eshinaa naa lɛ, ekolɛ obaana ole akɛ mɔ lɛ laaje esuɔlɔ ko yɛ gbele mli etsɛko tsɔ, aloo ekolɛ mɔ ko he miiye yɛ weku lɛ mli. Bei pii lɛ, gbɔmɛi ni kɛ awerɛho shihilɛ kpeɔ aloo amɛmiibɔ mɔdɛŋ ni amɛkpee naagbai ni sɛɛ tsɛɔ naa lɛ naa henumɔi gbohii, ni amɛyajeɔ nɔnyɛɛ shishi. Kwɛ bɔ ni eeefee suɔmɔ kpojiemɔ eha kɛ wɔkɛ amɛ gba sane ni woɔ mɔ hewalɛ, ni yɔɔ Miishɛjemɔ Kɛha Mɛi ni Ehao Lɛ dɛhiɛmɔ wolo lɛ mli lɛ! Ekolɛ obaale akɛ egbala mli tse etsɛko tsɔ, aloo ekolɛ enitsumɔ efite. Niiashikpamɔi ni tamɔ nɛkɛ nyɛɔ ehaoɔ mɔ waa, ni esaa weku shihilɛ hu he. Okɛ sanebimɔi ni yɔɔ Na Weku Shihilɛ Mli Ŋɔɔmɔ dɛhiɛmɔ wolo lɛ baafa 2 lɛ atsu nii: “Mɛni hewɔ naagbai ni hiɛdɔɔ yɔɔ mli nɛkɛ baa wekui anɔ ŋmɛnɛ lɛ? Te wɔɔfee tɛŋŋ wɔna weku shihilɛ mli miishɛɛ?” Ekolɛ sanebimɔi nɛɛ nɔŋŋ ji nɔ ni ka mɔ lɛ jwɛŋmɔ nɔ waa fe fɛɛ. Kɛ ejieee miishɛɛ kpo amrɔ nɔŋŋ po lɛ, eeenyɛ ebalɛ akɛ ebaakane dɛhiɛmɔ wolo lɛ yɛ sɛɛ mli.​—Jaj. 11:⁠6.

⁶ Asafoi komɛi yɛ ni amɛfɔɔ amɛshikpɔŋkuku lɛ mli nitsumɔ kpitiokpitio, ni mɛi pii yɛ mli ni yɛ wɔwoji lɛ eko momo. Kɛ wɔkɛ dɛhiɛmɔ woji lɛ tsu nii lɛ, wɔbaana hegbɛ wɔkɛ shiatsɛmɛi lɛ asusu sane ni amɛnaa he miishɛɛ lɛ ahe, ni wɔkɛle amɛjwɛŋmɔ, ni wɔha amɛsusu Maŋtsɛyeli hiɛnɔkamɔ lɛ he. Okɛ sanebimɔ ko ni nyɛbaanyɛ nyɛsusu he be kroko awo ejwɛŋmɔ mli. Yaa sɛɛsaramɔ ni oha emiishɛɛ lɛ afa kɛya hiɛ. Yɛ be ni sa mli lɛ, ekolɛ wɔbaanyɛ wɔkɛ amɛ akase nii kɛtsɔ woji bibii aloo woji wuji ni amɛyɔɔ momo lɛ eko nɔ.

⁷ Okɛ Dɛhiɛmɔ Woji Atsu Nii Trukaa: Kɛ wɔkɛ dɛhiɛmɔ woji lɛ wo he ni wɔnine baanyɛ ashɛ nɔ oya​—yɛ wɔ shɛɛt kotoku mli, koot kotoku mli, shika kotoku mli, aloo shiɛmɔ baagi mli lɛ​—no lɛ wɔbaanyɛ wɔkɛtsu nii yɛ bei sɔrɔtoi amli, yɛ he fɛɛ he ni wɔbaana gbɔmɛi yɛ. Okɛtsu nii beni oyeɔ jara, ofaa gbɛ, aloo okɛ owekumɛi loo mɛi ni eba bo saramɔ wieɔ lɛ. Dɛhiɛmɔ woji haa wɔnaa hegbɛ wɔkɛyeɔ odase kuku. Dɛhiɛmɔ wolo ji nɔ ko ni ewieee babaoo bɔ ni eeehao mɔ, shi moŋ ewieɔ oti pɔtɛɛ ko he yɛ ŋaa mli. Akɛni nibii pii tsɔ bɛ mli ni abaakane, ni akɛhaa yaka ni aheee shika hu hewɔ lɛ, akpɛlɛɔ nɔ oya fe wolo wulu loo woji tɛtrɛbii.

⁸ Ha ohiɛ ahi ohe nɔ ni okɛ dɛhiɛmɔ woji aha trukaa yɛ skul aloo onitsumɔ he, yɛ niyeli hei, yɛ pɛtrol hɔɔmɔ he, kɛ hei krokomɛi ni tamɔ nakai. Beni nyɛmiyoo ko toɔ gbɛjianɔ ni ekɛ enaa ayana datrɛfonyo ko lɛ, ekai ni ekɔlɔ dɛhiɛmɔ woji lɛ ekomɛi ehiɛ edɛŋ kɛtee. Beni amɛyɔɔ datrɛfonyo lɛ ŋɔɔ lɛ, ekɛ yoo ko ni musu eda bɔi sanegbaa. Ni ekɛ Shihilɛ yɛ Toiŋjɔlɛ Jeŋ Hee ko Mli dɛhiɛmɔ wolo lɛ tsɔɔ yoo lɛ, kɛkɛ ni nyɛmiyoo lɛ bi lɛ akɛ: “Ani obaasumɔ ni obi lɛ ada yɛ jeŋ ni tamɔ nɔ ni afee he mfoniri nɛɛ mli?” Etee eyasara yoo lɛ yɛ eshia ni ekɛ lɛ tsa nakai sanegbaa lɛ nɔ. Ni enɛ ha enyɛ etee eŋɔɔ eyasara lɛ shii abɔ kɛtsara nɔ.

⁹ Abaanyɛ akɛ Dɛhiɛmɔ Woji Aje Biblia Mli Nikasemɔi Ashishi: Kpokpaa nɔkwɛlɔ ko bɔ amaniɛ akɛ asafo ni esaraa amɛ lɛ je shia Biblia mli nikasemɔi 64 shishi yɛ otsi lɛ mli kɛtsɔ dɛhiɛmɔ woji ni amɛkɛtsu nii beni amɛŋaa shiatsɛ lɛ klɛŋklɛŋ kwraa lɛ nɔ.

¹⁰ Ani oka akɛ okɛ Biblia mli nikasemɔ hegbɛ aaaha yɛ oklɛŋklɛŋ shia-kɛ-shia nitsumɔi amli? Kɛ okɛ dɛhiɛmɔ woji tsu nii lɛ, obaanyɛ ofee bɔ ni afeɔ nikasemɔ ahaa lɛ he nɔkwɛmɔ nɔ kuku. Nyɛmiyoo ko fee enɛ kɛtsɔ Shihilɛ yɛ Toiŋjɔlɛ Jeŋ Hee ko Mli dɛhiɛmɔ wolo lɛ kɛ nitsumɔ nɔ. Egbala jwɛŋmɔ kɛtee mfoniri lɛ nɔ, ni ebi shiatsɛ lɛ kɛji esusuɔ akɛ be ko baaba kɛ ni wɔshikpɔŋ lɛ baafee tamɔ nakai. Ni shiatsɛ lɛ jie naa sɛɛ lɛ, nyɛmiyoo lɛ ha ekane 2 Petro 3:13 kɛ Yesaia 65:​17, ni amamɔ nɔ mi yɛ dɛhiɛmɔ wolo lɛ mli lɛ. Kɛkɛ ni wɔnyɛmiyoo lɛ kɛɛ akɛ: “Nɛkɛ shiwoi nɛɛ jeee lamɔi loo yiŋsusumɔi foji kɛkɛ, shi moŋ nɔ ni akɛha yɛ Nyɔŋmɔ Wiemɔ, Biblia lɛ diɛŋtsɛ mli.” Kɛkɛ ni no sɛɛ lɛ eto gbɛjianɔ koni enɔ otsi lɛ, ekɛ lɛ abatsa sanegbaa lɛ nɔ. Beni etee eŋɔɔ ekoŋŋ lɛ, eha yoo lɛ sanebimɔi pii ahetoo ni eshi Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ ekome eha lɛ. Biblia mli nikasemɔ jɛ mli ba.

¹¹ Ani oji mɔ hee ni abaptisi bo aloo ekolɛ shiɛlɔ ni abaptisiko lɛ ni miiná niiashikpamɔ yɛ osɔɔmɔ nitsumɔ lɛ mli? Kɛ nakai lɛ, ekolɛ obaasumɔ ni otao mɛi ni yɔɔ niiashikpamɔ babaoo lɛ asɛɛ gbɛ ni obi amɛ ŋaawoi yɛ dɛhiɛmɔ woji lɛ kɛ nitsumɔ he yɛ nyɛ asafo lɛ shikpɔŋkuku lɛ mli. Wɔyɛ nɔkwɛmɔ nii babaoo yɛ Biblia lɛ mli ni tsɔɔ mɛi ni nine shɛ hewalɛwoo kɛ gbɛtsɔɔmɔ nɔ kɛjɛ mɛi ni edara yɛ hemɔkɛyeli lɛ mli lɛ aŋɔɔ.​—Bɔf. 18:​24-27; 1 Kor. 4:⁠17.

¹² Asafo Woloŋ Nikasemɔ nɔkwɛlɔ lɛ baanyɛ aye abua titri kɛtsɔ gbɛjianɔ ni eeeto koni mɛi krokomɛi aye abua bo ni okɛ dɛhiɛmɔ woji atsu nii jogbaŋŋ kɛmɔ shi lɛ nɔ. Sɔ ka fɔlɔi anɔ akɛ amɛye amɛbua amɛbii lɛ ni amɛya amɛhiɛ yɛ shiɛmɔ nitsumɔ lɛ mli. Odasefonyo gbekɛyoo fioo ko fɔlɔi tsɔɔ lɛ bɔ ni eeefee ekɛ Shihilɛ yɛ Toiŋjɔlɛ Jeŋ Hee Ko Mli dɛhiɛmɔ wolo lɛ aha. Beni efata enyɛ he kɛtee Biblia mli nikasemɔ ko feemɔ lɛ, ekɛ dɛhiɛmɔ wolo ha mɔ ni yɔɔ wiemɔ lɛ he miishɛɛ nɛɛ wu. Ewu lɛ na miishɛɛ waa akɛ gbekɛ fioo tamɔ nɛkɛ aaanyɛ ana Nyɔŋmɔ jamɔ saji anɔmimaa ni mli wa tamɔ nakai. Ena dɛhiɛmɔ wolo lɛ fɛɛ kanemɔ he miishɛɛ. Be fɛɛ be ni gbekɛyoo fioo nɛɛ kɛ enyɛ kuɔ amɛsɛɛ kɛyaa jɛmɛ lɛ, ekɛ nuu lɛ wieɔ ŋmalɛ loo Biblia mli sane ko ni eje gbɛ esaa kɛha lɛ lɛ he. Amrɔ nɛɛ nuu lɛ kaneɔ woji tɛtrɛbii lɛ daa, ni ena Kpojiemɔ Naagbee wolo lɛ he miishɛɛ, ni ebaa kpeei yɛ bei komɛi amli hu. Enɛ fɛɛ balɛ nakai ejaakɛ fɔlɔi lɛ he be ni amɛkɛtsu amɛgbɛnaa nii akɛ amɛtsɔɔ amɛbiyoo lɛ ni ekɛ dɛhiɛmɔ woji atsu nii jogbaŋŋ lɛ he nii.

¹³ Okɛ Wɔ Dɛhiɛmɔ Woji Heei Iɛ Atsu Nii Jogbaŋŋ Kɛmɔ Shi: Kɛ okɛ Ani Je Nɛɛ Baaya nɔ Ahi Shi? dɛhiɛmɔ wolo lɛ miitsu nii lɛ, obaanyɛ otsɔɔ mɔ ni oji, ni oje osanegbaa lɛ shishi akɛ: “Ojekoo. Wɔkɛ gbɔmɛi miisusu bɔ ni shihilɛ efee ŋmɛnɛ lɛ he. Ani osusuɔ akɛ bɔ ni shihilɛ efee ŋmɛnɛ lɛ baahi, aloo ebaaya nɔ efite fe bɔ ni eyɔɔ nɛɛ? [Ŋmɛɛ gbɛ ni eha hetoo.] Mɛi komɛi susuɔ akɛ nɔ ni yaa nɔ yɛ je lɛŋ ŋmɛnɛ lɛ woɔ Biblia gbalɛ obɔ, ni akɛ je lɛ naagbee ebɛŋkɛ kwraa. Te osusuɔ yɛ he tɛŋŋ?” Kɛ shiatsɛ lɛ jie naa lɛ, okɛ dɛhiɛmɔ wolo lɛ aha lɛ ni ogbala ejwɛŋmɔ kɛya sanebimɔi etɛ ni yɔɔ kuku ni ji enyɔ lɛ mli lɛ nɔ. No sɛɛ lɛ nyiɛmɔ bɔ ni ato saji anaa aha yɛ dɛhiɛmɔ wolo lɛ mli lɛ sɛɛ koni otsɔɔ lɛ bɔ ni jeŋ ko eba naagbee pɛŋ, kɛ bɔ ni enɛ hu baaba enaagbee lɛ. Kɛ osaramɔ lɛ miiba naagbee lɛ, too gbɛjianɔ oha saramɔ kroko koni nyɛkɛsusu Biblia odaseyeli ni tsɔɔ akɛ je lɛ naagbee ebɛŋkɛ lɛ he.

¹⁴ Bei pii ji be ni wɔnaa akɛ wɔyajeɔ shihilɛ ko mli ni be fioo pɛ wɔyɔɔ ni wɔbaanyɛ wɔkɛ mɛi krokomɛi awie Maŋtsɛyeli sane lɛ he, tamɔ ekolɛ yɛ nitsumɔ he loo skul nɛkɛ. Yɛ onitsumɔ he nɛkɛ lɛ, ekolɛ abaanyɛ awó nɔyeli he sane ni ba etsɛko tsɔ he sanegbaa nɔ. Obaanyɛ okpɛlɛ nɔ akɛ yɛ mɔdɛŋ ni maŋ hiɛnyiɛlɔi ni hiɛ jwɛŋmɔ kpakpa lɛ bɔɔ fɛɛ sɛɛ lɛ, je lɛ ena amanehulu aahu yɛ yinɔsane be fɛɛ mli. No sɛɛ lɛ, gbalamɔ jwɛŋmɔ kɛya Namɔ Diɛŋtsɛ Yeɔ Je lɛ Nɔ? dɛhiɛmɔ wolo lɛ baafa 2, kuku ni yɔɔ shishigbɛ kwraa lɛ nɔ. Kanemɔ sanebimɔi etɛ ni teeɔ niiahesusumɔ shi lɛ. Kɛji be bɛ kɛha sanegbaa kuku lɛ, okɛ dɛhiɛmɔ wolo lɛ aha mɔ lɛ loo mɛi lɛ, koni oto gbɛjianɔ ni nyɛsusu nɛkɛ sanebimɔi nɛɛ ahe be kroko loo yɛ he kroko.

¹⁵ Akɛ aŋkroaŋkroi kɛ wekui lɛ, nyɛŋɔa be ni nyɛkɛsusua bɔ ni nyɛaafee nyɛkɛ dɛhiɛmɔ woji sɔrɔtoi nɛɛ eko fɛɛ eko aha lɛ he. Nyɛtoa be ni nyɛkɛkaa nyɛkwɛa. Te nyɛaafee tɛŋŋ nyɛkɛ dɛhiɛmɔ woji lɛ afata woji krokomɛi ni akɛtsuɔ nii yɛ nyɔŋ lɛ mli lɛ he ni nyɛkɛha? Mɛɛ gbɛjianɔ oto yɛ wɔsɛɛ ni okɛ mɛi komɛi baakpe, ni no hewɔ lɛ obaanyɛ okɔlɔ dɛhiɛmɔ woji lɛ fioo komɛi kɛhiɛ odɛ? Ani okɛ mɔ ko baakpe yɛ otsi nɛɛ mli, ni nɛkɛ dɛhiɛmɔ woji nɛɛ amli saji ni eba yɛ ebe naa pɛpɛɛpɛ nɛɛ he aaanyɛ aba sɛɛnamɔ kɛha lɛ?

¹⁶ Suɔmɔ ni mli wa ni wɔyɔɔ wɔhaa Yehowa kɛ gbɔmɛi ahesusumɔ baakanya wɔ ni wɔfee nɔ fɛɛ nɔ ni wɔɔnyɛ ni wɔkɛha amɛnu sanekpakpa lɛ. Dɛhiɛmɔ woji ni wɔkɛaatsu nii daa lɛ baaye abua wɔ ni wɔfee nakai. Gbekɛnuu fioo ko ni eye afii kpawo, miisumɔ ni eye ebua yoo ko yɛ shia ni tsa amɛnɔ lɛ mli koni enyɛ eya gbɛjianɔtoo hee lɛ mli, no hewɔ lɛ eha lɛ dɛhiɛmɔ wolo, ni amɛje Biblia mli nikasemɔ shishi. Efeemɔ yɛ mlɛo! Shi ani wɔbuɔ gbɛ ni yɔɔ mlɛo nɛɛ kɛ nitsumɔ yɛ wɔsɔɔmɔ nitsumɔ lɛ mli? Be kroko ni wɔɔshi dɛhiɛmɔ wolo wɔha mɔ ko lɛ, ebaanyɛ etsa nɔ kɛtsɔ Biblia mli nikasemɔ. Kɛ wɔkɛ dɛhiɛmɔ woji lɛ tsu nii yɛ nilee mli ni wɔkɛshiɛ Maŋtsɛyeli lɛ he sanekpakpa lɛ, no lɛ eka shi faŋŋ akɛ wɔbaana sɛɛnamɔi kpakpai kɛjɛ mli.