Too Gbɛjianɔ Yɛ Oklɛŋklɛŋ Saramɔ Lɛ Mli
1 Sɛɛsaramɔi feɔ mlɛo kɛ wɔtsɔ hiɛ wɔto gbɛjianɔ kɛha klɛŋklɛŋ saramɔ lɛ. Reasoning wolo lɛ baanyɛ aye abua wɔ ni wɔfee nakai.
2 Shiɛmɔ wiemɔ ni nyiɛ sɛɛ nɛɛ damɔ hiɛkpamɔ ni ji enyɔ ni yɔɔ Reasoning wolo lɛ baafa 10 lɛ nɔ, yɛ yitso ni ji “Bible/God” loo [Biblia kɛ Nyɔŋmɔ] shishi.
Beni okɛ miishɛɛ eŋa lɛ sɛɛ lɛ, kɛɛmɔ akɛ:
◼ “Wɔmiina akɛ ŋmɛnɛ, gbɔmɛi pii nuɔ he akɛ amɛleee bɔ ni amɛaafee ni amɛna amɛ daa gbi naagbai ni faa babaoo lɛ anaa tsabaa loo hetoo. Ani ona akɛ eji anɔkwale nakai? [Ha ewie.] Tsutsu lɛ gbɔmɛi taoɔ yelikɛbuamɔ kɛjɛɔ Biblia lɛ mli. Shi ŋmɛnɛ mɛi pii kɛɔ akɛ amɛyiŋ feɔ amɛ kɔshikɔshi. Te onuɔ he ohaa tɛŋŋ, yɛ Biblia lɛ he?” Kɛji akɛ shiatsɛ lɛ tsɔɔ akɛ eyiŋ feɔ lɛ kɔshikɔshi yɛ anɔkwale ni eji he lɛ, jiemɔ dɛhiɛmɔ wolo, Nɔ Hewɔ ni Obaanyɛ Okɛ Ohe Afɔ Biblia lɛ Nɔ lɛ, ni okane kukuji enyɔ kɛ etɛ ni yɔɔ baafa 2 lɛ. Kɛ shiatsɛ lɛ kpɛlɛɔ nɔ akɛ Biblia lɛ ji Nyɔŋmɔ Wiemɔ lɛ, kanemɔ ŋmalɛi ni atsɛ yɛ kuku enyɔ ni yɔɔ dɛhiɛmɔ wolo lɛ baafa 2 lɛ, ni okɛ lɛ asusu enɛ he kuku.
3 Kɛ mɛi pii yɛ oshikpɔŋkuku lɛ mli ni heee yeee lɛ, bɔɔ mɔdɛŋ ni okɛ hiɛkpamɔ wiemɔ ni ji enumɔ ni yɔɔ Reasoning wolo lɛ baafa 10 lɛ atsu nii ni okɛtee amɛmiishɛɛ shi.
Obaanyɛ okɛɛ akɛ:
◼ “Yɛ béi ni yaa nɔ yɛ je lɛŋ fɛɛ ŋmɛnɛ hewɔ lɛ, ewa kɛha gbɔmɛi anɔkwafoi pii akɛ amɛaahe Nyɔŋmɔ nɔ amɛye. Aloo kɛ amɛheɔ lɛ amɛyeɔ po lɛ, amɛheee amɛyeee akɛ ebaanyɛ etsu naagbai ni wɔkɛkpeɔ lɛ ahe nii. Te onuɔ he ohaa tɛŋŋ? [Ha ewie.] Kadimɔ nɔ ni dɛhiɛmɔ wolo nɛɛ kɛɔ yɛ gbɔmɛi, jeŋ nilee, kɛ Biblia lɛ he.” Kɛkɛ lɛ jee shishi ni okane kuku enumɔ lɛ ni yɔɔ dɛhiɛmɔ wolo, Nɔ Hewɔ ni Obaanyɛ Okɛ Ohe Afɔ Biblia Lɛ Nɔ lɛ baafa 3 lɛ.
4 Bi Saji Kɛjɛ Dɛhiɛmɔ Wolo lɛ Mli Kɛha Saramɔ Be Kroko: Too oklɛŋklɛŋ saramɔ lɛ he gbɛjianɔ akɛ sɛɛsaramɔi babaoo ni woɔ yibii ni baanyiɛ sɛɛ lɛ shishijee. Kaasusu akɛ ehe miihia ni obote nibii amli vii; ni kaafo lɛ kuku hu bɔ ni aaaha shiatsɛ lɛ anu he akɛ obɛ ehe miishɛɛ tsɔ ko. Beni okane dɛhiɛmɔ wolo lɛ mli kukuji enyɔ loo etɛ lɛ, bi sane ni nyɛbaanyɛ nyɛsusu he yɛ saramɔ be kroko mli.
5 Akɛ nɔkwɛmɔ nɔ lɛ, obaanyɛ ogbala jwɛŋmɔ kɛya kuku etɛ ni yɔɔ baafa 4 lɛ ni obi akɛ: “Ani osusuɔ akɛ Biblia lɛ kɛ odaseyelii babaoo haa ni aaaha ahe nɔ ni ekɛɔ yɛ wɔsɛɛ be he lɛ aye? Obaagbala jwɛŋmɔ kɛya enɛ nɔ yɛ sɛɛsaramɔ be lɛ mli, ni eeeha nyɛnyɛ nyɛsusu The Bible—God’s Word or Man’s lɛ yitsei 9 kɛ 10 he.
6 Kɛ shiatsɛ lɛ hiɛ sɔɔ saji ni enu lɛ, obaasumɔ ni okɛ God’s World wolo lɛ aha lɛ beni otee jɛmɛ klɛŋklɛŋ nɛɛ. Aloo kɛ shihilɛ lɛ sa lɛ, obaasumɔ ni okɛ New World Translation lɛ loo woji enyɔ lɛ fɛɛ aha lɛ.
7 Kɛ wɔsusu shiatsɛmɛi lɛ ateŋ mɔ fɛɛ mɔ he akɛ mɔ ni baanyɛ atsɔ kaselɔ lɛ, wɔbaabɔ mɔdɛŋ ni wɔkɛ wɔnaagbee wiemɔi lɛ atsu nii ni wɔkɛto gbɛjianɔ wɔha sɛɛsaramɔ.