Feemɔ Tswaa yɛ Osɔɔmɔ Nitsumɔ lɛ mli
1 Awieɔ akɛ sɔrɔto-feemɔ ni baa nibii ateŋ lɛ haa shihilɛ ŋɔɔ. Bei pii lɛ, bɔ ni ajeɔ sane ko he wiemɔ shihilɛ haa anaa he miishɛɛ. Eji anɔkwale yɛ wɔsɔɔmɔ nitsumɔ lɛ hu he. Kɛ wɔkwɛɛɛ jogbaŋŋ lɛ, no lɛ shiɛmɔ wiemɔi ni wɔkɛjeɔ sanegbaa shishi yɛ wɔ shia-kɛ-shia sɔɔmɔ lɛ mli lɛ baafee wiemɔ koome lɛ nɔŋŋ. Hiɛkpamɔ wiemɔ kome lɛ ni wɔɔti mli shii abɔ lɛ baanyɛ afee tɔlɛ kɛha wɔ diɛŋtsɛ kɛ shiatsɛmɛi lɛ hu. No hewɔ lɛ, feemɔ tswaa yɛ osɔɔmɔ nitsumɔ lɛ mli. Shi mɛɛ gbɛ nɔ oootsɔ ofee enɛ?
2 Yɛ nɔ najiaŋ ni oookɛɛ nɔ ko tamɔ. ‘Oje koo. Yehowa Odasefoi ji wɔ, ni wɔkɛ Maŋtsɛyeli lɛ he sanekpakpa lɛ miiha akutso nɛɛ mli bii fɛɛ’ lɛ, mɛni hewɔ osusuuu gbɛi ni oootsɔ nɔ otsake ohiɛkpamɔ wiemɔ lɛ mli lɛ he? Saji babaoo ni he yɔɔ sɛɛnamɔ ni kɔɔ hiɛkpamɔ wiemɔi ahe yɛ Reasoning wolo lɛ mli. Hiɛkpamɔ wiemɔi ni kɔɔ saji sɔrɔtoi 18 he yɛ ebaafai 9-15. Ni yɛ saji nɛɛ mli pii agbɛfaŋ lɛ, hiɛkpamɔ wiemɔi enyɔ, etɛ, loo nɔ ni fa fe nakai po yɛ ni obaanyɛ okɛtsu nii.
3 Kɛji okɛ “Ani Nyɔŋmɔ Susuɔ Wɔhe Lɛlɛŋ?” wolo bibioo lɛ miitsu nii lɛ, no lɛ ekolɛ nɛkɛ hiɛkpamɔ wiemɔ ni yɔɔ ‘Wala/Miishɛɛnamɔ’ shishi yɛ baafa 13 lɛ baanyɛ aye abua bo:
◼ “Wɔkɛ mɛi fɛɛ ni susuɔ bɔ ni shihilɛ lɛ efee ŋmɛnɛ lɛ he waa lɛ miigba sane. Mɛi pii biɔ akɛ; Ani abaanyɛ ana shihilɛ ko ni miishɛɛ yɔɔ mli lɛlɛŋ? Nɛkɛ wolo bibioo nɛɛ kɛ susumɔ ko ni woɔ mɔ hewalɛ ni ekanyaa niiahesusumɔ hu haa.” Gbelemɔ wolo lɛ baafa 25, ni okane oti kome loo enyɔ ko kɛjɛ kukuji 15 kɛ 16.
4 Maŋtsɛyeli shiɛlɔi komɛi—titri lɛ gbekɛbii kɛ mɛi heei, shi kɛ onukpai komɛi hu—ena akɛ abaanyɛ akɛ gbɛ kroko ni yɔɔ miishɛɛ atsu nii yɛ shinaai anaa kɛtsɔ dɛhiɛmɔ woji kɛ nitsumɔ nɔ.
Shiɛlɔ obalaŋta ko baanyɛ ekɛ “Na Weku Shihilɛ Mli Ŋɔɔmɔ” dɛhiɛmɔ wolo Iɛ atsu nii ni ekɛɛ akɛ:
◼ “Miyɛ shɛɛ sane kuku ko kɛha bo ni kɔɔ bɔ ni Nyɔŋmɔ baanyɛ aha wekui afee ekome yɛ miishɛɛ mli lɛ he. Masumɔ ni mikɛ dɛhiɛmɔ wolo nɛɛ aha bo, ni egbɛi ji Na Weku Shihilɛ Mli Ŋɔɔmɔ.” No sɛɛ lɛ shiɛlɔ onukpa ni kɛ gbekɛ lɛ tsuɔ nii lɛ baakpɛ eyiŋ kɛji eesumɔ ni ekɛ wiemɔ fioo ko atsa nɔ aha lɛ, shi enɛ baadamɔ bɔ ni shiatsɛ lɛ baahere nɔ aha lɛ nɔ.
5 Kɛ shiatsɛ Iɛ jie miishɛɛ kpo Iɛ, no lɛ shiɛlɔ onukpa lɛ baanyɛ akɛɛ akɛ:
◼ “Biblia lɛ kɛ gbɛtsɔɔmɔ haa yɛ gbɛhe kpakpa ni sa akɛ wu, ŋa, kɛ bii atsu he nii yɛ weku gbɛjianɔtoo lɛ mli lɛ he. Akɛni Nyɔŋmɔ ji weku lɛ Shishijelɔ hewɔ lɛ, ani okɛ wɔ kpaŋ gbee akɛ lɛ ji mɔ ni le bɔ ni sa akɛ weku lɛ atsu nii jogbaŋŋ eha, fe wɔteŋ mɔ fɛɛ mɔ? Masumɔ ni male bɔ ni osusuɔ yɛ ŋaawoo ni Biblia lɛ kɛhaa weku lɛ mli bii lɛ he.” No sɛɛ lɛ, kanemɔ Efesobii 5:22, 23, 28-31.
6 Kɛ okɛ Kpojiemɔ Naagbee wolo lɛ miiha lɛ, mɛni hewɔ omaaa wɔsɛɛ be he gbɛkpamɔ kpakpa ni atsɔɔ yɛ Kpojiemɔ 21:3,4 lɛ nɔ mi? No sɛɛ lɛ, kanemɔ kuku 7 yɛ wolo lɛ baafa 303. Bi shiatsɛ lɛ akɛ ani nilee yɛ mli akɛ aaahe aye akɛ Nyɔŋmɔ baaha nɛkɛ shiwoi nɛɛ aba mli lo. Biblia gbalɛi ni eba mli momo lɛ ahe sanegbaa kuku baawo shiatsɛ lɛ hekɛnɔfɔɔ ni eyɔɔ yɛ Nyɔŋmɔ nyɛmɔ ni ekɛaajɔɔ adesai aweku lɛ mli lɛ mli hewalɛ waa.
7 Maŋtsɛyeli jajelɔi fɛɛ miisumɔ ni amɛna teokrase nibii ahiɛyaa mli gbɛfaŋnɔ, ni amɛdũ anɔkwale dumɔwui lɛ yɛ hei ni eeehi, ni amɛha miishɛɛ ni ana lɛ aya hiɛ. Kɛ wɔtsu wɔgbɛfaŋ nɔ lɛ, wɔbaanyɛ wɔkɛ miishɛɛ ashi shweremɔ ni baaba wɔsɛɛ lɛ yɛ Yehowa dɛŋ. Wɔhiɛ sane kpakpa fe fɛɛ ni wɔkɛaaha wɔkuuŋbii. Kɛ wɔsaa wɔhe be fɛɛ be lɛ, wɔbaanyɛ wɔfee tswaa yɛ Maŋtsɛyeli sane lɛ kɛhamɔ mli, ni wɔkɛ sɛɛyoomɔ atsu nii yɛ wɔwoji lɛ kɛhamɔ mli.