Deŋdadei Ni He Hiaa Lɛ Kɛ Nitsumɔ Yɛ Nilee Mli
1 Beni oyeɔ odase kɛjɛɔ shinaa na yaa shinaa naa lɛ, esa akɛ oti ni ma ohiɛ lɛ afee akɛ okɛ shiatsɛ lɛ baaje ŋmalɛ mli sanegbaa ni tswaa mɔ emaa shi shishi kɛtsɔ Biblia lɛ kɛ dɛŋdadei krokomɛi ni he hiaa lɛ kɛ nitsumɔ nɔ. (Okɛto 2 Korintobii 6:1: 2 Timoteo 2:15 lɛ he.) Mɛni gbɔmɛi ni yɔɔ oshikpɔŋkuku mli lɛ fɔɔ he wiemɔ gbii etɛ nɛɛ? Ani shika gbɛfaŋ shihilɛ ni yɔɔ lɛ kɛ bɔ ni weku shihilɛ baa shi yɛ ehilɛ mli lɛ amɛ? Hiɛkpamɔ wiemɔ kuku ni wɔkɛaaje nɛkɛ saneyitsei enyɔ nɛɛ eko fee eko he sanegbaa shishi lɛ nyɛ atsɔ Biblia mli sanegbaa ni ŋɔɔ.
2 Obaanyɛ okɛɛ akɛ:
“Shihilɛ lɛ mli ewa waa eha mɛi; nɛkɛ jaramɔ be nɛɛ mli. Ani osusuɔ akɛ adesai anɔyelii baanyɛ ana wɔ shika gbɛfaŋ naagbai lɛ anaa tsabaa bɔ ni aaahi aha mɔ fɛɛ mɔ? [Bo hetooi ni ebaaha lɛ toi.] Mi diɛŋtsɛ mina akɛ nɛkɛ susumɔ nɛɛ woɔ mɔ hewalɛ waa . . . ”
3 No sɛɛ lɛ obaanyɛ okane Lala 72:12-14 lɛ koni ohala ŋmalɛi ni yɔɔ Reasoning wolo lɛ baafai 154-5 lɛ hu ateŋ ekome ofata he ni okɛmu osanegbaa lɛ naa. Aloo kɛji okane ŋmalɛ kome lɛ, obaanyɛ ogbala ejwɛŋmɔ kɛya kuku ko nɔ yɛ Shihilɛ Yɛ Toiŋjɔlɛ Jeŋ Hee Ko Mli dɛhiɛmɔ wolo lɛ mli. Shiɛlɔi pii—ni gbekɛbii fata he—miije Biblia nikasemɔ shishi yɛ dɛhiɛmɔ woji lɛ ekome mli kɛtsɔ kuku ko kanemɔ, kɛ agbɛnɛ shiatsɛ lɛ jwɛŋmɔ ni ebiɔ yɛ nɔ ni ekane lɛ he lɛ nɔ.
4 Yɛ akutsei komɛi amli lɛ, ekolɛ obaasumɔ ni otsɔ nɛkɛ gbɛ nɔ:
◼ “Mɛi pii baasumɔ ni amɛna akɛ aku sɛɛ akɛ blema weku mli jeŋbai kpakpai miitsu nii ekoŋŋ. Ani osusuɔ akɛ mɔ fɛɛ mɔ yɛ hegbɛ ni ekpɛɔ eyiŋ yɛ nɔ ni nɛkɛ jeŋbai kpakpai nɛɛ ji lɛ ahe, aloo ani esa akɛ afo tɛ kome afɔ shi aha mɔ fɛɛ mɔ? [Ŋmɛɛ gbɛ ni ejie naa.] Mɛi pii kpɛlɛɔ nɔ akɛ kɛ aaanyiɛ Biblia lɛ ŋaawoo ni nilee yɔɔ mli lɛ sɛɛ lɛ, ebaaha weku shihilɛ aya hiɛ jogbaŋŋ diɛŋtsɛ.”
5 Yɛ biɛ nɛɛ obaanyɛ otsĩ bɔfo lɛ wiemɔ ni yɔɔ Kolosebii 3:12-14 lɛ tã loo okɛ lɛ agba he sane po, aloo obɔ mɔdɛŋ ni oje shia Biblia mli nikasemɔ shishi yɛ ojɛmɛ yaa klɛŋklɛŋ nɛɛ mli kɛtsɔ otii ni yɔɔ yitso bibioo ni ji “Mɛɛ Gbɛ Haa mɔ Yeɔ Omanye?” yɛ Na Weku Shihilɛ Mli Ŋɔɔmɔ dɛhiɛmɔ wolo lɛ mli lɛ kɛ nitsumɔ nɔ.
6 Kɛ shiatsɛ Iɛ jie miishɛɛ kpo lɛ, tsɔɔmɔ lɛ sɛɛnamɔ ni yɔɔ Asafo lɛ woji ni hiɛ baafai 192 lɛ ateŋ nɔ ni akɛtsuɔ nii yɛ nyɔŋ lɛ nɔ lɛ he. Okɛ dɛŋdadei krokomɛi ni he hiaa lɛ atsu nii yɛ nilee mli kɛtsɔ oti ko ni sa, ni jɛ dɛhiɛmɔ wolo, wolo tɛtrɛɛ, aloo woji bibii lɛ eko mli, ni okɛ lɛ aaagba he sane lɛ nɔ.
7 Kɛ onyɛ oje nikasemɔ shishi yɛ ojɛmɛ yaa klɛŋklɛŋ lɛ, too gbɛjianɔ jogbaŋŋ koni nyɛtsa sanegbaa lɛ nɔ yɛ be kroko mli. Obaanyɛ oto gbɛjianɔ kɛha osaramɔ ni nyiɛ sɛɛ lɛ kɛtsɔ kɛɛmɔ ni oookɛɛ shiatsɛ lɛ akɛ kɛ oku osɛɛ lɛ, obaasumɔ ni okɛ lɛ asusu sane ni afɔɔ bimɔ nɛɛ hetoo he lɛ nɔ akɛ: “Mɛni hewɔ ni Nyɔŋmɔ eŋmɛ amanehulu gbɛ lɛ?” Sane ni yɔɔ shishi gbɛ lɛ baatsɔɔ bɔ ni aaafee agba saneyitso nɛɛ he sane yɛ sɛɛsaramɔ mli.